Aisaia 25:1 - Nobonob Baibel

¹ O Yawe, na dahil Kayak! Da na binan mein, na onin attan humakkul. Aɗinu? Na keeke oh hekkutnu anukka maittak aome amu, na maittak amunu oo metta ii uuak kobol dim lamidnana, aakku heme. Amu, na keeke heme amu, keeke amuam keeke okkainab, danab andatta ottaitte.

Aisaia 25:1 Referans Kwoze

Eksodas 15:2

Yawe Nug nukka da ɠagattag iukkunu dootte; Nugib da ehaniɗtte amunu, da gamag ahak doye, ahi edattem. Nugib da ehaniɗe, da padal ii mettem. Nug am dahil Kayak, da Nug onig humakkul. Nug am da mamelnu Kayak, da Nug binag okkai humakkul.

Sam 118:28

O Kayak, na dahil Kayak, da na amenppa, “Ena hen mekkame,” akkul! Yo, na am dahil Kayak, da na binan mekkul.

Namba 23:19

Danab ag hambubutteb, amge Kayak Nug am danab iitta, amu Nug ham-ii-bubutte. Ao, danab ag ahilag dabmak baolitteb, amge Nug am danab bekka iitta, amu nug nuhig dabmak ii baolitte. Yawe Nug keeke hekkunu atte amu, Nug hette. Nug keeke hekkunu nai ana qagatte amu, Nug genab anamib aakku hette.

Sam 98:1

Yawe Nug kobol danab hekkunu elele iitta heum amunu, ig Yawenu ahi bau ettatu! Yawe Nug am ɠagattag, amu oppiaawak ele. Amuppa amu Nug ha, Nug kekeɗ nuhikkud eɗattom.

Aisaia 61:10

Da padal mepanu Yawe Nug ehaniɗom, amuam Nug lamen ena da beɗulppa melo, amubia daatte. Ge! Kayak he, da genab tutukku hak danab daattem, amuam Nug lamen elab enanag da beɗulppa melo, amubia daatte. Nug anam heum amunu, da nuhignu enanagnab doottem. Ge! Da nuhignu oo gamag ahak okkai doottem. Lamen Nug dahilppa meum amu, amuam danab nug ah aokkunu haaha, nug igippa lamen enanag, mana mettak danab mette bia mette amu, lamen dahilppa meum am amubia. Yo, ah nug danab aokkunu haaha, nug bala enanag beɗuppa mette amu, lamen dahilppa meum am amubia.

Aisaia 28:29

Doyak imu oh am Yawe Nukka Ɠagattag Oh Ele, nuhigppanu uɗitte. Nug ulum ena ena ele megatte. Nug doyak dabmak okkai okkai, laa oh eɗattak ele.

Sam 40:5

O Yawe, dahil Kayak, na keeke kuɗum, danab amu hekkunu elele iitta, na aakku heme. Ao, na keeke ena ena kuɗum ihinignu maidme amu, laa nug keeke amu ohnu eɗua, na amenppa ab dookkutnu elele iitta. Keeke na hekkutnu maidttem am huanak, ebqaknu iitta amunu, da ma anttak hein, da laa amegppa keeke amu ohnu akkulnu hekkul dayeb amu, da elele iitta. Am keeke kuɗum, huanak ele.

Epesus 1:11

Ig Kristusnu uɗat okkaippa Kayak bekkod daattem. Kayak Nug keeke oh attem bekkunu dabmette amu, anamib bette amunu, Nug ig nuhikkudnab daagnignu dabmaama meikkom daatta, ig Nug bekkod daattem.

Sam 46:10

Yawe Nug atte. “Danab ah wanppanu, ag toettan daan, ag imu doyeg! Da am Kayak. Da geha wanppan wan anen anen oh dilag king daakkul. Ao, da geha wan ohnu king daakkul.”

Revelesen 19:11

Nug anam a amu, hab obate, da hos hakkab laa dayeye anidmi. Laa Nug hos amu attan dayom amu, Nug onig am, Oo Metta ii Uua, Genab Hak. Laa amu Nug nai doya mala hettoɗia epeɗia elele mettak kobol dim lamittatta, nug epeɗiak uɗat, ban hak ele hette.

Aisaia 46:10

Da digmak haenppa keeke laanu gogppa tak haenppa bekku amu hei, miag atitte. Da anukkanab aɗi keeke butti aɗi bekku ai dooppig. Da attem. ‘Da aɗi keeke dabmein attem amu, da hei bette. Da aɗi oh hekkulnu hettem amu, da hekkul.’

Revelesen 7:12

Ag binag mena appig. “Genab, anam dayaɗ! Onig okkai, binag amahlak oppiaawak ele, doyak dabmak ena ele, ena heme anak, binag mak, ɠagattag oh, amu ebehi ele hanhan alet ele ihinig Kayak, nuhigppa dayaɗ! Genab.”

Aisaia 26:13

O Yawe, na am ihinig Kayak. Okkai laa ag ig gumigppig, amge ig na oninib binag mettem.

Sam 146:2

Da bau dayeye, da Nug binag mekkul. Ge, da dahil Kayak binag mekkulnu amu, da ahi edetteib daappi ukkeb mauhkkul.

Sam 99:5

Yawe Nug oppiaawak daatte ⌊amunu,⌋ ag Yawe, ihinig Kayak, ag Nug humitteg! Ag Nug baeg gukkuidna gona, ag Nug noobppa dup nona Nug binag meig!

Revelesen 15:3

Ag anam daanna, ag Moses, Kayaknu maɗi nid, amu Sipsip Nag, Nug ele edapiɗ amu, ag amu ettanna inam appig. “O Naɗi Kayak Nakka Ɠagattag Oh Ele, nahip hak am onig, ɠagattag ele, danab antta nug enanag doya dabmak kuɗum aotte. Nahip ib am ib tutukku, genab ele. Na wannu king hanhannu.

Sam 78:4

Ig nai genab amu ig nid ihinkad doomnanu ii lokkumadmata. Ao, menuattak huu laippu bia bau dotteb ele amu, ig apput dooglag. Ig Yawe keeke okkai okkai heumnu apput dooglag. Ao, ig nuhig ɠagattagnu, amu kobol danab hekkunu elele iitta nug heumnu ele mattignig.

Sam 145:1

O Yawe, na am dahil Kayak, na king. Da geha na binan okkai, attannab humakkul. Yo, da geha hanhan na onin attan humakkul.

Sam 111:4

Nug kobol danab hekkunu elele iitta heum ele amu, Nug he, danab ag amu daulag atikkunu elele iitta. Yawe Nug oo bodoette enanag maɗoɗ ele hak kobol dim lamitta, Nug ihinignu oo gai-iitta doya, oo mekka, ehanigtte!

Sam 89:1

O Yawe, da oo mauhaknab kobol nahipnu oo gamag ahak doyeye, hanhan ahi edakkul. Yo, da geha oo metta ii uuak kobol nahipnu laa amelagppa madikkul.

Aisaia 7:13

Anam a amu ⌊Aisaia⌋ nug aum. “King Dawit buɗub ag, ag gemu tutukku doyeg! Ag kobol ahilag amunu amu, danab ah ag ahilagnu bahilag yaatte amunu, gemu ag heppeg, dahil Kayak Nug ele ahilagnu bahi yaakkute?

Aisaia 11:5

Danab nug matagiɗ tagatte, amubia ⌊Jesi buɗub⌋ nug genab tutukku hak kobol aɗa dim lamidkku. Ao, danab lamen tagatte, amubia geha nug oo metta ii uuak kobol haen oh dim lamidkku.

Aisaia 12:1

Haen amuppa amu ⌊Israel danab ah, Juda danab ah ele ag oh laib laib⌋ geha ahi inam ettan akkulag. “O Yawe, na dahilnu oot nauhom, amge gemu nahip oo nauhak amu na uume. Ao, na uunna, nai ena da meɗan oo mak meɗame amunu, da na binan humakkul.

Aisaia 26:8

O Yawe, ig ihinig oiyak ohppa nahip ɗo dim lamidtata, amenig na anidtata, naib amen mekkunig. Ig na onin, binan okkai ele daakkutnu oonig okkai daatte.

Aisaia 40:27

O Jakop buɗub, aɗinu ag inam atteb? Ao, ag Israel danab ah, aɗinu ag wagai mena, inam atteb? “Yawe Nug dahil ib ii dootte. Ao, Kayak dahil Nug nai doya mala hettoɗia epeɗia elele mettak kobol ii dim lamitta, da ii ehaniɗtte.” ⌊Ag anam atteb, amge amuppa ag eheɗ hetteb.⌋

Aisaia 49:4

Amge da ami. “Da uɗat hemi amu, amuppa aɗitai laa ena ii beum. Yo, da uɗat hei, dahil ɠagattag iitta meum, amge uɗat amu oh hamu ukkom. Anam daatte, amge uɗat da hemi, amuppa da nob ena aokkulnu daatte, amuam Yawe eppegppa daatte. Yo, da uɗat hemi, amuppa nob aokkul ele amu, amuam Kayak toppa daatte.”

Aisaia 49:5

Yawe Nug da anil ooppa, Nug da nuhig maɗi nid meiɗa, Nug da Jakop buɗub, ag nuhigppa eɗue diie uɗikkulnu heiɗom. Yo, Nug da Israel danab ah ehanadppi, ag eɗun, nuhigppa uɗiglagnu heiɗom. Yawe Nug da binag okkai meɗatte. Ao, dahil Kayak Nug ɠagattag meɗatte.

Joel 2:26

Ag ee amu aon, ag elele labeppeg, oolag didikku. Oolag dittieb, ag da, Yawe, ahilag Kayak, da ag ehanadkkulnu uɗat ɠagattagnab ele hemi amu, ag uɗat amunu da onil humaglag. Ag am dahilad danab ah. Ag baula uɗa nak ii doomna; iitta.

Sam 31:15

Da na eppenppa daattem. Kekeɗ ag da iuppeg mauhkkulnu hetteb; laa ag da lamiɗna uɗina, da eɗilkkulagnu hetteb amu, da amu oh dilag qagaiettakppa daapanu na ehaniɗkkutnu oɗ medattem.

Sam 40:6

O Yawe, na ootppa keeke anuqak am, danab ah ag ofa iɗu iɗu na mettaglagnu ii daatte. Ge, danab ag nahip qaɗabppa manaknu ofa, ib etta hipunin haknu ofa ele na mettaglagnu amu, na amunu ootppa keeke anuqak ii doottem. Kobol na amunu anuqak doottem ele am, danab nug nahip nai dim lamidkku.

Sam 75:2

Amu Kayak atte. “Daib da hettoɗiak ganeb haknu attem; daib da nai doya mala hettoɗia epeɗia elele mettak tutukku hettem.

Aisaia 46:11

Da danab laa ⌊Sairus,⌋ aam bedeppanu, ⌊nug ban haknu danab⌋ ai doɗ qe mauhe latte, nug amubia hekku amu, da nug onigppa ettem. Ao, da wan umanabnu danab laa nug dahil dabmak dim lamitta, dahil oo hak heeb bekkunu onigppa ettem. Da aɗi heppi bekkunu ami am, ana bekku. Ao, da aɗi kobol bekkunu maittak aomi amu, da heppi bekku.