Aisaia 22:16 - Nobonob Baibel

¹⁶ ‘Sepna, na ⌊hee, maɗi nid nahip ag men oɗe enanag⌋ nahip boumak aben daakkunu aoeg, nahip boumak aben aakku heppig. Ao, na gaɗan aben ⌊enanagppa⌋ daakkunu na ⌊hee, danab ag⌋ men oɗe amu hoieg ukke daatte. ⌊Amge⌋ na ippa aɗin daattem? Ippa na laipad laa elete, amunu na nahip boumak aben anam iikku bappaidme?’ ” awa aum.

Aisaia 22:16 Referans Kwoze

Matyu 27:60

Nug itowa, nuhig moɗ bau menppa babaittom amuppa meum. Mewowa, men okkai laa buɗibɗib mette ukka, moɗ oɗe qehakkom. Nug anam hewowa amu, nug ukkom.

2 Stori 16:14

Amu Asa nug ii mauhom haenppa nug he, danab ag nuhig boumak aben menppa hoippig. Men moɗ amuam Dawitnu Aab, aab amuppa dayom. Amu Asa nug mauhe, ag nug aguppa boumna, ag spais, keeke muttuɗig enanag laala ele kuɗumnab amuppa meeg dayeye, ag aab naɗi nug binag mekkulagnu ilappig.

2 Samuel 18:18

Amu Apsalom ii mauhom haenppa, nug bau dayaya, nug men okkai laa babaitta, nug men amu oolnu noak onig Kingnu Oolnu Noak, aguppa qappe dayom. Nug amu heumnu diig am nug nukka, nug mattia inam aum. “Da nid danab iitta amunu, danab ah oh ag dahilnu daulag ii atimanu, da men imu ag dahilnu dabmekkulagnu hettem,” awa aum. Nug nukka nug onig men amuppa qataqeum, amu haen amuppa, gemu ⌊nai imu yaak haenppa⌋ ele, danab ah ag men amunu, “Apsalomnu at,” aon atteb.

Job 3:14

Da anam mauhlom amu, gemu da king laala, ahilkad ulum mettak danab ele ag lag enanag, okkainab ele ahilagnu babaitteg ukke, ag mauheg, lag amu ele nauhppig, da ag ele niilom.

Maika 2:10

Ag nau amu hetteb amunu, ag ahan, wan imu uun ukkeg! Wan imuam ag ahilag aben hik aon daaglagnu iitta. Aɗinu? Ag heeg, wan ag daattebppa imu, am Kayaknu neekkakppa dubuttid tak ele daatte. Ao, ag heeg, wan ag daattebppa imuam nauha autanab awom daatte; babaittaknu elele iitta.

Aisaia 52:5

Ag anam daaeg uɗie, gemu attemnab iikku beum daatte? Aɗi beum daatte amunu, wan laappan daup ag ele uɗin, ag dahilad danab ah hamu diin goppig? Ag diin gona heeg, dahilad danab ah ag gumak ahilag waappa daaeg, danab amu ag dahilad danab ah aon aon aqatteg, danab ah kuɗum ag deɗ oh amun tuqan ele dahilnu dabittak nai maditteb.

Aisaia 14:18

King laa oh wan laala ohppan mauhppig, gaɗalag boumak aben enanagnabppa boumatteg niitteb. Mauhak gaɗalag anen anen amu ag ahilag aben piɗe piɗeppa maadppig niitteb.

Genesis 50:5

“Da mamel nug mauhak haen nuhigppa da amelppa inam aum. ‘Da mauhkkul hettem amunu, na da Kanan wanppa, boumak aben da bappaidmi ele, na appa boumiɗkkutnu nahip nai ɠagattag qena, appe doyei!’ awa aum. Nug anam aum amunu, da dahil nai ɠagattag qein, da anam mattimi amunu, da anam hekkulnu ool daatte. Na appe, da ukke, Kanan wanppa da mamel boumoya, da eɗuen uɗikkul.” Josep nug anam awa atte,’ aon aeg!” Josep nug ag Paro amegppa anam akkulagnu ag amelagppa anam awa aum.

Aisaia 14:19

King laala oh ag matmatppa anam niitteb, amge laa nug na gaɗan matmatppa ii meum. Iitta. Na gaɗan am hamu, miag daatte; doɗ laa mauha beɗeɗe, danab anidtte, amge nug keeke laa ii hette, na gaɗan am amubia daatte. O na gaɗan am ban haenppa kekeɗ ag ban gudkkudppa o latppa danab kuɗum aqaeg mauheg, laa ag mauhak gaɗalag amu moɗ hamuppa akkaeg nona daatteb, na gaɗan amubia daatte. O na gaɗan amu danab laa banppa oiye oiye, qeeg mauha, na qa wanppa niieye, ban danab laa ag baelagppa danab mauhom amu tappanna gotteb, na gaɗan am anam bia daatte.

Aisaia 22:17

⌊Sepna⌋ na dabme! Na danab ɠagattagte dabmettem? Iittanab iitta! Yawe Nug geha danab nug qiɗnu bal ɠagattag aɗa, mawe, laih umanab ukka na qette, amubia Yawe Nug heeb, kekeɗ ag na awidna gona, wan laa umanab daatte, appa meidppeg daakkut. Na geha wan amuppa mauhppe, oiyaknu karis enanag nahip, na oot amunu huan mauhtte ele, geha keeke amu ele am wan amuppan dilag daakku. Na kingnu uɗat hettem, amge na uɗa nak nau guittak ele aon dona, king baekkudppa madattem.