Aisaia 33:1 - Nobonob Baibel

¹ Na laa, na hee, laa nauhtteb, laa ag na heitteg ii nauhme amu, nahipnu am gadonnab gadon. Yo, na laa hambuppualadna, nahip nai ag amelagppa ame ii dim lamidttem; laa ag nahipnu anam ii heppig ele amu, nahipnu am gadonnab gadon. Na laa heppe nauhkkulagnu uuppe, danab laa ag na heidppeg nauhkkut. Ao, na laa hambuppualadna, nahip nai ag amelagppa anana, ii dim lamidkkutnu kobol uuppe, laa ag hambuppuidna, na amenppa nai mattinna, ii dim lamidkkulag.

Aisaia 33:1 Referans Kwoze

Matyu 7:2

Aɗinu? Ag laa dilagppa epeɗiak kobol attenppa epeɗiadppeg amu, ag epeɗiak kobol amuppa aoglag. Ag lailkad dilagnu aɗi melemelppa keeke hetteb, ag melemel amuppaib geha keeke aoglag.

Aisaia 24:16

Danab ah aab umanab daatteb, wan ukka batakppa amu, ag gamag ahak doon, ahi edappeg doognig. Ahi ahilag am inam. “Ig Laa, Nug Genab Tutukku Hak Kobol Diig amu, ig Nug binag amahlak oppiaawak ele metu!” Ag anam ahi ettaglag. Ag anam ahi ettaglag, amge ⌊gemu amu, da uug bekkunu doottem amunu,⌋ da inam attem. “Dahilnu am gadonnab gadon. Da oolppa uug okkainab doyeye, da hamu iitta mekkulnu hettem. Ge! Da oolppa uug okkainab doyeye, da hamu iitta mekkulnu hettem. Da eheɗ hak danab, ag kobol nau henana, lailkad hambuppualatteg anadttem. Ge! Ag laa eheɗnab hambuppualadnana, eheɗnab hattegeg anadttem,” awe attem.

Revelesen 17:17

Ag oolag laippu mena, gumaknu ehah, ag amuppa king daatteb ele amu, ag oh gumaknu ehah amu doɗ dakkuɗ mettaglag. Ib amuppa ag Kayak nug dabmak amu ag oolagppa meum, ag Nug keeke anam bekkunu maittak awom am genab heppeg meu okku. Ag anam heppeg ukkeb, Kayak dabma mattiom amu, nai amu oh meu okku.

Aisaia 21:2

Da keeke anidmi am Yawe Nug tulegleg uug okkainab ele laa da meɗe anittitti, amuppa Yawe Nug inam a doomi. “Wan laa, ag nug bubuittak kobol nau hetteb ele amu, ag amuib tuɗidna hetteb. ⌊Amuam Babilon wan.⌋ Ao, wan laa ag ban hena, wan laappan danab aqaeg, amu dilag keeke aotteb ele amu, ag amu tuɗidna hetteb. ⌊Amuam Babilon wan aakku.⌋ Ag anam heegeg, ⌊kobol nau amu ba, naɗi mette amunu,⌋ Elam ban danab ag banelag uɗin, Babilon aqeg! Ao, Midianu ban danab ag uɗin, aab okkai amu talilidna, oo mettan dayeg! Da geha uug oh Babilon ag danab ah huu laa dilagppa madappig amu, da amunu nob elele mekkul,” awa aum.

Aisaia 10:12

Anam amunu, am inam bekku. Asiria dilag king nug dada danabnab daya haaha, nug ele beɗuppa tak kobol dim lamittatta, nai maditte amunu, Naɗi Nug heeb, Asiria dilag king nug keeke oh Sion qaukoppa Jerusalem appa hekkunu Naɗi Nug ana, nug eppegppa meum ele amu, nug amu oh ha maleb, dimppa geha Naɗi Nug dada ha laa eɗittaknu dabmak awak hak kobol nuhignu, beɗuppa tak kobol nuhignu ele, Nug diig amunu bu medakku.

Revelesen 13:10

Am aun nug maniguittakppa gokkunu daatte amu, appa gokku. Aun laa nug qep elabppa mauhkkunu daatte amu, nug qep elabppa mauhkku. Kobol amuam Kayaknu danab ah oppiaawak ele, ag tuɗidna uug doyaya eɗittaknuib dabmak awak kobol dim lamidna, ag oo metta ii uuak kobol ele tuɗidna anamib hekkulagoitte ippunigtte

Aisaia 17:14

Tueb, baɗak eheɗ nau! Ii wagkkaɗebeb, padal mak aakkuib! Kayak Nug heeb, laa ag eheɗ heignana, ihinkad keeke aotteb dilagppa anam bekku. Ao, Kayak Nug heeb, aun aɗi ag iqan, ihinkad keeke aoglagnu hetteb dilagppa anam bekku.

Ikki Danab 1:7

Ag amu heeg, dimppa Adoni Besek nug aum. “Da king 70 ele ban heta eɗatte, ag eppelkad tanig, amu baelkad tanig ele otaɗadmi. Da amu hein malai amu, ag ee huppu dahil balal waappanu amu lappig. Gemu Kayak Nug da ahilagppa heminu noob meɗom,” awa aum. Am Juda, Simeon danab ele ag nug aon Jerusalem ukkaeg, nug appa mauhom.

Revelesen 16:6

Danab imu ag nahipad danab ah oppiaawak ele, amu propet nahipad ele tiilag aɗappig amunu, na tiig lakkulagnu mattame. Ag nob amu aoglagnu daappig, amu na heme, amuppa na elelenab heme,” awa aum.

Ikki Danab 9:23

Kayak Nug ouɗi laa, hak eheɗ ele uuitte, nug he, Abimelek, Sekem danab ah ele gamalagppa oo aeg bak be, Sekem danab ah ag Abimelek waappa daaglagnu uun, nuhig nai tappaeg neum.

Aisaia 14:25

Da Yawe Dakka Ɠagattag Oh Ele, da geha heppi, Asiria ag uɗin, wan dahilppa daatteb, geha ag eheɗ naunab aoglag. Dahil qaukoppa, da ag tappaladppi nokkulag. Da heppi, geha danab ah dahilad, ag Asiria huu ehanadkkulagnu uɗat ɠagattag, guittak ele iinab hemana. Ao, ag Asiria dilag keeke uug okkai ele baula iinab maomna. Iitta!

Aisaia 31:8

Amu Yawe Nug atte. “Asiria ag mauhkkulag, amge ag danab dilag qep-ppa ii mauhma. Ao, qep laa heeb, Asiria ag mauhkkulag, amge qep amuam danabnu qep iitta. Ahilkad nid danab ag oolkkulag, amge ag uug ii qe-eɗidmana. Ao, laa ag ag aɗualadna maadppeg, daden madna, diin gona heppeg, ag danab ɗo waappa kingnu uɗat haknuib daaglag.

Aisaia 48:8

Anukkanu, gemu ele ag dahil nai dooglagnu uun, ag amunu dabmak ii aoppig. Ag daulag hanhan ituakib daatte. ⌊Da gemu keeke bau imunu madittem, anukka ag amelagppa ii ai dooppig amu, amunu diig am⌋ da doottem, ag paha da dimeɗan, laa binag mekkulagnu hetteb. Ag digmak haenppanu, gemu ele ag da waalppa daamnanu, dahil nai tabappeg nekkunu henan oitteb.

Esekiel 39:10

Ag bannu keeke aab ilaglagnu akkaglag amunu, ag aab atuppanu, o dattanu aoglagnu ii dabmemana. Laa Israel dilag keeke akkan gokkulagnu heppig amu, Israel ag ahilag keeke anam aoglag.” Naɗi Yawe Nug ana aakku atte.

Prowerb 22:23

Aɗinu? Yawe Nug daɗek ehanadkku; Nug danab ag daɗek eheɗ hadatteb ele, Nug ag eheɗ hadakku.

Sepanaia 3:19

Haen amuppa amu, laa ag ag Israel danab ah eheɗ hadappig amu, da ag bu eheɗ madakkul. Da dahilad laa ag eheɗ daatteb ehanadppi, ag eɗun uɗiglag. Ao, kekeɗ ag heeg, ag laih laih matatun gona daatteb amu, da ag qagmaadkkul. Da heppi, wan atu laihppan danab ag dahilad danab ah heeg, laih laih matatun gona daaegeg, appa ag aon aon aqan, uɗa nak madappig ele amu, danab ah amu ag dahilad danab ah binalag mattaglag.