Aisaia 9:4 - Nobonob Baibel

⁴ Aɗinu ⌊ag anam gamalag ahakku⌋? Anukka na Midian ebehilag tappae ne, Midian danab ag Israel baula ii gumanna, baula uug laa ii madappig, amubia na kekeɗ ag aɗi keekeppa uug madappig, aɗi keekeppa guittak madappig amu, na keeke amu oh maduduɗna, tabappe nob, kekeɗ ag baula danab ah nahipad eheɗ iinab hattamna. Diig amunu ag anam gamalag ahakku.

Aisaia 9:4 Referans Kwoze

Aisaia 14:25

Da Yawe Dakka Ɠagattag Oh Ele, da geha heppi, Asiria ag uɗin, wan dahilppa daatteb, geha ag eheɗ naunab aoglag. Dahil qaukoppa, da ag tappaladppi nokkulag. Da heppi, geha danab ah dahilad, ag Asiria huu ehanadkkulagnu uɗat ɠagattag, guittak ele iinab hemana. Ao, ag Asiria dilag keeke uug okkai ele baula iinab maomna. Iitta!

Jeremaia 30:8

Haen amuppa amu, da Jakop buɗub ag danab laa waalagppa daamnanu da ehanadppi, ag anam ii daamna; danab nug doɗnu duugppan tuqai makau duugppanu loppaɗe, hamu oitte, amubia da hekkul. Jakop buɗub ag baula wan laihnu danab waalagppa daan, ahilag begbeg maɗi nid ii daamna.” Yawe Nukka Ɠagattag Oh Ele, Nug anam awa atte.

Nahum 1:13

Gemu ag Asiria waappa daan oitteb, amuam makau aɗit doɗnu duugppan tuqai qakkalatakppa uɗat heeheh, laa nug doɗnu duugppan tuqai qiia awe, makau aa hamu, uɗat ii heyaya oittep, amubia da heppi, ag Asiria dilag eheɗ hattak waappa ii daamna. Ao, da danab nug eppeg, baeg ele hippalak daatte, laa nug sen pakkua mette, nug hippalak ii daatte, amubia da heppi, ag Asiria dilag hippalakppa ii daamna.” Yawe Nug anam awa atte.

Aisaia 54:14

Ag genab tutukku hak kobol dim lamidnana, tutukku, ɠagattag anamib daaglag. Yawe Nug heeb, keeke laa ag baɗaglagnu ii daama amunu, eheɗ hak laa eppelagppanu amu, eheɗ hak amu ahilagppa bekkunu aib dabmeppig. Ao, Yawe Nug heeb, baɗak nau ag gukkuattak ii daama amunu, ag baɗak naunab ahilagppa bekkunu aib dabmeppig!

Aisaia 49:26

Laa ag Juda ahilagnu eheɗ hetteb ele amu, da heppi, ag akka akka ag teppulag lakkulag. Da heppi, ag akka akka ag tiilag lawona, danab nug wain la, kaaka qette bia daaglag. Da anam hekkul amunu, danab laa oh ag da Yawe, ag dahilnu, da am ag Juda, ahilag padal memananu ehanittak danab dayeye, da ahilag qagaiettakppanu eɗua uhuqaknu ehanittak dayeye, da am Yawe, da Laa Ɠagattag Okkai Ele, Jakop da binal meum ele amu, da anam daattem dooglag.” Yawe Nug anam atte.

Lewitikas 26:13

Da am Yawe, ahilag Kayak. Am ag tuɗidna, Isip dilag begbeg maɗi nid daamnanu, da ag Isipnu diie, omalatti uɗippig. Da hei, ag Isip dilag maɗi nid maɗi ah ele baula ii daatteb; ag gemu hamu, danab laa waappa ii daan, uɗa nak iitta ele oitteb.

Genesis 27:40

Nahip ban hakppa na keeke aon oikkut. Ao, na, na amap waappa daakkut. Na anam daakkut, amge dimppa na bahi yaak dookkut. Na anam doonna, na wagai mena, uug nug na medatte ele amu, na buɗippe gokku,” Aisak nug anam awa aum.

Aisaia 10:5

Amu Kayak Nug atte. “Asiria danab ah dilagnu am gadonnab gadon. Gemu Asiria nug da eppelppa bu aɗak bia da aɗai dayeye, danab ah ag da oo nauhak meɗatteb amu, da amuppa ag uug matte, eheɗnab mataɗadttem. Ao, Asiria nug da eppelppa daɗib bia da aɗai dayeye, da danab ah dilagnu oppoɗi bak huanak doyeye, amuppa bu madattem.

Sam 125:3

Anam amunu, nau hak danab ag genab tutukku hak danab iinab hanhan gumadmana. Ag anam helob amu, genab tutukku hak danab ag eɗun, nau helobtai.

Aisaia 51:13

Aɗinu ag anam baɗadna, ag da Yawe, da ag hattami amu, ag dahilnu daulag atitte? Da hab hein, da wan ele hemi. Aɗinu ag danab ag ahilagnu oppoɗi bak nau doon, ag ag waalagppa daaglagnu wagai mena, ag hadappeg nauhkkulagnu dabmetteb ele amu, aɗinu ag amu dilag hanhan deɗ oh eheɗ nau baɗan oitteb? Ag anam baɗan oitteb, amge amu dilagnu ag gemu adeppa daatteb?

Aisaia 47:6

Da dahilad danab ah, ag hipunin heppig amunu, da ahilagnu ool nauhe, da hei, Babilon ag wana, ahilag wan aon, ahilag daakkunu aɗappig. Da hei, Israel danab ah ag, ag Babilon eppelagppa daappig, amge ag Babilon ag Israel dilagnu oo gai-iitta doya oo metta ehanittak laa iinab heppig. Iitta. Ag nid bau dilag eheɗ hadappig, amge amuib iitta. Iitta. Ag ele ahilag eheɗ hak tuɗidna, wagai mena, ag Israel danab ah kaino dilag eheɗ hattanna, uɗat nau, uug ele ag madappig.

Sam 81:6

Kayak Nug atte. “Da ag gukkalagppan uug amu aɗatte aomi. Ao, da hei, ag baula uɗat uug ele, Isip danab ah ag heeg heppig ele, ag amu baula ii heppig.

Aisaia 9:5

Amu ban danab dilag keeke beɗulagppa mena gona, ban hetteb ele, amu oh geha aab eokku. Baeg gaɗa okkai okkai ahilkad, am bannu danab dilag lamen, tiilag laittak ele, amu oh geha aab eweb, iitta mekku.

Aisaia 16:4

Na Moap danab ah ag wan ahilagppanu oolna gona, laih daaglagnu gokkulag amu, ag uɗin, nahip wanppa daaglagnu, “Ao,” a! Yo, na ag ena daaglagnu, kekeɗ aqamanu, na ahilag guppiɗ daye! Danab nug Moap eheɗ hadakku, nug ag nug waappa daaglagnu wagai mekku amu, nug geha iitta mekku. Nug geha iitta meeb, wan he nauhaknu kobol amu ele iitta mekku. Haen amuppa laa nug Moap danab ah tappalatteb nokkulag amu, nug wanppa baula iinab daama.

Aisaia 52:2

Ag Juda danab ah, ag gappudppan aheg! Ag ahan, ag abenlagppanab dayeg! Ao, ag Juda danab ah, laa ag aɗalatte, ag nug eppegppa daatteb ele amu, ag sen ag baalagppa qakkak daatte uhuqna, qakkak iitta oiyeg!

Jeremaia 48:17

Ag huu laa oh Moap talilidna daatteb, ag huu laa ag nug onig okkai ele daatte dootteb ele, ag oh nuhignu mahieg! Ag nuhignu mahin, ag inam aig! ‘O gadonnab gadon, gumak laa ɠagattag okkai ele aakku na qeum. Ao, laa king ehah enanag ele, nug aakku na qeum.’ Ag anam aon aig!

Aisaia 10:16

⌊Keeke danab eppegppa daatte ele, keeke amu aha, danab aɗatte aben ii aotte, amge Asiria dilag king nug anam hekkunu hette⌋ amunu, Naɗi, Nug Yawe Nukka Ɠagattag Oh Ele, Nug heeb, oɗe nau nuhikkud daup ɠagattag aqeb, ag beɗulag aakku nauhkku. King amu nug ɠagattagnab, amge aab ewewe, ⌊ad keeke iitta mette,⌋ amubia Yawe Nug heeb, nuhig ɠagattag iitta mekku.