Aposel 20:29 - Nobonob Baibel

²⁹ Amu da doottem, da ag uuatten goppi, dimppa hambuppuak ippunittak danab, ag wulp bia, geha ag tamaniak oolagppa bena heppeg nauhkkulagnu hekkulag.

Aposel 20:29 Referans Kwoze

Matyu 7:15

Ag propet hambuppuak dilag dabmeig! Propet hambuppuak ag, ‘Da Kayak ippu ippunadttem,’ aon atteb, amge amuam nai hambuppuak. Propet hambuppuak ag wulp sipsip emala lakkunu, sipsip gaɗa awa ma, sipsip oolagppa oitte, ag amubia oitteb.

2 Pita 2:1

Propet hambuppuak ag anukka danab oolagppa oidppig amubianab ippunittak danab hambuppuak ag geha ag gemu daatteb, ag oolagppa bena oiglag. Amu ag geha lokkumakppa hambuppualadppeg, kobol adekku dim lamidkkulagnu amu dabmekkulag. Hambuppuak kobol amu ag keeke heeg nauhtte. Amu ele, danab amu ag Naɗi Yawe, Nug ag hipuninnu qagaiettakppanu eɗua uhuqattom ele amu, ag Nug guhuɗidkkulag amunu, danab amu ag aakku akka padal mekkulagnu hetteb.

Aposel 20:28

Amunu ag akka ahilagnu dabmenan daanna, amu Kayaknu danab ah, Kayak Ouɗi Nug ag gumak ikki danab ahilag daaglagnu otiattom ele amu, ag amu dilag ele oh dabmenan dayeg! Ag Kristen tamaniak, Kayak Nug nukka Nug tiigppa nuhig tamaniak amu daden meum ele amu, ag nuhig tamaniak amu tutukku gumatteg!

Jon 10:12

Danab nug uɗat nid daatte, nug sipsip gumak danab genab iitta, nug sipsip mamelag ele iitta amunu, haen nug wulp uɗitte antta amu, nug sipsip uuatta, oola ugekke, wulp nug sipsip aqa lamatte, ag mauhnoak oolna, matatun tamtam gotteb.

Luk 10:3

Nug anam ana, Nug nai baula tuɗitta aum. “Ag aakkude ukkeg! Da ag maatti, ag sipsip nakkud wulp oolagppa gotteb bia gotteb.

Matyu 10:16

Doyeg, da ag maatti, ag sipsip wulp oolagppa gotteb bia gotteb amunu, ag dabmak tutukkunab aona, keeke heig! Amu ele ag keeke oh qinonob henana, kobol nau laa hekkulagnu aib dabmeppig.

Sekaraia 11:17

O gadonnab gadon! Danab okkai amu, nug sipsip pehettak ii gumadtte, nug genab bu okkai aokku. Qep elab nug eppeg okkuleb, nug ameg naɗiap ele yaakku. Ao, nug eppeg am aakku nauhak dayebeb, nug ameg naɗiap ele gaɗuak daakku.” Yawe Nug anam awa atte.

Jeremaia 23:1

Yawe Nug inam atte. “Danab okkai ag danab ah dahilad eheɗ hadatteb ele, ag am sipsip gumak danab nau, sipsip eheɗ hattaeg nauheg, lamatteg, pitaiettan gotteb, ag amubia hetteb amunu, ag gumak danab amu, ahilagnu am gadonnab gadon,” awa atte.

Sepanaia 3:3

Israel dilag ehanittak anuqak danab amu, ag danab ah dilagnu laion doɗ laa qa lakkunu oiyaya gaatte, amubia ag danab ah dilagppa hetteb. Ao, Israel ag ahilkad okkai danab ag doɗ wulp, ag tueb meeb, ag doɗ laa anidna, qena lalobnu oitteb bia hetteb. Doɗ laion, o doɗ wulp ag aɗi doɗ laa tueb qena lae neppig, butti buttua huppu nakok laa ii daatte, amubia hetteb.

Jeremaia 13:20

Amu ag Juda danab okkai, Jerusalem daatteb, ag amelag human, neegppeg ukkeb, aun aɗi yawalti uɗitteppanu uɗitteb anatteg! Ag danab okkai, ag sipsip gumak danab sipsip nuhig gumadtte bia ag Juda danab ah gumadkkulagnu tituanak daatteb, amge ag Juda dilag okkai, ag ahilkad danab ah gemu adeppa daatteb? Ao, ag akka ag dada nai mattinna, “Ihinkad danab ah am kuɗumnab, ɠagattag ele,” appig, amge gemu danab ah amu ag adeppa daatteb?

Esekiel 22:27

Doɗ wulp ag doɗ laa qena latteb, amubia Israel dilag okkai ag danab ah eheɗ hatteg nauhtteb. Ag men doɗo, wan keeke, ahilag iitta, amge ag aoglagnu danab aqaeg mauheg, ahilag keeke aotteb.

Esekiel 34:8

“Da Naɗi Yawe, da inam attem. Da genab bau daattem, genab amubia da ag sipsip gumak danab dahilad sipsip atognoadkkulagnu daatteb, da ahilagnu iikku attem. Dahilad sipsip ag ahilag gumak danab iitta amunu, laa ag eheɗ hatteg, doɗ dakkuɗ ag uɗin, aqadna ladappig. Amu sipsip dahilad ag matatun gona daappig, amge ag gumak danab ag eɗun diiglagnu ii mattialadppig. Iitta. Ag akka ag ena daaglagnu henana, dahilad sipsip dilag ii dabmeppig,” awa atte.

Daniel 11:34

Danab doyak dabmak ena ele ag anam daappeg, laa eheɗ anam hadappeppeg, ag ehanittak nakok aoglag. Ag ehanittak aoppeg, laa kuɗum ag, ‘Ig ag ele laippu daagnig,’ akkulag, amge ag hambuppunna anam akkulag.

Luk 12:32

O lailad, ag aib baɗappig. Da Mamel Nug nuhig ɗo maɗoɗ ag madakkunu oo daatte.

Jon 21:15

Ag ee lana malona daaegeg, Jesus Nug Pita oɗ mettom. “Saimon, Jon bekka, na imu eɗattak dahilnu oot mauhttete?” awa aum. Anam a amu Pita aum. “Naɗi na doottem. Da nahipnu ool mauhtte,” awa aum. Pita anam a amu Jesus aum. “Na dahil sipsip nakkud bekkadna meɗe!” awa aum.

1 Pita 5:2

Ag Kayaknu danab sipsip bia ag eppelagppa daatteb atognoadna autna aweg! Ag ɗo duttunakppa bia daanna, ahilag uɗat aib heppig. Iitta. Ag Kayak oo niitte amubia ena doonna hekkulag. Ag men doɗo aoglagnu aib dabmenana heppig, ag oolag ahebeb hekkulag.

Jut 1:18

Am ag inam ag amelagppa appig. “Gog tak haenppa ihaklel qettak danab ag Kayak dimettan, ag Kayaknu, hak nuhignu ele uuak kobol dim lamidna beɗunu oo ahak kobol ahilag hekkulag,” aon appig.