Aisaia 44:3 - Nobonob Baibel

³ Aɗinu ⌊ag ii baɗamnanu attem⌋? Da heppi gu huana wan qaɗaiettakppa na, leppu medakku. Ao, da heppi, gu huana neeb, le naunau kuɗum wan qaɗaiettakppa gokkulag. Da anam hekkul amu, anamib da dahil Ouɗi ag buɗulkad madakkul. Ao, da dahil itittak ena ag buɗulkad madakkul.

Aisaia 44:3 Referans Kwoze

Joel 2:28

Yawe Nug atte. “Amu dimppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

Aposel 2:17

Kayak Nug inam Joel amegppa a doya yom. ‘Dimppa, haen malakkunu heebeb, haen gamag amuppa da dahil Ouɗi danab ah diig oh dilagppanu ⌊danab ah laala⌋ madakkul. Da madappi, ag bekkalkad, aɗelkad ele ag propet nai madippeppeg, ahilkad danab kaino ag tul niiakppa keeke anidppeg, ahilkad danab bau ag tuleglegppa keeke anidkkulag.

Aisaia 59:21

Amu Yawe Nug atte. “⌊Danab ah ag oolag eɗuom ele⌋, da, ge da, da ag ele imu hekkunignu nug tituana nai qakkak hettem. Da dahil Ouɗi, Nug ahilagppa daatte, amu da heppi, Nug ag, ag bekkalkad aɗelkad ele, amu ag bekkalkad aɗelkad ele amu, Nug ag oh ele gemu, hanhan ele anam daaglag. Laa, dahil nai, ag oɗelagppa daatte amu, da heppi, nai amuam ag oɗelagppa, ag bekkalkad aɗelkad ele oɗelagppa, amu ag bekkalkad aɗelkad buɗulkad oɗelagppa ele gemu, hanhan ele anam daakku.” Yawe Nug anam atte.

Prowerb 1:23

Ag danab ah anam amu, ag da Doyak Dabmak Ena Ele, ag matu daug batak dahil imu dabmena dim lamidlob amu, da dahil doyak dabmak ena ele imu oh ag mattalom. Ao, da dahil dabmak appi, ag doolob.

Revelesen 21:6

Nug anam awowa, Nug tuɗitta da amelppa aum. “Keeke oh aakku meu beum! Da haen oh daattem; da tatam daami, da hanhan daakkul. Digmakppa, batakppa ele da daattem. Laa ag le baalag diitte amu, da ag le bauklel ele, le amuam qeppuɗia bette, da le amu nob iitta, hamu madakkul.

Aposel 2:39

Am Kayak Nug anukka nuhig Ouɗi ag, ag bekkalkad, amu wan laa adeppan danab ah, ag ele madakkunu nai qakka aum. Yo, Naɗi, ihinig Kayak, Nug aun aɗi ag onilagppa ette amu, Nug nuhig Ouɗi ag madakkunu nai qakka aum,” awa aum.

Sekaraia 12:10

Anam amu, da heppi, Dawit buɗub, aria Jerusalem danab ah ele, ag ehanittak okkai hamu mettaknu kobol, unuqittak kobol ele dim lamidkkulag. Ag anam henana, ag laa qetti banppa atulppig, amuam da, ag eɗun aniɗna, ag dahilnu oo doyak doon, mahiak okkai hekkulag. Laa nug nuhig nid laippuib, nid amu mauhe, nuhignu mahiak okkai hette, ag amubia dahilnu mahiglag. Ao, laa nug nid danab tatamnu mauhe, oo doyak okkai, guittak ele awa mahitte, amubia ag dahilnu mahiglag.

Esekiel 39:29

Amu da baula dahilad danab ah ii dimadapa. Iitta. Da dahil Ouɗi ahilagppa daakkunu madappi, ahilagppa daakku.’ ” Naɗi Yawe Nug anam atte.

Aisaia 32:15

Wan amu nauha anam dayeb ukkeb, Yawe Nug nuhig Ouɗi hab attannu ig mekkeb batakku. Yawe Nug anam heeb, atu taɗak amu, wan amuam wan ittag ele bekku. Ao, Nug anam heeb, wan ittag ele, am ittag huanaknab ele daakku.

Aposel 10:45

Am Juda danab ag Jesusnu oolagppa genab dooppig, ag Pita dim lamidna uɗippig ele, ag Kayak Nug Kornilius aɗi, ag iitta aɗi danab, Nug nuhig Ouɗi Juda danab mattom bianab, Nug iitta aɗi ag ele mattom anidna, ag ottaina dabmak kuɗum aoppig.

Sam 107:35

⌊Amge Nug ele he,⌋ atu taɗak eɗue, appa le ameg kuɗum daappig. Nug he, wan qaɗaiettak eɗua, lenag kuɗum daan madmad goppig.

Aisaia 41:17

Amu Yawe Nug atte. “Haen Israel danab ah, ag am danab ah daɗek, keeke iitta ele bia daatteb amu, haen ag le oug mattin ii anidppeppeg, ag le baalag eheɗnab diiebeb, da Yawe, da ahilag unuqittak doyen ehanadkkul. Ao, da, da ag Israel ahilag Kayak, da ag ii uuadpa. Da ag ehanadkkul

Joel 3:18

Haen amuppa amu, grep dad meu enanag otteb ele, am qauko oh tonadkkulag. Amu ag Israel, ag ahilkad makau, meeme ele qaukoppa gikkiɗah lanan daanna, huh huanaknab mattaglag. Le nakok Juda wanppa daatteb amu, ag ii qaɗaiettamna. Laa ele, Yawenu mettid lag ooppanu amu, le laa uɗiaya, oolnu noak ad akasia betteb amu, aben amu oh le madakku.

Aposel 2:33

Nug hab aabppa teum, Kayak eppeg naɗiap-ppa daatte. Mameg Kayak Nug nuhig Ouɗi, anukka medakkunu nai qakka aum bia amu, Nug mettom. Mette, Jesus Nug ig ele iikku gemu Kayak Ouɗi mekkom amunu, ag keeke imu gemu anidna dootteb.

Esekiel 34:26

Da ag, amu aben oh dahil qauko Sion talilittak daatteb ele itadppi, ena daaglag. Da heppi, gu nuhig haenppa elele neeb, itittak ena ele aakkuib daaglag.

Aisaia 61:9

Wan atu ohnu danab ah ag dahilad danab ah buɗulkad dooglag. Ge, wan atu ohnu danab ah ag dahilad danab ah dilag menuattak dooglag. Ag amu dooppeg, aun aɗi ag dahilad danab ah buɗulkad anadna amu, ag inam dooglag. ‘Danab amu ag Yawenu danab ah. Yawe ag itittak ena mattom.’ ” Yawe Nug anam atte.

Revelesen 22:17

Amu Kayak Ouɗi amu Sipsip Nag wau, aa attep. “Na do!” Am aun nug nai amu doya nug, “Na do!” anaɗ! Am laa ele, laa nug le baag diieb, am nug doaɗ! Am laa nug bauklel le lakkunu oo hette ele amu, nug doa, bauklel le lanaɗ! Kayak Nug le amu hamu medatte.

Aisaia 48:21

⌊Ag gobeppeg, haen amuppa kobol digdig Yawe Nug Israel Isipnu diia ukke daappig bia daaglag. Yawe Nug Israel Isipnu diia ukkom, haen amuppa⌋ Nug omalatte, ag atu taɗakppa oippig, amge ag le baalag ii diiom. Nug he, le ahilagnu menppa neum. Ao, Nug he, men oppate, le huanaknab noa ukkom.

Aisaia 65:23

Ag uɗat hamu ii hemana; am meu okku. Ag nid ahilkad uugppa daaglagnu ii menuadmana. Aɗinu? Da Yawe, da itadkkul. Da ag, ag buɗulkad dimppanu ele, da ahilagnu ele anam hekkul.

Sam 63:1

O Kayak, na dahil Kayak, da ool unuqagppanu na anitten dim lamidkkulnu na madittem. Da na ele daagnihnu ool okkai daatte. Da meul ohppa danab nug aben le iitta, atu qaɗaiettakppa oiyaya, lenu oo daatte bia, da na ele daagnihnunab ool okkai daatte.

Aisaia 49:10

Ag gobeppeg, enug ii aqama; le baalag ele ii diima. Atu taɗaknu aam gakkaɗak ele ii aqama. Aɗinu? Laa ag oo madatte amu, Nug ag ulum madatta, Nug ag le qeppuɗia betteppa omalatta gokku.

Aisaia 32:2

Haen amuppa kobol inam bekku. Danab okkai amu oh ag gilil ulah qehagtte bia daaglag. Ao, ag ulah huanak uɗieye, danab nug padal mak eɗitteb ena dayaknu abenppa ukka daatte, ag aben amubia daaglag. Okkai danab amu ag atu taɗak, le iitta ele, ag appa le laa noa gotte bia daaglag. Ao, ag wan laappa, aam gakkaɗak naunab nau neene, danab nug men okkainab logoppa ukka daatte, ag lokko amubia daaglag.

Matyu 12:43

Nug anam mattiowa amu Nug aum. “Haen ouɗi nau laa nug danab laa uuidtte, nug ukka atu taɗakppa, nug aben laa antta, hik awa daakkunu oitte. Oiya oiya, nuhig dayaknu aben ena laa ii anidtte, aakku nug atte.

Job 5:25

Na nahipad nid ag kuɗumnab daaglag dookkut. Ge, na buɗunad ag gikkiɗah wan qaɗeppa daatte bia daaglag dookkut.

Aisaia 48:19

Ag anam helob amu, ag buɗulkad ag yu ihippan abuɗ bia daalob. Ag dimulagppa uɗiglag amu, ebqak ahilag am abuɗnu ebqak bia daalob. Ag anam helob am da heppi, laa ag uɗin heppeg, ahilag wan am padal ii melo. Da noolppa iitta ii melo,” awa atte.

Aisaia 55:1

Yawe atte. “Oe! Ag aun aɗi, ag le baalag diitte, ag leppa uɗin le laig! Ao, ag aun aɗi oh ag men doɗo iitta ele, ag amunu aib dabmeppig; ee ippa ina daattede, ag uɗin laig! Ge, ag men doɗo iitta ele, ag uɗin, wain, huh ele hamu aon laig!

Esekiel 36:27

Amu da ele da Ouɗil ag matten, da heppi, ag dahil nai dim lamidkkulagnu dabmak anuqak aɗan oiglag. Ag dahil ɗo iɗu iɗu ii tippalmananu dabmak okkainab aoglag.

Esekiel 47:8

Da amu anitti, danab amu nug da amelppa aum. “Le imu nug aam bedeppa, appa ugakka, Jodan lenu oolnu noakppa ukka, le gottu okkai onig Mauhak Le, le amuppa gotte. Le imuam Mauhak Leppa ukka heeb, le amu ena iitta daatte amu, eɗua ena daakku.

Hosea 10:12

Ag Israel, ag genab tutukku hak kobol ag oolagppa ebappeg, Yawenu oo mauhaknab ag tonadkku. Ag oolag ɠagattag eppak daamanu, ag heppeg, ag oolag gai-iitta dayaɗ! Aɗinu? Gemu am ag Yawe anidna, Nug dim lamidkkulagnu mattiglagnu haen aakku daatte. Ag amu hekkulagnu diig am, ag amu heppeg, Nug gu digittig bia he ne, dattan keeke ena bette, amubia Nug heeb, ag genab tutukku hak danab ah bena daaglag.

Maika 5:7

Amu dimppa amu, oɗo yaak danab Jakop buɗubppanu amu, ag danab ah laa oh oolagppa daaglag. Baito Yawe me nette amu, baito amuam danab amelag ii mette. Ao, gu nakok gikkiɗahppa nette, gu amuam laa dilag ameg mak ii hette. ⌊Amubia Jakop buɗub ag Yawenu ehanittak aakkuib dabmekkulag, danab dilag iitta⌋.

Aisaia 27:3

Da Yawe, da grep dad amu gumattem. Da hanhan le medette, laa appa uɗia eheɗ laa hemanu amu, da haen oh amun tuqan ele gume daattem.” Nug anam akku.

Joel 2:27

Amu beeb, ag Israel, ag da ag oolagppa daattem doon, da am Yawe, da ahilag Kayak daattem doon, amu kayak laa ii daatte, ag amu dooglag. Amu danab ah dahilad ag, ag baula uɗa nak ii doomna.” Yawe Nug anam atte.

Joel 3:1

Yawe Nug atte. “Anam amunu, doyeg! Haen amuppa da heppi, Juda danab ah ag eɗun uɗin Jerusalem, amu Juda wanppa laih laih ele daaglag.