Aisaia 10:6 - Nobonob Baibel

⁶ Anam amu, da Kayak, da heppi, Asiria danab, ag danab ah laa, danab ah amu ag dahilnu, dahil haknu ele uuak dootteb, ⌊am Israel danab ah aakku,⌋ da ag danab ah dahil amu bu mattaglagnu ahilag wanppa gokkulagnu gokkulag. Ao, da, Kayak, da Asiria ag danab ah amu ag oo nauhak da meɗatteb, ⌊am Israel danab ah aakku,⌋ da ag danab ah dahil amu dahil bu aoglagnu heppi, ag ahilagppa gokkulag. Da Asiria ag banelag gona, Israel dilag keeke, ahilag en ele aoglagnu heppi gokkulag. Yo, da Asiria ag gona, Israel eheɗ hattan, tappaladppeg noppeg, oɗoɗadna autna aoglagnu heppi gokkulag.

Aisaia 10:6 Referans Kwoze

Aisaia 9:17

⌊Ikki danab aɗi ag anam hetteb,⌋ diig amunu ⌊Israel danab ah oh⌋ ag Kayaknu, nuhig haknu ele uuak doon, ag nau hak kobol henana, nai uɗig wak ele oɗelagppa anan oitteb. Anam amunu, Naɗi Nug Israel dilag nid bau dilagnu gamag ahak laa ii dootte. Diig amunu Nug ah qab, amu nid ag mamelkad mauhppig ele, Nug amu dilagnu ele oo ii madatte. Anam, amge Naɗi Nug nuhig oo nauhak amu iinab bodoettama. Iitta! Nug ⌊bu tuɗitta madakkunu⌋ eppeg huma daakku.

Sekaraia 10:5

⌊Juda⌋ ag ban danab ɠagattag, banppa ban ɠagattag hetteb bia daaglag. Ao, ag danab, ag ahilkad kekeɗ eheɗ eɗadtteb bia hekkulag. Aɗinu? Yawe Nug ag ele daatteb. Ge, ⌊Yawe ag ele daatteb, amunu⌋ ag ban ɠagattag hena, ag kekeɗ hosppa ban hetteb ele eɗadkkulag.

Jeremaia 34:22

Da appi, Babilon dilag king, nuhikkud daup ele ag eɗun, aab okkai imuppa daanna, ban hekkulag. Ag aab imu eɗidna aon, ag manappeg eokku. Amu da heppi, Babilon dilag daup ag Judanu aab heppeg nauhattakib daappeg, danab ah laala ag amuppa daaglagnu elele iitta daaglag.” Yawe Nug anam awa atte.

Jeremaia 25:9

da heppi, Babilon dilag king Nebukatnesar, dahil maɗi nid, nug nuhikkud daup ele, aria, laa oh ag wan imunu laih yawalti uɗitteppanu daatteb ele, ag Nebukatnesar nuhikkud daup ele oh banelag uɗiglag,’ awa atte. Amu Nug atte. ‘Da heppi, ag uɗin, ag wan imu aoglagnu, ag ippan danab ah, wan laala wan imu talilittak daatteb ele amu, ag ele oh ban hekkulag. Da heppi, wan imu, amu wan laala wan imu talilittak daatteb ele, ag dahilnuib, dahil pelemppa daaglag. Ag anam daappeg, wan laappan danab ah ag anidna, ameg iɗuak doon, ahilagnu, “Keeke hamunab,” dooppeg, wan imu, wan amu oh am hanhan padal mak anamib daaglag.

Aisaia 19:17

Ag geha baɗan ottaina, ag Juda dilag ele geha eheɗ nau baɗaglag. ⌊Genabnab genab!⌋ Isip ag Yawe Nukka Ɠagattag Oh Ele, ⌊ag Nug Juda dilag Kayak daatte doon, ag⌋ Nug ag ahilagnu aɗi hekkunu maittak awom daatte dooglag amunu, haen danab laa nug Isip danab laa amegppa, “Juda,” ab amu, Isip danab amu nug geha eheɗ naunab baɗakku.

Matyu 15:7

Ag hambuppuak danab! Propet Aisaia nug ahilagnu tutukkunab aakku anukka propet nai ana, inam mattiom.

Maika 7:10

Yawe Nug anam heeb, ihinkad kekeɗ ag anidna, ag uɗa nak naunab nau dooglag. Ao, laa ag ig amenigppa, “Yawe, Nug am ahilag Kayak, Nug adeppa daatte?” appig ele amu, ag uɗa nak anam dooglag. Ag anam nena qekkulag, ig amenigppanab ahilag na qak anidkkunig. Ao, haen amuppa Yawe Nug heeb, danab lekkoh tappa gotte, amubia danab ag ihinkad kekeɗ baelagppa tappaladna oiglag.

Jeremaia 4:14

O Jerusalem danab ah, Juda danab ah ele, ag oolag dubuttid ele amunu, ag padal ii memananu, ag ehanittak aoglagnu, ag dubuttid amu oppieg! Ag nau hekkulagnu dabmak aɗan daatteb; amu haen gane laa ele ukkeb, ag dabmak amu uuglag.

Jeremaia 3:10

Israel ag anam heegeg, da ag uug nau mattami, amu Juda, ag da ippunadmi bia da dim lamiɗkkulagnu uun hetteb amu, ag anidppig, amge ag genab eɗun dahilppa ii uɗippig. Iitta. Ag ameg qakkak hakib hena, gaɗalagib eɗun dahilppa uɗippig.” Yawe Nug anam atte.

Aisaia 63:6

Da ool nauhehe, da wan atu laihppan huu tabatti neppig. Ao, da oppoɗil beebe, da hei, ag nena qeppig. Da ag tiilag wanppa gokkaɗmi.” Laa uɗiom ele nug anam aum.

Aisaia 63:3

Amu laa nug uɗitte amu, nug nob ma atte. “Da danab nug nukka grep meu tappa leppu awaknu abenppa grep meu tabatte bia, da dakka kekeɗ ele ban hemut. Wan atu ohppanu laa nug da ehaniɗkkunu laa ii dayom. Laa ehaniɗkkunu iitta amunu, da dakka hemi. Da ool nauhehe, da kekeɗ tappaladmi. Ao, da oppoɗil beebe, da tappalatti neppig. Da anam heiyi, ag tiilag lamen dahilppa ta, qataqeum. Dahil lamen oh am tiig amu laittak ele.

Aisaia 41:25

Yawe Nug atte. “Da laa dabmak metten hei, laa amu nug yawalti uɗitteppanu aakku aha, yag bak doya uɗitte. Ao, da laa, nug appag diig aam bedeppa daatte amu, da laa amu hei aha, nug da unuqiɗtte. Danab laa amu nug danab lekkoh baegppa tabatte, nug amubia danab okkai he nauhtteb. Nug waa keeke hak danab tatam lekkoh baegppa tappe, kaboliak elele daye waa hette, danab amu nug danab okkai dilagppa anam hette.

Aisaia 33:14

Hipunin hak danab ah Sion daatteb ele, ag eheɗ nau baɗatteb. Ao, Kayaknu nuhig haknu ele uuak danab ag hahaɗtteb. Ag hahaɗnan atteb. “Ig oonigppanu amu, aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele daaglahnu elele?” Ao, ag hahaɗnan, “Ig oonigppanu aun nug Kayak, Kayak Nug aab aɗu keeke oh ewe iitta mette bia daatte amu, aun nug Nug ele hanhan daaglahnu elele?” atteb.

Aisaia 29:13

Am Naɗi Nug atte. “Danab ah imu ag oɗelagppan nai mattiakppa da gumiɗna uɗitteb. Ao, ag nai mattiak ahilagppa da binal meɗatteb, amge ag oolag da ii meɗatteb. Ag dup nona binal metteb, amge ag danab dilag dabmakppaib, amu ag danab dilag ɗoppaib amu hetteb.

Aisaia 22:5

Aɗinu ⌊da anam doyeye daakkul⌋? Naɗi, Nug Yawe Nukka Ɠagattag Oh Ele, Nug haen laa me daye, amu haen amuppa Nug heeb, Jerusalem ippa uug digdig naunab ⌊ag Juda,⌋ ahilagppa bekkulag. Kekeɗ ag uɗin, ag huan baalag okkaippa enan, qaiqaɗ laih gona, laih uɗin hebeppeg, ag ⌊Juda danab ah, ag⌋ ottaina, kaaka aqeb, ag eheɗ nau baɗaglag. Kekeɗ ag aab okkainu aɗ loppaɗppeg, ag Juda, ag baɗan, laa ag ehanadkkulagnu ebeppeg, ag baalag am umanab ukka, qauko batakku.

Aisaia 9:19

Am Yawe Nukka Ɠagattag Oh Ele, Nug oppoɗi beeb, Israel danab ah eheɗ anam madakku. Atu ewa, keeke oh ewa iitta mette, amubia Nug heeb, wan danab ele nauhkkulag. Danab ah ag aab ewaknu aab bia daaglag. Haen amuppa laa nug awag, o amag laa ii ehanidma. Iitta!

Aisaia 5:29

Ban danab amu ag oɗelagppa ena, muttub qena, oqottilag laion gaatteb, baalag oqotti amubia oqotti okku. Ao, ag laion bau gaatteb bia heppeg, oqotti okku. Laion liɗimna, doɗ aɗan qena, maon ukkaeg, laa doɗ amu ehanitteb, qagaiettakppa ii daamanu ii daatte amu, amubia kekeɗ ag anam hekkulag.

2 Samuel 22:43

Da oɗoɗatti, ag wanppa gappud bia daappig. Ge, da danab nug gappud tate, ib daugppa gotte, amubia da hei, ag nauhppig.

Aisaia 5:5

⌊Iitta! Da amu oh elele hemi⌋ amunu, gemu da muɗi grep dad dahilppa keeke laa hekkulnu dabmemi amu, da ag amelagppa akkul. Gemu da dadnu aɗ keeke qaun ele eppak amu oadppi ukkeb, muɗi grep dad dahil am, doɗ ag wana, ee lanan daaglagnu aben daakku. Ao, da dadnu men aɗ aoɗppi neeb, doɗ ag dad ooppa nona, tappanna, ⌊ee lanan daaglag⌋,” awa aum.

Aisaia 5:25

Diig amunu amu, Yawe Nug nuhikkud danab ah dilagnu oo nauhak naɗi dootte. Ge! Nug eppeg humom dayeye, Nug makkuɗadtte. Nug eppeg e, qauko oh uɗaltteb. Nug eppeg e, kuɗum mauheg, ag gaɗalkad aab okkainu ibppa kinipan bia niitteb. Anam, amge amuppa Nug nuhig oo nauhak amu iinab bodoettom. Iitta. Nug ⌊bu tuɗitta madakkunu⌋ eppeg humom daatte.

Aisaia 7:17

Anam bekku, amge ⌊ag oolag ii eɗutte amunu,⌋ geha Yawe Nug heeb, haen nau nahip-ppa, am nahipad danab ah dilagppa, am na baenadppa dilagppa ele uɗikku. Uug bekkunu daatte ele, amuam naunab, anukka uug beppig eɗattak, uug amu bekku. Haen Israel ag oppatna, Juda uun goppig ele, haen amuppa digmak uɗie, gemu batak uug nau bekkunu daatte amubia laa ii beum. Uug nau bekkunu amuam iikku. Yawe Nug geha Asiria dilag king awa uɗieb, ⌊Juda aqa oɗoɗadkku⌋,” awa aum.

Aisaia 24:5

Wan imuppan danab ah ag heeg, wan imuam Kayaknu neekkakppa dubuttid tak ele daatte. Aɗinu? Ag ɗo dim ii lamidna, ⌊kobol nau digdig henana,⌋ ag Kayak dimettan, nai nuhig tappaeg ne, ag nuhig nug tituana nai qakkak hanhannu Kayak Nug ag ele heppig amu, ag tippalppig.

Aisaia 32:6

Aɗinu? ⌊Ag inam dooglag.⌋ Danab nug Kayaknu dab-ii-maama ii dim lamidtte ele, danab amu nug nuhig nai mattiak am Kayak dab-ii-maama hakppa gotte. Ao, danab Kayak dab-ii-maama, Nug dim ii lamidtte ele, nug nau hekkunu dabmaama daatte. Danab nug Kayak dab-ii-maama, Nug dim ii lamidtte ele, nug Kayaknu, nuhig haknu ele uutte. Ao, danab nug Kayak dab-ii-maama, Nug dim ii lamidtte ele, nug Yawenu hambuppuak nai maditte. Danab anam nug danab ee iitta ele ehanitta, ee metteb lakkunu uua heehe, danab amu ee iitta daatte. Ge, nug danab le baag diitte ele, nug nug ehanitta, le oug metteb lakkunu uua heehe, danab amu nug le iitta daatte.

Aisaia 33:1

Na laa, na hee, laa nauhtteb, laa ag na heitteg ii nauhme amu, nahipnu am gadonnab gadon. Yo, na laa hambuppualadna, nahip nai ag amelagppa ame ii dim lamidttem; laa ag nahipnu anam ii heppig ele amu, nahipnu am gadonnab gadon. Na laa heppe nauhkkulagnu uuppe, danab laa ag na heidppeg nauhkkut. Ao, na laa hambuppualadna, nahip nai ag amelagppa anana, ii dim lamidkkutnu kobol uuppe, laa ag hambuppuidna, na amenppa nai mattinna, ii dim lamidkkulag.

Aisaia 49:17

⌊Anam amu, haen da ag eɗuen diiadkkul, am inam daakku.⌋ Ag bekkalkad, laa ag diin goppig ele amu, ag paha eɗun, ahilagppa uɗiglag. Huu laa ag uɗin heeg nauhppig ele amu, huu amu ag ahan, uuadna gokkulag.

Aisaia 49:25

⌊Amunu nob am iitta, amge haen imuppa nob laa daakku.⌋ Aɗinu? Yawe Nug inam atte. “Da heppi, danab ah ban danab ɠagattag aɗualatteg, ag ag eppelagppa daatteb amu, laa ag eɗun aɗadna diiglag. Ge! Da heppi, keeke ban danab nug ban huana hette ele eppegppa daatte amu, laa ag amu eɗun aoglag. Da laa, ag Juda ahilagnu ban hetteb ele amu, da ag ele ban hekkunig. Ao, da ag Israel, da ag bekkalkad aɗi ehanadppi, padal ii memana.

Esekiel 29:20

Da hei, Nebukatnesar nug nuhikkud daup ele, ag Tair aab ele ban heppig, amge ag nob ena laa ii aoppig. Anam, amge da nug uɗat amu hekkunu ai heum amunu, nug amunu nob ena aokkunu da Isip nug eppegppa mekkulnu dabmak awen, iikku hekkulnu attem.” Naɗi Yawe Nug anam atte.

Esekiel 38:12

Anam amunu, da dahilad ele ig gota, wan amuppa danab ah dilag keeke aɗadta, aot gokkunig. Ig gota, danab appa daatteb ele, amu ag anukka wanppan wan laalappa daaegeg, Yawe he, ag appanu eɗun uɗin aab nauhattak daappigppa daatteb, ag makau, sipsip, doɗ laala ele, amu en huanak laala ele aɗan, wan anuqakppa daatteb amu, ig gota, eppenigppa aqadta, ahilkad keeke aognig.’ Na anam akkut.

Esekiel 38:13

Amu na amu hebeppe gobeppeg, Seba danab, Dedan danab, aria Tarsis danab, amu danab aab naunau Tarsis talilidna guguattak daatteb, ag keeke laihnu awa dadennu mak danab amu, danab ah amu oh ag, ag anadna, ag na oɗ mettan, inam akkulag. ‘Na keeke kuɗum banppa aɗan, aon gokkutnu uɗimete? Ao, na nahipad daup huanaknab ag uɗin, banppa silwa, gol, makau, sipsip, doɗ laala ele, en huanaknab laa ele aɗan, aon gokkulagnu qagmaadna uɗimete?’ aon akkulag.” Yawe Nug anam atte.

Habakuk 1:12

⌊Yawe Nug anam aum amu, Habakuk nug inam unuqittom.⌋ “O Yawe, na haen ohnab aakku daye uɗie, gemu ele daattem. O Kayak, na am dahil Kayak Oppiaawak Ele; ig ii mauhmata. O Yawe, na Babilon dilag daup ag uɗin, hipunin haknu nob mekkaglagnu tituanadme. Ao, O Yawe, na am kekeɗ nikkamnanu ehanittak ihinig daattem, amu na Babilon ag bu mekkaglagnu otiadme.

2 King 18:25

Keeke laa amu, Yawe Nug iite a, da banelag uɗien, wan imu eɗitten, heppi nauhkkulagnu uɗimi? Nug a, da amu hekkulnu aakku uɗimi,” awa aum.

Aisaia 8:4

Aɗinu? Haen nid amu nug oɗe oppateb, ‘Mama, anai,’ ii aabob amu, Asiria dilag king, nuhikkud daup ele ag uɗin, aab okkai Damaskusnu keeke ena oh akkan aon, aab okkai Samarianu ele akkan aon gokkulag,” awa aum.