Daniel 2:45 - Nobonob Baibel

⁴⁵ O king, na men, laa Nug qaukoppanu okkula awom, amge laa amu heum am danab iitta, na tulelegppa anidme, na men amu dottognu aen, bras, wan aab aɗuppa ewom ele, silwa, gol ele he, huppu nakok nakok neum ele anidme amu, tulegleg amunu meu am aakku. Kayak, Nug onig, ɠagattag ele, Nug dimppa aɗi bekku am aakku na ippunittom. Tul niiak amuam keeke genab ippunigtte, meu da na amenppa ami ele am genab; na amu ootppa genab dookkutnu elele.” Daniel nug King Nebukatnesar amegppa anam aum.

Daniel 2:45 Referans Kwoze

Aisaia 28:16

Ag anam atteb amunu, Naɗi Yawe Nug inam atte. “Antteg! Da geha Sion appa men ɠagattag, men enanag laa, ukku ɠagattag daakkunu ebappi dayebeb, ag amu qaɗeppa keeke oh heppeg tekku. Amu aun laa nug nuhignu ooppa genab dookku amu, nug ɠagattag, ena daakku.

Genesis 41:32

Kayak Nug keeke imu genab bekkunu nai qakkom, diig amunu na tul niiak aɗit, diig laippu ele ippunittom. Keeke imu bekkunu amu uma iitta, miagnab daatte. Am Kayak Nug hekku.

Malakai 1:11

Aɗinu? ⌊Da ahilag mana mettak ii aopanu uug laa ii doottem.⌋ Aam bedeppan ukka aam nodeppa da onil am binag ele daakku. Da onil am binag ele daakku amunu, danab ah ag kalu danab ile muttuɗig enanag bette, amu doɗ tutukku ele manan, da meɗaglag,” Yawe Nukka Ɠagattag Oh Ele Nug anam atte.

Sam 48:1

Yawe Nug onig okkai ele; danab ah ag Nug binag mekkulagnu elelenab. Nug onig aab okkai Jerusalem appa meum daatte. Danab ah ag Nug appa binag mekkulagnu daatte. Ge, ag nuhig qaukoppa, Nug binag mekkulagnu daatte. Qauko amuam nuhignu tituanak daatte.

2 Samuel 7:22

O Naɗi Yawe, na laa oh eɗattaknab daattem. Ig daunigppa doomut, amubianab laa na bia iinab daatte. Na nakka Kayak daattem, laa ii daatte.

Duteronomi 10:17

Aɗinu? Yawe, ahilag Kayak, Nug am kayak laa oh eɗadtte, Nug am naɗi laa oh dilag Naɗi daatte. Nug am Kayak naɗinab, ɠagattag okkai ele. Nug am danab Nug antta, ebehi oh bodoetta le maknu Kayak daatte. Nug danab ah ohnab kobol eleleppaib epeɗiadtte. Nug lokkumakppa eheɗ haknu ehanittak ii aoma.

Genesis 41:28

Da matu ami aakku. Kayak Nug aɗi keeke hekkunu hette amu, Nug na ippunittom.

Revelesen 19:17

Aria, da engel laa aam amegppa hibaitta dayeye anidmi. Dayaya, nug baag okkaippa, ai oh hab waappa hagagaɗppig ele, nug ag uɗin, king teppulag, ban daup ikki teppulag, danab ebehilagnab teppulag, danab amu hos ahilkadppa daappig ele teppulag, danab ah laa, laa ag begbeg maɗi nid iitta, laa ag begbeg maɗi nid, laa ag onilag ele, laa ag onilag iitta ele, amu oh teppulag ele lakkulagnu ag onilagppa ewa, inam aum. “Ag uɗin, Kayaknu ee lanak balalppa dayeg!” ewa aum.

Revelesen 4:1

Keeke amu oh dimppa da neekke, hab aabppa od matulak dayeye anidmi. Da baag tatam trampet oqotti bia doomi amu, da baula dooiyi amu aum. “Na inam beppe, da keeke dimppa bekkuoitte ele ippunidppi antte!” awa aum.

Revelesen 1:19

Amunu keeke na anidme, keeke gemu daatteb, amu keeke aɗi dimppa bekkulagnu ele amu oh buk itoɗiakppa ye!

Luk 17:20

Amu haen laa ɗo gumak danab-Parasia ag Jesus oɗ mettan appig. “Haen ganeb Kayaknu ɗo maɗoɗ am uɗikku?” aon appig. Aon aeg amu Jesus Nug nai ahilag amu nob ma aum. “Kayaknu ɗo maɗoɗnu uɗiak am danab ah ag amelagppa anidkkulagnu elele iitta.

Matyu 24:35

Hab wan ele am iitta mekkulah, amge nai dahil am iitta iinab mema.

Matyu 21:24

Ag anam aeg amu Jesus oɗelagppa awa aum. “Da ele keeke laippunu ag oɗ madakkulnu hettem. Da ag oɗ madappi, oɗmak dahil imu nob mekkulag dayeb amu, da ɠagattag aɗippa uɗat hettem amu appi dooglag.

Sekaraia 12:3

Haen wanppan wan ohnu danab ag ahan, Jerusalem banelag uɗippeg, deɗ amuppa da heppi, Jerusalem amu men uug naunab, humaknu elele iittanab bia daakku. Aun nug men amu humakkunu hekku, nug guittak aokku, ⌊amubia aun nug Jerusalem heeb nauhkkunu hekku, nug guittak aokku⌋.

Daniel 2:44

Baeg wan tabatte, wan aab aɗuppa ewom, aen ele qataqak am king laala ag laippu daaglagnu hekkulag, amge laippunab ii daamna ippunigtte, haen ag amu henan daappeg, haen amuppa Kayak hab attan daatte, Nug ɗo maɗoɗ laa daakkunu heeb, ɗo maɗoɗ amuam hanhan daakku. Ɗo maɗoɗ laa wan atu gumaglagnu ahan, ɗo maɗoɗ amu eɗidna ii aomna. Ɗo maɗoɗ amuam ɗo maɗoɗ oh heeb, iitta mekkulag, amge ɗo maɗoɗ amuam hanhan daakku.

Daniel 2:24

Daniel anam ana, nug aha, nug Ariok, king nug Babilon dilag doyak danab aqeb mauhkkulagnu tituanattom amu, Daniel nug Ariok toppa ta, amegppa aum. “Na Babilon dilag doyak danab aib aqappe mauhppig. Na omaiɗna, king toppa goppe, da tul nuhig, tul amunu meu ele mehuqppi dookku,” awa aum.

Sam 145:3

Yawe Nug am onig, ɠagattag okkai ele. Nug danab ah ag Nug binag mekkulagnu elelenab daatte. Auntai laa nug Nug onig, ɠagattag okkai ele tutukku dookkunu elele iitta.

Sam 135:5

Da doottem, Yawe Nug ɠagattagnab daatte. Ao, Naɗi ihinig, Nug kayak laa oh eɗatta malom daatte.

Sam 96:4

Aɗinu? Yawe Nug onig ɠagattag ele, laa oh eɗattak daatte. Ao, Nug danab ah ag Nug binag mekkulagnu elelenab daatte. Ge, danab ah ag nuhignu ebehilag oh bodoetta le mekkunu elelenab daatteb. Kayak laa anam laa ii daatte.

Job 36:26

Kayak Nug keeke laa oh eɗattak; ig danab ig nuhig ɠagattag, Nug binag, onig okkai ele, ig amunu diignu doyak tutukku aognignu elele iitta. Ao, Kayak Nug hanhan daatte; laa nug maɗ nuhig ebaqakkunu ele iitta.

Nehemaia 9:32

O Kayak, na ihinig Kayak, na ɠagattag okkai ele, danab na anitta, nug ebehi oh bodoetta le mette elenu Kayak, na danab ah aun aɗi ele, na hee, na danab ah amu ele ag nug oo mauhaknab doyaknu nug tituana nai qakkak hetteb amu, na nug tituana nai qakkak amu ii okkulttem. Na anam henan daattem amunu, O Kayak, uug digdig ig gemu daattem, ihinigppa beppig amu, ig na uug amunu, ‘Am keeke hamu, keeke okkai iitta,’ ii doomnanu oɗ medattem. Uug amuam, ig, ihinkad king, ihinkad ikki danab, ihinkad mana mettak danab, ihinkad propet danab, ig mamenkad aɗi, ig laa oh ele, ig oh ihinigppa beppig. Asiria dilag king ag digmena, uug amu ig mekkaeg uɗie uɗie, gemu ele ig uug amu anidttem.

Nehemaia 4:14

Da amu hein maloya, da keeke oh antte, itale malen, da anuqak danab, Juda dilag ehanittak anuqak danab, amu danab ah laa oh ele amelagppa ami. “Ag kekeɗ dilagnu aib baɗappig. Naɗi, Nug ɠagattag okkai ele, danab Nug antta, ebehi oh bodoetta le mette elenu Kayak, Nug daatte amunu, ag Nug dabmenana, ag, ag awalkad amalkad, ag bekkalkad aɗelkad, ag waalkad, ag laulkad ele ena daaglagnu ban heig!” awe ami.

1 Stori 16:25

Aɗinu? Yawe Nug onig ɠagattag ele, laa oh eɗattak daatte. Nug danab ah ag Nug binag mekkulagnu elelenab daatte. Ge, danab ah ag nuhignu ebehilag oh bodoetta le mekkunu elelenab daatteb. Kayak laa anam laa ii daatte.

Daniel 2:28

amge Kayak, hab attan daatte, Nug keeke uug ele he, miag atitte. Nug anam hette amunu, Nug na, King Nebukatnesar, Nug na dimppa aɗi bekku aakku ippunittom. Na niiak abenppa tul niinna, tuleglegppa keeke digdig anidme am iikku.

Daniel 2:29

O king, na niiak abenppa niinna, na dimppa aɗi bekkun daattenu dabmeeme amu, laa Nug dimppanu keeke he, miag atitte ele, Nug dimppa aɗi bekkun daatte am ippunittom.

Daniel 8:25

Nug hambuppuak kobolppa keeke haknu doya auta autanab awa, kobol amuppa nug nuhig uɗat haaha, laa kuɗum ag amu ii dabmetteb ele eɗadkku. Nug nukka, nuhignu, “Da am danab enanag, laa oh eɗattak,” dabmaama oikku. Laa ag akka, ag ahilagnu, “Ig maɗoɗ ele iikku daattem,” abeppeg, nug heeb nauhkkulag. Nug Kayak, Nug laa oh eɗadtte amu, nug Nug ele ban hekkulahnu hekku. Nug keeke okkai amu oh hekku, amge laa, danab iitta, laa nug heeb nauhkku.

Genesis 41:26

Makau eblaih aɗit ele beɗulag ena, teppulag ele, amu ee aeg ikki eblaih aɗit ele ikkilag oh ena, aelkad ambak ele, amu ag oh maɗ eblaih aɗit ele ippunidtte. Keeke aɗit oh am diig laippu.

Hagai 2:22

Da heppi, king laala dilag sia king nena qena, nauhak daaglag. Da heppi, wanppan ɗo maɗoɗ laala dilag ɠagattag am iitta mekku. Da heppi, bannu karis, danab lamidtteb ele ag nena qeppeg, hos, ban danab hos attan oitteb ele ag ele nena qekkulag. Amuam danab amu lailkad eppelagppa bekku.