Aisaia 26:7 - Nobonob Baibel

⁷ Ib genab tutukku hak danab ah dim lamidtteb ele, ib amuam tak nak okkai, o tak nak naunau laa iitta. O Yawe, na haen oh kobol genab tutukkuib hettem amu, na genab tutukku hak danab ah dilag ib ena babaittette, tak nak laa ii dayeye, ag amuppa oitteb.

Aisaia 26:7 Referans Kwoze

Epesus 2:10

Amu Kayak Nug nuhig doyakppa he, ig bemut. Ge, Kayak Nug he, ig Kristus Jesusnu daatta, ig kobol ena hekkunignu daattem amunu, ig ig oninig humagnignu elele iitta. Kayak Nug ig amuppa oignignu anukka babaitta mekkom.

1 Jon 3:7

O nid naunau dahilad, laa ag buppualadmananu ag dabmeig! Aun nug kobol tutukkuppa oitte, nug Kristus genab tutukku hak danab daatte, nug amubia aakku genab tutukku hak danab daatte.

2 Korint 1:12

Aria, ig keeke laanu maɗoɗppan gamag ahak doottem. Ihinig ooppan oiyak ippunittaknu ulum am keeke amuam genab ippunigtte. Keeke amuam inam. Ig wanppa oimut, gemu ele oittem amu, ig Kayaknu oppiaawak kobol amu nuhig hambuppuak iitta kobol ele aot oimut. Ig danab dabmakppa ii hemut. Iitta. Ig Kayaknu ehanittak okkai hamu megatte, ig amuppa hetata amu, ig ag Korint daatteb oolagppa huana hemut.

Aisaia 42:16

Da geha dahilad danab ah, ag amelag gaɗuak bia daatteb amu, da ag omaladppi, ib ag anukka ii dooppig ele amuppa gokkunig. Yo, da ag omaladppi, ib ag anukka ii anidppig ele, ig amuppa gokkunig. Da heppi, gatatu ag tonattom daatte amu, gatatu amu oppiak ele dayeb, ag amahlak aoglag. Da heppi, aben qe ta qe nak ele, am uɗem tutukku daakku. Genab, da anam aakku ehanadkkulnu hekkul; da ag iinab uuadpa.

1 Jon 3:10

Anam amunu, ig kobol imuppa aun nug am Kayak Bekka, aun nug am Kayak Bekka iitta, nug Satan bekka daatte, amu ele doottem. Am inam. Aun nug kobol tutukkuppa ii oitte amu, nug Kayak Bekka iitta. Am laa nug layagnu oo ii mauhtte, nug ele Kayaknu iitta.

Prowerb 20:7

Genab tutukku hak danab nug oiyaya, nug Kayaknu neekkakppa danab ooppa kaliak laa iitta ele daatte; nug ena anam heehe, nug bekkod aɗekkud ele nug dim lamidtteb amu, ag itittak ena aotteb.

Sam 11:7

Aɗinu? Yawe Nug genab tutukku hak kobolib hette. Ao, Nug genab tutukku hak kobolnu oo mauhtte. Ge, aun aɗi ag kobol tutukku hetteb, ag geha Nug iɗu anidkkulag.

1 Korint 4:5

Epeɗiak uɗat amu ig gemu ii gumattem amunu, haen gamag imuppa ig anam ii hemata. Ag Naɗi uɗikkunu haen ameg meig! Nug uɗia, keeke oh gatatuppa lokkumak daatteb amu heeb, amahlakppa miag atippeg, aria Nug ele heeb, danab ag diig aɗinu keeke laala heppig amu, danab oh dilag dabmak amu miag bekku. Haen amuppa geha Kayak Nug ig danab oh laib laib ihinig haknu nob tutukku megakku.

Aisaia 35:8

Amu Yawe heeb, wan enanag dayeb, amuppa ib naɗi enanag ele daakku. Ib amu onig am Danab Oppiaawak Ba Daakkunu Ib. Danab ah ag Yawenu neekkakppa ag oolagppa dubuttid teum daatteb ele, ag ib amuppa ii oimna. Iitta. Ib amuam danab ah ag Kayakib dim lamidna, hipunin ii hetteb ele, ag ippulag aakkuib daakku. Nau hak danab ag Yawe dab-ii-mena ii dim lamidtteb ele, ag amuppa nakok laa oiglagnu elele iitta.

Sam 1:6

⌊Nau hak danab ag anam aakku daaglag.⌋ Aɗinu? Yawe Nug genab tutukku hak danab ah atognoadtte, amge nau hak danab ag padal mekkulag.

1 Stori 29:17

O Kayak dahil, da doottem, na danab oolagppa attem attem daatte, ag oolag italttem. Amu na danab nug nuhig dabmak oiyak ele am tutukkuib anidna, na amunu ootppa ena doottem. Anam amu, keeke imu oh da na mettami amu, da oo qak iitta ele, da dabmak genab dim lamitten mettami. Laa amu, da danab nahipad ag ina daatteb amu, ag oo qak iitta ele keeke medappig, da amu ele antten, gamag ahak okkai doottem.

Sepanaia 3:5

Ag anam hetteb, amge Yawe Nug aab amuppa tuɗidib daatte, Nug am genab tutukku hak kobol aakkuib dim lamidtte. Nug kobol kaliak nakok laa ii hette. Deɗ oh Yawe Nug nai doya mala hettoɗia epeɗia elele mettak kobol dim lamidtte. Ge, deɗ oh Nug nai doya mala hettoɗia epeɗia elele mettak kobol ii hemanu uutte. Amge danab laa, nug am genab tutukku hak danab iitta, nug heumnu dabmaama, nug eheɗ heumnu uɗa nak ii dootte.

Sam 11:4

Yawe Nug nuhig mettid lag nuhignu tituanak daatte, Nug amuppa daatte. Ao, Yawe Nug hab attan sia king nuhigppa gumak haaha daatte. Nug keeke oh dabmetta autanab aotte. Nug wanppan danab ah ohnab epeɗiadtte.

Sam 25:4

O Yawe, na nahip ib ippuniɗkkutnu oɗ medattem. Ao, O Yawe, na nahip ib attem attem gotte appe dookkulnu unuqidttem.

Sam 25:5

Na heppe, da nahip doyak diig genabib doyen, dim lamittei! Aɗinu? Na am dahil Kayak, na am dahil padal mepanu ehanittak daattem. Da deɗ oh amun tuqan ele nahipnu oolppa genab doottem.

Sam 27:11

O Yawe, kekeɗ dahilad ag da heiɗppeg nauhkkulnu hetteb amunu, na da ib nahip ena ippuniɗna omaiɗppe, ib tutukkuppa gokkulnu oɗ medattem.

Prowerb 4:18

Amu genab tutukku hak danab ippulag am digmakppa ena daatte, gamagppa enanag daatte, batakppa am enanagnab daatte; am aam haɗaedette, amahlak nakok nakok wanppa daye ukke, aam be, amahlak naɗi daatte, amubia daatte.

Aisaia 52:12

Aɗinu ⌊ag anam hekkulagnu elele daaglag⌋? Yawe Nug ag noolag awa, anuqa gokku. Ao, Israel dilag Kayak, Nug ag dimulagppa oiyaya uɗikku. Anam amunu, ag laa dilag baɗan, oolna ii gomana. Ao, ag oolna ii gomana.

Aisaia 57:2

Danab ah ag oolagppa kaliak laa iitta ele oitteb, ag Kayaknu nai dim lamidtteb amu, ag maɗoɗ aotteb. Ag mauhna, ag maɗoɗ tutukku aon niitteb.

Jeremaia 10:23

O Yawe, da doottem, ig danab ig ikka, ig ihinig oiyaknu ulumnab ii aɗattem. Ao, ig aɗi aɗi ihinigppa bekku amu, ig amu ii gumattem.

Hosea 14:9

Laa ag danab doyak dabmak ena ele, ag keeke imu ohnu diignu doyak tutukku aweg! Ao, laa ag oo maittak awaknu ehah aoppig daatteb ele, ag keeke imunu diignu doyak tutukku aweg! Aɗinu? Yawenu ib amu genab tutukku ele, amu genab tutukku hak danab ah ag amuppa daanna oitteb; amge nai tappe nak danab ah ag amuppa taataɗ qetteb.

Sam 5:9

Aɗinu? Kekeɗ dahil ag nai genab mattiglagnu elele iitta. Ao, ag oolag unuqagppa laa hadappeg nauhkkulagnuib oolag ahak daatte. Mattiak ahilag am uɗig wak nau, mauhak moɗ ooppan bia. Ge, ag nai maditteb, amge nai amuam nai hambuppuak.

Prowerb 3:6

Keeke oh na hekkutnu dabmettem amu, tatam Kayaknu dabmewona hekkut. Na anam heppe, Nug geha heeb, na ippun tutukku daakku.

Prowerb 11:5

Kayaknu neekkakppa danab ooppa kaliak laa iitta ele amu, genab tutukku hak kobol nuhig he, nug ib enappa oitte; amge nau hak danab ag nau heeg, kobol amu he, ag nauhtteb.

Prowerb 21:8

Danab ag beɗulagppa aab ele, ag kobol hambuppuak dim lamidna oitteb; amge danab ag eheɗ laa ii heppig ele, ag genab tutukku hak kobol dim lamidna oitteb.

Aisaia 30:18

Diig amunu amu, ⌊Ag oolag eɗueb,⌋ Yawe Nug oo bodoette enanag maɗoɗ ele hak kobol dim lamittatta, amuppa ag ehanadkkunu oo huan daatte. Ao, Nug ⌊ag oolag eɗueb,⌋ Nug ahilagnu oo bodoetta le mekkunu babaittak daatte. Aɗinu? Yawe Nug am Kayak haen oh nai doya mala hettoɗia epeɗia elele mettak kobol dim lamidtte. Amu aun aɗi ag Yawe ameg metteb ele amu, ag am itittak ena aoppig daatteb.