Aisaia 51:10 - Nobonob Baibel

¹⁰ Na hee ⌊ib daakkunu⌋, yu okkai, umanab noa ukkak ele, yu ⌊aben amuppa⌋ iite qaɗaiettom. Na amu hena, na danab ah nahipad ag qagaiettakppanu eɗua uhuqak hena mattame ele, na ag laih gokkulagnu na ib laa, yu amu gamagppa iite bappaidme?

Aisaia 51:10 Referans Kwoze

Aisaia 43:16

Amu Yawe Nug anukka Israel ag yu mataɗkkulagnu Nug he, le naɗi gamagppa ib dayom. Ao, Yawe Nug Israel ag yu mataɗkkulagnu Nug he, le koɗkoɗ qak ele gamagppa ib aakku dayom.

Aisaia 50:2

Da uɗien, ag onilagppa emi, amge ag oolagppan laa nug nai dahil ii awom. Ao, da ag onilagppa emi, amge laa nug nob laa ii meɗom. Dahil ɠagattag tutu meum amunu, da ag qagaiettakppanu ehanittak okkaippa uhuqadkkulnu elele iittate? Iitta! Ge, da ɠagattag iitta amunu da ag ehanadppi, ag qagaiettakppa ii daamnanu elele iittate? Iitta. Dahil ɠagattag am elele. Ao, da oɗelppaib nai matti, yu qaɗaiedatte. Da hei, le gottomppa am atu taɗak daatte. Yo, da anam hei, kakai ag mauheg, beɗulag beɗatteb.

Eksodas 15:13

Na nahip oo mauhaknab kobol dim lamidnana, na ig Israel, ig Isip dilag begbeg maɗi nidnu qagaiettakppanu eɗua uhuqak hen mekkana, na ig eleleib omaigkkut. Ao, na nahip ɠagattag, na amuppa na ig omaigppe, ig aben nahip, aben amu nahipnu tituanak daatte, ig amuppa gokkunig.

Aisaia 42:15

⌊Da ag anam ehanadkkulnu hein, danab layag ehanidkkunu keeke kuɗum he nauhakib daatte, amubia⌋ da qauko okkai, amu qauko nakok ele hadappi, ag nauhaknab bena daaglag. Da heppi, ad keeke, ag qaukoppa daatteb amu, ag qaɗaiettaglag. Amu ele da heppi, le, amu le ameg ele ag qaɗaiettaglag.

Sam 74:13

Na nahip ɠagattagppa he, yu laih laih dayom. Na nahip ɠagattagppa na yuppan doɗ okkai nau ele ikkilkad oɗoɗatte aoɗppig.

Sam 77:19

Nahip ib am yu gamagppa ukkom. Ao, na ippun am le naɗi gamagppa ukkom. Nahip ib am anam, amge auntai laa na baen abenab anidkkunu elele iitta dayom!

Sam 106:9

Nug he, ib man qaɗaiettak Le Kokoɗppa beum. Nug he, yu unuqagppa wan qaɗaiettak, atu taɗakppa qaɗaiettak daatte bia dayom; amu amuppa Israel danab ah omalattom.

Sam 106:10

Nug ag padal memananu ehanatte, kekeɗ eppelagppa ii daappig. Ao, Nug ag kekeɗ eppelagppa dayaknu qagaiettakppanu eɗua uhuqak heum.

Aisaia 11:15

⌊Amge haen Israel, Juda ele ag eɗun ii uɗippeg, haen amuppa⌋ Yawe Nug heeb, le kokoɗ uttug laih qaɗaietteb, Nug heeb, ulah gakkaɗak naunab ele uɗia, le Yupretis heeb, oppata, le naunau eblaih aɗit ele beeb, danab nug le mataɗkkunu uug iitta doya mataɗkku.

Aisaia 11:16

Yawe Nug anam heeb, nuhikkud danab ah oɗo yaak Asiria daatteb amu, ag ahilagppa ib ena beeb, ag eɗun ahilag wanppa uɗiglagnu ib uug iitta ena daakku. Haen matu anukkanab, Yawe Nug nuhikkud danab ah Isip uuglagnu ib ahilag heum, kobol anambia, amuppa geha Nug ib madakku.

Aisaia 35:8

Amu Yawe heeb, wan enanag dayeb, amuppa ib naɗi enanag ele daakku. Ib amu onig am Danab Oppiaawak Ba Daakkunu Ib. Danab ah ag Yawenu neekkakppa ag oolagppa dubuttid teum daatteb ele, ag ib amuppa ii oimna. Iitta. Ib amuam danab ah ag Kayakib dim lamidna, hipunin ii hetteb ele, ag ippulag aakkuib daakku. Nau hak danab ag Yawe dab-ii-mena ii dim lamidtteb ele, ag amuppa nakok laa oiglagnu elele iitta.

Aisaia 35:9

Doɗ laion ib amuppa ii daama, amu doɗ nau laala, danab qe mauhtte ele, doɗ amubia laa ib amuppa nakok iinab daamna. Doɗ anam ag ib amuppa ii daamna. Ib amuppa amu, danab ah Yawe Nug ag hipuninnu qagaiettakppanu eɗua uhuqak ha mattom ele, agib aguppa oiglag.

Aisaia 62:12

Amu laa ag nuhikkud danab ah dilagnu, “Danab ah Yawenu oppiaawak ele,” akkulag. Ag, “Danab ah umu amu, Yawe Nug ag hipuninnu qagaiettakppanu eɗua uhuqak ha mattom,” akkulag. Ag Jerusalemnu, “Danab ah ag aab okkai amunu oolag hette,” anana, ag, “Aab okkai amu hamu dayom, amge gemu anam ii daatte. Danab ah ag eɗun, appa daatteb,” akkulag.

Aisaia 63:9

Haen ag uug nau dooppig amu, Nug ele uug nau doya he, laa nugatoppa daatteb amu, nug ehanatte, padal ii meppig. Nug ahilagnu oo mauhak doya, ag dabmatta, oo gai-iitta doya oo metta ehanittak kobol ele dim lamittom amunu, haen kuɗum ag nau doyegeg, Nug amunu qagaiettakppanu eɗua uhuqak heum. Anukka, haen amuppa, maɗ kuɗum ukkom amu, Nug danab laa nid nakok laa ehanitta awa maotte, amubia ag ehanattom. ⌊Yawe Nug nukka amu oh ahilagnu heum.⌋

Sekaraia 10:11

Da ehanadppi, ag danab nug yu naɗi, duban huanak ele mataɗa gokkunu hette, amubia dayebeb uug eɗadkkulag Ao, da heppi, yu duban am iitta mekkulag, Nil le ele qaɗaiedakku. Da heppi, Asiria danab, ag am dada danab amu, ag uɗalag nekku. Ao, da heppi, Isip nauhkku.

Eksodas 14:29

Amge Israel amu, ag wan qaɗaiettakppa ena goppig. Yu nug laih laih ɠagattag gilil bia dayeye, ag gona, laih mataɗna teppig.

Aisaia 35:10

Ao, danab ah Yawe Nug ehanatte, ag qagaiettakppa ii daatteb ele, ag eɗun uɗiglag. Ag eɗun uɗin, gamag ahak, amu maɗoɗppan gamag ahak ele Sion tena, hanhan oo gamag ahak amu doon daaglag. Oo gamag ahak amu ahilagppa ambak dayebeb, uugnu oo doyak, oo uug mettak ele amu, ahilagppa nakok laa iinab daama.

Maika 7:15

Am Yawe Nug atte. “Haen ag alalkad ag Isip wanppanu ahan, Kanan wanppa uɗiegeg, da hei, ag kobol danab haknu elele iitta kuɗum anadppig, amubia da heppi, ag gemu daatteb, ag baula dahil hak amubia anadkkulag.”