Aisaia 34:6 - Nobonob Baibel

⁶ Tiig am Yawenu qep elab aeg am laidkku. Ao, ittag Nug qep aeg laidkku. Sipsip nag tiilag, meeme tiilag ele qep elab aeg nuhig laidkku. Ao, sipsip dawai aɗita doɗonu ittag am qep aeg laidkku. Nuhig qep elab aeg anam daakkunu diig am, Yawe Nug mana mettak okkai Edom wanppa aab onig Bosra appa daakkunu dabma, bekkunu mattia malom. Ao, Edom wanppa am mauhak huanaknab daakku.

Aisaia 34:6 Referans Kwoze

Aisaia 63:1

Laa nug Edomnu uɗitte am aun? Nug Bosranu, lamen kokoɗnab laittak ele uɗitte, amge nug am aun? Nuhig lamen am enanagnab, me nug am aun? Nug danab ɠagattag okkai naɗi ele, amu nug huana tappa uɗitte. Danab amu nug nukka, nug am aun daattenu am inam atte. “Imu da, da aɗi madittem amu, nai amuam genab tutukkuib. Da danab ah padal memananu ehanadkkulnu ɠagattag elelenab ele,” awa atte.

Jeremaia 49:13

Amu Yawe atte. “Da dakka, da onil awen, dahil nai ɠagattag qetten, da attem. Kekeɗ ag heppeg, Edomnu aab Bosra nauhakib daakku. Danab ah laa ag amu anidna, ag ameg iɗuak doon, ag Edom danab ah aon aon aqanna, ag Edom danab ah eheɗ laa awaknu anak waappa daaglagnu anana oiglag. Amu Edomnu aab oh amu nauhattak hanhan daaglag.” Yawe Nug anam atte.

Sepanaia 1:7

Ag Naɗi Yawe noobppa toettan dayeg! Aɗinu? Yawenu deɗ naɗi miag uɗiom daatte. Laa amu, danab nug mana mettak hewowa, doɗ amu teppu nuhignu daatteppa hobul hekkunu bappaidtte, amubia Yawe Nug hobul babaittom. Nug he, laa hobul amuppa daaglagnu ag nuhikkud daaglagnu tituanattak daatteb.

Jeremaia 50:27

Babilon dilag daup enanag, ag makau gaiɗ bia daatteb, amge ag kekeɗ ag Babilon dilag daup amu oh aqappeg mauheg! Ag Babilon, ag ahilagnu gadonnab gadon. Aɗinu? Ahilag bu awak haen aakku uɗiom daatte,” awa atte.

Aisaia 63:3

Amu laa nug uɗitte amu, nug nob ma atte. “Da danab nug nukka grep meu tappa leppu awaknu abenppa grep meu tabatte bia, da dakka kekeɗ ele ban hemut. Wan atu ohppanu laa nug da ehaniɗkkunu laa ii dayom. Laa ehaniɗkkunu iitta amunu, da dakka hemi. Da ool nauhehe, da kekeɗ tappaladmi. Ao, da oppoɗil beebe, da tappalatti neppig. Da anam heiyi, ag tiilag lamen dahilppa ta, qataqeum. Dahil lamen oh am tiig amu laittak ele.

Aisaia 34:5

Amu Yawe atte. “Dahil qep elab nug hab aabppa aɗi uɗat hekkunu nai awa mala, qep amuam Edom danab ah bu madakkunu nekku. Da danab ah wan amuppanu, ag dahilnuib, dahil pelemppa daaglagnu ain malami amunu, am anam bekku,” awa aum.

Duteronomi 32:14

Nug he, makau, meeme ele ag lanaknu huh huanak ele daappig. Ao, Nug he, sipsip nakkud ittag ele, amu meeme ele ag ena meegeg, lanaknu teppulkad ena ele daappig. Yawe Nug Israel danab ah sipsip dawai enanagnab Basannu, Nug amu ele mattom. Ge, Nug ag wit ena ele mattom. Nug ag amu matte, Nug he, grep ahilkad meu ena oegeg, ag wain enanag lappig.

Esekiel 21:10

Qep elab amuam danab aqeb mauhkkulagnu uɗikkak daatte. Qep amuam laa he, amemɗiag aotte, amemɗi bia. Ag Israel, ag ahilag king nug hanhan daakku dabmena, “Uug laa ihinigppa iinab bema,” atteb am, ag enate atteb? Dahil qep elab am Israel dilag kingnu ena iinab dootte.

Duteronomi 32:41

Da qep elab dahil, qep amuam amemɗi laippun yaatte bia danab ah aqadtte amu, da qep amunu aeg hoikkul dayeb, amu da qep amuppa danab ah bu madakkul dayeb, da inam hekkul. Da dahil kekeɗ dilag eheɗ haknu nob tutukku qep amuppa madakkul. Ao, da laa ag dahilnu nau ninig ele dootteb amu, da ahilag eheɗ haknu nob elele madakkul.

2 Samuel 1:22

Jonatan nug latppa heeb, ban danab tiilag nekkunu ii baɗom. Saul nug qep aɗa heeb, ban danab nena qekkulagnu ii uuom.

1 Stori 1:44

Bela mauhe, Sera bekka Jobab nug abenabppa king ba dayom. Nug Bosra ted.

Sam 137:7

O Yawe, Edom ag deɗ Babilon dilag ban danab ag Jerusalem eɗittegeg, ag aɗi henan daappig na dautppa dob, ⌊bu madakkutnu⌋ oɗ medattem. Deɗ amuppa amu, Edom danab ah ag, “Loppaɗppeg naɗ! Loppaɗna autnanab aoppeg naɗ!” eppig.

Aisaia 65:12

Da ag hettebnu dabmein, da heppi, laa ag uɗin qep elabppa aqadppeg mauhkkulag. Ao, ag gomelppeg, laa qep elabppa aqadppeg mauhkkulag. Aɗinu? Da ag onilagppa emi, amge ag da baal dooglagnu uuppig. Da ag amelagppa nai mattimi, amge ag dooglagnu uuppig. Ag da amelppa kobol nau heppig. Ao, keeke digdig da ag amu hekkulagnu ool ii daatte ele, ag hekkulagnu dabmenan heppig.” Yawe Nug anam atte.

Jeremaia 12:12

Kekeɗ huanaknab ag atu taɗak oppatna uɗiglag. Aɗinu? Ag da, Yawe, ag dahil qep elab daanna, ag dahil wan ohppa danab ah aqappeg mauhkkulag. Laippu laa nug maɗoɗ ele ii daama.

Jeremaia 25:34

Ag gumak danab, ag danab sipsip gumadtte bia ag gumak danab daanna, danab ah gumadtteb, ag eheɗ gaanna, mahieg! Ao, ag gumak danab, ag danab sipsip gumadtte bia daan, ag danab ah gumadtteb amu, ag gappudppa niin, beɗulag itoɗinna dayeg! Aɗinu? Danab ag doɗ kuɗum aqaeg mauhtteb bia, kekeɗ ag banppa ag aqappeg mauhkkulagnu haen aakku beum daatte. Ao, ag aakku hinai enanag na qa aoɗtte, ag amubia daaglag.

Jeremaia 46:10

Ag amu hekkulag, amge aun laa ag eɗadkkulag amu, keeke amuam Kayak, Nug Yawe Nukka Ɠagattag Oh Ele, amuam Nug eppegppa daatte. Deɗ amuam Yawe nob tutukku eɗua mettaknu deɗ. Ao, nuhikkud kekeɗ dilagppa Nug nob tutukku eɗua madakku. Danab nug ee, o le elelenab lana male, oo dittiom, amubia danab mauhadppeppeg, elele metteb, ban iitta mekku. Aɗinu? Danab nug doɗ kuɗum aqe mauheg, tiilag gokkaɗe, mana Yawe medatte, amubia Kayak, Nug Yawe Nukka Ɠagattag Oh Ele Nug heeb, yawalti uɗitteppanu, Yupretis le guguittak appa danab kuɗumnab mauhkkulag.

Jeremaia 49:7

Edomnu amu, Yawe Nukka Ɠagattag Oh Ele, Nug inam atte. “Teman appa amu, danab laa nug doyak dabmak ena ele iittate? Appa laa nug eheɗ bemanu dabmak awa dabmak amu dim lamittak kobol dim lamitta, okkai danab ulum nai ena iite medatte? Teman danab ah dilag doyak dabmak ena ele am iitta meumte?

Esekiel 35:8

Da heppi, mauhak gaɗalag qaukoppa ambak daaglag. Ge, danab ah qep elabppa mauhkkulag amu, ag gaɗalag qauko nakokppa, oolnu noak okkaippa, oolnu noak nakokppa ele ambak daaglag.

Esekiel 35:15

Ag kekeɗ heeg, Israel wan hele-ettak beum, haen amuppa ag oolag gamag ahom amunu, da heppi, ag Edom, ahilag wan am anamib daakku. O Qauko Seirnu danab, da heppi, ahilag wan oh am hele-ettak daakku. Anam dayeb am, ag Edom danab, ag dooglag, da am Yawe.” Yawe Nug anam atte.

Amos 1:11

Yawe Nug inam atte. “Edom danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag lailkadnab, am Israel danab ah amu, ag ag aqaglagnu qep elab aɗan, lamadna, ag oo bodoetta le mak nakok laa dooglagnu ii doonna uuppig. Ag uueg, ahilag oo nauhak am aab ewawaib daatte bia dayeye; ag lailkadnab dilagnu oppoɗilag be amelag kokoɗ eppa dayom.

Aisaia 29:2

amge da heppi, kekeɗ ag uɗin, Jerusalem oo mattan, danab aqadkkulagnu daan, appan danab ah ag guittak okkai aon, ag gaanna, mahiak okkai hekkulag. Jerusalem am danab mana mettaknu qaɗab qaɗeppa doɗ tiig gokkaɗeg laidtte, am amubia daakku.