Aisaia 53:11 - Nobonob Baibel

¹¹ Amu Yawe Nug atte. “Dahil maɗi nid, nug genab tutukku hak kobolib dim lamidtte amu, Nug guittak amu mawa malowa, nug bau dayaya, ⌊danab oolag eɗueb ele antta,⌋ elele dookku. Dahil maɗi nid nug nuhig doyak, nug amuppa heeb, danab ah kuɗumnab ag genab tutukku hak danab ah daaglag. Nug ahilag hipunin mawa heeb, iitta mekku.

Aisaia 53:11 Referans Kwoze

1 Pita 2:24

Ig hipuninnu begbeg maɗi nid daamtanu, ig Kayak dim lamidta genab tutukku hak danab daagnignu, Jesus Nug ihinig hipunin oh ad emaitakppa mawom. Genab, Jesus nug guittak awe, ig amuppa elele daattem.

Rom 4:24

Iitta. Ihinignu ele aakku atte. Ig Kayak Nug he, Jesus, ihinig Naɗi, Nug eɗua hibaittom amu, ig nuhignu oonigppa genab doottem, amu Kayak Nug ihinig ooppa genab doyaknu amu ele antta, ihinignu, “Ag am genab tutukku hak danab,” atte. Amunu nai amuam ig oh, ihinignu nai.

Jon 17:3

Bauklel hanhannu, amuam danab ag na Kayak, na nakkaib am Kayak genab, amu da, na bekkat, na da meiɗe uɗimi amu, ag i oh dooitkkulagnu daatte.

Aisaia 53:12

Diig amunu da heppi, Nug danab ah oolagppa okkainab daya, Nug banppan awak keeke laa ag Nug dim lamidna, danab ɠagattag daatteb ele, Nug ag madakku. Da heppi, anam bekkunu diig laa am, nug doyaya, nuhig bauklel uua dayom. Laa am, ag nug danab nau ele laippu qagmaadna ⌊qeeg mauha, amuppa nug eheɗ haknu nob nau iitta mekkunu he elele mettom⌋. Laa am nug danab ah kuɗumnab dilag hipunin mawom. Amu laa am, Nug danab ah hipunin heppig ele, Nug amu dilagnu unuqittom,” awa atte.

1 Pita 3:18

Kristus Nug hipunin uhuqa mettaknu haen laippu aakku mauhom. Nug baula ii mauhma. Nug beɗuppa aab laa iitta, amge Nug ig danab, ig beɗunigppa aab ele, Nug ig omaikka, Kayak toppa wakkunu Nug mauhom. Ag heeg, Nug beɗu mauhom, amge Kayak Ouɗi Nug he, Nug eɗua hibaitta, bauklel daatte.

Hibru 12:2

Amu ig amenig ukkeb, Jesus, Nug am ooppa genab doyaknu diig daatte, Nug ooppa genab doyak ihinig elelenab medakku diig ele amu, ig Nug anidtu! Jesus Nug anukka maɗoɗppan gamag ahak geha dimppa anidkkunu dabmeum amunu, Nug ɠagattag dayaya, ad emaitakppa uug doyaya, guittak awa mauhom. Ad emaitakppa mauhaknu amu uɗa nak ele, amge Nug dimppa maɗoɗppan gamag ahak okkai aokkunu dabmaama, uɗa nak amunu dab-ii-meum; am keeke hamu bia doyom. Nug amu hewowa, Nug hab aabppa, Kayak eppeg naɗiap-ppa heɗep na dayom.

1 Jon 2:1

O nid naunau dahilad, ag hipunin ii hemananu da nai imu ye madattem. Amge laa nug hipunin hekku amu, ihinig ehanittak, Nug am gamag danab, Nug Mame toppa daatte. Nug Jesus Kristus; Nug am genab tutukku hak danab.

Hibru 9:28

amubia Kristus Nug danab kuɗum dilag hipunin uhuqa madakkunu Nug nukka haen laippu aakkuib, Nug beɗu mana mettak bia Kayak mettom. Nug anam heum amu dimppa Nug baula eɗua uɗikku, amge hipunin uhuqkkunu iitta. Nug danab ameg mena daatteb ele amu eɗua diikkunu uɗikku.

1 Korint 6:11

Anukka ag oolagppa laala amubia oittappig, amge Kayak Nug he, hipunin ahilag iitta meum. Nug he, ag oppiaawak daatteb. Kayak Nug he, ag genab tutukku hak danab ah daatteb. Ihinig Kayak Nug amu oh Naɗi Jesus Kristus onigppa, amu nuhig Ouɗippa ele heum.

Jon 16:21

Ah nug nid menukkunu haen male, nug guittak dootte, amge nug nid menuowa, nug baula guittak ii dabmette. Aɗinu? Nug nid menue doum amunu, nug maɗoɗppan gamag ahak dootte.

Matyu 20:28

Yo, nug Danab Bekkalag da, da hettem amubia haɗ! Am inam. Danab Bekkalag da, da wan imuppanu danab ah ag da ehaniɗkkulagnu ii uɗimi. Iitta. Da ag ehanadkkulnu uɗimi, amu da dahil mauhakppa danab ah kuɗum eɗue diiadkkulnu ele uɗimi,” awa aum.

Aisaia 53:8

Ag ɠagattagppa aɗan, nai tutukku iittappa, “Nug mauhkkun daatte,” anan, qeppeg mauhkkunu aon goppig. Ag anam heppig, amu laa nug nug buɗubnu akkunu elele iitta. Aɗinu? Ag nug qeeg mauhom. Ao, ag dahilad danab ah dilag hipuninnu, nug qeppig.

Aisaia 45:25

Amge geha Israel buɗub oh ag Yawenu ehanittakppa genab tutukku daan, ag gamag ahak okkainab dooglag.

Aisaia 42:1

Yawe atte. “Antteg! Imuam dahil maɗi nid; da nug haen oh elele daakkunu ɠagattag medattem. Ao, imu amu, da nug tituanmi; da nuhignu enanagnab doottem. Da dahil Ouɗi Nug medappi, dahil maɗi nid nug danab ah oh nai doya mala hettoɗia epeɗia elele mettak kobol ippunadkku.

2 Jon 1:3

Anam amu, ig Mamenig Kayak, Nug Bekka Jesus Kristus ele, aa doyak diig genabib, oo mauhak kobol ele dim lamidya, aa ehanittak okkai hamu mettak, oo gai-iitta doya oo metta ehanittak, amu maɗoɗ ele ig mekkaglah.

2 Jon 1:1

Da Jon, da Kayaknu tamaniaknu ikki danab laa, da nai imu yaattem. Da na ah Kayak tituanittom, nahipad nid naunau ele, da ag oh ahilagnu yaattem. Doyak diig genabib ihinigppa daatte, haen oh ele daakku amunu, da genab ahilagnu ool mauhtte. Am daib iitta. Laa ag doyak diig genabib dootteb amu, ag ele amubia ahilagnu oolag mauhtte.

2 Pita 3:18

Amge ihinig Naɗi Jesus Kristus, Nug am ihinig Padal ii maknu ehanittak daatte, ag nuhig ehanittak okkai hamu mettak, amu nuhig doyak ena ele, amu waappa ena daanna, amuppa okkai mekkulagnu uɗat heig! Ig Nug binag naɗi gemu, haen oh ele metu! Genab.

Galesia 4:19

O nid dahilad, da ag Kristen bekkulagnu guittak naɗi, ah nid menukkunu guittak dootte, amubia doomi, amu gemu da ag Kristus daatte bia bekkulagnu guittak amubia baula doottem.

Rom 5:9

Kristus ig ounig mauha, Nug tiig gokkaɗom amunu, ig ib amuppa genab tutukku hak danab bemut daattem. Aria, ig nau daautut, Kristus ehanikkom dayeb amu, gemu Nug Kayaknu oppoɗi bak, Nug ig amuppanu genabnab genab iite eɗua awigkku? Yo, Nug eɗua awigkku.

Jon 12:24

Genabnab genab da ag amelagppa attem. Wit aeg nug qaɗu bekkunu wanppa ii na qekku, aeg nug ele ii nauhkku amu, aeg nug aakkuib daatte, amge nug wanppa na qa nauhkku dayeb amu, nug bau ba, meu huanak otte.

Luk 22:44

Jesus Nug beɗuppa uug nau, mauhak bia doyaya, Nug oo unuqagppanu unuqittette, heɗi tiig bia na, wanppa noum.))

Aisaia 49:3

Yawe Nug da amelppa aum. “Na am dahil maɗi nid; Israel ⌊daalob bia, na⌋ daattem. Da heppi, danab ah laa ag nahip hak anidnana, ag da binal humaglag,” awa aum.

Aisaia 52:13

Yawe Nug atte. “Antteg! Dahil maɗi nid nug doyak dabmak okkai ele dim lamitta, nuhig hak hekku. Nug onig okkai, binag okkai ele aokku.

Daniel 12:3

Laa ag doyak dabmak ena ele ag hab attan amahaltte, ag amubia amahalkkulag. Ge! Laa ag heeg, danab ah kuɗum ag kobol genab tutukku dim lamidtteb ele, ag hoɗoppai amahaltte bia amahalkkulag. Ge, laa ag heeg, danab ah kuɗum ag kobol tutukku dim lamidtteb ele, ag hoɗoppai amahaltteb bia hanhan amahalkkulag.

Daniel 9:24

Kayak Nug nahipad danab ah Israel, ag daanna anidkkulagnu, nahip aab okkai Kayaknu tituanak daatte, Jerusalem, amu tonakkunu, Nug haen maha 70 ba gokkunu ɗo laa aakku meum. Haen maha 70 amu bekkunu diig anen anen am inam: Haen maha amuppa Kayak Nug heeb, danab ah ag nai tappe nak kobol uuglag. Nug heeb, ag tuɗidna hipunin ii hemana. Nug eheɗ haknu nob nau nuhig ehanittak okkaippa iitta mekkunu heeb elele medakku. Nug heeb, kobol genab tutukku hanhannu bekku. Nug heeb, nuhikkud danab ag tulegleg genabppa aɗi aɗi keeke anidppig, propet ag dimppa bekkunu nai madippig ele amu, keeke amu oh meu okku. Amu Nug heeb, aben laa tituanaknab daakku.