Aisaia 47:6 - Nobonob Baibel

⁶ Da dahilad danab ah, ag hipunin heppig amunu, da ahilagnu ool nauhe, da hei, Babilon ag wana, ahilag wan aon, ahilag daakkunu aɗappig. Da hei, Israel danab ah ag, ag Babilon eppelagppa daappig, amge ag Babilon ag Israel dilagnu oo gai-iitta doya oo metta ehanittak laa iinab heppig. Iitta. Ag nid bau dilag eheɗ hadappig, amge amuib iitta. Iitta. Ag ele ahilag eheɗ hak tuɗidna, wagai mena, ag Israel danab ah kaino dilag eheɗ hattanna, uɗat nau, uug ele ag madappig.

Aisaia 47:6 Referans Kwoze

Sekaraia 1:15

amge da wanppan wan laala danab ah dilagnu, ag ahilag dabmakppa ag ɠagattag daatteb, ag uug laa ii anidmananu dabmetteb amu, da amu dilagnu ool nauhtte. Da dahilad danab ah dilagnu ool nakokib nauhom, amge da ag amunu bu madakkulnu dabmein, bu qak amu wanppan wan laala eppelagppa memi. Da anam memi amge, wanppan wan laalappan danab ag bu da dabmemi, ag amu eɗittak, bu eheɗ nau ele Israel madappig,” awa atte.

2 Stori 28:9

Israel dilag daup ag amu heppig, amge Yawenu propet danab onig Odet, nug Samaria appa dayom. Nug appa daya, nug aha, Israel dilag daup uɗalag tekkunu wana, ag uɗalag teum. Nug ag uɗalag ta, nug ag amelagppa aum. “Yawe, ag mamelkad aɗi dilag Kayak, Nug Juda dilagnu oo nauhom amunu, Nug he, ag Israel dilag daup ag ag eɗatteg, eppelagppa daappig. Ag ag eppelagppa daappig, amge ag Israel ag oo doyak iinab doonna, ag oppoɗi bak nau, Kayak Nug amunu nob nau madakkunu daatte amu, ag oppoɗi bak amu doon, ag huanak aqaeg mauhppig.

Duteronomi 28:50

Am wan amuppan ban danab, ag iɗulkad am danab ag anadna baɗatteb. Ag am danab kaino dilagnu ena elele ii dootteb, ag am oo gai-iitta doya oo metta ehanittak kobol ele danab ah bau dilagppa ii hetteb.

Obadaia 1:10

Amu Yawe Nug inam atte. “Aɗinu ag Edom danab, ag anam aoglag? Diig am iikku. Ag ag lailkad Israel danab ah guittak nau mauhnoak madappig. Ag amu heppig amunu, uɗa nak ag tonatta daakku. Ao, geha ahilkad kekeɗ ag ag oɗoɗadppeppeg, ag nauhna autna aoppeg, hanhan anamib daakku.

Jems 2:13

Aɗinu? Danab laa nug layagnu oo gai-iitta doya oo metta ehanittak kobol ii dim lamidtte, nug layag eheɗ heumnu nob nau medatte, nug nob nau amu medakkunu ii uutte amu, Kayak Nug danab amu hettoɗiakppa nob nau medakku. Amge danab laa nug layagnu oo gai-iitta doya oo metta ehanidtte, nug hipuninnu nob nau ii medatte amu, nug geha hettoɗiakppa nob nau ii aoma. Oo gai-iitta doya oo metta ehanittak kobol am nob mettak kobol eɗidtte!

Sam 69:26

O Kayak, da na dahilad kekeɗ dilagppa anam hekkutnu oɗ medattemnu diig am inam. Na laa bu madattem ele amu, dahilad kekeɗ ag ag eheɗ hattaegeg, guittak tuɗittak, okkai dootteb. Ao, na laa, na ag bu matte guittak dootteb ele amu, dahilad kekeɗ ag amu dilag guittaknu qattag metteb.

Obadaia 1:16

Amunu, qauko dahilnu tituanak daatteppa, appa dahilad danab ah ag bu awak okkainab aon malappig, amubia wanppan wan laa oh ag ele bu amubia, amge amu eɗittak aoglagoitte. Ag aona, ag ii daappig bia daaglag.

Aisaia 14:17

Danab laa nug he, wan oh atu taɗak bia be, amu aab okkai kuɗum eɗatta, danab ah kuɗum aɗualatta, diia ukke daappig amu, nug ag uuatteb, ag appalag diigppa gokkulagnu oo ii daye he, ag aakku anam daappig amu, danab amuam danab imu iikkuibte?”

Aisaia 10:6

Anam amu, da Kayak, da heppi, Asiria danab, ag danab ah laa, danab ah amu ag dahilnu, dahil haknu ele uuak dootteb, ⌊am Israel danab ah aakku,⌋ da ag danab ah dahil amu bu mattaglagnu ahilag wanppa gokkulagnu gokkulag. Ao, da, Kayak, da Asiria ag danab ah amu ag oo nauhak da meɗatteb, ⌊am Israel danab ah aakku,⌋ da ag danab ah dahil amu dahil bu aoglagnu heppi, ag ahilagppa gokkulag. Da Asiria ag banelag gona, Israel dilag keeke, ahilag en ele aoglagnu heppi gokkulag. Yo, da Asiria ag gona, Israel eheɗ hattan, tappaladppeg noppeg, oɗoɗadna autna aoglagnu heppi gokkulag.

Matyu 7:2

Aɗinu? Ag laa dilagppa epeɗiak kobol attenppa epeɗiadppeg amu, ag epeɗiak kobol amuppa aoglag. Ag lailkad dilagnu aɗi melemelppa keeke hetteb, ag melemel amuppaib geha keeke aoglag.

Esekiel 28:16

Tair dilag okkai, na keeke kuɗum kuɗum mee, laa uɗin daden meegeg, na en huanak aona, na laa guittak nau mauhnoak mettak danab beme; na hipunin heme. Na heme amunu, da Kayak, da lamitti, na uɗa nak nau guittak ele qauko da daattemppanu ahan gome. Ao, da hei, na, na engel okkai-kerubim keeke gumadtteb bia daame amu, da hei, na da daattemppa, men amahlak okkai ele, aab dittiak bia daatteb, na amuppa ii daame.

Esekiel 24:21

⌊Esekiel⌋ na Israel danab ah ⌊na ele Babilon ippa diia ukka laih me dayak danab ah daatteb amu⌋ na ag amelagppa inam appe doyeg! Naɗi Yawe Nug inam atte. ‘Da heppi, hipunin hak danab, Israel buɗubppan iitta, ag dahil mettid lag heppeg nauhkku. Ag Israel, ag dahil lag ag oolagppa daattenu enanag doon, “Lag amu ig oonigppa daatte amunu, aɗitai laa heeb, ig ii nauhmata,” aon atteb. Ag lag amunu enanagnab doon, lag amunu ag oo mauhak bia dootteb. Ag anam dootteb, amge gadon, ag bekkalkad aɗelkad Jerusalem appa daatteb, bekkalkad aɗelkad amu ag banppa mauhkkulag.

Gayak Nai 2:2

Naɗi Nug oo gai-iitta doya oo metta ehanittak kobol ii dabmaama, Juda danab ah ii ehanattom; iitta, Nug he, kekeɗ ag uɗin, Juda danab ah, ahilkad keeke ele danab ee toppua ukke nauhtte bia hatteg nauhppig. Yawe Nug ⌊Juda dilag eheɗ haknu oppoɗi be⌋ he, kekeɗ ag Juda dilag ban haknu aben ɠagattag heeg nauhppig. Ao, Nug he, kekeɗ ag heeg, Juda uɗa nak aoeg, ahilag ɗo maɗoɗ am binag ele iinab daye, Juda dilag anuqak danab ele ag anamib, binalag ele iinab daatteb.

Aisaia 43:28

Amunu da heppi, ag Juda, ag ahilag mana mettak danab amu, danab ah laa ag ahilagnu, ag am keeke hamu bia dooglag. Ao, da heppi, ag Jakop buɗub, ag dahilnuib, dahil pelemppa daaglag. Ge, da heppi, ag Israel buɗub ag uɗa nak nau guittak ele dooglag.” Yawe Nug anam atte.

Aisaia 13:16

Danab ah ag hippaidna neekkadna daappeg, ban danab wan laappan ag geha Babilon danab ah bekkalkad yuɗ, aɗelkad yuɗ ele aɗualadna, buɗiadppeg, wanppa noppeg, geha ag beɗulag oh aoɗeb, hupu hupu nekku. Ban danab ag geha danab laulkadppan keeke akkan gona, danab waalkad aɗualadna, ahilagppa eheɗ hekkulag.

2 Samuel 24:14

Gad nug anam a, Dawit nug aum. “Da uug naunab nau doottem. Amge Yawe Nug oo gai-iitta doya oo metta ehanittak kobol okkainab aɗa dim lamidtte amunu, ig Nug eppegppa bu aognignu ool hette. Da danab eppelagppa bu aognignu ool ii daatte. ⌊Nug heeb, oɗe ig iqakkunu ool hette⌋,” awa aum.

Aisaia 14:6

Kingnu qakun amu aɗappig ele amu, ag oo nauhakppaib daan, ag haen oh danab ah laa oh eheɗib hadappig. Ao, ag oppoɗilag be amelag kokoɗ eppe, ag haen oh ban henana, wan laa oh eɗadnana heeg, agib waalagpa daappig.

Jeremaia 50:42

Daup amu ag lat, ban ele aɗaglag. Ag laa guittak mettaglagnu uug laa ii doomna. Ag laa dilagnu oo gai-iitta doya oo matta ehanittaknu kobol nakok laa dim ii lamidmana. Ag hos attan daanna oippeppeg, oqotti ahilag am yu heehe, oqotti otte amubia. O Babilon danab ah, ag ag ele ban hena aqaglagnu ag huu men uɗiglagnu bappaidkkulag.

Gayak Nai 1:14

Yawe Nug ig Juda, ig ihinig hipunin awa, hipunin amu oh ehakka qakkom. Ao, Nug ihinig hipunin awa, oh aɗe ooho, qagma laippu qakkom. Nug amu ha mala, ig hipunin amu ig baanigppa aihatte, Naɗi, nuhig hak amuppa ig beɗunig gai-iitta meum oittem. Nug laa, ig ag eɗadkkunignu elele iitta, Nug ig ag eppelagppa meikkom daattem.

Gayak Nai 1:21

Danab ah ag ihinig aiqakkak dooppig, amge ag ehanigppeg, oonig mekkunu kobol nakok laa ii heegeg daattem. Ihinkad kekeɗ ag uug nau na, Yawe, na hee, ihinigppa beum doon, ag gamag ahak okkai dootteb. Ag oolag gamag ahatte, amge na ag ele uug nau dooglagnu ame amunu, ag ig daattem bia daaglagnu, na heppe, haen amu bekkunu oɗ medattem!

Gayak Nai 5:12

Ag king bekkod eppelagppa aihadna; ag Juda dilag ikki danab dilagnu ele ena elele ii dootteb.

2 Stori 10:11

Genab, da mamel nug ag uɗatnu uug okkai, ɠagattagnab mattom, amge da amu, geha da ag amu eɗittak, okkainab madakkul. Da mamel nug ag bu qaun eleppa mataɗattom, amge da amu geha bu laa noobppa aeg ele awe, ag huan mataɗadkkul.’ Na anam appe doyeg!” aon appig.

2 Stori 36:17

Ag eheɗ anam heegeg, Yawe Nug he, Babilon dilag king, nuhikkud daup ele ag Juda banelag uɗin, ag Juda dilag nid bau Yawenu mettid lag ooppa qep elabppa aqaeg mauhppig. King nug auntai laanu oo gai-iitta doya oo metta ehanittak kobol ii doyom. Iitta! Nid bautai, o ah bautai, o danab kaino, o danab kainonab, nug ag oh dilagnu oo gai-iitta doya oo metta ehanittak kobol dim lamidkkunu ii dabmeum. Yawe he, ag ohnab Nebukatnesar eppegppa daappig.

2 Stori 36:20

Nebukatnesar nug anam ha, nug Juda danab ah oɗo yaak daappig ele diia, Babilon, ag appa diia ukka laih me dayak danab ah daaglagnu ukkom. Nug danab ah aun aɗi ag qep elabppa ii mauhppig diia ukkom. Nug diia ukke, ag nug, amu nug bekkod ele dilag maɗi nid daappig. Ag anam daaeg ukke ukke, Persia danab ag ahan, Babilon eɗadppig, haen amuppa ag ahilkad maɗi nid baula ii daappig.

Esra 5:12

Anukka ig mamenkad aɗi lag imu heppig, amge ig mamenkad aɗi ag kobol nau digdig heppig amunu, Kayak hab attan daatte, Nug oo nauhe, Nug he, ig mamenkad aɗi ag Kaldia ted Nebukatnesar, Babilon dilag king, ag nug eppegppa daaegeg, Nebukatnesar nug mettid lag imu he nauhe, nug ig mamenkad aɗi diia ukka he, ag Babilon appa diia ukka laih me dayak danab ah daappig

Gayak Nai 4:16

Ahilagnu anam daatte. Aɗinu? Yawe Nug nukka he, ag matatun gona, tamtam oitteb. Nug ag ii atognoadtte. Nug he, mana mettak danab, danab okkai ele adeppa adeppa daatteb amu, appanu danab ah ag mana mettak danab binag nakok laa ii mattan; Ao, ag Juda dilag ikki danab ehanittak nakok laa ii madatteb.

Sekaraia 1:12

Yawenu engel nug nai amu doya, nug Yawenu inam unuqittom. “O Yawe Nakka Ɠagattag Oh Ele, na anukka Jerusalem danab ah dilagnu, Juda danab ah laa ele dilagnu oot nauhe uɗie uɗie, gemu ele anam doottem. Oo nauhak nahip aakku maɗ 70 iikku dayaya, ii iitta meum; amu haen gane laa ele ukkeb, na heppe, nahip oo nauhak iitta meeb, na Jerusalem danab ah, Juda danab ah laa oh dilag ele oot gai-iitta doon oot mattan ehanadkut?” awa oɗ mettom.