Duteronomi 7:24 - Nobonob Baibel

²⁴ Nug geha danab amu, Nug king ahilkad diia, ag eppelagppa meeb, ag hadappeg nauhkkulag. Ag heppeg, king amu ag nauhna autnanab aon, ag wanppa deɗ laa ii daalob, am anambia daakku. Auntai laa ag, ag Israel eɗadkkulagnu elele iitta. Geha ag hadappeg, nauhna iitta mekkulag.

Duteronomi 7:24 Referans Kwoze

Josua 23:9

Amu Yawe Nug ahilagnu he, wanppan wan laala, ag ahilkad daup am ɠagattagnab ele, danab amu ag Israel ag lamadppig; wan imu oolagppanu amu, huu auntai laa, anukka, gemu ⌊nai imu yaak haenppa⌋ ele, ag ag lamadkkulagnu elele iitta laa ii dayom.

Josua 10:8

⌊Amge tatam⌋ Yawe Nug Josua amegppa aum. “Ag aib baɗadppig. Aɗinu? Da geha heppi, ag eɗadkkulag. Laippu laa ag Israel ban danab eɗadkkunu, laa iinab daama. Iittanab,” awa aum.

Duteronomi 11:25

Ag Nug oɗe dim lamidkkulag dayeb amu, ahilkad kekeɗ ag ag ii eɗadmana; kekeɗ ag geha oolna gokkulag. Ele amu Yawe, ahilag Kayak, Nug ahilkad kekeɗ dilagppa heeb, kekeɗ ag ahilagnu baɗak eheɗ nau dooglag. Nug amu hekkunu nai anan qakkom, amu aakku hekkunab. Nug ag wan madatte, ag wan amuppa adeppa adeppa oiglag amu, Nug amuppa anamnab aakku hekku.

Josua 10:42

Yawe, Israel dilag Kayak, Nug nuhikkud danab banppa ehanattom amunu, haen tutu laippu amuppaib, Josua nug king appanu eɗattowa, nug wan amu oh awom.

Josua 1:5

Josua, da haen oh na ele daagnih. Da Moses ele daamuɗ, amubia da na ele daagnih. Na wanppa bau daappe, haen amu ohppa laa nug na eɗidkkunu elele ii daama. Da na ii uuidpa. Da na ii paɗaidpa.

Duteronomi 9:14

Ag anam daatteb amunu, da geha heppi, danab ah imu ag iitta mena autna aoppeg, hab waappa amu, danab laa nug baula imu dilagnu dab-ii-memanu, na uuppe, da hei! Da anam hein, da heppi, na buɗunppan danab kuɗum daan, ag ɠagattag okkai ele daaglag. Na buɗunad ag danab ah imu gemu daatteb dilag ebqak eɗadna, ɠagattagnab, gemu daatteb dilag ɠagattag eɗattak daaglag,” awa aum.

Rom 8:37

Amge keeke amu oh ig eɗigkkulagnu am elele iitta. Iitta. Kristus Nug haen oh ihinignu oo mauhtte amunu, ig kobol nau amu oh eɗadta autta aotta aottem.

1 Korint 15:57

Amge ig Kayak amegppa, “Ena heme,” aot akkunig! Ihinig Naɗi Jesus Kristus, nuhig ɠagattagppa, Kayak Nug ɠagattag amu mekke, ig ban eɗidttem.

Sepanaia 1:4

Amu Yawe Nug inam atte. “Da danab ah Jerusalem daatteb, Juda danab laa oh ele bu okkai madakkul. Ao, da heppi, auntai laa nug kayak hambuppuak Bal noobppa dup noa binag mette, aria Bal dottog, nug noobppa dup noa binag mak hekkunu keeke oh ele amu, amunu keeke laa nakok laa ii daama. Da kayak hambuppuak dilag mana mettak danab aqappi mauhkkulag. Ao, da amu heppi, danab ah laa ag amu dilagnu baula ii dabmemana, ag daulagppa ele ii daama; ag wanppa ii daappig bia daakku.

Jeremaia 10:11

Ag Israel danab ah, ag wanppan wan anen anen ohppan danab ah inam appeg dooglag. “Kayak hambuppuak ag bappaladtteb, ag hab, wan ele ii heppig. Ag ii heppig, amu ag wanppanu qettoɗkkulag.”

Aisaia 54:17

Da amu oh hettem amunu, da ele heppi, daup ag bannu keeke aɗinab aɗan, ag Israel ele ban hekkulagnu amu, kekeɗ amu ag ag Israel ii eɗadmana. Amu danab ah ag Israel, ahilagnu aɗi hambuppuak nai eheɗ akkulag amu, ag Israel, ag nai amu tabappeg nekku. Ag danab ah, ag da, Yawe, ag dahilad maɗi nid maɗi ah ele daatteb amu, dahil ehanittak amuam ag aulag bia daakkunu madattem. Ao, ag da, Yawe, ag dahilad maɗi nid maɗi ah ele daatteb amu, ehanittak da ag madattem amu, amuppa da hei, tutukku hak ahilag aakku miag atitte.” Yawe Nug anam atte.

Prowerb 10:7

Genab tutukku hak danab nug mauhkku amu, dimppa laa ag nug onigppa laa itittak ena medakku; amge nau hak danab mauheb, amu dimugppa, nug onig am beɗakku.

Sam 9:5

Na wanppanu wan anen anennu danab ah ag daulag batan, na nau hak danab hattai nauhppig. Ao, danab ah ag geha baula danab ah amu, ag ahilagnu ii dabmemana.

Duteronomi 29:20

Yawe Nug danab ah anamnu amu ena ii doyatta, ahilag hipunin iinab uhuqa mattama. Nug ahilagnu oppoɗi bak, oo aeg bak ele bekku. Eheɗ laa awaknu anak waappa dayaknu nai oh buk imuppa yaak daatteb amu, amu oh ahilagppa neeb, Yawe Nug geha heeb, danab ah amu ag iitta mena autna aoppeg, hab waappa amu, danab laa nug danab ah amu dilagnu baula dab-ii-mema.

Duteronomi 25:19

Ag anam heppig amunu, haen Yawe, ahilag Kayak, haen Nug heeb, ag hik aon ena daaglagnu, wan Nug ag aulag daakkunu madatte, ag amuppa daanna amu, haen amuppa ag banelag gona, Amalek danab ah ag iitta mena autna aoppeg, hab waappa, danab laa nug baula ahilagnu dab-ii-memanu heig! Ag amu hekkulagnu aib daulag atiom.

Eksodas 17:14

Moses, Israel ele ag anam heeg, dimppa Yawe Nug Moses amegppa inam aum. “Dabmak imu iitta memanu amu, na nai imu buk itoɗiakppa yaan, na heppe, Josua nug doyaɗ! Aɗinu? Da geha heppi, Amalek ag iitta mena autna aoppeg, hab waappa amu, danab laa nug Amalek dilagnu baula dab-ii-mema.” Yawe Nug anam aum.

Duteronomi 9:3

Amge ag imu tutukku doyeg! Yawe, ahilag Kayak, Nugib geha ag noolag awa, Jodan le mataɗa ukka, aab aɗu gakkaɗak naunab keeke he nauhtte, amubia Nug heeb, danab amu ag padal mekkulag. Nug geha heeb, danab amu ag, ag Israel noolagppa ahilag ɠagattag bodoetteb daaglag. Amunu Yawe Nug hekkununab nai anan qakkom bia, Nug heeb, ag Israel ag wana laippun kekeɗ lamadppeg, ag padal mekkulag.

Josua 6:2

Amge Yawe Nug Josua amegppa aum. “Antte! Da Jeriko, nuhig king, nuhig ban danab ɠagattag ele oh na eppenppa aakku mettem.

Josua 10:23

Nug anam a, ag king tanig ele amu wan oɗeppanu diippig. King amu ag, Jerusalemnu, Hebronnu, Jarmutnu, Lakisnu, amu Eklonnu king ele.

Josua 10:40

Anam daye, Josua nug aakku wan atu amu oh nug awom. King amu, danab ah ele Israel ag eɗadppig, ag ahilag wanppa daappig, wan atu amuam Negeb, wan qauko qauko ele, qauko nakok qauko okkai diigppa daatteb, qauko nakok amuam Kanan wan ooppa qaban uɗitteppanu daatteb, amu qauko okkai heqoppan ele. Nug he, wan amuppan danab ah oh am Yawenuib nuhig pelemppa daappig. Nug laippu laa uue, ii dayom. Yawe, Israel dilag Kayak, Nug anam hekkununab aum amunu, nug heum.

Josua 11:17

Israel wan tom gemu am Helak qauko, Seir guguittak, appanu ukka Balgat waum. Amuam qauko Hermon guguittak. Balgat am Lebanonnu atu oolnu noakppa daatte. Josua nug wan amuppanu king oh eɗatta, aɗalatta aqom.

Josua 12:24

Amu Tirsa dilag king ele. Amu oh am king ebqak 31. Ag king amu eɗadna, amu ag ahilkad aab oh ele diippig.

Josua 21:44

Amu Yawe Nug he, Israel dilag kekeɗ ag nakok laa heeg, Israel ag ii baɗadna, ag maɗoɗ, ena daappig. Yawe Nug ag mamelkad aɗi amelagppa Nug anamnab hekkunu nuhig nai ɠagattag qetta aum amu, Nug amu bianab heum. Yawe Nug Israel ehanattom amunu, ahilkad kekeɗ laa ag Israel ele ban hena, eɗadkkulagnu elele iitta daappig.

Josua 23:3

Yawe, ahilag Kayak, Nug ahilagnu dabmak anuqak awa, Nug diig amunu aɗi aɗi wanppan wan laalappan danab ah dilagppa heum amu, ag amu oh anidppig. Amu beum anidppignu diig am, Yawe, ahilag Kayak, Nugnab, Nug ag ehanadkkunu, Nug ahilkad kekeɗ dilagppa ban heum.