Aposel 17:11 - Nobonob Baibel

¹¹ Am Juda danab Beria daappig amu, ena haknu, ag diilag am Juda danab Tesalonaika daappig eɗittak. Aɗinu? Ag nai Pol mattiom ele dooglagnu oolag ahe, ag doon autna aoppig. Ag doon aon, Pol nai attom am genabte, o iitta genab iittate amu, ag amu dooglagnu deɗ ohppa Kayak nai ebqeppig.

Aposel 17:11 Referans Kwoze

Aisaia 34:16

Na Yawenu buk itoɗiak laappa neegna, amuppa aɗi yaak daatte ebqe! Am inam. “Doɗ amu laa am appa daakkunu ii uuma. Ag ohnab ahilag ehanittak ele appa daaglag. Yawe Nug amu bekkunu Nug oɗeppa haknunab mattiom amunu, am anam bekku. Nuhig Ouɗi Nug doɗ amu oh aguppa qagmaadkku amunu, am anam daakku.”

Jon 5:39

Ag Kayak nai yaak niitte, nai amu ebqena autna aona, ‘Nai amu bauklel hanhannu megatte,’ atteb, amge nai amuam dahilnu aakku atte

1 Tesalonaika 2:13

Ig ag amelagppa nai mehuqmut amu, ag wanppanu danab dilag nai bia ii aoppig. Iitta. Ag nai amunu, am Kayak nai, tutukku doonna aoppig amunu amu, ig haen oh Kayak amegppa keeke amunu ele, “Ena heme,” aot attem. Nai amunu amu ag oolagppa genab dootteb ele amu, nug ag oolagppa uɗat ɠagattag heehe, meu aakku bette.

Matyu 13:23

Aria, ee aeg wan enappa nena qeppig ele amu, nai amu inam ippunigtte. Danab nug nai daugppa doya dabmedatte, nai diig ele oo maidtte amu, nug meu ena otte, laa 100, laa 60, laa 30 eppakppanu eɗittak, anam otte,” awa aum.

Prowerb 9:9

Na danab doyak dabmak ena ele nai enappa doyak medappe, nug anamib doyak dabmak ena tuɗid ele daakku. Ao, na genab tutukku hak danab laa doyak aokkunu ippunidppe, nug tuɗid ele doyak okkai ele daakku.

Prowerb 1:5

danab nug oiyak ehanittaknu nai tutu, aria keeke danab ag dootteb ii dootteb ele ouaqata ippuanattak nai ele dookkunu, diig amu ohnu amu, oiyak ehanittaknu nai tutu imu am amunu daatte. Aria, danab nug doyak dabmak ena ele, nug daug huma doya, nug nuhig doyak dabmak ena ele nai imuppanu tuɗitta awaɗ! Ge, danab nug oo maittak awaknu ehah ele amu, nug ele nai imuppa ulum awaɗ!

1 Tesalonaika 1:6

Ag ihinig kobol dim lamidnana, Naɗinu ele dim lamidppig. Ag uug teppu ele maoppig, amge Kayaknu nai ii uuppig. Iitta. Ag Kayak Ouɗinu maɗoɗppan gamag ahak ele nai amu aoppig.

Jon 3:21

Amge laa nug doyak diig genabib kobol dim lamidtte, nug laa ag Kayak a doya hette miag atiak anidkkulagnu, nug amahlakppa daakkunu uɗia daatte,” awa aum.

2 Tesalonaika 2:10

nug danab ah, ag padal mekkulagnu oitteb ele, nug ib eheɗ digdigppa ag hambuppualadkku. Danab amu ag doyak diig genabib dooppig, amge ag uuppig. Ag ii uulob amu Kayak Nug eɗua diilo, amge iitta amunu, ag padal mekkulag.

1 Pita 2:2

Amu ag danab laa nug ee enanag laa lana enanag dootte, amubia ag Naɗinu enanag doona, ag Nug bekkod daatteb amunu, ag ena mekkulagnu, nid yuɗ ag huh aoglagnu oolag okkainab daatte amubia, ag Kayak nai, ag amu dooglagnu oolag dayaɗ!

Luk 24:44

Nug amelagppa aum. “Anukka da ag ele daatta, da ag amelagppa dahilnu nai oh Mosesnu ɗoppa, amu Kayaknu propet dilag yaakppa ele, nai amu oh bekkuoitte ami,” awa aum.

Aisaia 8:20

Gona, ag Kayaknu dabmak, nuhig ɗo naippa, nuhig nai laappa ele, ag amuppa anidna doyeg! Aun aɗi ag nai maditteb ele, ag Kayak nai bia ii maditteb dayeb, ag ahilagppa amahlak laa iitta.

Prowerb 8:10

Doyak dabmak ena ele am men laa onig rubi, daden nob okkainab ele, am amu eɗidtte. Aɗi keeke laa na aokkutnu oot huan daatte ele amu, keeke amu doyak dabmak ena ele ii eɗidtte amunu, na dahil ippunittak nai aokkutnu anuqak doon, silwa aokkutnu am anuqak aib doome. Ao, na doyak ena aokkutnu anuqak doon, na gol enanag aokkutnu anuqak aib doome.

Jems 1:21

Amunu kobol nau oh, kobol dubuttid oh ele, wan ohppa daatteb amu, ag amu oh maoppeg ukkeb, ag akka ag onilag qeppeg neeb, ag nai Kayak Nug ag oolagppa eppom daatte amu aweg! Nai amu nug ag eɗua diikkunu elele.

Sam 119:148

Am nahip nai na ame amu, da amu dabmedakkulnu, da tuqan ahe daattem.

Sam 119:100

Da nahip oo yaak nai ɗo bia, da nai amu dim lamitten oittem amunu, da diignu doyak tutukku dahil am okkai, danab kaino dilag eɗidtte.

Sam 119:97

O ⌊Yawe⌋, da nahip ɗonu oo mauhak naɗi doottem! Da deɗ oh amun tuqan ele da nahip ɗonu dabmak unuqag awewe daattem.

Aposel 10:33

Nug anam a amu da paha hei, danab laala na omaidkkulagnu ukkaeg, am na ena hena uɗime. Aria, ig oh Kayak noobppa inam daatta amu, Naɗi nuhig nai oh Nug na appe doognignu a doome ele amu, na appe doognignu daattem.” Kornilius nug Pita amegppa anam aum.

Aposel 2:41

Am danab ag Pita nai mattiom, ag amu genab doonna, ahilag ebqak am 3,000 keeke, amu ag layattak aoppig. Aona, ag Jesusnu oolagppa genab dooppig ele, ag amu oolagppa ukkaeg, oh laippu daanna,

Job 23:12

Da haknunab nai Kayak oɗeppanu doomi amu, da nai amu ii uumi. Da dim lamidmi. Ao, da ee lakkulnu ool hette, amge da Kayak nai, Nug oɗeppanu aomi amu, da nai amunu ool huanaknab hette.

Aposel 17:1

Pol, Silas ele aa Pilipainu ahaya goya, Ampipolis teya eɗidya goya, Apolonia teya, amu ele eɗidya goya, Tesalonaika tepiɗ. Aab amuppa amu, Juda dilag nai doyak lag laa dayom

Aposel 11:1

Aria totol danab laa, amu ag lailkad Juda wanppa daappig ele ag oh iitta aɗi ag ele Kayak nai aakku aoppig amu, ag dooppig.

Luk 16:29

Nug anam aum, amge Abraham nug aum. ‘Ag amu Mosesnu nai am Kayaknu propet dilag nai ele; ag am nai amu doyeg!’ awa aum.

Jeremaia 2:21

Israel danab ah, ag am muɗi grep danab eppom, amubia. Muɗi grep amuam enanag, meu okkunu elelenab, oɗe keeke iitta. Nug muɗi grep elele anam eppom, meu enanag aokkun dabmeum, amge muɗi grep ba, okkai ma, meu oum, me meu amuam ena iitta; am meu nau. Muɗi grep amuam eɗua, muɗi grep dakkuɗ, meu ena iitta ele beum. Amu ag Israel danab ah, ag dahilppanu anam bia aakku.

Duteronomi 29:29

Yawe, ihinig Kayak, Nug haen gemunu keeke, o butti aɗinu keeke amu, Nug amunu diignu doyak tutukku oh ig ii mekkom, amge ig, amu ig buɗunkad ele ɗo mekkom, Nug ig amu dim lamittaknu haknunab anak nai ihinignu aum.

Luk 1:2

Digmakppanu ukke batakppa danab ag keeke amu anidppig ele ag aeg doout yaappig. Ag am Nai Ena mehuqak danab daanna, nai amu aeg doomut.

Luk 11:3

Ig ee megattem ele amu, gemunu ele megakkutnu na oɗ medattem.