Aisaia 44:8 - Nobonob Baibel

⁸ O danab ah dahilad, ag aib ebehilag hahaɗeb baɗappig. Anukka da ⌊aɗi keeke bekkunu dayom amu,⌋ da amunu mattii, ag iite dooppig? Da ag amelagppa amunu iite ami? Ag am dahilad laa aɗi heehe anttomnu mattiak danab ah daatteb. Da aakkuib am Kayak, ahilag ehanittak, daattem. Da laa anam daattenu ii doottem,” awa atte.

Aisaia 44:8 Referans Kwoze

Aisaia 43:10

Amu Yawe Nug ele atte. “Ag Juda danab ah, ag am da aɗi aɗi hei anidppig amu, ag laa amelagppa amunu mattiglagnu danab ah dahilad daatteb. Laa ele amu, ag am dahil maɗi nid daatteb. Da ag dahil maɗi nid daaglagnu tituanadmi. Ag da dooiɗkkulagnu, ag dahilnu oolagppa genab dooglagnu, ag da am Yawe, ag amunu diignu doyak tutukku aɗaglagnu ele da anam tituanadmi. Da haen oh daami. Kayak laa dayeye, dimppa da ii uɗimi. Iitta! Da haen oh daami. Da malappi, kayak laa ii daama. Iitta! Da haen oh daakkul. Da dakka, da Yawe daattem.

1 Samuel 2:2

Laa nug oppiaawak, Yawe daatte bia, laa nug amubia ii daatte. Kayak laa ii daatte. Ihinig Kayak Nug kekeɗ ig nikkamanu ehanittak ihinig daatte, laa nug anam bia ii hette.

Duteronomi 4:35

Ag Yawe, Nugib am Kayak, kayak laa ii daatte, ag amu dooglagnu Nug keeke amu ippuanatta he anidppig.

Duteronomi 4:39

Amunu ag imu dabmettanna, ahilag dabmakppa ɠagattag aɗeg! Yawe Nug am wanppan, habppan ele Kayak daatte, kayak laal iitta.

Jon 10:30

Da Mamel ele amu i am laippu,” awa aum.

Jon 1:1

Kayak Nug keeke oh digma heum, haen amu ii nak amu Kristus, Nug onig laa Nai Kayak Ippunigtte, Nug dayom. Nug Kayak noobppa dayom amge anamib iitta, Nug ele Kayak dayom.

Joel 2:27

Amu beeb, ag Israel, ag da ag oolagppa daattem doon, da am Yawe, da ahilag Kayak daattem doon, amu kayak laa ii daatte, ag amu dooglag. Amu danab ah dahilad ag, ag baula uɗa nak ii doomna.” Yawe Nug anam atte.

Aisaia 44:6

Yawe, Nug Israel dilag king, Nug Israel dilag qagaiettakppanu eɗua uhuqaknu ehanittak, Nug Yawe Nukka Ɠagattag Oh Ele, Nug inam atte. “Da hanhan daattem; anuqakppa, batakppa ele da daattem. Kayak laal ii daatte.

Sam 18:31

Yawe Nug anam daatte amunu, Nugib Kayak daatte. Kayak laa ii daatte. Ao, ihinig Kayak Nugib am kekeɗ nikkamanu ehanittak ihinig daatte. Laa nug amubia ii daatte.

2 Samuel 22:32

Yawe Nug anam daatte amunu, Nugib Kayak daatte. Kayak laa ii daatte. Ao, ihinig Kayak Nugib am kekeɗ nikkamanu ehanittak ihinig daatte. Laa nug amubia ii daatte.

Duteronomi 32:39

Antteg! Da dakka, da Kayak laippu daattem; kayak laa ⌊ag ehanadkkunu⌋ da heqolppa ii daatte. Da dakka Kayak daattem. Da danab bau dayak madattem, amu da bau dayak amu eɗue aɗattem. Da danab eheɗ hedattem, amu da danab ehanatti, ena daatteb. Auntai laa, dahil hak nuhigppa hekkulnu hettem, nug amu qe-eɗitta, oola gokkunu elelete? Iitta!

Aisaia 46:9

Ge! Ag anukkan keeke, keeke ag anukkanunab dooppig ele, keeke amu ag daulagppa doaɗ! Aɗinu? Da am Kayak. Kayak laa ii daatte. Da am Kayak, laa nug da bia ii daatte.

Daniel 6:22

Dahil Kayak Nug da eheɗ laa Nug noobppa ii hemi aniɗa, O king, da nahipnu ele eheɗ laa ii hemi ele anttom amunu, Nug he, nuhig engel laa uɗia he, laion ag oɗelag aahekkulagnu elele iitta daan, ag da laiɗkkulagnu elele iitta. Ag da guittak laa ii meɗappig,” awa aum.

Daniel 4:25

Na ⌊dabmak nahip eɗua, kaaka dayeb,⌋ laa ag lamidppeg, na goppe, doɗ dakkuɗ ele daaglag. Daanna, na makau gikkiɗah latteb bia gikkiɗah lakkut. Baito habppanu na, na nidakku. Maɗ eblaih aɗit ele na anam daappe ukkeb, na Kayak Attannab Laa Oh Eɗattak Nug wannu ɗo maɗoɗ oh gumadtte, Nug aun ahilag okkai daakkunu oo he, king abenabppa mette doon, dabmak amu tutukku doon elele aɗan oikkut, dimppa na eɗun ena daakkut.

Daniel 2:47

Nebukatnesar nug anam ha mala, nug Daniel amegppa aum. “Genabnab genab, nahip Kayak Nug kayak laa oh eɗattak daatte; Nug king laa oh dilag okkai daatte; Nug dimppa aɗi bekkunu daatte danab ippunadtte. Aɗinu ⌊ig amu doognignu elele⌋? Nug he, keeke lokkumak dayom imu amu, na he, miag atiom,” awa aum.

Daniel 2:28

amge Kayak, hab attan daatte, Nug keeke uug ele he, miag atitte. Nug anam hette amunu, Nug na, King Nebukatnesar, Nug na dimppa aɗi bekku aakku ippunittom. Na niiak abenppa tul niinna, tuleglegppa keeke digdig anidme am iikku.

Jeremaia 10:7

Na wan atu oh dilag King daattem; danab ah ohnab ag nahipnu ebehilag oh bodoetta le mekkunu daatteb. Aɗinu? Ig danab ah oh anam hekkunig am kobol pehettak, kobol tutukku ele. Laa ele, wanppan wan ohppa danab ag doyak dabmak ena ele daatteb, amge ag oolagppa, aria, ɗo maɗoɗ oh oolagppa ele, laa nug na bia laal ii daatte.

Aisaia 48:5

Anam amunu, da keeke imu bekkunu anukkanab ai dooppig. Ao, keeke imu ag ii beppig haenppa da ai dooppig. Da amu heminu diig am, da anam ii helom, ag, ‘Dahil kayak dottog, nug he beum,’ alob. Ao, da anam ii helom amu, ag, ‘Dahil kayak dottog adppa hoiyak, laa aenppa ele hak amu, aa anam bekkunu aeh, aakku beppig,’ alob.

Aisaia 43:12

Da, Yawe, da ag Israel, ag padal memananu ehanadkulnu ami. Da anam awoya, da amu hemi. Kayak hambuppuak atu laihnu anam ii heum. Ag Israel, ag, ‘Da am Kayak,’ ag amu anidna malappig amunu, ag laa amelagppa amunu mattiglagnu danab ah dahilad daatteb.

Aisaia 42:9

Antteg! Keeke da anukka bekkulagnu ami amu, ag aakku beppig. Gemu da keeke bau laanu appi dooglag. Keeke bekkulagnu ii digmeppig ele amu, da ai, ag bekkulagnu daatteb,” awa aum.

Aisaia 30:29

Kekeɗ dilagppa anam bekku, amge ag Yawenu danab ah ag danab ag qagmak gamag ahak ele Yawenu tituanak daatte, ag amu henana, ahi edatteb, amubia ag ahi ettaglag. Ao, danab ag dumuttum iwalnana, Yawenu qaukoppa tenana, oo gamag ahak dootteb, amubia ag oo gamag ahak dooglag. Ag Israel dilag ehanittak, Nug laugppa tenana, gamag ahak dootteb bia dooglag.

Esra 8:22

Anukka ig king amegppa inam amut. “Ihinig Kayak Nug aun aɗi laa ag nuhignu dabmena, Nug dim lamidtteb ele Nug ii helo bia me, Nug ehanatte, ag ena daatteb, amge aun aɗi ag Nug uutteb amu, Nug amu dilag oo nauhak naɗi doya, bu madatte,” aot amut. Ig anam king amegppa amut amunu, gemu da ibppa kekeɗ heigppeg nauhmatanu nug oɗ medappi, nug ban danab baelagppa oitteb, ban danab hos attan oitteb ele ag omaigppeppeg, ig Jerusalem tekkunignu am uɗal neum. Da anam doomi amunu, da ig ee ohnu kud meta, Kayak unuqidkkunignu ag amelagppa ami.

Esra 1:2

Amu Sairus, Persia dilag king, nuhig nai am iikku. “Yawe, Nug Kayak hab attan daatte amu, nug wanppan wan atu oh da meɗom. Nug da meɗa, da nug laug laa Juda wanppa Jerusalem appa bapaidkkulnu da otiɗa, amu hekkulnu da amelppa aum.

Duteronomi 32:31

Nai amu genab daattenu diig am, ig Israel, ihinig Kayak, Nug hanhan ɠagattag daatte. Anam amge, ihinkad kekeɗ dilag kayak, ag am ɠagattag iitta. Ahilag kayak am ihinig Kayak bia iitta. Anam amu, ihinkad kekeɗ ag amu doon maditteb.

Duteronomi 32:4

Nug am hanhan ɠagattag daatte; nuhig uɗat am qa oppiaawak ele. Keeke oh Nug hette amu, Nug nai doya mala hettoɗia epeɗia elele mettak kobol dim lamitta hette. Kayak Nug diig nuhignu oo metta ii uuak kobol dim lamittatta, Nug eheɗ laa ii hette. Nug tutukkuib daatte, Nug nai doya mala hettoɗia epeɗia elele mettak ibuppa hanhan daatte.

Genesis 48:19

Josep anam aum, amge Jakop nug nai nuhignu dab-ii-metta, nug aum. “O bekkal, nug nid danab naanaeg amu, da doottem. Geha nug buɗub ele elab bekku, amge nug dimugppa amu, nug buɗub ag laanu buɗub eɗadna, appatna elabnab bekkulag,” awa aum.

Genesis 46:3

Jakop anam a amu, Kayak Nug aum. “Da Kayak, na mamennu Kayak. Na Isip gokkutnu aib oot baɗom. Aɗinu? Na appa daappe, da heppi, na buɗunad ag appatna, huu okkainab, ɠagattag ele daaglag.

1 Jon 1:2

Kayak he, Kristus, Nug bauklel hanhannu diig amu, Nug miag atia be, ig Nug anidmut. Ig anidmut ele amu, ig ag amelagppa genabnab iikku madittem. Ig Kristusnu madittem. Nug anukka ig Mamenig Kayak ele daayya, Kayak he, Nug ihinigppa miag atia beum.

Hibru 12:1

Aria, ihinignu amu ig anukkanu danab kuɗumnab ag ig ooppa genab doyak kobol ippunikkeg anidttem amunu, ig ooppa genab doyak ippu tutukku dim lamidtu! Ig danab laa ag nug eɗid eɗid qaiettan gotteb ele ag keeke oh beɗulag uug medatte ele, ag amu buɗieg ukke, qaiettan gotteb, amubia ig aɗi keeke, ig amu aɗat ooppa genab doyaknu ippu tutukku ii dim lamidkkunig amu, ig keeke amu buɗipput ukkeb, ig aɗi hipunin, nug ig beɗunigppa ta aɗaikkom daatte ele, ig amu ele qepput na ukkeb, ig Kayak Nug ippunig mekkom amu, amuppa bahi yaak ele iittappa qaiettat gotu!

Aposel 14:15

“Ag ippan danab, ag aɗinu anam hetteb? I ele am danab, ag biaib. I Nai Ena ag amelagppa mehuqta, amu i ele ag keeke nau hamu meu iitta amu uuadna, ag Kayak bau daatte amu Nug dim lamidkkulagnu amelagppa mehuqttep. Nug am hab, wan, yu ele, amu keeke oh amuppa daatteb ele, amu oh Nug hattom.

Aposel 1:8

Amge geha dimppa Kayak Ouɗi Nug ahilagppa neeb, ag ɠagattag aon, geha ag dahil aɗi heehe anttomnu mattiak danab daanna, ag dahilnu Jerusalem mehuqna, ag gona, Juda wan ohppa, Samaria appa ele mehuqna, ag wan atu ohppa ele gona mehuqkkulag,” awa aum.

Jon 6:10

A amu Jesus amelagppa aum. “Danab imu oh heppeg, ag heɗep nena dayeg!” awa aum. Appa amu gikkiɗah teppu ele dayom amunu, danab oh ag heɗep nena daappig. Danab ⌊aakkuib⌋ ag 5,000 keeke anam.

Sam 86:10

Ag amu hekkulagnu diig am, na onin ɠagattag ele, na kobol danab hekkunu elele iitta okkai okkai hettem. Na aakkuib am Kayak.

Aisaia 17:10

Aɗinu? Ag ⌊Juda, ag⌋ Kayak ahilag, Nug ag ehanatte, ag padal ii metteb ele amu, ag Nug daulag atiom. Ao, ag ahilag Kayak, Nug kekeɗ aqamanu ehanattak ahilag, Nug am aab aɗ ɠagattagnab ele ahilag bia daatte amu, ag Nug dab-ii-metteb. Anam amunu, ag muɗi grep ena ena aon eppaglagtai. Ao, ag grep aben laihnu aon eppaglagtai. Ag buttua eppelagppa eppan heppeg, qaɗu buttua amuppaib belo. Ao, deɗ amuppa buttua ag eppan heppeg, haɗag ele qelo. Ag anam heppeg belo, amge meu awak haenppa keeke amu oh am keeke hamu. Ag grep meu laa ii aomna. Iitta. Ag meu diig aɗit laa, meu amuam oɗe digdig, amu guittak ii bodoedatte ele, ag meu amu aakkuib aoglag.

Aisaia 26:4

Yawe, ge Yawe, Nug am ihinig lokkumak aben ɠagattag, men laa hanhan daatte bia daatte. Nug geha anamib haen oh daakku amunu, ig hanhan nuhignu oonigppa genab dootu!

Aisaia 41:23

Ge, ig ag genab kayak daatteb doognignu, ag butti aɗi, aɗi keeke bekkunu daatte amu, ag appeg dootu! Ag hamu aib daappig. ⌊Ag genab kayak daatteb dayeb amu,⌋ ig baɗadta hahaɗkkunignu, ag keeke okkai naɗi ena, o keeke okkai naɗi nau laa heppeg anidtu!

Aisaia 43:11

Da, yo da, da am Yawe daattem. Da aakkuib, da danab ah padal memananu ehanittak daattem. Laa iitta.

Aisaia 45:19

Da aben lokkumak ele, da aguppa dayeye, nai ii mattimi. Wan amuppa gatatu daatte amu, da gatatu amu ooppa daye, nai ii mattimi. Da Jakop buɗub ag aben danab ah ii daattebppa da aniɗna dim lamiɗkkulagnu mattiɗkkulagnu ii ami. Da, Yawe, da genab madittem. Da kobol tutukku aakkuib ippunadttem,” Yawe Nug anam atte.

Aisaia 48:3

⌊Yawe Nug atte.⌋ “Anukkanab da keeke bekkunu dayom ai dooppig. Ao, tatamnab aɗi keeke bekku amu, da ii beum haenppa ai dooppig. Ge, da ai doyeg, haen do, da laippun hei, aakku beppig.

Sam 18:32

Kayak Nug ɠagattag meɗatte. Ao, Nug he, dahil ib am, qa oppiaawak daatte.

Aisaia 43:9

Amu ⌊haen amuppa⌋ wan atu ohppan danab ag ⌊ele⌋ qagmena uɗiglag. Ao, danab ah diig ohnu ag uɗin daaglag. Ag uɗin daaglag, amge ag oolagppanu, o ahilag kayak hambuppuak laa nug keeke bekkun daatte a doomutte? Ahilagppan laa nug digmakppanu uɗia gemu batak, nug haen amu ohppan keeke laanu, keeke amu ii nak haenppa, nug keeke amunu mattie doomutte? Ahilagppan laa nug anam heum dayeb amu, laa nug mattiak amu doyom ele, nug aha, mattieb dootu! Nug anam mattieb amu, laa ag ele ahan, ‘Nug genabib atte,’ akkulagnu elele. ⌊Amge laa anam haknu am iitta.⌋” Yawe Nug anam atte.