Aposel 20:28 - Nobonob Baibel

²⁸ Amunu ag akka ahilagnu dabmenan daanna, amu Kayaknu danab ah, Kayak Ouɗi Nug ag gumak ikki danab ahilag daaglagnu otiattom ele amu, ag amu dilag ele oh dabmenan dayeg! Ag Kristen tamaniak, Kayak Nug nukka Nug tiigppa nuhig tamaniak amu daden meum ele amu, ag nuhig tamaniak amu tutukku gumatteg!

Aposel 20:28 Referans Kwoze

1 Timoti 4:16

Na nakka kobol na hettem, amu nai, na amu danab ah ippunadttem ele amu, na amu oh atognona dabmenana he! Na uug doyaya eɗittaknuib dabmak awak kobol dim lamidna, anam he! Aɗinu? Na anam hekkut amu, uɗat nahip amuppa na laa nahip nai dootteb, na nakka nahipnu ele, na ag oh ehanadppe, ag ib ii apiɗidmana.

Aisaia 40:11

Amu Nug sipsip gumak danab laa nuhikkud sipsip atognoadtte, amubia nuhikkud danab ah atognoadtte. Sipsip gumak danab nug sipsip nakkud diia, momoppa maatta, gamanattatta, anilkad amu qinonob omalatta gotte bia nuhikkud danab ah dilagppa hette.

1 Timoti 3:2

Amunu laa nug Kristen tamaniak gumak ikki danab daakkunu, nuhigppa nai laa ii daakkuoitte. Nug ah laippu gamu aakkuib daya, nug atognoak oiya, nug nukka nuhig oiyak pehettak atognoak kobol haaha, laa nuhignu ena elele dooglagnu elele daya, nug ɗo danab dotteb ele atognoatta, nug danab ah ele nai ippunadkkunu elele daakkuoitte.

Aposel 13:2

Ag am Naɗi noobppa dup nona binag menana, ee ohnu kud mena daaegeg, Kayak Ouɗi Nug ag amelagppa aum. “Da Barnabas, Saul ele aa uɗat laa hekkulahnu tituanatmi amunu, ag otiatna meɗeg!” awa aum.

Jeremaia 3:15

Da Sion omalatten uɗien, da ag, Israel, da ag gumak danab, sipsip gumak danab bia, da gumak danab ena, ag da ool hette bia oolag hekku, da ag maadppi, ag gumadkkulag. Ag doyak ena, diignu doyak tutukku ele aɗan, ag gumadkkulag.

Hibru 13:17

Ag tamaniak ooppa daatteb ele amu, ag ahilkad ikki danab waalagppa daanna, ahilag nai ele dim lamitteg! Ikki danab ag ehanadkkulagnu hena, hanhan ag atognoadnana uɗat hetteb amu, ikki danab amu ag amunu geha Kayak amegppa mehuqkkulag, amunu ikki danab ag uug doomnanu, ag maɗoɗppan gamag ahak dooglagnu amu, ag laa ag ag waalagppa daanna, ahilag nai dim lamitteg! Tamaniak danab ah ag uug doon ikki danab dilag nai dim lamidppeg, ikki danab ag uɗat ahilag hekkulagnu uug doon hekkulag dayeb amu, tamaniak danab ah ag kobol amuppa ehanittak ena ii aomna.

1 Timoti 5:17

Ag Kristen danab, ag Kristen tamaniak ikki danab ag tamaniaknu uɗat ena hetteb ele amu, ag danab amunu ena elelenab doyeg! Amu Kristen tamaniak ikki danab, amu oolagppanu laala ag Kayak nai mehuqtteb, danab ah ele nai ippunadtteb ele amu, ag amu dilagnu amu ag anuqaknab doyeg!

1 Korint 10:32

Ag Juda danab laa, Grik danab laa, amu Kayaknu Kristen tamaniak dilag laa ele kobol ahilagppa heppeg, ag nena qemananu, ag tutukku daan oiyeg!

Maika 5:4

Amu laa Israel gumadkku Nug hibaitta, nuhikkud danab ah, sipsip gumak danab sipsip nuhikkud gumadtte, amubia nuhikkud danab ah gumadkku. Nug Yawenu ɠagattagppa nuhikkud danab ah gumadkku. Ao, Yawe, Nug dagom onig ɠagattag okkai ele, Nug am laa Israel gumadkkunu Kayak; amu laa Israel gumadkku amu, Nug Yawe onigppa nuhikkud danab ah gumadkku. Nug ag gumadkku amunu, ag ena, baɗak iitta eleppa daaglag. Aɗinu? Haen amuppa Nug onig, ɠagattag elenu nai am aha ukkeb, wan ohppa gokku.

Pilipai 1:1

Da Pol, amu Timoti ele, i oh am Kristus Jesusnu maɗi nid, i uɗug imu Kayaknu danab ah oppiaawak ele oh Jesus Kristusnu daan Pilipai daatteb, amu ahilkad gumak ikki danab, amu ahilkad toliak danab oh ele, ahilagnu yaattep.

Epesus 1:7

Kayak Nug nuhig doyak dabmak ena ele oh, nuhig diignu doyak tutukku oh eleppa Nug dabmekka, Nug nuhig ehanittak okkai hamu mettak naɗinab megakka, Nug Jesus Kristus tiigppa Nug ig hipuninnu qagaiettakppanu eɗua uhuqak ha mekka, ⌊amuppanu laih amu⌋ ig hipuninnu uhuqak aomut.

Luk 12:32

O lailad, ag aib baɗappig. Da Mamel Nug nuhig ɗo maɗoɗ ag madakkunu oo daatte.

Esekiel 34:31

Amu Yawe Nug atte. “Ag Israel, ag am dahilad sipsip. Ag dahil gikkiɗah dadppa daatteb. Ag dahilad danab ah daatteb, da ahilag Kayak daattem.” Naɗi Yawe Nug anam aakku atte.

1 Timoti 3:5

Am danab laa nug nug baekkudppa atognoatta omalattak ii dootte dayeb amu, nug attemun Kayaknu Kristen tamaniak dabmadatta daakku.

Revelesen 5:9

Ikki danab 24 ag anam hena, ag ahi bau laa inam edappig. “Na buk itoɗiak amu aona, qataqak oh tolakkutnu ehah ele. Aɗinu? Ag heeg, na mauhme, amu na danab ah huu ohppanu, nai ohppanu, beɗulag iɗu iɗu ohppanu, wanppan wan ohppanu ele na tiinppa hipuninnu qagaiettakppanu eɗua uhuqak hena, Kayak mettame.

1 Timoti 4:14

Haen tamaniaknu ikki danab ag eppelag na baɗenppa meeg, propet nai laa nahipnu mattieg, na Kayaknu uɗat hekkutnu ehah aome amu, na uɗat amu daut aib atiom; aib uume.

Epesus 1:14

Kayak Nug ig nuhikkud daatteb, ig dimppa gog tak haenppa ig qagaiettakppanu eɗua uhuqak megakkunu aum amu, ig megakkunu genabnab doognignu Nug nuhig Ouɗi, keeke lonnu onig awa bia ha, ig mekkom. Ig Kayak binag metu!

Galesia 1:13

Am da kobol anukka, haen da Juda dilag kobol dim lamittette, kobol hemi amu, ag amu dootteb. Kayaknu Kristen tamaniak danab eheɗ hattak danab nau am da iikku; ag iitta mekkulagnu da wagai mein hemi.

Aposel 20:29

Amu da doottem, da ag uuatten goppi, dimppa hambuppuak ippunittak danab, ag wulp bia, geha ag tamaniak oolagppa bena heppeg nauhkkulagnu hekkulag.

Aposel 20:17

Amge ig Miletus tewota amu, Pol nug Epesus Kristen tamaniak ikki danab ag nug gumidna uɗiglagnu onilagppa eum.

Aposel 14:23

Anam heyaya amu, aa Kristen tamaniak amu ohppa ikki danab laala otiadya maadpiɗ. Aa ee ohnu kud meya daayya unuqidyaya, aa Kristen tamaniak amu oh diiya, Naɗi, ag nuhignu oolagppa genab dooppig ele amu, Nug eppegppa maadpiɗ.

Maika 7:14

O Yawe, sipsip gumak danab nug dudqak hokkat nuhigppa nuhikkud sipsip gumadtte, amubia na nahipad danab ah gumadkkutnu ool daatte. Nahipad danab ah ag am sipsip nahipad, na aut bia daatteb. Ag sipsip piɗe atuppa daattebbia daatteb, amge atu amu oh daug daug amu, wan gikkiɗah enanag ele daatte amunu, na heppe, ag wan ena Basan, am wan ena laa Gileat, ag aguppa, anukka daan oittappig bia hekkulagnu oɗ medattem.

1 Pita 2:25

Anukka ag am sipsip hetteb, amubia ag ib ettan goppig, amge gemu ag eɗun ahilag gumak danab, sipsip gumak danab bia daatte, ahilag okkai, Nug ag atognoadtte ele amu, ag Nug gumidna uɗippig.

1 Pita 2:9

Amge ag Kristen danab ah amu, ag gatatuppa daaegeg, Kayak Nug diia amahlak enappa maattom, ag Nug ahilagppa ena heum, ag amu miag atiglagnu Nug ag tituanatte daanna, ag am mana mettak danab, king ele daatteb, ag am danab ah Kayaknu ɗo maɗoɗppa daatteb, ag danab ah nuhikkudnab ele daatteb.

Kolosi 4:17

Aria ag Arkipus amegppa, “Na uɗat Naɗi eppegppanu aome amu, na uɗat amu heppe gogppa taɗ!” aon appeg doyaɗ!

Epesus 4:11

Nugib ehah iɗu iɗu matta, danab laa ag totol danab dilag uɗat hekkulagnu mattom. Laa ag propet daaglagnu mattom. Laa ag nai mehuqak danab daaglagnu mattom. Laa ag pasto am laa ag ippuanittak uɗat hekkulagnu mattom.

1 Korint 15:9

Amu da totol danab oolagppanu amu da onig iitta bia daattem. Laa ele amu laa ag dahilnu, “Nug totol danab,” aon ii alob bia. Aɗinu? Da Kayaknu Kristen tamaniak amu heppi, iitta mekkulagnu eheɗ hadattami,

1 Korint 1:2

i nai imu uɗugppa yaattep. I Kayaknu Kristen tamaniak Korint daatteb, ahilagnu yaattep. Ag Kristus Jesusnu, oppiaawak danab ah daatteb. Nug ag oppiaawak daaglagnu ag onilagppa eum. Amge Nug agib onilagppa ii eum. Iitta! Nug danab ah oh ag wan atu ohppa daana, ag Naɗi Jesus Kristus onigppa unuqidtteb amu, ag oh onilagppa eum. Jesus amu, Nug am ag ig ele, ig oh ihinig Naɗi daatte.

Luk 21:34

Jesus Nug anam ana, Nug nai tuɗitta aum. “Keeke amu bekkun daatte amunu, ag daulag atieb, ag hanhan ee lanaknuib hik aqeb, le ɠagattag labeppeg, kaaka aqebeb, beɗu ena dayak amunu guattebeb hebeppeg, kobol amuib aha ag tonadmanu tutukku dabmeig! Kobol amu ag tonatteb, Naɗinu deɗ amu ag dab-ii-menana, pahaettak, doɗ pelemppa notte bia ag anadkku.

1 Jon 1:7

Amge Nug nukka amahlakppa daatte, amubia ig amahlakppa oittem dayeb amu, ig oh nug oo laippu ele nug doya dayakppa daattem, amu Nug Bekka Jesus, Nug tiig ihinig hipunin oh mihehe, ig oppiak daattem.

Hibru 12:15

Danab laa nug Kayaknu ehanittak okkai hamu megatte ele amu dimetta na qemanu dabmeig! Ag oolagppa danab laa nug ad laa tiig mua ele, danab lanana mauhtteb ele, amubia dayaya, nug heeb, uug aqeb, ag kuɗum ag Kayak amegppa dubuttid ele daamnanu ele dabmeig!

Taitus 1:7

Kristen tamaniaknu gumak ikki danab amu, nug Kayaknu uɗat gumatte amunu, nug Kayaknu neekkakppa ooppa kaliak laa iitta ele daakkuoitte. Nug beɗuppa tak danab aib dayom, nug oppoɗi paha aib beum, nug le ɠagattag huana aib laum, nug la guittak nau mauhnoak mettaknu tiigppa dayak danab aib dayom, amu nug men doɗo kuɗum awaknu hik aib qeum.

Kolosi 1:14

Amu Nug tiigppa Nug ig hipuninnu qagaiettakppanu eɗua uhuqak ha mekka, ⌊amuppanu laih amu⌋ ig hipuninnu uhuqak aomut.

1 Korint 11:22

Amu attemu? Ag ee le ele lakkulagnu laulkad iittate? Ag Kayaknu Kristen tamaniak amu keeke hamunab bia doottebte? Ag lailkad laala, ee iitta ele daatteb amu, ag ag anadna ahilagnu dabmak ii aona, uɗa nak nau madattebte? Ag hetteb amu da amunu aɗi akkul? Da ag binalag mekkulte? Iitta! Kobol amunu amu da ag binalag iinab mepa.

Mak 13:9

Ag dahilad amu, ag wan imuppan oiyak ahilag dabmeig! Laa ag ag hettoɗiakppa maadna, nai doyak lag ooppa bu qaun eleppa eheɗ mataɗadkkulag. Da onil ahilagppa daatte amunu, ag diiadna king, gabman ele eppelagppa maadppeg, ag hettoɗiadkkulag. Amu ag haen amuppa dahilnu ag amelagppa mehuqkkulag.

Matyu 16:18

amunu, da na amenppa attem. Na am Pita, na am men, amu men imuppa da tamaniak dahil buukkul. Buuppi, Satannu ɠagattag nug qeeb ii nema.

Sekaraia 11:4

Yawe, dahil Kayak, Nug da amelppa inam aum. “Sipsip ameg laa, danab baalag otaɗadna meppeg, laa daden mena lakkulagnu tituanak daatteb amu, na sipsip amu dilag gumak danab daan, ee matte!

Esekiel 34:3

Ag Israel dilag gumak danab ag sipsip huh aon latteb, ag sipsip uɗilag aon, ahilag lamen hadatteb, ag doɗ ena ena ele baalag otaɗadna latteb, amge ag sipsip ii atognoadtteb.

Jeremaia 13:20

Amu ag Juda danab okkai, Jerusalem daatteb, ag amelag human, neegppeg ukkeb, aun aɗi yawalti uɗitteppanu uɗitteb anatteg! Ag danab okkai, ag sipsip gumak danab sipsip nuhig gumadtte bia ag Juda danab ah gumadkkulagnu tituanak daatteb, amge ag Juda dilag okkai, ag ahilkad danab ah gemu adeppa daatteb? Ao, ag akka ag dada nai mattinna, “Ihinkad danab ah am kuɗumnab, ɠagattag ele,” appig, amge gemu danab ah amu ag adeppa daatteb?

Jeremaia 13:17

Amge ag nuhig nai dooglagnu uun, ii dim lamidkkulag dayeb amu, ahilag dada hak, diig amunu, da dakka piɗe dayeye gaakkul. Ge, ag Yawenu danab ah, ag nai dooglagnu uun, ii dim lamidkkulag dayeb amu, ahilag hak nau, diig amunu kekeɗ ag uɗin, eɗadna, aɗualadna diin goppeg, ag wan laappa diia ukka laih me dayak danab ah daaglag amunu, da eheɗ gaappi, da amel leb huanak nekku.

Aisaia 63:11

Nug anam he, nuhikkud danab ah ag anukka Yawe Nug ag ehanattomnu dabmeppig. Ag Mosesnu haenppa Nug kobol digdig ehanadkkunu heum amu, amuam ag daulagppa doum. Ag amu dabmena, akka akka nug oɗ medappig. “Laa Nug yu gamagppa ib he, ig memetankad aɗi, ahilag okkai Moses ele, ag ib amuppa laih ena goppig amu, Nug gemu adeppa daatte? Laa Nug nuhig Ouɗi Oppiaawak Ele ag oolagppa meum amu, Nug gemu adeppa daatte?

Prowerb 10:21

Genab tutukku hak danab dilag nai am kuɗum laa ehanadtte; amge danab ag Kayak dab-ii-mena ii dim lamidna oitteb ele, ag am epeɗia ha dabmak ena awak kobol ii dootteb amunu, ag geha mauhkkulag.

Sam 74:2

Ig nahipadnab danab ah daagnignu anukkanab na tituanigme amu, na ig dabmegakkutnu oɗ medattem. Ao, na ig tituanigme, ig huu okkai laa nahipad danab ahnab daagnignu, na ig qagaiettakppanu eɗua uhuqak hena mekkame amu, na ig dabmegakkutnu unuqidttem! Ge, na wan imuppa Sion qauko appa daame amu, na qauko amu dabmekkutnu oɗ medattem.

Jeremaia 31:10

Danab ah wanppan wan ohppanu ag daulag human, Yawe aɗi atte amu doyeg! Ag doon, amu appeg, danab ah wan laalappa daatteb ag doon autna aoglag. Nug Israel danab ah matatun goppig ele eɗua diia, laippu qagmaadkku, aon appeg doyeg! Yo, Nug sipsip gumak danab laa sipsip nuhikkud dabmadatte bia ag dabmadakku.

Rom 16:16

Ag Kristen kobol oppiaawak eleppa, ag nug humittak heig! Kristusnu tamaniak oh ag ahilag humittak ag madatteb.

1 Korint 6:20

Aɗinu? Kayak Nug ag hipuninnu qagaiettakppanu eɗua uhuqadkkunu daden maattom amunu, ag Kayak binag mekkulagnu, ag beɗulkadppa ele Kayak binag meig!

1 Timoti 3:1

Nai imuam genab, danab nug Kristen tamaniaknu gumak ikki danab bekkunu oo niitte dayeb amu, nug aakku uɗat enanu oo hette.

Taitus 2:14

Kristus Nug ig ihinig nau hak ohnu qagaiettakppanu eɗua uhuqak hekkunu, ig nuhikkudnab danab ah oppiaawak ele daatta, kobol ena tutukku aakkuib hekkunignu dabmak aognignu amu, Nug ihinignu mauhom.