Duteronomi 24:14 - Nobonob Baibel

¹⁴ Am laa nug uɗat nid daatte me, nug am daɗek, na danab anam am aib eheɗ hettame. Nug am Israel tedte, o nug am wan laihnu danab nug uɗia, ag oolagppa aab laappa daattetai, na aib eheɗ hettame.

Duteronomi 24:14 Referans Kwoze

Malakai 3:5

Amu Yawe Nukka Ɠagattag Oh Ele Nug atte. “Haen amuppa da ag hettoɗiakppa maadkkul. Da danab ag onig awak heppig, danab wau uuitta ah laa ele oipiɗ, laa hambuppunna, nai hambuppuaknu, da dahil nai ɠagattag qein, nai amuam genab attem, appig ele amu, da ahilag kobol nau amunu paha mattien, naippa yaaladkkulnu daakkul. Laa ag ahilkad uɗat nid daden elele ii madappig, laa ag ah qab, gamulkad mauhppig, amu nid anilkad mamelkad mauhppig ele eheɗ hadappig, amu laa ag wan laihnu danab ag uɗin, ag oolagppa daaegeg, ag ahilagnu nai doya mala hettoɗia epeɗia elele mettak kobol ii dim lamidppig amu, da ahilag kobol nau amunu paha mattien, naippa yaaladkkulnu daakkul. Danab ah nau amu hetteb ele amu, ag dahilnu ebehilag oh bodoetta le ii mette amunu, da anam hekkul.” Yawe Nukka Ɠagattag Oh Ele Nug anam atte.

Prowerb 14:31

Danab nug daɗek dilag eheɗ hadatte amu, nug laa Nug nug heum ele, nug nuhignu, “Keeke hamunab,” aakku dootte; amge aun nug daɗek ehanadtte, nug kobol amuppa Kayak binag mette.

Prowerb 22:16

Laa nug en okkai aokkunu daɗek danab duttunatte, ag nuhig uɗat o hamu bia hetteb, o laa nug enub danab ag nuhignu oolag hekkunu keeke ahilag daakkunu madatte amu; aɗit amu oh aa goya, daɗek daaglah.

Amos 4:1

Amu Yawe Nug atte. “Samaria ah, ag nai imu doyeg! Ag amu, ag makau, Basan appa ⌊gikkiɗah enaib lanana, beɗulag enaib daatteb,⌋ ag amubia daatteb. Ag daɗek danab ah eheɗ hattanna, ag laa keeke iitta ele am hatteg nauhtteb. Ag amu henana, ag ahilkad danab amelagppa, ‘Le ɠagattag aon doppeg latu!’ aon atteb.

Luk 10:7

Ag lag laippu humadppig ele, amuppaib daanna, lanaknu keeke, ee le ele madappeg laig! Aɗinu? Uɗat nid nug nuhig uɗatnu nob aokkun daatte. Ag lag laala ohppa aib gona daappig.

Amos 2:7

Israel ag daɗek danab ah dilagnu keeke hamunab, gappud bia doon, uug nau madatteb. Ge, ag laa ag danab okkai eppelagppa eheɗ hattak aotteb ele, ag amu dilag hettoɗiak abenppa nai doya mala hettoɗia epeɗia elele mettak kobol ii dim lamidtteb. Israel laa, nug bekka ele aa oh nid ahin laippu ele oitteb; kobol amuppa ag da onil, oppiaawak daatte, ag heeg, da onil laa dilag neekkakppa hamu bia daatte.

Amos 8:4

Israel danab ah, ag laa keekenu tutu mak daatteb ele, ag ag eheɗ hattaeg nauhtteb amu, ag imu doyeg! Ao, ag Israel danab ah, ag daɗek danab ah dilagppa eheɗ hattaeg, ag wanppa ii daatteb amu, ag doyeg!

Esekiel 22:7

Jerusalem danab ah, ag oolagppan laa ag mamelkad anilkad dilagnu, “Keeke hamunab,” dootteb. Ag oolagppan laa ag wan laihnu danab eheɗ hadatteb, amu laa ag ag nid mamelkad iitta ele eheɗ hattana, ag ah qab ele eheɗ hadatteb.

1 Timoti 5:18

Amuam Kayak nai atte amubia. “Na makau okkai ebehi ele ee aeg, dappunkkeg ele piɗe piɗe daaglagnu uɗat haaha, ee laabob, na aib lanak uukkunu oɗe hautna qakkame.” Laa ele, “Uɗat nid nug nuhig uɗatnu nob aokkun daatte.”

Lewitikas 19:13

Ag aib lokkumak kobol eheɗppa ahilkad mudippan laippu, ahilkad keeke aoppig. Ahilag keeke ele aib yab aoppig. Ag haen oh ahilkad uɗat nid ag uɗat heppignu nob, daden ⌊elele⌋ haenppa matteg!

Duteronomi 15:7

Amge qinob ag wan aon malan, daɗek danab ah laa aab, Yawe, ahilag Kayak, wan madatte, amuppa daaglag dayeb amu, ag akka ahilagnuib dabmena, daɗek amu ii ehanidmananu aib dabmeppig.