Duteronomi 26:10 - Nobonob Baibel

¹⁰ Amunu, O Yawe, gemu da ee tatam oɗutte wan na da meɗameppanu aomi amu, da na medakkulnu uɗimi.” Na anam Kayak noobppa daanna akkut. Na amu oh awona, na kaleg amu, keeke ele Yawe, nahip Kayak, na Nug noobppa uuppe dayebeb, na Yawe noobppa dup nona binag mekkut.

Duteronomi 26:10 Referans Kwoze

Revelesen 22:9

amge nug da amelppa aum. “Na anam aib heme! Da am Kayaknu maɗi nid, na, na laipad propet danab, amu aun laa oh ag buk imuppanu nai dim lamidtteb ele, ag nuhig maɗi nid daatteb, amubia. Na Kayak aakkuib Nug noobppa dup nona binag me!” awa aum.

1 Korint 10:31

Amge ag ee le ele lakkulag, o keeke laa hekkulag amu ag keeke amu ohppa ag Kayak binag amahlak oppiaawak ele mekkulagnu aakkuib dabmenan heig!

Rom 2:1

Amunu, na danab aun, na laipad epeɗiadna, eheɗ heppignu nob nau aoglagnu attem ele amu, na am attemun? Na ele eheɗ amu hettem amunu, na Kayak noobppa, “Da hemi amuam da beɗulppa iitta,” akkutnu elele iittanab. Na laipad epeɗiadna, ag eheɗ hena, nob nau aoglagnu attem, haen amuppa na ele eheɗ nahipnu nob nau aokkutnu, na nakka nai beɗunppa iite yaattem?

Aisaia 66:23

Am inam bekku. Kalam baunu qagmak gamag ahak ele anen anen ohppa, amu Sabat deɗ anen anen ohppa amu, danab ah wanppanu wan ohppanu ag uɗin, da noolppa dup nokkulag.

Prowerb 3:9

Am na en nahip-ppanu laih aon, Yawe binag medakkutnu Nug mette! Ao, ee nahip tatam oɗueb amu, na ee meu tatamnu amu aona, Yawe eppegppa me!

Sam 95:6

Yawe Nug am ihinig Kayak amunu, doppeg ig Nug noobppa dup nota binag metu! Ao, ig laa Nug ig heikkom ele, ig Nug noobppa gota, gatenig qaun okkunig. Nug danab ag sipsip elelenab gumadtteb, amubia Nug ig danab ah gumigtte. Ao, ig sipsip gikkiɗah aon latteb, amubia ig ee keeke aottem amu, Nugib ig megatte. Ag gemu Kayak Nug nai inam atte amu, ag daulag human doyeg!

Sam 86:9

Naɗi, na danab ah wan ohppan hattame, ag uɗin, na noomppa dup nona binan mekkulag. Ao, ag na onin am binag amahlak oppiaawak ele mettaglag.

Sam 22:29

Dada hak danab ah ag Nug noobppa dup nokkulag. Yo, aun aɗi ag bau daan mauhtteb, ag Nug noobppa dup nokkulag.

Sam 22:27

Wan oh geha Yawe doona, Nug dim lamidkkulag. Yo, danab ah wan ohppan ag Nug noobppa dup nokkulag.

1 Stori 29:14

Amge da am aun? Dahilad danab ah ele ag am aun? Ig am aun amunu, ig keeke okkai imu oo qak iitta na mettagnignu elele? Aɗinu? Keeke oh am na eppenppanu uɗitte, amu ig keeke mettamut ele, ig keeke amu tatam na eppenppanu aot, eɗut mettamut.

Duteronomi 26:17

Gemu ag Yawe Nug ahilag Kayak daatte anan malappig. Ag nuhig kobolppa oinna, ag nuhig ɗo iɗu iɗu, nuhig haknunab anak, nuhig ɗo laa ele dim lamidna, ag Nug keeke ohnu atte amu, ag anam hekkulagnu ele appig.

Duteronomi 26:4

Na anam appe, mana mettak danab nug battam ee ele amu eppenppanu awa, qaɗabppa Yawe, ahilag Kayak, Nug noobppa mekku.

Duteronomi 26:2

na aun, na ee tatam oɗuttenu laala, ee amuam wan Yawe, ahilag Kayak, madakkunu hette, amuppan awak amu, na ee amu aon, kalegppa inan aon, Yawe, ahilag Kayak, Nug aben Nug onig aguppa daakkunu epeɗikku amu, na amuppa ukke!

Duteronomi 18:4

Ag ee tatam oɗuttenu, keeke laala tatamnu ele amu, ag mana mettak danab ahilag daakkunu mattaglag. Amuam ee aeg, wain bau, olip goɗen bau, amu sipsip tatamnu uɗig otaɗak ele.

Eksodas 22:29

Ag keeke ebappeg, da heppi, meu okku amu, ag keeke ebappignu meu, wain, olip goɗen ele amu, ag amunu maha ofa daakkunu da meɗaglagnu aib uuppig. Ag uug doon, oolag uug ele da nakok nakokib meɗaglagnu am aib. Ag oo gamag ahak ele, elele meɗaglagnu meɗeg! ⌊Pasowa ebqak 1 haenppa da ag amelagppa amibia amu,⌋ buɗub buɗub doobob, ag ahilkad nid danab tatamnu da meɗeg!

Eksodas 23:19

Ag ee tatam oɗutte ele, ag ee amunu laih enanag aon, da Yawe, ahilag Kayak, ag ee amu aon, da laulppa uɗieg! Ag meeme nag, anignu huhppa aib badippig.

Duteronomi 8:18

Amge ag Yawe, ahilag Kayak, ag Nug dabmetteg! Aɗinu? Nugib ag ɠagattag matte, ag enulag ele daatteb. Nug ag mamelkad aɗi amelagppa nuhig nai ɠagattag qetta ana, Nug ag ele nug tituanna nai qagappig amu, nai amu elele medakkunu hette.

Prowerb 10:22

Yawenu itittak ena he, danab nug elelenab daatte; amuppa uug laa ii daatte.