Duteronomi 32:18 - Nobonob Baibel

¹⁸ Israel danab ah ag laa Nug hanhan ɠagattag daatte, Nug ag mamelag beum daatte ele amu, ag nuhignu dup noa binag mak kobol ii heppig. Ao, ah ag nid menuadtteb bia, Kayak Nug he, ag huu laippu beppig daatteb, amge ag nuhignu daulag atiom.

Duteronomi 32:18 Referans Kwoze

Aisaia 17:10

Aɗinu? Ag ⌊Juda, ag⌋ Kayak ahilag, Nug ag ehanatte, ag padal ii metteb ele amu, ag Nug daulag atiom. Ao, ag ahilag Kayak, Nug kekeɗ aqamanu ehanattak ahilag, Nug am aab aɗ ɠagattagnab ele ahilag bia daatte amu, ag Nug dab-ii-metteb. Anam amunu, ag muɗi grep ena ena aon eppaglagtai. Ao, ag grep aben laihnu aon eppaglagtai. Ag buttua eppelagppa eppan heppeg, qaɗu buttua amuppaib belo. Ao, deɗ amuppa buttua ag eppan heppeg, haɗag ele qelo. Ag anam heppeg belo, amge meu awak haenppa keeke amu oh am keeke hamu. Ag grep meu laa ii aomna. Iitta. Ag meu diig aɗit laa, meu amuam oɗe digdig, amu guittak ii bodoedatte ele, ag meu amu aakkuib aoglag.

Jeremaia 2:32

Ah laa nug nuhig ewau matulak awaknu bala daug ii atitte. Ao, ah nug ewau matulak awak haenppa aɗi bala meum am dabmette, daug ii atitte. Nug anam hette, amge ag Israel ag dahilnu haen elabnab daulag atie, dahilnu nakok laa ii dabmeppig.

Sam 106:21

Ag Kayak, Nug ehanatte, ag padal ii meppig ele, ag nuhignu daulag atiom. Ao, ⌊ag ehanadkkunu⌋ Nug keeke okkai okkai Isip appa heum, amge ag nuhignu daulag atiom.

Duteronomi 32:4

Nug am hanhan ɠagattag daatte; nuhig uɗat am qa oppiaawak ele. Keeke oh Nug hette amu, Nug nai doya mala hettoɗia epeɗia elele mettak kobol dim lamitta hette. Kayak Nug diig nuhignu oo metta ii uuak kobol dim lamittatta, Nug eheɗ laa ii hette. Nug tutukkuib daatte, Nug nai doya mala hettoɗia epeɗia elele mettak ibuppa hanhan daatte.

Hosea 8:14

Da, Yawe, da Israel danab ah hattami, amge ag dahilnu daulag atie, ag king laulkad okkai okkai buualadppig daatteb. Juda danab ah ag ⌊kekeɗnu baɗan,⌋ ag aab kuɗumppa aɗ keeke heppig. Ag anam heppig, amge da heppi, aab dittia, ahilkad aab okkai, amu ahilkad aab okkai aɗ ɠagattagnab ele eokku.” Yawe Nug anam awa atte.

Sam 9:17

Am nau hak danab ag Kayak ele ii daamna. Iitta! Ag mamak abenppa daaglag. Ao, wan imuppan wan ohppan danab ah ag Kayaknu daulag atitte ele amu, ag ahilagppa anam bekku.

Duteronomi 32:15

Amge Israel danab ah ag titiɗak huana hena, ag Kayak oɗe tappaeg neum. Yo, ag ee huana lanana, titiɗna daappig. Ag amu hena, ag laa ag hattom ele am uuppig. Ao, ag laa, Nug hanhan ɠagattag daatte, Nug ag ehanatte ag padal ii metteb ele amu, ag Nug guhuɗidppig.

Duteronomi 8:19

Amge am inam daakku. Ag Yawe, ahilag Kayak, ag Nug daulag atieb, ag kayak laa dim lamadna, ag noolagppa dup noa binag mak kobol hekkulag dayeb amu, da genab ag amelagppa attem, geha ag padal mena, iitta mekkulag.

Duteronomi 8:14

geha, haen ag keeke amu oh ele, ag oolagppa dada danab bena, Yawe, ahilag Kayak, ag Nug daulag atimanu dabmeig! Nug ag Isipnu diia, omalatte uɗippig. Ao, ag wan laappa begbeg maɗi nid daaegeg, Nug amuppanu diiom.

Duteronomi 8:11

Haen ag keeke ena amu oh ele daan amu, ag Yawe, ahilag Kayak, ag Nug daulag atieb, ag aakku nuhig haknunab anak, nuhig ɗo ele dimettan, ii dim lamidmananu dabmeig! Da gemu ag ɗo amu oh madattem.

Duteronomi 6:12

ag Yawe daulag atimanu dabmeig! Nug ag Isip, ag appa begbeg maɗi nid daaegeg, Nug appanu diia, omalatte uɗippig.

Jeremaia 3:21

Qauko ikkilkadppa qanak baag laa doyeg! Baag amuam Israel danab ah ag kobol eheɗ dim lamidna, kaliak henana, ag Yawe, ahilag Kayak daulag atiom dootteb amunu, ag gaanna, Nug oo doyakppa unuqidtteb.

1 Samuel 12:9

Amge ag Yawe, ahilag Kayak, ag Nug daulag atie, Yawe Nug he, Hasor dilag ban daup ikki Sisera, nuhikkud daup ele, amu Pilistia dilag daup, amu Moap dilag king, nuhikkud daup ele, ag oh haen anen anen uɗin, Israel ele ban henana, ag Israel eɗadppig.

Sam 18:2

Yawe Nug kekeɗ niɗamanu ehanittak dahil daatte; Nug aab aɗ ɠagattagnab dahil bia ele daatte. Nug ehanitte qagaiettakppa ii dayaknu ehanittak dahil daatte; Kayak dahil Nug kekeɗ niɗamanu ehanittak dahil dayeye, da nuhigppa ukken, padal mak eɗitten ena daattem. Kayak Nug am dahil guppiɗ, da nuhig ɠagattagppa da kekeɗ eppelagppa ii daattem; Nug am ban haknu aben ɠagattag dahil bia daatte.

Aisaia 27:11

eppeg qaɗaiedappeg, ah ag uɗin, qiin aon gona, aab ilaglag. Aɗinu ⌊uug amu Israel dilagppa bekku⌋? Israel danab ah ag diignu doyak tutukku am iitta ele. ⌊Ag Yawe uun oitteb.⌋ Anam amunu, laa Nug ag hattom ele, Nug ahilagnu oo ii mattama. Ao, laa Nug ag daaglagnu hattom amu, Nug ahilagnu ena ii doya, keeke ena ii mattama. Iitta.

Jeremaia 2:31

Amu ag Israel ag gemu daatteb, ag dahil nai imu doon dabmetteg! Atu taɗakppa, danab nug appa ehanittak keeke nakok laa aokkunu elele iitta, da ahilagnu anam daamite? Ao, atu laa, gatatu manak ele, appa keeke kuɗum danab heppeg nauhkkunu daatteb amu, da ahilagppa anam laa daamite? Da amubia laa ii daami amunu, aɗinu ag, ‘Ig Yawe uut, Nug baula ii dim lamidmata,’ atteb?

Esekiel 22:12

Ag Jerusalem danab ah, ag oolagppan laa ag laa men doɗo mattaeg, ag laa aqaeg mauhtteb. Ag Jerusalem danab ah, ag lailkad lon mattan, ag lonnu intres digdig aotteb. Ge, ag gane medappig, amu eɗittak laa eɗun aotteb. Ag Jerusalem danab ah, ag mudippan laippu ele keeke lokkumakppa awaknu duttuna hak kobolppa ag eppelagppanu men doɗo keeke aotteb; amuppa ag keeke ii aolob aotteb. Ge, ag Jerusalem danab ah, ag dahilnu daulag atiom oitteb.’ ” Naɗi Yawe Nug anam atte.