Aisaia 51:11 - Nobonob Baibel

¹¹ Anam amu, danab ah Yawe Nug ehanatte, ag qagaiettakppa ii daatteb ele, ag eɗun uɗiglag. Ag eɗun uɗin, gamag ahak, amu maɗoɗppan gamag ahak ele Sion tena, hanhan oo gamag ahak amu doon daaglag. Oo gamag ahak amu ahilagppa ambak dayebeb, uugnu oo doyak, oo uug mettak ele amu, ahilagppa nakok laa iinab daama.

Aisaia 51:11 Referans Kwoze

Aisaia 25:8

Naɗi Yawe Nug geha mauhak amu heeb iitta meeb, geha mauhak amu ahilagppa ii bema; hanhan anamib daakku. Nug geha danab ah oh amelag leb amu oppieb, iitta mekku. Amu Nug geha danab ah nuhikkud wan ohppa uɗa nak nau guittak ele ahilagppa daatte amu heeb, iitta mekku. Yawe Nug anam mattiom daatte amunu, am anam bekku.

Revelesen 21:4

Kayak Nug heeb, amelag leb am iitta mekku. Danab ah ag baula ii mauhmana, ag baula ii mahimna, ag baula ii gaamna, amu ag guittak ele baula ii doomna. Aɗinu? Anukkan keeke amu oh iitta meum.”

Revelesen 7:17

Aɗinu? Sipsip Nag Nug gamagppa sia king ⌊anuqak⌋ guguittak daatte amu, Nug ahilag gumak danab ena dayaya, geha gumattebeb gona, moɗ laappa, le qeppuɗia bette ele, amuppa ag bauklel le aoglag. Amu Kayak nug geha amelag leb oh amelagppanu obikku,” awa aum.

Aisaia 35:10

Ao, danab ah Yawe Nug ehanatte, ag qagaiettakppa ii daatteb ele, ag eɗun uɗiglag. Ag eɗun uɗin, gamag ahak, amu maɗoɗppan gamag ahak ele Sion tena, hanhan oo gamag ahak amu doon daaglag. Oo gamag ahak amu ahilagppa ambak dayebeb, uugnu oo doyak, oo uug mettak ele amu, ahilagppa nakok laa iinab daama.

2 Tesalonaika 2:16

Aria, ihinig Naɗi Jesus Kristus Nugnab, amu ig Mamenig Kayak, Nug ihinignu oo mauhom, Nug nuhig ehanittak okkai hamu mettakppa oo ɠagattag qak hanhannu, ena baknu dabmak aɗa oiyak enanag ele mekkom amu, aɗit amu aa hepeɗ,

Aisaia 61:7

Danab ah dahilad ag uɗa nak nau dooppig, amge Yawe Nug ehanatteb, ag enaib daaglag. Ao, danab ah dahilad uɗa nak nau guittak ele dooppig, amge dahilad danab ah ag keeke Yawe eppegppan aoglag, amuam ag aulag amu, ag amunu oo gamag ahak okkai dooglag. Yawe Nug anam ehanadkku amunu, ag ahilag wanppa daanna, Nug eppegppan keeke okkai okkai, tatam awak huan eɗittak aonna, ag hanhan oo gamag ahak doon oiglag,” awa atte.

Jeremaia 33:11

ag gamag ahak okkai doon oiglag. Danab ah ele ag ewau matulak aonna, ag gamag ahak doon oiglag. Danab ag Yawe laugppa daan, ena heme anaknu ofa hekkulag. Ag doɗ amu main, Yawe mettanna, ag inam akkulag. ‘Yawe Nug am enaib. Ao, nuhig oo mauhaknab kobol ii iitta mette. Anam amunu, ig Yawe Nukka Ɠagattag Oh Ele, ig Nug amegppa “Ena hen mekkame,” aot atu!’ Ag anam akkulag. Ag anam akkulagnu diig am, da heppi, ag ahilag wanppa enaib daaglag.” Yawe Nug anam awa atte.

Revelesen 22:3

Amu keeke oh, Kayak Nug amunu oo iinab dayom ele amu, Kayak Nug heeb, iitta mekkulag; keeke amu baula ii daamna. Kayak amu Sipsip Nag ele, ahilah sia king aab amuppa daakku. Dayeb, Kayaknu maɗi nid ag Nug waappa daan Nug oɗe dim lamidkkulag.

Jut 1:24

Aria Kayak Nug ag dabmatta auta aweb, ag ii nena qemananu elele daatte, Nug nukka ag diia, Nug noobppa, aben amuam binag amahlak oppiaawak ele, appa nuhig neekkakppa ag oolagppa kaliak laa iitta ele, maɗoɗppan gamag ahak naɗi eleppa maatteb daaglagnu ele elele daatte.

Aisaia 65:19

Da Jerusalemnu ool gamag ahakku. Ao, da dahilad danab ah dilagnu enanagnab dookkul. Amu da heppi, dahilad danab ah ag baula ii gaamna, ag ele ii mahimna. Amuam baula ii daamna. Iitta!

Aisaia 44:23

Yawe Nug keeke okkai heum amunu, ag habppanu, ag oo gamag ahak okkai doon, ahi etteg! Ag wanppa daatteb, ag huana eig! Yawe Nug Jakop buɗub hipuninnu qagaiettakppanu eɗua uhuqak ha mattom; Nug nuhig binag amahlak oppiaawak ele Israel oolagppa he, miag atiom amunu, wanppan keeke oh Yawe hattom ele amu, ag ahi etteg!

Aisaia 49:13

Yawe Nug danab ah nuhikkud oo mak madatte, Nug nuhikkud danab ah bu okkai aoppig dilagnu oo bodoetta le mak dootte amunu, ag hab daup, ag oo gamag ahak doon, baalag okkaippa eig! Yawe Nug anam hette amunu, danab ag oo gamag ahak dootteb, amubia keeke oh wanppa daatteb, ag oolag gamag ahaɗ! Nug anam hette amunu, danab ag oo gamag ahak doon, ahi ettaladtteb, amubia ag qauko, ag oo gamag ahak doon ahan, ahi etteg!

Aisaia 48:20

⌊Yawe Nug atte.⌋ “Ag Babilonnu ahan ukkeg! Ao, ag Babilon oolagppanu ahan, oolna ukkeg! Ag gonana, ag, ‘Yawe Nug ig Jakop buɗub, nuhikkud maɗi nid maɗi ah ele, Nug ig laa eppelagppa dayaknu qagaiettakppanu eɗua uhuqak ha mekkom,’ mattinna eig! Ag wan atu ohppan danab ah dooglagnu nai amu appeg doyeg!

Revelesen 21:1

Aria, amu dimppa da aakku hab bau wan bau ele anatmi. Hab tatamnu wan tatamnu ele aa iitta mepiɗ, amu yu nug ele iitta meum.

Sam 126:5

Danab ah ag uɗat huana henana, gayak ele dad ebatteb ele amu, ee meu awak haenppa, ag meu aona, gamag ahak okkainab doon, baalag okkaippa na binan mekkulag.

Aisaia 11:15

⌊Amge haen Israel, Juda ele ag eɗun ii uɗippeg, haen amuppa⌋ Yawe Nug heeb, le kokoɗ uttug laih qaɗaietteb, Nug heeb, ulah gakkaɗak naunab ele uɗia, le Yupretis heeb, oppata, le naunau eblaih aɗit ele beeb, danab nug le mataɗkkunu uug iitta doya mataɗkku.

Aisaia 55:12

Anam amunu, ag diia ukka laih me dayak danab ah, ag Babilon uuna, ag oo gamag ahak okkai doon gokkulag. Ag maɗoɗ ele gokkulag. Ag gonana, ag qauko okkai, qauko nakok ele dilagnu, “Ag ahi ettaegeg gottem,” dooglag. Ag gonana, ag adnu, “Ag oo gamag ahak doon, eppelag tap qeegeg gottem,” dooglag.

Aisaia 65:14

Dahilad danab ah ag oolagppa oo gamag ahak ele doon, ag ahi ettaglag, amge ag nau hetteb ele, ag oolagppa guittak nau doon, ag eheɗ gaaglag. Ag eheɗ nau doon, ag mahiak okkainab hekkulag.

Jeremaia 31:13

Haen amuppa, nid ahin bau ag oolag huana gamag aheb, ag goɗaglag. Yo, danab bau, amu danab kaino ele ag oolag huana gamag ahakku. Yawe atte. “Ag oolagppa uug doon mahiglag, amge da ag gamag ahak madakkul. Ao, ag oo doyak dooglag, amge da heppi, ag oolag meeb, oolag gamag ahakku.

Sam 126:2

Ig gamag ahak okkai doot, imamut. Ao, ig gamag ahak doot, ahi ettamut. Wan imuppan wan anen anen appa ag appig. “Yawe Nug keeke okkai ahilagnu heum.”