Aisaia 23:13 - Nobonob Baibel

¹³ ⌊O Ponisia danab ah, ag Yawe Nug aɗi bekkunu maittak aotte ele amu, keeke amu bette anidkkulagnu⌋ ag neegna, Babilon dilag wan antteg! Appa danab ah qainqainib oitteb. ⌊Aɗinu? Yawe dabmeum bia⌋ Asiria ag ahan heeg, Kaldia wan am nauhakib daatte. Am ai nau, doɗ nau ele dilag aben aakku daatte. Asiria ag Kaldia dilag aab laala aɗ ele, ag aab amu eɗadkkulagnu ag aɗ dimittim lag attan ta ukkak hattana, appanu eɗadppig. Asiria anam heeg ukke, ag Kaldia dilag king laug, danab okkai laulkad ena ena ele, ag lag amu ohppanu keeke oh akkan goppig. Ag wan amu aakku heeg nauhom daatte.

Aisaia 23:13 Referans Kwoze

Aposel 7:4

Kayak aum amu Abraham nug Kaldia wan uua, aha ukka, Haran dayom. Appa dayeye, dimppa mameg mauhe amu Kayak Nug he, aha Kanan wan, gemu ag daatteb ele imu, iguppa uɗiom.

Habakuk 1:6

Na ootppa genab ii doomnanu diig am, antte! Da heppi, Babilon danab ag ahan, ⌊ag Juda, ag bu mattaglag⌋. Babilon daup ag am ban danab, ag oo doyak ii doon nau hetteb. Ag aɗi hekkulagnu ahilag dabmakppa bette, ag ahan hetteb. Ag wan atu ohppa paha wana, eɗadna, ahilkad lag, wan keeke, ag aon, ahilag daakkunu aɗatteb.

Daniel 4:30

nug aum. “Da ɠagattag okkainab ele. Da ɠagattag amuppa hei, ag aab naɗi imu, Babilon, da iguppa daakkulnu iite buuppig. Danab ah ag da king, da dagom onil ɠagattag ele aniɗkkulagnu amu, da dahil ɠagattag naɗinab amuppa hei, ag aab imu iite heppig?” awa aum.

Esekiel 29:18

“Danab bekka, Babilon dilag king Nebukatnesar nug he, nuhikkud daup ag Tair aab eɗidkkulagnu uɗat ɠagattag, heɗiag ele heppig. Ag keeke digdig ikkilagppa maoegeg, ikkilag uɗug tataɗe ukke, iitta meum. Ag keeke gukkalagppa maoegeg, gukkalag ihi mettom. Anam, amge Nebukatnesar, nuhikkud daup ele ag aab Tair paha eɗidkkulagnu elele iitta. Anam daye, Nebukatnesar, nuhikkud daup ele ag Tair appanu keeke nobnu laa ii aoppig.” Yawe Nug anam awa atte.

Aisaia 13:19

Wanppan wan oh oolagppa, danab ah ag Babilon am attannab dabmetteb. Babilon danab ah ag dada hak kobol henana, Babilonnu, ‘Am binag amahlak oppiaawak ele,’ dootteb. Ag anam dootteb, amge Kayak Nug heeb, Babilon am Sodom, Gomora ele nauhpiɗ, amubia nauhkku.

Aisaia 10:7

Amge dahil dabmak amu, Asiria kingnu dabmak ele laippu ii daama. Nuhig dabmak am laa daakku. Aɗinu? Nuhig dabmak am nug wan imuppan wan kuɗum heeb nauhna, iitta mekkulagnu daakku. Nuhig dabmak am anam daakku.

Aisaia 10:5

Amu Kayak Nug atte. “Asiria danab ah dilagnu am gadonnab gadon. Gemu Asiria nug da eppelppa bu aɗak bia da aɗai dayeye, danab ah ag da oo nauhak meɗatteb amu, da amuppa ag uug matte, eheɗnab mataɗadttem. Ao, Asiria nug da eppelppa daɗib bia da aɗai dayeye, da danab ah dilagnu oppoɗi bak huanak doyeye, amuppa bu madattem.

Sam 72:9

Danab ah ag atu taɗakppa oinna daatteb ele, ag nug noobppa dup nokkulag. Nuhig kekeɗ ag nug noobppa nena qena, gappudppa niiglag.

Job 1:17

Danab amu nug uɗia, nai amu Job amegppa mattia dayeye, nai awa uɗiak danab laa nug qaietta uɗia, Job toppa ta, amegppa aum. “Kaldia danab ag oinna ban hena danab ah aqadna ahilag keeke aon gotteb ele amu, danab amu ag huu ewam daan uɗin, ag nahipad maɗi nid kamel gumadppig ele oh qep elabppa aqaeg mauheg, ag kamel nahip oh diin goppig. Da dakka ag da ii aɗaileg, da oole, na amenppa akkulnu uɗimi,” awa aum.

2 Stori 33:11

Ag amu heegeg, Yawe he, Asiria kingnu daup dilag okkai ag ahilkad daup ele uɗin, Juda eɗadna, ag Manase aɗan, ag huk nug noobppa mena, ag qakkaknu keeke brasppa hak nug eppegppa, baegppa ele qakkan, ag nug aon, Babilon goppig.

2 King 20:12

Haen amuppa Baladan bekka, Merodak Baladan, nug Babilon dilag king dayom. Nug king dayaya, nug Hesekaia oɗe me doyom amunu, nug nuhikkud danab laa ag pas laala, keeke ena laa ele ag aon gona, nuhig daakkunu Hesekaia hamu mettaglagnu maatte goppig.

2 King 17:24

Israel ag anam gona daaegeg amu, Asiria dilag king nug danab ah Babilonnu, Kutanu, Awanu, Hamatnu, am Separwaimnu ele diia ukka, Israelnu aab anen anenppa maatte, Israel oulag daaglagnu daappig. Danab ah amu ag Israel wan ahilag daakkunu aon, ag Israelnu aab anen anenppa aakku daappig.

Genesis 11:31

Anam daye amu, Tera, amu nug bekka Abram, nug alag Lot, amu nug ahipa Sarai ele, nug ag omalatta ukkom. Lot amu, nug Haran bekka, amu Sarai, nug am Abram wau. Tera aɗi ele ag aab onig Ur, Kaldia wanppa daatte, ag aab amu uuna, Kanan wanppa gokkulagnu ahappig. Ahana amu, ag gona, Haran aabppa tena, ag aab amu uun, Kanan wanppa ii goppig. Iitta. Ag aguppa daaglagnu daappig.

Genesis 11:28

Haran, nug appag diig onig Ur, Kaldia wanppa daatte, amu appa nug mameg dayeye, nug mauhom.

Genesis 11:9

Yawe Nug amu he, ag nai piɗe piɗe mattiegeg, laa nai mattiom amu, layag nug mattiak nuhig ii doyom amunu, ag aab amu onig Babel ataɗppig. Yawe Nug anam he, ag aben amu uuna, wan ohppa gona oidttappig.

Genesis 2:14

Asiria wanppa, laih ulah kaɗag uɗitteppanu daatte amu, appa le laa gotte; nug onig Taigris. Amu le laa onig Yupretis.

Aisaia 13:21

⌊Danab ah ag geha appa ii daamna. Iitta!⌋ Amge doɗ dakkuɗ atu taɗakppanu ag uɗin, appa daappeg, doɗ jakal ag uɗin, lag amuppa ambena daaglag. Hipunai ag geha uɗin, appa teɗ mebeppeg, meeme dakkuɗ ag ele geha uɗin, qiɗ henan daaglag.

Aisaia 18:6

⌊Kekeɗ ag geha ban danab wan amuppan kuɗumnab aqappeg mauhppeg,⌋ ag gaɗalag geha mauhna niippig, aben amuppaib anam niippeg, ai doɗ latteb ele, ag lattaglag. Ao, doɗ, ag doɗ teppu latteb ele amu, ag lattaglag. Gakkaɗak haenppa, geha ai teppu latteb ele, ag lakkulag; oug haenppa am geha doɗ teppu latteb ele, ag lakkulag.

Aisaia 43:14

Yawe, Nug ag Juda, ag ahilag qagaiettakppanu eɗua uhuqaknu ehanittak daatte, Nug ag Israel, ahilag Kayak Oppiaawak Ele amu, Nug atte. “Ag Juda, ag Babilon appa diia ukka laih me dayak danab ah daaglag amunu, da ahilagnu dabmak anuqak awewe, da heppi, ban danab laa ag Babilon gona, ban heppeg, Babilon nauhkku. Da heppi, laihnu ban danab ag Babilon eɗadna, ag Babilon danab ah kuɗum aɗualadna heppeg, ag laih gonana, ag gaanna gokkulag.

Esekiel 23:23

Ag uɗin, talilidna daaglag amu, ag am Babilon dilag daup Babilon wan ohppanu, aria Babilon dilag ehanittak Pekot, Soa amu Koanu ele. Amu Asiria ele ag uɗin, Babilon ehanidkkulag. Ag oh am nid bau, beɗulag ena ele. Ag am ban danab ikkilkad. Ag am ban danab ban haknu karisppa oinna ban hetteb dilag ikkilkad. Ag danab onilag ele, hos attan daan ban hetteb ele.