Duteronomi 33:7 - Nobonob Baibel

⁷ Moses nug amu awowa, nug imu Israel dilag huu okkai Judanu aum. “O Yawe, na Juda danab ah dilag unuqittak doon, ⌊ag kekeɗ ahilkad ele nug qeppeg amu,⌋ na eɗun diippe, ahilkad danab ah dilagppa uɗiglagnu oɗ medattem. Na ehanadna, ɠagattag madakkutnu oɗ medattem. Ge! Na ag ahilkad kekeɗ eppelagppa daamnanu ehanadkkutnu unuqidttem,” awa aum.

Duteronomi 33:7 Referans Kwoze

Hibru 7:14

Amu ig doot autta aottem. Ihinig Naɗi, Nug Juda buɗubppa doum. Amu Moses nug buɗub amuppanu mana mettak danab laa bekkunu amu, nug laa ii aum.

1 Korint 15:25

Amunu diig am, Kristus Nug keeke ohnu gumak danab dayebeb ukkeb, Kayak heeb, Kristus Nug nuhikkud kekeɗ oh tabatteb, ag nug baeg waappa wakkulagoitte.

Luk 19:27

King nug anam ana, nug nai tuɗitta aum. ‘Aria laa ag da kekeɗ meɗan, da ahilag king daakkulnu uuppig amu, ag diin, da noolppa ippa dona, aqappeg mauheg!’ awa aum.” Jesus anam aum.

Aisaia 9:17

⌊Ikki danab aɗi ag anam hetteb,⌋ diig amunu ⌊Israel danab ah oh⌋ ag Kayaknu, nuhig haknu ele uuak doon, ag nau hak kobol henana, nai uɗig wak ele oɗelagppa anan oitteb. Anam amunu, Naɗi Nug Israel dilag nid bau dilagnu gamag ahak laa ii dootte. Diig amunu Nug ah qab, amu nid ag mamelkad mauhppig ele, Nug amu dilagnu ele oo ii madatte. Anam, amge Naɗi Nug nuhig oo nauhak amu iinab bodoettama. Iitta! Nug ⌊bu tuɗitta madakkunu⌋ eppeg huma daakku.

Sam 146:5

Amu danab aun nug Jakopnu Kayak eppegppanu ehanittak aotte amu, nug itittak ena awom daatte. Ao, aun nug Yawe, nuhig Kayak, nug Nug eppegppanu ehanittak awa, gogppa tekkunu ameg mette ele amu, nug itittak ena awom daatte!

Sam 21:8

⌊O Yawe,⌋ na geha nahip kekeɗ aɗualadkkut. Ao, na eppen naɗiap ɠagattag am geha, laa ag nahipnu nau ninig ele dootteb amu aɗualadkku.

Sam 20:2

Yawe Nug nuhig mettid lakkanu na ehanidkkunu oonig daatte. Yo, Nug ɠagattag, nuhig mettid lakka Sion appanu medakkunu oonig daatte.

Maika 5:2

Amu Yawe Nug atte. “Amge ag danab ah Betlehem Eprata daatteb, ag Juda wanppan aab ikki laa oh oolagppa aab ikki nakoknab daatteb, amge dimppa laa Nug ag oolagppanu, Nug Israel dilag okkai danab dayaya, gumak uɗat amu ha meɗakkunu bekku. Laa amu hekku, Nug mamekkud huu am tumaiib ii digmeppig; iitta, Nug mamekkud am anukkanab digmeeg uɗie uɗie, gemu ele daatteb. Nug huu amuppa bekku.” Yawe Nug anam atte.

Sam 78:70

Naɗi Nug nuhig maɗi nid Dawit epeɗiom. Yo, Nug sipsip aɗppanu onigppa eum.

Sam 78:68

Nug Israel dilag huu okkai amu ii tituanom. Iitta. Nug Israel dilag huu okkai Juda epeɗiom. Nug qauko Sion, ⌊qauko amuam Juda wanppa daatte,⌋ Nug qauko amunu oo mauhtte amu, Nug qauko amu tituanom.

Sam 21:1

O Yawe, king nug nahip ɠagattagnu gamag ahak okkai dootte! Yo, na nug ehanidttem amunu, nug gamag ahak ele ette.

1 Stori 12:22

Amu danab anam anam deɗ oh bia Dawit ehanidkkulagnu uɗippig amunu, Dawitnu daup am huanaknab daappig. Ahilag ebqak am Kayaknu daup dilag ebqak, amubia.

2 Samuel 5:24

Amge na gona, atu ad amu eleppa tewona, ad balsam amu gogppa oqotti laa, oqotti amuam ban danab ag laippuppa tappa ukkak oitteb oqotti bia, na oqotti amu doon, na da, Yawe, da na noomppa Pilistia aqadkkulnu gottem ippunidtte dookkut amunu, na amu doon, na paha ahan, Pilistia danab aqadkkutnu ukke!” awa aum.

2 Samuel 5:19

Ag anam daappig amunu, Dawit nug Yawe oɗ mettom. “Da Pilistia banelag tekkul am enate? Da banelag teppi amu, na ag da eppelppa maadkkutte?” awa oɗ mettom. Dawit nug Yawe anam oɗ mette, Nug nob ma aum. “Da Pilistia na eppenppa maadkkul amunu, na te!” awa aum.

2 Samuel 5:1

Amu dimppa amu, Israel dilag huu okkaippan danab oh ag Dawit gumidna, Hebron uɗippig. Ag uɗin appig. “Ig na ele ig oh tiinig laippu.

2 Samuel 3:1

Amu haen elab danab Saul bekka dim lamidppig, amu danab ag Dawit dim lamidppig ele ag ban henan daappig. Amu Dawit, nuhikkud danab ele ag ɠagattag okkai mena daaegeg, danab ag Saul bekka dim lamidppig amu, ag nauhegeg ukke, gai-iitta bia daappig.

Malakai 3:1

Yawe Nukka Ɠagattag Oh Ele Nug atte. “Antte! Da heppi, dahil nai awa ukkak danab laa nug ukka, dahil ib da nool awa bappaidkku. Nug anam heeb amu, da Naɗi, ag da aniɗkkulagnu mattiɗtteb amu, da pahanab da laulppa uɗikkul. Ao da, da am nug tituana nai qakkak nainu Okkai daattem, ag dahil uɗiaknu oolag huana hette ele amu, antteg! Da uɗikkul.” Yawe Nukka Ɠagattag Oh Ele Nug anam awa atte.

Namba 34:19

Israel dilag huu okkai anen anenppanu danab otiadkkulag ele onilag amu iikku. Kalep, nug am Jepune bekka. Nug am Israel dilag huu okkai Judanu.

Josua 15:20

Wan ag aulag daakkunu Josua, nuhig ehanittak ele ag Israel dilag huu okkai Juda baekkudppa madappig amu, imuam wan amunu aab anen anen, ag aoppig.

Sam 89:24

Dahil oo metta ii uuak kobol, amu oo mauhaknab kobol dahil ele, amu oh am nug ele daakku. Da nug ehanidppi, nug king ba, nug ɠagattagnab daakku.