Aisaia 9:13 - Nobonob Baibel

¹³ Anam bekku, amge Israel danab ah ag amu anidna, amuppa oolag eɗueb, laa ag bu madakku ele gumidna iinab gomana. Ag eɗun, Yawe Nukka Ɠagattag Oh Ele, Nug anidna dim lamidkkulagnu ii mattimna.

Aisaia 9:13 Referans Kwoze

Hosea 7:10

Israel danab ah ag am beɗuppa tak danab ah. Ahilag beɗuppa tak kobol am he, ag eheɗ hetteb am miag atiak daatte, amge ag Yawe, ahilag Kayak, ag eɗun, Nug waappa daaglagnu, o Nug mattin anidna dim lamidkkulagnu ii hetteb.

Jeremaia 5:3

Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.

Aisaia 31:1

Aun aɗi ag Isip appanu ehanittak aoglagnu dabmetteb amu, ahilagnu am gadonnab gadon. Ag bannu hosppa ⌊Isipnu⌋ ehanittak aoglagnu dabmetteb. Ag Isip dilag daup bannu karis kuɗum eleppa daan, ban hetteb doon amunu, bannu karis amuppa ehanittak aoglagnu oolagppa genab dootteb. Ao, ag Isipnu ban danab kuɗumnab hos attan daan oin, ban hetteb doon amunu, ahilagppa ehanittak aoglagnu oolagppa genab dootteb. Ag anam dabmetteb, amge ag Israel dilag Kayak Oppiaawak Ele, ag nuhig dabmak aoglagnu oɗ ii medatteb. Ao, ag Yawenu, ag ehanittak nuhigppanu aoglagnu ii dabmetteb. Ag anam hetteb amunu, ahilagnu gadonnab gadon.

Aisaia 1:5

⌊O Israel danab ah,⌋ aɗinu ag nai tappe nak kobol tuɗidna henana oitteb? Aɗinu ag bu baula aoglagnu hetteb? Israel ag nid laa, hibguitta haaha, bu awe, mukki gaɗa laɗue ukke, beɗu laa oh ele ihi mettom, ag amubia nauhppig daatteb. Ao, Israel ag nid laa beɗu oh oɗe ele, amubia ag nauhna autna aoppig daatteb.

Hosea 7:16

Da am Kayak Attannab Laa Oh Eɗattak daattem, amge da ag ehanadkkulnu gumiɗna ii uɗitteb. Ag am lat tanig laa lat doɗo pehetta ii ette, ag amubia daatteb. Israel dilag ikki danab ag dahilnu eheɗ doon dahil nai tappaeg ne oippig amunu, kekeɗ ahilkad geha ag qep elabppa aqaglag. Diig amunu Isip danab ah geha ag imadkkulag.” Yawe Nug anam aakku atte.

Hosea 5:15

Da dahilad danab ah guittak mattoya, da eɗue ukken, da daattemppa daappi ukkeb, dahilad danab ah ag, ‘Ig eheɗ hemut, ig hipunin ele,’ dooglag. Haen amuppa ag da aniɗna dim lamiɗkkulagnu mattiɗkkulag. Ge, ag uug nau doon, ag oolag unuqagppanu da aniɗna dim lamiɗkkulagnu mattiɗkkulag,” awa aum.

Esekiel 24:13

Jerusalem danab ah, ag kobol nau heppig; ag gappai heeb baknu kobol dim lamidppig. Anam amu, da heppi, ag oppiaawak daaglagnu hemi, amge ag uun, dubuttid ele daaglagnu heppig. Anam amunu, ag bu awak iitta eleppa oppiaawak baula ii daamna. Iitta. Da ahilagnu oppoɗi bak doottem, amu da bu eheɗ madappi ukkeb, gogppa teeb, dahil oppoɗi bak oug meeb, ag oppiaawak daaglag.

Jeremaia 29:11

Aɗinu da, Yawe, da anam hekkul? Da ag Juda, da ahilagnu maittak ena laa ele aɗe daattem. Maittak amuam, da heppi, ag maɗoɗ ele daaglag. Da eheɗ hadakkulnu maittak aɗe ii daattem. Da ag, ag ena bena, baɗak iitta daaglagnu dabmak aɗan oiglagnu maittak aɗe daattem.

Aisaia 57:17

Da dahilad danab ag baubau awaknu hik aqeeqe eheɗ heppig amunu, da oppoɗil eheɗ beum. Da amu antten, da oo nauhak doyeye, da bu matten, dimattami. Da amu hemi, amge ag doonna, tuɗidna eheɗ heppig.

Aisaia 26:11

O Yawe, na nau hak danab ah ele nob nau madakkutnu na eppen humame daattem, amge ag amu ii dabmetteb. Anam amu, na nahipad danab ah ehanadkkutnu yag-nab-bak doottem ippunadppe, nau hak danab ag amu anidna, dabmak eheɗ aoppig dooppeg, uɗalag nekkunu ool daatte! Ge, na heppe, aab aɗu na nahipad kekeɗ dilagnu bappaidme amu, aab aɗu amuam hipunin danab ah ewadkkunu oɗ medattem.

Job 36:13

Danab ag Kayaknu nuhig haknu ele uuak dootteb amu, ag oolagppa oo aeg bak ambak daatte; Kayak ag dabmak eɗuglagnu dabma, amunu qakkaladtte amu, haen amuppa ele ag amu dabmenana, Nug ag ehanadkkunu onigppa ii etteb.

2 Stori 28:22

Uug digdig amu be, King Ahas nug doyom, amge uug amu beebe, nug eɗua, Yawe dim ii lamittom. Iitta. Nug tuɗitta, Yawe ippunittomnu oo metta ii uuak kobol dim lamidkkunu uua auta autanab awa oiyom.

Duteronomi 4:29

Ag geha wanppan wan laalappa anam appa daanna, ag Yawe, ahilag Kayak, ag Nug anidna dim lamidkkulagnu Nug mattiglag. Amu ag meulag ohppa, oolag ohppa ele Nug anidna dim lamidkkulagnu Nug mattiglag dayeb, haen amuppa ag Nug anidkkulag.

Jeremaia 15:7

Danab nug ulah ee aeg dappunkkeg iwale ukkaknu uɗat hette, amubia ikki danab dilag qagmak aben aab okkai odppa daatte, da appa heppi, Juda danab ah ag ahilag wanppa ii daamna; ag umanab gona, diia ukka laih me dayak danab ah daaglag. Ag oolag eɗueb, da oɗel dim lamittaknu uun oitteb amunu, da heppi, ag oolagppa guittak doon, ag ele nauhkkulag.

Esekiel 22:24

“Danab bekka, na Israel danab ah oh amelagppa ag oppoɗi bak deɗppa, ag gu okkai, o gu nakok laa ii aomna appe doyeg!

Daniel 9:13

Moses ɗoppa yom bianab uug naunab amu oh ihinigppa beum, amge ig na ihinignu oot gai-iitta doon oot mekkan ehanigkkutnu ig ihinig hipunin ii dimettat, ig na Yawe, na ihinig Kayak, ig nahip doyak diig genabib ii dabmetat dim lamidmut.

Amos 4:6

Amu Yawe Nug atte. “Da hei, ag aab okkai ohppa ee iitta daappig. Ao, aab naunau ohppa ag bret iitta daappig, amge ag eɗun, da dim lamiɗkkulagnu da gumiɗna ii uɗippig,” awa atte.

Amos 4:10

Yawe Nug anam ana amu, Nug atte. “Da anukka Isip danab ah uug naunab aqadkkunu hei aqom amu, da uug amuib ag Israel, ag aqadkkunu hei aqom. Ao, da hei, ban ahe, ahilkad nid bau ag banppa daan, qep elabppa mauhegeg, kekeɗ ag ag Israel, ahilkad bannu hos ele diin aqatteg mauhppig. Ge, da hei, anam be, danab, hos ele gaɗalkad beɗaegeg, uɗig nau ahilag haen tutu dayaknu aab kalappigppa dayom. Keeke amu oh ahilagppa beum, amge ag eɗun, da dim lamiɗkkulagnu da gumiɗna ii uɗippig,” awa atte.

Sepanaia 1:6

Da heppi, laa ag anukka da noolppa dup nona binal meppig, amge ag uun uuiɗna, kayak laanu dabmetteb; ag da, Yawe, ag da aniɗna dim lamiɗkkulagnu ii mattiɗna, ag da ulum madakkulnu oɗ ii meɗatteb amu, da ag ele heppi, ag nauhkkulag.” Yawe Nug anam awa atte.

Aisaia 7:20

Am haen amuppa Naɗi Nug geha Asiria dilag king, ⌊ag nug ehanatteb, padal ii memananu dabmena, ɗo naɗi nug medappig,⌋ Nug nug le Yupretis heqo laihppanu awa heeb, nug geha Naɗinu resa bia dayaya, Juda beɗulkad uɗig hoikku. Nug ikkilag uɗug hoya, akkaɗilag hoya, baelag uɗig ele oh hoikku.

Aisaia 19:15

Isip ag laippu laa nug Isip ehanadkkunu laa iitta. Danab nug danab okkaitai, o danab okkai iittatai, danab nug keeke kuɗum eletai, o daɗek danabtai, ag oh am melemel laippu. Laippu laa nug Isip danab ah ag ehanadkkunu laa iitta.