Aisaia 47:8 - Nobonob Baibel

⁸ Ag Babilon danab ah ag ah okkai laa bia daatteb. Ah amu nug keeke enaib aokkunu wagai ma hette. Nug uug laa nuhigppa bekkunu dab-ii-maama, nug nukka nuhignu, ‘Da dakka okkai daattem. Laa nug okkai da bia ii daatte. Laa nug danab dahil heeb nauhkkunu ib iitta. Laa nug nid naunau dahilad hatteb nauhkkulagnu, o diin gokkulagnu ele, elele iitta,’ atte. Ag Babilon ag anam daan dabmena, ag kobol eheɗ henana, dabmak eheɗ ele aotteb, amge ag gemu ag dahil nai imu doyeg!

Aisaia 47:8 Referans Kwoze

Sepanaia 2:15

Aab okkai Niniwe amu, tatam appan danab ah ag gamag ahaknu qagmakppa daan, muttub qenana, ag baɗak iittappa daappig. Appan danab ah ag appig. “Wan atu ohppa aab laa ihinig aab imu bia laa ii daatte. Aab ihinig amu laa oh eɗadtte,” aon appig, Amge Yawe Nug heeb, Niniwe nauha auta autanab aokku. Aab naɗi amuam doɗ dakkuɗ laulkad daakku. Ao, danab aun aɗi ag laih gokkulagnu Niniwe gukkuidna wana gonana, ag aab naɗi amu aon aon qettaglag.

Aisaia 32:9

Ag Juda ah, ag hamu uug iitta ele daatteb, ag ahan, nai dahil doyeg! Ao, ag Juda ah, ag oolagppa, “Ig eheɗ laa ii anidmata,” dabmetteb amu, ag daulag human, nai dahil doyeg!

Jeremaia 50:11

Amu Yawe Nug atte, “Ag kekeɗ ag dahiladnab danab ah eheɗ hattana, ahilag keeke aon gotteb ele, ag amunu oolag gamag ahatte. Makau balat, mameg qakkaknu muɗi uhuqe, enanag dootte bia, ag dahilad danab ah dilagppa eheɗ heppignu enanag dootteb. Ag hos dawai enanag doyaya, huana gaatte bia, ag gamag ahak doon etteb.

Aisaia 47:10

Ag nau hak kobol ahilag dimugppa, guppiɗ dimugppa dayak bia, ag anam daanna, ag, ‘Laa ii anigtte,’ adappig. Ahilag doyak dabmak ena ele, ahilag doyak ele am eheɗ dayaya he, ag ib ena apiɗidna, eheɗ gonana, ‘Igib danabnab daattem. Laa oh am hamu. Ig bia laa ii daatteb,’ appig.

Aisaia 45:6

Wan atu ohppanu danab ah, ag laa da bia ii daatte dooglagnu amu, da diig amunu ɠagattag medakkul. Da aakkuib am Yawe; Kayak laa ii daatte.

2 Tesalonaika 2:4

Danab amu nug danab laa oh ag keeke oh dilagnu, “Imuam Kayak,” atteb, keeke amu noolagppa ag gatelag qaun otteb ele amu, nug amu oh tappeb neeb, nug onigib humeb, attan tekku. Nug Kayaknu mettid lag, appa nug aguppa daakkunu ta dayaya, nuhignu, “Da iikkuib am Kayak,” awa akku.

Nahum 1:10

Aɗinu? Ag danab muɗi qaun ele ooppa dayeye, qaun nug aɗatteb bia daaglag. Ao, ag ahilag wain labeppeg, kaaka aqakku. Ge, gikkiɗah qaɗaiettak huana eotte bia, Yawe Nug heeb, ag nauhna, padal mekkulag.

Daniel 11:36

Wan yawalti uɗitteppanu daatte, wan amunu king nug aɗi hekkunu oo hette amu, nug aakku hekku. Nug nukka haaha, nug kayak oh eɗattak dabmekku. Nug Kayak, kayak laa oh eɗattak daatte amu, nug nuhignu nai nau, laa nug nai amubia deɗ laa ii mattiom amu, nug nai amu nuhignu madikku. Kayak Nug danab ah hipunin heppeg, oppoɗi bak doya, bu madakkunu haen tituanom, haen amu iitta ii meebeb, king amu nug aɗi hekkunu dabmekku am hekku. Laa nug ib oo ii nema. Aɗinu? Kayak Nug danab ah ag eheɗ heegeg, bu atten aoglagnu dabmak awe ɠagattag eppom daatte amu, ag amu haenppa aoglagoitte.

Daniel 5:30

Anam, amge tuqan amuppanab Midia, Persia ele dilag daup ag aab naɗi Babilon amu aon, ag Babilon dilag king Belsasar qeeg mauhom.

Daniel 5:23

Na amu helom, amge na ii heme, gemu ele ii hettem. Iitta. Na Naɗi, hab attan daatte, na Nug ele mehqak hekkulahnu hettem. Na he, laa ag nuhig mettid lagppan kap akkan uɗieg, na, nahipad okkai, na waatad, am na waatad amge waatadnab iitta ele ag amuppa wain lanana, ag kayak dottolkad golppa, silwappa, brasppa, aenppa, adppa, menppa hak ele binalag meppig. Kayak dottolkad amu ag keeke laa amelagppa anidkkulagnu iitta, ag daulagppa keeke laa dooglagnu iitta, ag dabmakppa keeke laanu diignu doyak tutukku aoglagnu elele iitta. Na amu heme, amge na Kayak, Nug nahip bau dayak, nahip oiyak ele Nug eppegppa aɗatte amu, na Nug binag ii meme.

Daniel 4:30

nug aum. “Da ɠagattag okkainab ele. Da ɠagattag amuppa hei, ag aab naɗi imu, Babilon, da iguppa daakkulnu iite buuppig. Danab ah ag da king, da dagom onil ɠagattag ele aniɗkkulagnu amu, da dahil ɠagattag naɗinab amuppa hei, ag aab imu iite heppig?” awa aum.

Daniel 4:22

O king, na amu anidme amu, ad okkai ena amu, am naib ippunigtte. Na king bena, onin okkai ba male, na ɠagattag ele daattem. Na onin okkainab meeme ukke, gemu ad ba hab aɗe, danab ah oh anidkkulagnu elele daappig bia, wan atu ohppanu danab ah ag nahipnu dootteb. Nahip gumak am ukke ukke, wan umanab daattebppa batatte.

Jeremaia 51:53

Babilon ag hab attan tena, appa aab aɗ ɠagattagnab ele hekkulag dayeblob, da heppi, keeke he nauhak danab laa ag gona, heppeg nauhlo.” Yawe Nug anam awa atte.

Aisaia 45:18

⌊Keeke amu oh am anamib bekku.⌋ Aɗinu? Yawe, Nug hab heum, Nug nukka am Kayak. Ao, Yawe, Nug wan heum amu, Nug wan ɠagattag daakkunu babaittom. Nug danab ag wanppa daaglagnu wan babaittom. Nug wan danab ah appa ii daamnanu ii babaittom. Iitta! Nug danab ah aguppa daaglagnu babaittom. Amu Yawe Nug atte. “Da am Yawe, laal ii daatte.

Ikki Danab 18:27

Aakku Dan danab ag Maikanu hambuppuak kayak akkan, nuhig mana mettak danab ele aon, ag aab Lais goppig. Appa amu danab ah ag maɗoɗ ele daanna, ag uug laa ahilagppa bekkunu ii dabmeppig. Dan danab ag wana, banelag hena, ag appan danab ah oh aqan, ag aab okkai amu manaeg ewa, iitta meum.

Ikki Danab 18:7

Nug ag anam amelagppa aum amunu, danab tanig ele amu ag tuɗidna, aab Lais goppig. Aab Lais appa amu, danab ah appanu ag Saidon danab ah daappig bia, ag baɗak iittappa daaegeg anidppig. Ge, Lais danab ag uug laa bekkunu dab-ii-mena, ag baɗak iittappa daaegeg anidppig. Danab ah appanu ag keekenu elelenab daappig. Aɗinu? Ahilag wan amu ittag ena ele. Ag am Saidon guguittak iitta, piɗenab daappig, ⌊amunu Saidon danab ag ag ehanadkkulagnu elele iitta daappig⌋, amu ag ehanittak laa miag appanu aoglagnu amu, ag qakub mak daappig.

Aisaia 14:14

Da geha attan tein ukke, lombig eɗitten daakkul. Da dakka da hein, da geha Kayak Attannab, laa oh eɗattak daatte bia daakkul.”

Aisaia 32:11

⌊Uug anam bekku amunu,⌋ ag Juda ah, ag hamu, uug laa iitta, eleleib doon daatteb amu, ag ottaieg! Ao, ag Juda ah, ag oolagppa, “Ig eheɗ laa ii anidmata,” dabmetteb amu, ag hahaɗeg! Ag lamen ena uɗadna, ag lamen heɗiag ele takkeg! Ag ee meu oh ena ii bemananu, ag grep muɗi am meu ii omananu, ag wan imuam ena ii daamanu, ag keeke amu ohnu mahieg! Aɗinu? Uud keeke qaun ele ag bena wan imu oh tonan, aab imu, lag laala imuppa daatteb ele, amuppa gamag ahak nau daatte, aab, lag amu ele tonaglag.

Aisaia 45:5

Da dakka aakkuib am Yawe! Kayak laa ii daatte. Na da ii dooiɗttem, amge da heppi, na ɠagattag daakkut.

Jeremaia 49:31

⌊Amu Yawe Nug Nebukatnesar amegppa atte.⌋ “Na, nahipad daup ele ag huu laa, ag uug iitta doon daatteb, ag, ‘Laa eheɗ ii heigma,’ anan oitteb ele, ag amu dilag ele banelag gona, aqaglagnu ban heig! Huu amu ag aab aɗ eleppa ii daatteb. Ag akka ag piɗe daanna oitteb.

Esekiel 28:2

“Danab bekka, na Tair dilag king amegppa, ‘Naɗi Yawe Nug inam atte,’ ana, na nai imu ele appe doyaɗ! ‘Na ootppa dada kobol henan, na, “Da am kayak laa, da kayak laanu sia enanagppa yu gamagppa iikku daattem,” mattin attem. Amge na am danabib, na kayak laa iitta. Na doyak dabmak ena nahipnu am kayak laanu bia daatte dabmettem, amge iitta!

Esekiel 30:9

Amu deɗ laa da Isip heppi nauhkku amu, deɗ amuppa da ele heppi, nai awa ukkak danab ag uubppa tena, ag nai madippeg, danab laa ag uug laa bekkunu ii dabmena daatteb, am Kus danab, danab amu ag eheɗ nau baɗaglagnu gokkulag. Isipnu nauhak deɗppa amu, Kus danab ag eheɗ hahaɗkkulag. Aɗinu? Antte! Deɗ amu genab aakku uɗitte, ⌊amunu deɗ amu uɗieb, ag anam hahaɗkkulag⌋,” awa atte.

Daniel 4:4

Da, Nebukatnesar, da dahil lag enanagnabppa dayeye, oolppa maɗoɗ doyeye, keeke elelenab ele daami.

Esekiel 16:49

Amu Naɗi Yawe Nug tuɗitta atte. “Jerusalem, na makkep Sodom, nug aɗekkud ele, ahilag hipunin am inam. Ag beɗuppa tak ah daan oinna, ag ee ge iitta lanan daanna, ag eheɗ heppignu uug laa ii doon, ag daɗek danab, amu laa ag keekenu tutu mak daappig ele ii ehanadppig.

Daniel 4:27

Anam aakku amunu, O king, da ulum nai laa medappi, na nai amu aon dim lamidkkutnu oɗ medattem. Na hipunin baula aib heme, amu na aɗi hettem amu, na hanhan kobol genab tutukkuib he! Ao, na eheɗ laa aib heme, amu na danab ah, ag laa eppelagppa daaeg, eheɗ hadatteb ele, na amu dilagnu oo gai-iitta doya, oo metta, ehanattak kobol he! Na amu hekkut dayeb amu, Kayak Nug ehanitteb, na tuɗidna, maɗoɗ ele daakkuttai.” Daniel nug King Nebukatnesar amegppa anam aum.

Nahum 3:4

Amu uug naunab amu oh ahilagppa bekkulagnu diig am, ag Niniwe danab ah ag ib baag ah hette bia heppig. Ib baag ah danab kuɗum diiadkkunu gappai huana hette, amu ag Niniwe, ag amubia heppig. Ib baag ah nug beɗu ena, danab eeɗadkkunu elelenab, nug ib amuppa amu hette, amu ag Niniwe, ag amubia heppig. Ib baag ah nug emaɗ kobol doya aut aut autanab awa, kobol amuppa danab diiadtte, amu ag Niniwe, ag amubia heppig. O gadon, ib baag ah nug nuhig gappai hak kobolppa danab kuɗum diiadtte, amubia ag Niniwe ag heppeg, wanppan wan kuɗum ag waalagppa daaglagnu heppig. Ao, ib baag ah nug emaɗ kobol nuhigppa ha, wanppan wan kuɗumnu danab nuhig pelemppa diiom, amubia ag Niniwe, ag huu kuɗumppan danab ah diippig.

Habakuk 1:7

Danab ah laa oh ag Babilon dilag eheɗ baɗatteb. Babilon ag laa dilag ɗonu ii dabmetteb. Iitta. Aɗi ɗo ag meppig amu, ag amuib dabmetteb. Ag akka, ag binalag okkai ele daaglagnu henan oitteb.