2 Timoti 3:16 - Nobonob Baibel

^16-17 Kayak Nug he, nuhig nai oh aakku beum, amu ig Kayaknu danab, ig babaittak daat, uɗat ena oh hekkunignu elele daagnignu, nai amu ig ehanigtte. Attemun ehanigtte? Ig amuppa ippunittak aottem. Ig eheɗ hekkunig dayeb amu, ig daug batak megatte. Ig ena ii oignig dayeb, ib tutukku ippunigtte, amu ig Kayaknu neekkakppa genab tutukku hak danab daagnignu ib ele ippunigtte.

2 Timoti 3:16 Referans Kwoze

Rom 15:4

Danab ag Kayak nai yaappig amu, ig nai amu ebqetata, ig ippunittak aognignu yaappig. Ig Kayak aɗi keeke ena megakkunu aumnu dabmak aɗat daagnignu, ig nai amu ebqetata, ig oo maɗoɗ ele dayak kobol anidta doot, ig Kayak tuɗidta dim lamidkkunignu oonigppa ɠagattag qak ele aottem.

Hibru 4:12

Kayak nai am bauklel, uɗat haaha daatte. Nug am qep laa aeg laih laih ele, uɗat nuhig enanag hette amu, Kayak nai nug uɗat nuhigppa qep amubia eɗidtte. Nug keeke qataiettaknab daattep am okkula aokkunu elele. Danab nug dabmakppa aɗi dabmette, nug ooppa aɗi dootte amu, Kayak nai keeke amu oh epeɗiadtte.

Mak 12:24

Ag anam aeg amu Jesus Nug aum. “Ag Kayaknu nai ii doonna, Kayaknu ɠagattag ele ag ii dootteb amunu, ag madittebnu diignu doyak tutukku iitta ele daan, nai maditteb.

Sam 119:9

O Yawe, danab ah bau ag attem hena, ag oolag oppiak ele na noomppa daaglag? Ag nahip nai dim lamidkkulag, ib amuppaib ag oppiak ele daaglag.

Prowerb 6:23

Aɗinu? Haknunab anak ihinihppan imu, ag am lam laa bia. Ao, ihinih ippunittak imuam amahlak laa. Amu anak ihinih na tolitta, daut batebeb, na aokkut amu, amuam na bauklel daakkutnu ippu aakku.

2 Timoti 4:2

Na amunu dabmak aonna, nai nuhig mehuqe! Danab ag nahip nai dooglagtai o iitta iitai doomna, amge na haen oh Kristusnu nai mehuqe! Haen oh ag Kayaknu kobol dim lamidkkulagnu na ag toliadna, daulag batan, oolag ɠagattag ele aqe! Na amu henana amu, na oo maɗoɗ doon, ippunittak ele pehettaknab he!

Sam 119:11

Da nahip-ppa hipunin qak hepa, da nahip nai da oolppa mein, dabmak dahilppa ele memi.

Sam 119:130

Nahip nai amu, danab ah ag doon, oolag maitte, am ag amahlak madatte. Ao, nahip nai danab ag doyak ii awak ele, am amu dilag diignu doyak tutukku madatte.

2 Samuel 23:2

“Yawenu Ouɗi Nug he, da oɗelppa nai mattimi. Ao, nuhig nai am, da oɗelppa iikku daatte.

Prowerb 15:31

Laa nug layagnu daug batak ena dootte amu; nug danab doyak dabmak ena ele oolagppa daakku.

2 Timoti 2:25

Nug laa ag nai nuhig tappaeg nette ele oo bodoettak kobolppa ag ib tutukku ippuanattaɗ! Kayak Nug ag oo eɗuak madakkunu, ⌊ag oolag eɗueb,⌋ ag doyak diig genabib tutukku dooglagnu nug anam hekku.

Duteronomi 4:36

Nug ag toliadkkunu, Nug he, ag Nug baag hab aabppanu dooppig. Nug ag nai madakkunu, Nug wanppa aab dittiak naɗippa dayaya, nai mattieye, nuhig ɠagattag okkai ag anidppig.

Aposel 20:20

Amu da nai oh ig ehanadkkunu mehuqkkulnu dayom amu da madikkulnu ii bodoettami. Iitta. Da qagmak abenalkadppa, ag laulkadppa ele da amu ippunadmi. Amu ag amu ele dootteb.

Jon 3:20

Anam amu, danab oh ag hak nauppa daatteb amu, ag amahlaknu nau ninig ele dootteb. Ahilag hak nau miag atimanu amu, ag amahlakppa daaglagnu oolag ii daatte.

Matyu 13:52

Ag, “Yo,” aon aeg amu, Nug ag amelagppa aum. “Anam amu ɗo mehuqak danab oh, ag Kayaknu ɗo maɗoɗ ooppa noppig ele amu, ag am lag okkai mameg bia daatteb. Nug keeke maknu oo nuhigppanu keeke alag, bau ele akke do madatte,” awa aum.

Aposel 18:25

Nug anam doya, Naɗi ippunu ippunittak ele awa doya, Nug yagbak doyaya, Jesusnu nai elele mattiom, amge nug Layattak Jon Jesusnu mattiom, nug amu aakkuib doyom.

Rom 2:20

ag, “Kayak Nug ɗo ig mekke, ɗo nug ig doyak diig genabib ippunigtte amunu, ig am doyak amu ele elelenab daattem,” dabmetteb. Ag anam dabmetteb amunu, ag danab laa dabmak tutukku iitta ele dilagppa ippunittak hekkulagnu elele doona, ag nid naunau ippunittak mattaglagnu ele elele daatteb dootteb

Nehemaia 9:20

Na nahip Ouɗi, Nug Ouɗi enaib, Nug ag ulum madakkunu ag mattame. Ag ee lakkulagnu amu, na maana mattana, ag le baalag diieye, na le ele mattame.

Galesia 3:8

Am Kayak Nug anukka iitta aɗi ag geha Nai Ena aona, ag oolagppa genab dooppeg, ahilagnu Nug, “Genab tutukku hak danab,” akkunu doya he, nai amunu nuhig naippa yaak daatte. Nug anam doyom amunu, Nug anukka Abraham amegppa Nai Ena mehuqa, inam aum. “Wanppan wan ohppan danab ah ag nahip-ppa itittak ena aoglag,” awa aum.

Hibru 3:7

Amunu Kayak Ouɗi Nug atte bia: “Ag gemu Kayak Nug nai inam atte amu, ag daulag human doyeg!” Nai amuam inam.

1 Korint 12:7

Danab ah ag tamaniak ooppa daatteb ele amu, ag nug ehanittak hekkulagnu, Kayak Ouɗi Nug nuhig ɗo hamu mettak digdig oolagppan laa danab anen anen madatte.

Aposel 20:27

Aɗinu? Da Kayaknu dabmak oh ag amelagppa mehuqkkulnu dayom amu da ii bodoettami. Iitta. Da mattimi.

Prowerb 15:10

Danab nug doyaya ib apiɗidtte, nug tolitta bu mettak ɠagattag aokku; amu danab nug daug tolitta mettaknu nau ninig ele dootte amu, nug mauhkku.

Jon 10:35

Anukka Kayak nai wan imuppan danab, amu dilagppa ukkom amu, amuppa Nug ahilagnu, ‘Ag am Kayak ganiappud,’ aum. Aria ig doottem, Kayaknu nai keeke laa hambuppuak ii ippunigtte. Iitta! Tutukkuib ippunigtte

Matyu 26:56

Amge keeke imu oh amu propet nai yaappig, amu meu medatte,” awa aum. Anam a amu ippunittak awak danab oh ag Nug uuidna oolna goppig.

Aposel 1:16

“O lailad, Kayak Ouɗi Nug Dawit oɗeppa keeke laa Judas, nug danab ag Jesus aɗaglagnu ib dayom amu, nuhigppa bekkunu a, Kayak nai amuam bekkununab dayaya aakku beum.

Matyu 21:42

Aeg amu, Jesus Nug amelagppa aum. “Ag Kayak naippa nai laa daatte amu, ag iite ebqeppig? Nai amuam inam. ‘Men laa, lag hak danab ag men amu uuppig, amge lag mameg nug men amu awa me, lagnu men anuqak daatte. Naɗi Nug men amu he, men amu anuqaknab dayeye, ig amenigppa anidta, ig enanag doot, dabmak kuɗum aottem.’

Rom 4:23

Nai imu, “Kayak nuhignu, ‘Genab tutukku hak danab,’ awa aum,” nai amuam Abrahamnuib ii daatte.

Hibru 11:1

Danab nug ooppa genab doyak ele amu, nug aɗi keeke aokkunu dabmak aɗa daatte ele, nug genabnab genab aokkunuib dabmette; nug ii aomanu nakok laa ii dabmette. Amu ele nug keeke amegppa ii anidtte ele, nug anamib genab anidkkunu dabmette.

Rom 3:2

Yo, ag Juda daanna, gaɗa otaɗak aona, ehanittak digdig aoppig. Keeke anuqaknab amu inam. Kayak Nug nai nuhignab Juda ag atognona dim lamidkkulagnu mattom.

Aposel 28:25

Ag anam henana ag gokkulagnu gonana, ag am akka akka ahilag dabmak ib piɗe piɗe dayeye, ag ahan goppig. Ag anam henana goppig, amge Pol nug tatam nai laa ahilagnu inam mehuqom. “Kayak Ouɗi Nug ig alankad amelagppa nai genabnab laa propet Aisaia oɗeppa aum. Nai amuam inam.

Mak 12:36

Aɗinu? Kayak Ouɗi Nug he, Dawit nug inam aum. ‘Yawe Nug dahil Naɗi amegppa inam aum. “Na da eppel naɗiap-ppa daappe ukkeb, da nahip kekeɗ na waatppa maadkkul.” ’

Maika 2:7

⌊Amge,⌋ O Israel danab ah, danab laa nug inam akkutai. “Yawenu Ouɗi Nug ihinignu oo nauhom daattete? ⌊Iitta!⌋ Genab, nai uug ele ihinignu amu, Nug anam he anidttemte? ⌊Iitta!⌋” Laa anam akkutai, amge nug anam akku dayeb am, nug ena akkute? Iitta! Am ena iitta. Amu Yawe Nug inam atte. “Danab genab tutukku hak kobol dim lamidtte ele, nuhignu amu, nai dahil nug ehanidtte,

Matyu 26:54

Amge da anam heppi amu, Kayak nai attem genab bekku? Kayak nai nug imu bekkunu atte amu, nug anamib bekku,” awa aum.

Matyu 22:43

Anam aeg am Nug aum. “Anam dayeb amu, aɗinu Dawit nug Kayak Ouɗinu ehanittak awa, nug Kristusnu, ‘Naɗi,’ awa aum?

Duteronomi 29:29

Yawe, ihinig Kayak, Nug haen gemunu keeke, o butti aɗinu keeke amu, Nug amunu diignu doyak tutukku oh ig ii mekkom, amge ig, amu ig buɗunkad ele ɗo mekkom, Nug ig amu dim lamittaknu haknunab anak nai ihinignu aum.

Sepanaia 3:2

Jerusalem danab ah ag ulum nai laa oɗeppa aoglagnu uun autna aotteb. Ao, laa nug daulag batebeb, ag nai nuhig ii doomna; uuglag. Jerusalemnu danab ah ag Yawenu oolagppa genab ii dootteb. Ag ahilag Kayak ii dim lamidtteb.