Aisaia 49:1 - Nobonob Baibel

¹ Danab ah wan miagnu, wan umanu ele, ag nai dahil doyeg! Ao, ag danab ah wan atu umanu, ag doyeg! Anai da ii menuiɗom haenppa, Yawe Nug da onilppa eum. Ao, da anai ooppa niiiyi, Yawe Nug da onil diiom.

Aisaia 49:1 Referans Kwoze

Jeremaia 1:5

“Jeremaia, da na anin ooppa heidmi, amge haen da na ii heidmi, haen amuppa da na tituanidmi. Ao, na anin nug na ii menuittom, haen amuppa da na uɗat laa hekkutnu otidmi. Da na otidmi, na propet daanna, dahil nai wan atu ohppa mehuqkkutnu na oninppa emi,” awa aum.

Galesia 1:15

Amge Kayak, Nug anai da ii menuiɗom haenppa da tituaniɗa, nuhig ehanittak okkai hamu megatte, amuppa Nug da onilppa eum amu, haen amuppa Nug nukka dahilnu dabma,

Aisaia 49:5

Yawe Nug da anil ooppa, Nug da nuhig maɗi nid meiɗa, Nug da Jakop buɗub, ag nuhigppa eɗue diie uɗikkulnu heiɗom. Yo, Nug da Israel danab ah ehanadppi, ag eɗun, nuhigppa uɗiglagnu heiɗom. Yawe Nug da binag okkai meɗatte. Ao, dahil Kayak Nug ɠagattag meɗatte.

Luk 1:31

Doye, geha na oot ele daanna, nid danab menuna, na Nug onig Jesus ataɗkkut.

1 Pita 1:20

Kayak Nug wan imu, nuhig keeke oh ii beum haenppa Nug tituanom, amge dimppa gog tak haen gamag imuppaib Kayak me uɗia, ag ehanadkkunu miag atiom.

Luk 1:15

Nug Naɗi noobppa onig am binag ele daakku. Nug wain amu kaaka qaknu le laa oh ele ii lama. Nug anig ooppa dayebeb amu Kayak Ouɗi am nug ooppa ambekku.

Hibru 12:25

Amunu ag dabmeig! Ag aib daulag itun, Kayak nai maditte qeppeg neum. Anukka wan imuppa Sinai appa amu, Kayak Nug nai ɠagattag danab amelagppa aum, amge ag nuhig nai tappaeg neum. Ag tappaeg neum amunu, ag ahilag hipuninnu nob nau qe-eɗidna gokkulagnu elele iitta daappig. Gemu Kayak Nug hab aabppa dayaya, nai ɠagattag ig megatte amunu, ig Nug dimettata, ig oolta hipunin ihinignu nob nau qe-eɗidkkunignu elelete? Iittanab!

Jon 10:36

amunu aɗinu ag dahilnu, ‘Nug Kayaknu dabittak nai maditte,’ atteb? Kayak Nug da tituaniɗa, meiɗe wanppa uɗimi. Nug anam heum, amu anukka Nug wan imuppan danab laa dilag, ‘Ag am Kayak ganiappud,’ aum amunu, ‘Da am Kayak Bekka,’ haen da ami am, aɗinu ag amunu, ‘Nug Kayak aben aokkunu hette,’ aon appig.

Sepanaia 2:11

Yawe Nug heeb, Moap, Amon ele dilag kayak hambuppuak oh ag padal mekkulag amunu, Moap danab ah, Amon danab ah ele ag Yawenu ebehilag oh bodoetta le mekku. Yawe Nug anam ha maleb, wanppan wan ohppan danab ah ag ahilag wanppa Yawe noobppa dup nona Nug binag mekkulag.

Aisaia 60:9

⌊Yawe atte, amubia uub amuam ag wan umanabnu danab ah aon uɗitteb.⌋ Nug atte. “Danab ah wan miagnu, wan umanu ele ag da aniɗna, ehanittak aoglagnu oolag huana hette,” awa atte. Uub tatam uɗitteb amu, ag Tarsisnu. Ag, ag Juda, ag bekkalkad umanabnu aon uɗinna, ag laih appanu danab dilag silwa, gol ele, ag amu ele aon uɗitteb. Ag Yawe, Nug ag Israel, ahilag Kayak Oppiaawak Ele, Nug ag Israel binalag okkainab meum ele amu, ag diig amunu ag silwa, gol amu ele aon uɗin, Nug binag mekkulagnu hetteb.

Aisaia 57:19

Da amu heppi, Juda danab ag uug doon gaatteb amu, ag eɗun, ena doon, da onil humaglag. Da heppi, danab ah ag uma daatteb, laa ag guguittak daatteb ele amu, da heppi, ag oh maɗoɗ daaglag. Ge ag maɗoɗnab daan oiglag. Da heppi, ag enaib daan oiglag.” Yawe Nug anam atte.

Aisaia 55:3

⌊O dahilad danab ah,⌋ ag daulag human, da dooiɗna, ag dahilppa uɗieg! Ag bau daaglagnu amu, ag dahilppa doig! Ag anam heppeg, geha da Yawe, da Dawitnu oo mauhaknab doyen dim lamidkkulnu dahil nai ain qakkami amu, da ahilagnu oo mauhaknab amuib dim lamidkkulnu heppi, da ag ele ig nug tituanta nai qagapput, nai qakkak amuam iitta ii mema.

Aisaia 46:3

Amu Yawe Nug atte. “O Jakop buɗub, ag dahil nai doyeg! Ao, ag Israel buɗub ii mauhppig, gemu daatteb ele amu, ag dahil nai doyeg! Nid nug digma, anig ooppa daye, anig atognotte, amubia ag Israel, ag digmena, huu laa daappig, haen amuppan uɗie, gemu ele da ag atognoadmi. Ao, anig nug nid menua, atognotte bia, da ag huu piɗe daaglagnu digmak haenppanu gemu ele, da ag mawattette bekkadttem.

Aisaia 44:24

Yawe, Nug ag qagaiettakppanu eɗua uhuqaknu ehanittak daatte, Nug he, nid anig ooppa ena mette, amubia nug he, ag Israel ag huu laippu daatteb amu, Nug atte. “Da am Yawe, da keeke oh hemi. Da dakka da hab hemi. Da dakka da wan ele hemi.

Epesus 2:17

Nug aakkuib uɗia, ameg laa uma daappig, ameg laa miag daappig ele amu, Nug ag oh ag oolag laippu maɗoɗppa daaglagnu aum.

Aisaia 51:5

Da dahil genab tutukku hak kobol dim lamitten ehanadkkulnu haen am miagib daatte. Ao, da danab ah ehanadppi padal ii memananu haen am miag uɗiom daatte. Da dahil ɠagattagppa heppi, danab ag lailkad ele ag nai doya mala hettoɗia epeɗia elele mettak kobol dim lamidna oiglag. Danab ah ag wan miagnu, wan umanu ele, ag dahil ɠagattag, ag amuppa ehanittak aoglagnu dabmak aɗan daan, amel metteb.

Aisaia 45:22

Amu ag danab ah oh wan atu ohnu ag padal memananu ag da dim lamiɗna, ehanittak da eppelppanu aweg! Aɗinu? Da aakkuib Kayak daattem. Kayak laal ii daatte.

Aisaia 42:12

Aben amu ohppan danab ag Yawe binag mettanna, ag wan miagnu, wan umanu ele, ag Nug binag okkai metteg!

Aisaia 41:1

Yawe Nug atte. “Ag danab ah wan miagnu, wan umanu ele, ag uɗippeg, ig oh hettoɗiak abenppa daatta, ag da noolppa daanna, oɗelag qamutna, toettan daan, dahil nai doyeg! Ag daanna, ag akka akka ag oolag ɠagattag aqan, ag da ele nai mattignignu bappaidna, ag da noolppa uɗin daan, ag ahilag nai madippeg doyei! Ig oh qagmeta, aun nug nai genab maditte amu, ig anidtu!

Aisaia 9:6

Aɗinu? Ihinigppa ah laa nid danab menukku. Ge, nid amu Yawe Nug ihinignu meeb uɗikku. Nug ihinig king daakku. Nug onig anaknu laala inam: Ulum Ena Mettaknu Danab Enanagnab, Kayak Nukka Ɠagattag Ele, Mamenig Hanhannu, King Maɗoɗ Ele.

Aisaia 66:19

Da uɗat naɗi, da heminu at daatte ag oolagppa heppi, ⌊aun laa nug amu antta, da dim lamiɗa amu, nug bau daakku⌋. Laa amu ag bau daaglag amu, da ag oolagppan laala ag maadppi, danab ah huu laa dilagppa gona, ag binag amahlak oppiaawak ele dahilnu ag amelagppa mattiglag. Danab amu ag da onil okkainu nai laanu ii dooppig; ag binag amahlak oppiaawak ele dahil ele ii anidppig daatteb. Danab amu ag am Tarsis, Libia, Lidia, Tubal amu Grik danab, amu nud umanabnu danab ele. Lidia danab ag am lat ewaknu doyak okkai ele.

Aisaia 7:14

Na atnu oɗmak hekkutnu uume amunu, Naɗi Nug nukka geha at laa na ippunidkku. At amuam inam. Ah makkun laa nug oo ele daya, geha nug nid danab menua, nid onig Imanuel ataɗkku.

Sam 22:10

Da domi haenppanu uɗie, gemu ele na da atognoiɗkkutnu aakku daame. Laa amu hekkunu elele iitta. Yo, anai da menuiɗom, haen amu digma uɗiak, na dahil Kayak daattem.

Aisaia 11:11

Aria haen amuppa Naɗi Nug baula inam hekku. Danab eppeg bahia, keeke laa aɗa, nug eppeg eɗua aotte, amubia Naɗi Nug nuhikkud danab ah oɗo yaak Asiria wanppa daatteb, Isip wanppa daatteb, Kus wanppa daatteb, Elam wanppa daatteb, Babilon wanppa daatteb, Hamat wanppa daatteb, yunu nudppa daatteb ele eɗua diikku.

Aisaia 24:15

Ag anam hekkulag amunu, danab ah laih aam bedeppa daatteb amu, ag Yawe binag amahlak oppiaawak ele mekkulag. Ao, ag danab ah aam nodeppa daatteb, ag oh Yawe binag mekkulag. Yawe Nug am Israel dilag Kayak.

Aisaia 33:13

Ag danab ah uma daatteb, ag da kobol okkainab hemi amu, ag amunu doyeg! Ao, ag danab ah miag daatteb, ag da ɠagattag okkainab ele anidna hambuppuna, ‘Nug gai-iitta,’ aib appig.” Yawe Nug anam atte.

Aisaia 45:3

Da Yawe, Israel dilag Kayak, da na oninppa ettem amu, na da dooiɗna autna aokkutnu, da na ehanitten, en okkai okkai, aben gatatu ele daatte medakkul. Ao, da en okkai okkai, aben lokkumakppanab daatte, da na medakkul.

Aisaia 49:12

Antteg! Dahilad danab ah ag umanabnu uɗiglag. Laa ag yawalti uɗitteppanu uɗiglag, laa ag qaban uɗitteppanu uɗiglag, laa ag yau uɗitteppanu, Aswan appanu uɗiglag.” Yawe Nug anam atte.

Aisaia 52:13

Yawe Nug atte. “Antteg! Dahil maɗi nid nug doyak dabmak okkai ele dim lamitta, nuhig hak hekku. Nug onig okkai, binag okkai ele aokku.