Duteronomi 16:19 - Nobonob Baibel

¹⁹ Epeɗiak danab ag heppeg, nai doya mala hettoɗia epeɗia elele mettak kobol am kaliak aib dayom. Ag hettoɗiakppa laanu hamu ena hettana, laanu hamu, eheɗ aib heppig. Ag lokkumakppa eheɗ haknu ehanittak aib aoppig. Aɗinu? Kobol anam, amuam he, danab doyak dabmak ena ele dilag dabmak he kaboliattette, genab tutukku hak danab dilag nai ele he kaliak daatte.

Duteronomi 16:19 Referans Kwoze

Lewitikas 19:15

Na nai doya mala hettoɗia epeɗia elele mettak kobol dim lamitte! Aib apiɗidme! Na laa nug daɗekte, o iitta nug enub elete amu, na amu aib dabmeme. Iitta. Na Kayak noobppa kaliak laa iitta eleppa na laipad dilag nai doya mala hettoɗia epeɗia elele mettak kobol dim lamidkkutoitte.

Eksodas 23:2

Danab kuɗum ag kobol eheɗ hekkulagnu dayeb amu, ag laa ag ahilag kobol amu aib dim lamidppig! Aria, haen danab kuɗum ag hettoɗiakppa ahan, nai doya mala hettoɗia epeɗia elele mettaknu kobol heppeg na qekkunu nai kuɗum madippeg amu, ag laa, ag amu dilag nai am aib dim lamidppig! ⌊Iitta. Ag nai tutukku aakkuib mattieg!⌋

Prowerb 17:23

Nau hak danab nug lokkumakppa eheɗ haknu ehanittak aotte; nug hettoɗiak haenppa nai doya mala hettoɗia epeɗia elele mettak elele ii bemanu anam hette.

Habakuk 1:4

Laa ⌊ag ɠagattag ele⌋ ag amu hetteb amunu, ɗo ahilagnu aɗi haknu atte amu, laa nug amu ii hette. Nai doya mala hettoɗia epeɗia elele mettak kobol na qeum daye, laa amuppa ehanittak laa ii aotte. Diig amunu nau hak danab ag genab tutukku hak danab eheɗ hattana, babaittaknu ib heeg, keldoak daatte amunu, genab tutukku hak danab ag qakkak daan, keeke laa hekkulagnu elele iitta bia daatteb. Ao, nau hak danab ag anam hetteb amunu, nai doya mala hettoɗia epeɗia elele mettak kobol ii daye, kobol kaliak ele daatte.” Da na amenppa anam awe attem.

Duteronomi 24:17

Ag wan laihnu danab ah dilagppan nai doya mala hettoɗia epeɗia elele mettak kobol dim lamidkkulagoitte. Ag nid naunau mamelkad mauhppig ele dilagppa ele anam hekkulagoitte. Ag ah qabnu lamen, keeke lonnu onig awak daakkunu ii aoglagoitte.

Duteronomi 10:17

Aɗinu? Yawe, ahilag Kayak, Nug am kayak laa oh eɗadtte, Nug am naɗi laa oh dilag Naɗi daatte. Nug am Kayak naɗinab, ɠagattag okkai ele. Nug am danab Nug antta, ebehi oh bodoetta le maknu Kayak daatte. Nug danab ah ohnab kobol eleleppaib epeɗiadtte. Nug lokkumakppa eheɗ haknu ehanittak ii aoma.

Aisaia 1:17

Ag dabmak ena aon, kobol genab tutukkuib hekkulagnu dabmettan, aon aɗan oiyeg! Ag kobol genab tutukku amu henana, ag nai doya mala hettoɗia epeɗia elele mettak kobol dabmenan, dim lamitteg! Ag danab laala ag lailkad laa, ɠagattag nakokib eheɗ hadatteb ele amu, ag hak nau amu bappaladnana, eheɗ hak danab bu matteg! Ag nid ag mamelkad mauhppig ele, ag hettoɗiakppa atognoatteg! Ag ah qab, laa ag amu dilag eheɗ hadatteb anidna, ag hettoɗiakppa, o adekkuppa ag ah qab amu ehanadnana, atognoatteg!” Yawe Nug anam awa atte.

Eklisiastis 7:7

Danab nug doyak dabmak ena ele, amge nug kobol nauppa danab laa eppelagppan en aokku dayeb, nug aakku eɗua, danab nug Kayak dab-ii-maama ii dim lamidtte ele daatte; laa amu, lokkumakppa eheɗ haknu ehanittak mettak am he, laa aotte ele nug oo kaliak daatte.

Prowerb 24:23

Nai imu ele am danab ag doyak dabmak ena ele, ahilag nai laa. Hettoɗiakppa, laanu diig iittappa ena doya, laanu diig iittappa eheɗ doyak kobol dim lamittaknu amuam ena iitta.

Duteronomi 27:19

Appeg, Lewi buɗub ag inam akkulag. “Aun laa nug nai doya mala hettoɗia epeɗia elele mettak kobol, wan laihnu danab ah, nid mamelkad mauhppig, amu ah qab dilagppa ele elele ii hette, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

Aposel 23:3

Nug Pol mataɗkkulagnu a amu, Pol nug amegppa aum. “Na am gilil dubuttid tak, amuppa gau hakkab hamu attanttan laaidppig, na amubia daattem! Geha Kayak Nug na oidkku! Na ɗo aɗi atte amuppa epeɗilkkutnu uɗime, amge na danab imu amelagppa, ‘Ag nug oig!’ ame, amuppa na ɗo tappae neum,” awa aum.

Aposel 16:37

Ag appig amu nug Pol amegppa a doya, nug aum. “I amu Rom danab, amge ag i hettoɗiakppa meitna, i eheɗ hemuɗtai o iittatai amu ag ii dooppig. Iitta. Ag i danab ah noolagppa hamu aɗaitna, makkuɗitnana, maniguittakppa hamu meitppig. Ag anam hewona amu, aɗinu ag gemu lokkumakppa henana, i dimittim gokkunihnu hetteb? Ag anam ii hemana. Iittanab! Ag akka uɗin, i omaitppeg dimittim gokkunihoitte,” awa aum.

Aposel 10:34

Kornilius nug nai mattia male amu, Pita nug inam awa aum. “Amu genabnab, gemu da doottem, Kayak Nug danab mamekkud aɗi am aun dabmaama, diig amunu Nug danab laa awa, laa geɗitta ii hette.

Maika 7:3

Wan imuppan danab ag eppelag laih laih ohppa eheɗ hekkulagnu doon autna aotteb. Danab okkai ag laa ag ag lokkumakppa eheɗ haknu ehanittak madappeg, ib amuppaib ag ehanadkkulagnu atteb. Ao, epeɗiak danab ag lokkumakppa eheɗ haknu ehanittak aon, ag laa ehanittak amu mettom amegppa, “Na am tutukku heme; na eheɗ laa ii heme,” hambuppun atteb. Genab, danab ag ɠagattag okkai ele ag aɗi keeke aoglagnu oolag hette, ag aoglagnu anan heeg ukke, aakku aotteb. Danab okkai amu oh ag eheɗ anam hekkulagnu nai qakkan oitteb.

Esekiel 22:12

Ag Jerusalem danab ah, ag oolagppan laa ag laa men doɗo mattaeg, ag laa aqaeg mauhtteb. Ag Jerusalem danab ah, ag lailkad lon mattan, ag lonnu intres digdig aotteb. Ge, ag gane medappig, amu eɗittak laa eɗun aotteb. Ag Jerusalem danab ah, ag mudippan laippu ele keeke lokkumakppa awaknu duttuna hak kobolppa ag eppelagppanu men doɗo keeke aotteb; amuppa ag keeke ii aolob aotteb. Ge, ag Jerusalem danab ah, ag dahilnu daulag atiom oitteb.’ ” Naɗi Yawe Nug anam atte.

Jeremaia 5:28

Ag keeke oh ele, beɗulag am enaib daatte. Ag ahilag eheɗ hak am batak iitta; hakib hetteb. Hettoɗiakppa ag nid laa mamelkad mauhppig naippa ii ehanatteg, ag nai doya, hettoɗia, epeɗia, elele mettak kobol nakok laa ii anidtteb. Ao, ag daɗek danab ah ii ehanatteg, ag aɗi keeke aoglagnu daatteb amu, ag ii aotteb.

Aisaia 33:15

Hipunin hak danab ag anam baɗan, uug doon oitteb, amge danab laa nug aben enanag, uug iittappa daakku, danab nug ɠagattag, enaib daakkunu padal mak eɗitteb ena dayaknu aben nuhigppa daakku amu, nug nuhig kobol am inam. Nug danab genab tutukku hak kobol dim lamitta oiyaya, nug nai tutukku, hambuppuak iitta maditte. Nug keeke lokkumakppa awaknu duttuna hak kobolppa men doɗo keeke ii aotte. Nug hettodiakppa lokkumakppa eheɗ haknu ehanittak aokkunu nai hambuppuak madikkunu, “Yo,” ii atte. Danab laa ag lailag laa qeppeg mauhkunu maditteb amu, nug nai amu doya, nug ehanittak madakkunu ii dabmette. Nug nau hekkunu dabmak nakok laa ii aotte. Danab nug anam hette ele, nug hanhan ee ele daakku. Nug le oug nuhig am iitta ii mema. Iitta.

Aisaia 1:23

Jerusalem, nahipad ikki danab ag am tappe nak danab. Ag yabhok danab ele layam batappig. Nahipad ikki danab ag lokkumakppa eheɗ haknu ehanittak aoglagnu oolag huana hette. Ao, nahipad ikki danab ag keeke ahilag daakkunu hamu mettak aoglagnu wagai metteb. Ag hettoɗiakppa nid ag mamelkad mauhppig ii ehanadtteb. Ag ah qab, ag amu dilag uug ele anidna, tutukku mettan ii ehanadtteb.

Prowerb 24:28

Mudippan laippu layap nug keeke eheɗ laa ii heum dayeb, hettoɗiakppa, “Nug eheɗ heum,” aib ame; na aibnab hambuppume.

1 Samuel 12:3

Amu gemu da ag noolagppa dayeye, ag amelagppa imu attem. Da ahilagnu eheɗ laa hemi dayeb amu, ag geha Yawe noobppa, king Yawe nug goɗen gokkaɗakppa tituanom, nug noobppa ele, ag geha appeg doyei! Da danab laanu makau, o donki yabbia aomite? O iitta, da hambuppuak kobolppa danab laanu keeke aomite? O iitta, da ag gumadmi, amuppa da ɠagattag dahilppa danab laa hei nauhomte? O iitta, epeɗiakppa da danab laa eppegppanu lokkumakppa eheɗ haknu ehanittak aomite? Da keeke amubia laa hemi dayeb amu, ag appeg doyen, da bappaidkkul,” awa aum.

1 Samuel 8:3

Aa anam hepiɗ, amge aa mamelah ippu ippuanatom ele amu, aa ib amu ii dim lamidpiɗ. Iitta. Aa men doɗo ib ena iittappa aoglahnu hepiɗ. Aa danab ag epeɗiak uɗat hekkulahnu uɗippig, haen amuppa aa lokkumakppa eheɗ haknu ehanittak aopiɗ. Aa nai doya mala hettoɗia epeɗia elele mettak kobol amu, aa amu dab-ii-mepiɗ; aa men doɗonu aakkuib dabmepiɗ. Diig amuppa amu, aa epeɗiak tutukku iinab hepiɗ.

Eksodas 18:21

Na anam hekkut, amge na inam ele hekkut. Na danab ah oolagppanu danab ag keeke haknu elelenab daatteb laala, ag Kayaknu ebehilag oh bodoetta le mette, laa ag danab amunu genab elele dooglagnu elele, danab amu ag men doɗo awaknu nai hambuppuak ii mattimna ele amu, na danab amubia otiadna heppe, ag laala danab ah 1,000 gumadna, ahilag okkai daappeppeg, laala 100, laala 50, am laala 10 anam gumadnana, ahilkad ehanittak anuqak danab daaglag.

Eksodas 23:3

Amu danab laa ag daɗek danab laa hettoɗiakppa meppeg, ag danab amu, ib tutukku iittappa ehanidkkulagnu nai aib kabolippig. ⌊Iitta. Ag nai tutukkuib mattieg!⌋

Duteronomi 16:18

Yawe, ahilag Kayak, Nug aab oh madakkun hette amu, ag amuppanu epeɗiak danab, amu okkai danab ele otiatteg! Ag Israel dilag huu okkai anen anen, ag anam heig! Ag otiadppeg, geha ag danab ah dilagppa epeɗiak, Israel wan ohppa nai doya mala hettoɗia epeɗia elele mettak kobol dim lamidnana hekkulag.

1 Samuel 8:1

Samuel nug anam haaha, kaino meum. Haen nug kaino ma amu nug he, nug bekoɗ aa beya, Israel dilag epeɗiak danab daapiɗ.

Sam 15:5

ag men doɗo lon hetteb, amge ag eɗua awaknu tuɗidna okkai awak kobol uutteb, ag hettoɗiakppa, o adekkuppa laa beɗulagppa aab iitta ele eheɗ aoglagnu, ag lokkumakppa eheɗ hekkulagnu ehanittak ii aotteb. ⌊Danab ah ag amu hetteb ele amu, ag na lautppa, nahip qaukoppa wakkulagnu elele.⌋ Am danab ah ag kobol ena amu hetteb, ag kobol nau amu ii hetteb ele amu, ag hanhan ɠagattag daaglag.

Prowerb 15:27

Danab nug baubau awaknu hik qak dootte amu, nug uug he, baekkudppa dilagppa ele bette; amge danab nug lokkumakppa eheɗ haknu ehanittak awaknu o mettaknu, nug amunu nau ninig ele dootte amu, nug bau daakku.

Prowerb 18:5

Hettoɗiakppa, epeɗiak danab nug nau hak danab dilag ena doya diig iittappa ehanadkku, amuam kobol nau; ele amu, hettoɗiakppa epeɗiak danab nug danab eheɗ laa ii heum, nug nuhig nai bappaidkkunu nug nai doya mala hettoɗia epeɗia elele mettak kobol ii dim lamidkku dayeb amu, amu ele am kobol nau.

Prowerb 31:5

King ag le ɠagattag huana lakkulag dayeb amu, ag ɗo aɗi hekkulagnu ippunadtte, ag amu daulag atieb; ag nai doya mala hettoɗia epeɗia elele mettak kobol ii dim lamidna, ag danab ah, laa ag eheɗ hadatteb ele, ag amu dilag oh elele ii hettoɗiadna, elele ii ehanadkkulagtai.

Duteronomi 27:25

Appeg, Lewi buɗub ag inam akkulag. “Aun laa nug danab beɗuppa aab iitta ele qaknu daden aotte, nug eheɗ laa awaknu anak waappa dayaɗ!” akkulag. Appeg, danab ah oh ag, “Genab, anam dayaɗ!” akkulag.

Esekiel 18:8

Genab tutukku hak danab amu, nug danab laanu lonnu intres ii aotte. Ge, nug gane mettom, amu eɗittak laa ii aotte. Nug eheɗ hekkunu ib anidtte ele amu, nug ib amu uua, eheɗ ii hette. Danab aɗit laa aa nug qeeheh, bappaidkkunu nug nai doya mala hettoɗia epeɗia elele mettak kobolnu oo metta ii uuak doyaya, kobol amu dim lamitta bappaidtte.