Aisaia 28:1 - Nobonob Baibel

¹ Amu Israel danab ah ag le lanana, spak metteb ele, ahilagnu am gadonnab gadon. Gemu ahilag aab anuqak, Samaria, aab amuam binag amahlak oppiaawak ele; nug aben laa wan ittag enanag ele, amuppa qauko nakok eleppa daatte. Amu Israel danab ah ag wain lanana, spak metteb ele ag Samaria onig attannab human, laa oh eɗattak anambia dootteb, amge iitta! Bala laa bunaɗkkunu mauɗe neekkak ena iitta daatte, aab amuam amubia daatte.

Aisaia 28:1 Referans Kwoze

Hosea 7:5

King binag maknu qagmak gamag ahak elenu deɗppa, king bekkod ag wain laegeg, kaaka aqatte, king nug awa awa qettak danab ele oitteb.

Aisaia 28:7

⌊Amu anam aakku bekku, amge gemu⌋ Israel danab le lanak kobolppa daatteb amu, ag Israel danab ah gumadtteb. Propet danab, mana mettak danab ele oh le ɠagattag lana, spak menan, taataɗ qeegeg, hak ahilag am nauhom. Ag amubia oitteb amunu, dabmak ahilag eɗatte, maɗi ahilag amu, ag tutukku ii hetteb. Propet ag Kayak Nug tulppa keeke ippunatte, ag pehettak ii anidtteb. Mana mettak danab ele ag danab ah dilag keeke tutukku ii epeɗitteb.

Amos 6:6

Ag wain huana latteb; ag goɗen muttuɗig enanagnab, daden nob okkai ele laatteb. Ag amu oh hetteb, amge ag Israel padal mekku, ag amunu dabmena, oolag ii dootte; ag amunu dabmak nakok laa ii aotteb.

Amos 6:1

Ag ikki danab aab okkai Sion appa daan, “Ig enaib daat oignig,” doon oiyegeg, amu ag ikki danab Samaria appa daanna, “Ihinigppa uug laa ii bema,” dabmenan oitteb; ag am huu laa Yawe tituanatte, ag Israel danab ah oh dilag danab okkai daaeg, Israel danab ah ag ahilagppa ehanittak aoglagnu uɗitteb ele amu, ag oh, ahilagnu am gadonnab gadon.

Amos 2:12

Yawe Nug anam anan, Nug inam ele atte. “Anam amu, dahilad danab, Nasarait danab atteb, da ag wain lamananu ami. Da anam ami, amge ag Israel laa ag wagai men heeg, dahilad danab, Nasarait atteb, ag wain lappig. Yo, ag ele propet danab dahilad ag propet nai mattimnanu haknunab nai anan, ‘Aib!’ appig.

Amos 2:8

Ag laa dilag lamen, lamen amuam keeke lonnu onig awak daatte, ag tueb eɗun, mameg mettalob amu, ag lamen amuppa niitteb. Ag ahilkad kayak hambuppuak binalag menana, ahilkad qaɗab oh daugppa amu hetteb. Ao, ag danab hettoɗiakppa mena, ag eppelagppanu men doɗo aon, ag men doɗo amuppa wain aon, ag ahilkad kayak hambuppuak laulkadppa wain amu latteb.

Hosea 6:10

⌊Ag anam hetteb amunu,⌋ da kobol naunab nau Israel appa anidmi. Israel danab ah ag kayak hambuppuak noolagppa dup nona binalag menan daatteb. Ge, Kayaknu neekkakppa ag oolagppa dubuttid teum daatte.

Hosea 5:5

Israel danab ah ag am beɗuppa tak kobol hetteb, amu kobol amuam naippa yaaladtte. Israel danab ah, ahilag wan onig laa Epraim, ag hipunin henan, taataɗ qedatteb, Juda danab ah, ag ele oh laippu taataɗ qedatteb.

Hosea 4:11

Israel danab ah, ag wain bau, alag ele laegeg, wain amu he, ag dahilad danab ah, ag diignu doyak tutukku iitta ele oitteb.

Aisaia 9:9

Amu Naɗi Nug anam heeb, geha Israel danab ah oh, amuam Israel, Samaria danab ah oh, ⌊ag geha “Kayak Nug nukka he, uug imu beum,”⌋ dooglag. Danab amu, ag dada danab. Ag beɗuppa tak danab. Amu ⌊ag uug amu beeb, ag⌋ inam akkulag.

Aisaia 8:4

Aɗinu? Haen nid amu nug oɗe oppateb, ‘Mama, anai,’ ii aabob amu, Asiria dilag king, nuhikkud daup ele ag uɗin, aab okkai Damaskusnu keeke ena oh akkan aon, aab okkai Samarianu ele akkan aon gokkulag,” awa aum.

Aisaia 5:22

Danab ah aun aɗi, ag danab wain lanaknu onilag ele, ahilagnu gadonnab gadon! Ao, danab ah aun aɗi ag le ɠagattag digdig kabolina, huana latteb ele amu, ahilagnu gadonnab gadon! ⌊Ag padal mekkulag.⌋

Aisaia 5:11

Amu danab ag le ɠagattag digdig lakkulagnu guittak doon, lakkulagnu buttuanab ahatteb amu, ahilagnu gadonnab gadon. Ge, laa ag tueb ukke tugmag mette ele, ag wain lanan, kaaka eheɗ aqadtte amu, ahilagnu gadonnab gadon.

Prowerb 23:29

Aun nug uug okkai dootte? Aun nug oo doyak okkai dootte? Aun nug laikkud ele oolag laippu ii daatteb? Aun nug naittuɗ mak ele? Aun nug guittak awom, amge nug ii aolo? Aun nug ameg kokoɗ eppom daatte?

2 Stori 28:6

Deɗ laippuppa Remalia bekka Peka, nuhikkud daup ele ag Juda dilag daup 120,000 aqaeg mauhppig. Amu beumnu diig am, Juda danab ah ag Yawe, ag mamelkad aɗi dilag Kayak, ag Nug dimettan, Nug uuppig.

2 King 15:29

Haen Peka nug king dayeye, Tiklat Pileser, Asiria dilag king, nug banelag uɗia, Israel eɗatta, nug ahilag aab Iyon, Abel Betmaka, Janoa, Kedes, Hasor ele oh diia, nug Gileat wan, Galili wan, amu Naptali wan oh ele awa, nug danab ah aab, o wan amuppa daappig am diia, Asiria ukka he, ag aguppa daappig.

Lewitikas 26:19

Da heppi, ag hibguitta okkai henan oiglagnu dabmak aon oitteb ele amu, dabmak amuam iitta mekku. Am da heppi, hab attan am aen bia dayebeb, gu ii nema; wan nug geha ɠagattag, bras bia daakku.

Hosea 5:9

O Israel danab ah, da keeke laa ag oolagppa genabnab bekkunu ai dootteb; amuam ahilag bu awak deɗ uɗieb amu, ahilag wan am nauhakib daakku.

Aisaia 9:8

Am Naɗi Nug Jakop buɗub uug madakkunu aum. Ge, Nug geha Israel danab ah uug madakkunu aum.

Aisaia 9:11

Anam amunu, Yawe Nug ⌊Israel dilagnu oo nauheb⌋ heeb, kekeɗ ag Israel aqaglagnu uɗiglag. Nug heeb, ahilag kekeɗ ag ahan uɗiglag.

Amos 4:1

Amu Yawe Nug atte. “Samaria ah, ag nai imu doyeg! Ag amu, ag makau, Basan appa ⌊gikkiɗah enaib lanana, beɗulag enaib daatteb,⌋ ag amubia daatteb. Ag daɗek danab ah eheɗ hattanna, ag laa keeke iitta ele am hatteg nauhtteb. Ag amu henana, ag ahilkad danab amelagppa, ‘Le ɠagattag aon doppeg latu!’ aon atteb.

Amos 6:4

Ag qaɗaqaɗ, amuppa kobol kobol hoiyak daatteppa elepan aeg babaittak qataqak ele, ag amuppa niitteb; ag sia okkai enanagppa ele hamu daatteb. Ag sipsip nag enanag teppulag latteb; ag ele makau nag, amge ittag huanak ele teppulag latteb.

Amos 6:8

Naɗi Yawe Nug nukka Nug onig awa, nuhig nai ɠagattag qetta, Nug, Nug Yawe Kayak Nukka Ɠagattag Oh Ele, Nug inam atte. “Jakop buɗub, ag dada danab dilag kobol dim lamidtteb amu, da amunu oolppa uuaknab doottem. Ao, ag aab aɗ ɠagattagnab ele bappaladppig amu, da keeke amunu ele oolppa uuaknab doottem. Da anam doottem amunu, da kekeɗ paɗadppi, ag aab okkai ahilag imu eɗidppeg, aab amu, danab ah, keeke oh aab amuppa daatte ele am kekeɗ eppelagppa daaglag,” awa atte.