Aisaia 59:12 - Nobonob Baibel

¹² Aɗinu ig amu ii anidttem. Ig hipunin kuɗumnab hetat oitut, na, Yawe, na hipunin amu oh anadttem. Ao, danab hettoɗiakppa layag eheɗ heumnu atte amu, ihinig hipunin ag ihinignu na amenppa anam bia hetteb. Eheɗ hak ihinig am laa nug he ii iitta meppig; amu ihinigppa ina daatteb. Ao, ig hipunin digdig hemut amu, ig amu aakku doottem.

Aisaia 59:12 Referans Kwoze

Esra 9:6

da unuqitten ami. “O Kayak dahil, da uɗa nak nau doottem. Da uɗa nak nau guittak ele doottem waappa dayeye, da amel hume, na neekkidkkulnu elele ii doottem. Aɗinu? Ig hipunin okkainab hemut, ikkinig eɗitta tak. Ao, ig beɗunigppa aab okkainab daatte, ⌊aab ewawa⌋ habppa tette, ⌊amubia⌋.

Hosea 5:5

Israel danab ah ag am beɗuppa tak kobol hetteb, amu kobol amuam naippa yaaladtte. Israel danab ah, ahilag wan onig laa Epraim, ag hipunin henan, taataɗ qedatteb, Juda danab ah, ag ele oh laippu taataɗ qedatteb.

Hosea 4:2

Ag ahilag wanppa nai ɠagattag qetta mattiowa, nai amu ii dim lamittak kobol, hambuppuak kobol, laa qe mauhak kobol, yabhok kobol amu ewau pakkua gappai hak kobol ele ambak daatteb. Ag ɗo waappa iinab daatteb. Ag laa makkuɗona, haen elab iitta, laa ele makkuɗtteb.

Esekiel 5:6

Amge Jerusalem danab ah ag nau henana, ag dahil ɗo iɗu iɗunu nai tappaeg neum. Wan laappan danab ah ag ele dahil ɗo iɗu iɗu tappaeg nette, amge Jerusalem danab ah ag amu huana, laa oh eɗattak hetteb. Aɗinu? Jerusalem danab ah ag dahil ɗo iɗu iɗu uun, dim ii lamittegeg uɗie, gemu ele anamib hetteb,” awa atte.

Jeremaia 14:7

⌊Yawe Nug gu ii nekkunu anam mattie, da unuqitte ami.⌋ “O Yawe, ig hipunin hemut, amge na, na oninnu dabmak anuqak aon, na ehanigkkutnu unuqidttem. Ig haen kuɗum na dimedata autta aomut. Ao, ig nahip-ppa hipunin hemut.

Aisaia 1:4

O gadon! Israel danab ah ag hipunin danab ah daatteb. Ag beɗulagppa aab okkainab ele. Israel anilkad mamelkad ele, ag nau hak danab ah. Kobol diig ena iitta uɗig wak ele Israel beɗulagppa ambeum daatte. Ag Yawe uuidppig oitteb. Ag Yawe, Nug am Israel, ahilag Kayak Oppiaawak Ele amu, ag nuhignu uuaknab doon oitteb. Ag Nug dimettan autna aoppig oitteb.

Hosea 7:10

Israel danab ah ag am beɗuppa tak danab ah. Ahilag beɗuppa tak kobol am he, ag eheɗ hetteb am miag atiak daatte, amge ag Yawe, ahilag Kayak, ag eɗun, Nug waappa daaglagnu, o Nug mattin anidna dim lamidkkulagnu ii hetteb.

Esekiel 7:23

Juda wan ohppa layag duug wak kobol am ambak daatte. Aab okkaippa amu, danab laa nug danab laa guittak nau mauhnoak medatte. Anam amunu, Israel danab ah eppelkad qakkaglagnu, ag sen bappalatteg!

Jeremaia 3:2

Ag Juda danab ah ag qauko ikkilkad ohppa neegna, ahilag hak antteg! Ib baag ah nug aben ohppa danab kuɗum ele niitteb, amubia ag Juda ag qauko ohppa kayak hambuppuak noolagppa dup nona binalag meegeg uɗie, gemu ele hetteb. Ag danab nau, nug laanu keeke yab aokkunu ib meitta daatte bia, ag kayak hambuppuak digdig aoglagnu heegeg uɗie, gemu ele hetteb. Ag kayak hambuppuak noolagppa dup noa binag mak kobol, amuam gappai kobolbia, ag kobol amu henana, ag nau hak kobol digdig laa ele heegeg uɗie, gemu ele hetteb amunu, ag kobol amu hettebppa, ag amuppa heeg, wan am dubuttid tak ele daatte.

Aisaia 3:9

Ag hipunin hetteb amunu, ag oolagppa aab daatte. Aab amu daya, aab dayak amu ag iɗulagppa danab ah anidkkulagnu bette. Ag Sodom danab anukka heppig bia, ag miag atiak hetteb. Hipunin ag hetteb ele, ag lokkumak ii hetteb. Ahilagnu amu, gadonnab gadon. Aɗinu? Ag bu nau aoglag. Ao, ag akka ag beɗulagppa, ag bu nau amu aoglagnu ib ooɗppig daatteb.

Nehemaia 9:33

Na ihinigppa aɗi aɗi heme amu, na oo metta ii uuak kobol aakkuib dim lamidna heme. Ig, ig nau hemut amunu, uug oh ihinigppa beppig amu, amuppa na nai doya mala hettoɗia epeɗia elele mettak kobol dim lamidme.

Esra 9:13

Ag ig amenigppa anam appig, amge ig mamenkad, ig ele, ig nahip nai dim ii lamidmut amunu, uug ihinigppa beum; am ihinig eheɗ hak, diig amunu beum. Ge, ig beɗunigppa aab naɗi dayom amunu, uug amu ihinigppa beum. O Kayak ihinig, ig nau anam heut, na bu eheɗ nau megakkutnu elele, amge na nob aɗae ne, ig oh ii mauhmut; ig laippu laippu oɗo yaak danab iikku daattem.

Namba 32:23

Amge ag keeke, da ag hekkulagnunab ippunadmi imu, ag ii heppeg amu, ag aakku Yawe, nuhigppa hipunin hekkulag. Ag aibnab dabmak hambuppuak aoppig! Ag hipunin qewona amu, ag hipuninnu nob nau aoglag.

Sam 51:3

Aɗinu? Da hipunin hemi amu, da doottem. Yo, da hipunin hemi amu, da amu daul atikkunu elele iitta.

Aisaia 58:1

Yawe Nug atte. “Ag laa, ag dahil nai mattiglagnu daatteb, ag Israel danab ah ag dahil nai dooglagnu nai amu huana eppeg doyeg! Ag qinonob aib madippig! Trampet huana gaatte bia eppeg doyeg! Ag dahilad danab ah, ag da waalppa daaglagnu uun, dahil nai tappaeg neene oitteb, ag amunu appeg doyeg! Ao, ag Jakop buɗub, ag hipunin digdig henan oitteb amu, ag amunu appeg doyeg!

Habakuk 1:4

Laa ⌊ag ɠagattag ele⌋ ag amu hetteb amunu, ɗo ahilagnu aɗi haknu atte amu, laa nug amu ii hette. Nai doya mala hettoɗia epeɗia elele mettak kobol na qeum daye, laa amuppa ehanittak laa ii aotte. Diig amunu nau hak danab ag genab tutukku hak danab eheɗ hattana, babaittaknu ib heeg, keldoak daatte amunu, genab tutukku hak danab ag qakkak daan, keeke laa hekkulagnu elele iitta bia daatteb. Ao, nau hak danab ag anam hetteb amunu, nai doya mala hettoɗia epeɗia elele mettak kobol ii daye, kobol kaliak ele daatte.” Da na amenppa anam awe attem.

Aisaia 64:4

Amu anukkanab, digmak haenppa uɗie, gemu ele auntai laa na heqonppa kayak laa dayaya, laa ag nug dim lamidtteb ele ehanadtte laa anttomte? Iitta! Laa anam ii daatte. Auntai laa kayak laa, nug laa ag nug dim lamidtteb ele ehanadtte, laa kayak amunu daugppa doyomte? Iitta! Laa iitta.

Esekiel 7:16

Danab ah aun aɗi ag ii mauhkkulag amu, ag oolna, qaukoppa gona, appa ag oh anen anen ahilag hipuninnu dabmenana, uppuɗil beɗulag nakok ele oolnu noakppa daatteb, uppuɗil amu ag oo doyak ele gaatteb, danab ah ii mauhkkulag amu, ag amubia gaaglag.