Aisaia 42:5 - Nobonob Baibel

⁵ Kayak, Nug Yawe, Nug hab ha, abenppa me daatte; Ao, Nug wan ele ha, wanppan keeke bau daatteb oh ele heum. Nug wanppan danab ah oh bau dayak madatte. Ao, Nug aun aɗi wanppa oitteb amu, nug ag ouɗi madatte. Amu Kayak, Nug Yawe, Nugib nuhig maɗi nid amegppa geha atte.

Aisaia 42:5 Referans Kwoze

Aisaia 40:22

Kayak Nug sia kingppa wan imu attan dayaya, wan imu oh gumatte. Danab ah wan imuppa oitteb ele, ag nuhig neekkakppa keeke nagnag, tap bia daatteb. Nug danab lamen okkai naɗi taietta otala mette, Nug amubia hab otala taiettom. Ao, danab nug aguppa daakkunu peh lag nuhig bappaidtte amu, Kayak Nug hab taietta babaittom.

Aisaia 45:12

Da, laa iitta, da wan hemi. Da hein, da danab ah aguppa daan oiglagnu ele hattami. Da eppelppa hab hein, da aam kalam hoɗoppai ele appa daatteb ele hattami.

Sekaraia 12:1

Nai imuam Yawe, Nug Israel dilagppanu aum. Yawe, Nug hab abenppa ma, wannu ukku, wan ele ha, Nug danab ah ele bau madatte amu, Nug atte.

Jeremaia 10:12

Amge Kayak Nug nuhig ɠagattagppa wan heum. Nug doyak dabmak ena ele nuhigppa wan ha, abenppa meum. Ao, Nug diignu doyak tutukku nuhigppa ele ha, hab nuhig abenppa meum.

Aisaia 48:13

Da eppelppa wan hemi. Da eppelppa hab ele hemi. Gemu amu, keeke amu oh dahil ɠagattagppa tutukku ena daatteb.

Aisaia 44:24

Yawe, Nug ag qagaiettakppanu eɗua uhuqaknu ehanittak daatte, Nug he, nid anig ooppa ena mette, amubia nug he, ag Israel ag huu laippu daatteb amu, Nug atte. “Da am Yawe, da keeke oh hemi. Da dakka da hab hemi. Da dakka da wan ele hemi.

Jeremaia 32:17

“O Naɗi Yawe, na ɠagattag nahip-ppa, nakka ebehinppa ele hab, wan ele heme. Aɗi keeke uug ele na hekkutnu elele iitta laa ii daatte.

Aisaia 45:18

⌊Keeke amu oh am anamib bekku.⌋ Aɗinu? Yawe, Nug hab heum, Nug nukka am Kayak. Ao, Yawe, Nug wan heum amu, Nug wan ɠagattag daakkunu babaittom. Nug danab ag wanppa daaglagnu wan babaittom. Nug wan danab ah appa ii daamnanu ii babaittom. Iitta! Nug danab ah aguppa daaglagnu babaittom. Amu Yawe Nug atte. “Da am Yawe, laal ii daatte.

Sam 33:6

Yawe Nug a, hab beum daatte. Nug oɗeppa nai mattieye, hoɗopai keeke beppig daatteb.

Job 33:4

Kayak Ouɗi Nug da heiɗom. Ao, Laa Nukka Ɠagattag Oh Ele Ouɗi Nug da bau meɗatte.

Aposel 17:25

Amu Kayak Nug keeke laanu tutu mettete amunu, ig danab ig Nug ehanidkkunig? Iitta. Nug nukka eleleib daatte. Nug nukkaib he, danab oh ag bau daatteb; ge Nug he, ag hik aotteb.

Job 12:10

Doɗ oh ag Nug eppegppa daaegeg, Nug a, ag bau daatteb. Nug a, ag mauhtteb. Ao, danab ah oh ele, Nug ag ulah matte, ag bau daatteb. Nug ii madatte amu, ag mauhtteb.

Aisaia 40:12

Aun yu, le oh ele eppegppa gokkaɗe ukke, gane daatte doyom? Aun nug habnu elab dookkunu nug eppeg melemel daakkunu ha ma ukke, habnu okkai aakku doyom? Aun wan ohnu gappud awa, kalegppa ina aɗom? Aun nug qauko oh dilag uug dookkunu, qauko amu oh skelppa maattom? Aun nug qauko nakok oh dilag uug dookkunu qauko nakok amu oh skelppa maattom?

Sam 136:6

⌊Ig Yawe,⌋ Nugib he, leppanu wan beum daatte amu, ⌊ig Nug amegppa, “Ena heme,” atu!⌋ Aɗinu? Nuhig oo mauhaknab kobol hanhan alet daatte.

Amos 9:6

Naɗi, Nug Yawe Nukka Ɠagattag Oh Ele, Nug lag enanagnab, attan tak nuhig hab attan appa batak babaittom; lag amunu men ukku wanppa daatte. Nug yuppan le ita, wanppa gokkaɗe, le amu wan tonatte. Nug onig am Yawe.

Genesis 2:7

Dimppa Yawe Kayak Nug wan gappud awa, amuppa danab heum. Ha amu, Nug danab amu noob oɗeppa ouɗi iwale, bau dayom.

Hibru 1:2

amge Nug gemu, gog tak haen imuppa amu, Nug Bekka oɗeppa ig amenigppa nai mattiom. Kayak Nug Bekka Nug aug daakkunu Nug keeke oh aokkunu aum, amu nuhigppa Nug keeke oh ele hattom.

Aisaia 40:28

Ag Yawe, Nug Kayak hanhan daatte, Nug wan atu oh, amuppan keeke oh ele heum amu, ag amu iite dootteb? Ag amu daulagppa iite dooppig? Yawe Nug beɗu bahi ii yaatte; beɗu bodo-ii-edatte. Nuhig diignu doyak tutukku amu, laa nug oh dookkunu elele iittanab iitta.

Job 34:14

Kayak Nug danab ha, noobppa ulah iwale, bau dayom amu, Nug oo heeb, ulah amu, nuhig Ouɗi ele eɗua aokku dayeblob,

Job 27:3

Kayak nug anam genab bau daatte, genab amubia da bau daattem haenppa, da oɗelppa nau laa ii madipa. Ao, genab amubia Kayak ehanikkekke, ulah da noolppa daatte haenppa, da ham-laa-ii-bubupa.

Daniel 5:23

Na amu helom, amge na ii heme, gemu ele ii hettem. Iitta. Na Naɗi, hab attan daatte, na Nug ele mehqak hekkulahnu hettem. Na he, laa ag nuhig mettid lagppan kap akkan uɗieg, na, nahipad okkai, na waatad, am na waatad amge waatadnab iitta ele ag amuppa wain lanana, ag kayak dottolkad golppa, silwappa, brasppa, aenppa, adppa, menppa hak ele binalag meppig. Kayak dottolkad amu ag keeke laa amelagppa anidkkulagnu iitta, ag daulagppa keeke laa dooglagnu iitta, ag dabmakppa keeke laanu diignu doyak tutukku aoglagnu elele iitta. Na amu heme, amge na Kayak, Nug nahip bau dayak, nahip oiyak ele Nug eppegppa aɗatte amu, na Nug binag ii meme.

Aposel 17:24

Pol nug anam ana, nug tuɗitta aum. “Amu Kayak Nug wan imu ha, keeke oh wanppa daatteb, laa ig anadttem, laa ig ii anadttem ele amu, Nug heum. Kayak amu Nug habnu, wannu ele Naɗi daatte amunu, Nug mettid lag, danab eppelagppa hetteb, amu ooppa, Nug ii daatte.

Genesis 1:1

Digmak haenppa Kayak Nug hab, wan ele heum,

Aisaia 37:16

“O Yawe Nakka Ɠagattag Oh Ele, na Israel dilag Kayak, na Tituanak Nainu Kunupnu engel okkai-kerubim aɗit dottolah gamalahppa sia king nahip-ppa daattem. Na hab, wan ele hatame. Yawe, na aakkuib am wan ohppan Kayak daattem.

Aisaia 40:26

Ag attan neegna, habppan keeke antteg! Aun nug keeke amu oh heum? Laa Nug keeke amu oh gumaama, Nug keeke amu oh onilkad dootte ele, Nug heum. Nug am ɠagattag okkai naɗi ele amunu, habppan keeke oh am hanhan anamib daatte. Laa iinab qettoɗtte.

Aisaia 57:16

Amu da hanhan dahilad danab dilagnu nai ii hepa. Da ahilagnu hanhan oo nauhak ii doopa. Aɗinu? Da hanhan nai helom, da hanhan oo nauhak doolom amu, danab ah dahilad ag gai-iitta daalob. Ao, da hanhan nai helom, da hanhan oppoɗi bak doolom amu, danab ah dahilad ag mauhlob.

Jeremaia 27:5

Da Yawe, da ɠagattag okkai ele, amu da ɠagattag amuppa da wan imu, danab ah wanppa daatteb, doɗ wanppa daatteb ele oh hattami. Da amu oh hattami amunu, da aun nug keeke amunu okkai daakkunu ool hette amu, da keeke amu oh nug eppegppa mettem.

Jeremaia 38:16

Jeremaia nug anam aum, amge King Sedekaia nug eɗua, aɗi hekkunu nuhig nai ɠagattag qetta, Jeremaia amegppa aum. “Iitta! Yawe, Nug ig oh bau megatte amu, Nug genab bau daatte, genab amubia da iikku attem. Da na ii nidappi mauhmana. Laa ag nidappeg mauhkkutnu hetteb ele amu, da ag eppelagppa ele ii meidpa,” awa aum. Sedekaia nug nai amu Jeremaiaib dookkunu aum. Danab laa ii doyom.

Esekiel 18:4

Danab ohnab am dahiladib. Laa mameg am dahil, danab amu bekka am ele dahil. Aɗit oh am dahilib, amu auntai laa nug hipunin heeb, nug mauhkku, am laa iitta.

Sam 96:5

Laa amu, wanppanu danab ah laa dilag kayak oh ag keeke genab iitta. Ag am dottolkad aakkuib daatteb, amge Yawe Nug amubia iitta. Nug hab heum.