2 Samuel 6:16 - Nobonob Baibel

¹⁶ Ag Yawenu Tituanak Nainu Kunup anam aon uɗinna, ag Dawitnu Aab, ag appa bena, aab ooppa nonana, Dawit nug gamag ahak okkai ele doyaya, nug oola taata, oola naana, ahi huana goɗeɗe, nug wau, Saul aɗeg Mikal, nug lag ooppa dayaya, gililppa ulah ibuppa daya, haen nug neekke ukke, King Dawit anam he antta amu, nuhignu nug ooppa ena iinab doyom.

2 Samuel 6:16 Referans Kwoze

1 Korint 2:14

Amge danab nug Kayak Ouɗi ii awom ele, nug Kayak Ouɗinu dabmak ii aotte. Aɗinu? Nug dabmak amunu, “Dabmak tutukku iitta,” anam dabmette. Dabmak amunu amu, Kayak Ouɗi Nug danab ehanidkku dayeb, nug dabmak amunu oo maidkku amunu, danab ag Kayak Ouɗi iitta ele, ag am dooglagnu elele iitta.

1 Stori 15:29

Ag Yawenu Tituanak Nainu Kunup kontrak inak ele anam aon uɗinna, ag Dawitnu aab, ag appa bena, aab ooppa nonana, Dawit nug gamag ahak okkai ele doyaya, nug ahi huana goɗeɗe, nug wau, Saul aɗeg Mikal, nug lag ooppa dayaya, gililppa ulah ibuppa daya, haen nug neekke ukke, King Dawit anam he antta amu, nuhignu nug ooppa ena iinab doyom.

Sam 69:7

Da na dim lamidttem, diig amunu amu, laa ag dahilnu, “Keeke hamunab,” dootteb. Ao, diig amunu ag da uɗa nak nau meɗatteb.

Aposel 2:13

Ag anam appig, amge laala ag awa awa qettak nai mattin, inam appig. “Umu amu, ag wain huana laeg, kaaka aqe hetteb,” aon appig.

2 Samuel 3:14

Dawit nug nai amu Apner dookkunu me ukke, nug ele nai imu Isboset dookkunu nuhig nai awa ukkak danab laa eppelagppa me goppig. Nai amuam inam. “Na heppe, dahil ah Mikal nug dahilppa uɗiaɗ! Anukka da nug aokkulnu da Saul aum bia, da ukken, Pilistia ban danab 100 aqai mauhppig. Mauheg, da hipalag gaɗa ele otaɗatten, akke, Saul mettami.”

Aisaia 53:3

Danab ah ag nuhignu ena iinab doon, ag nug guhuɗidppig. Nug bau dayaya, nug oo doyak huanaknab doyaya, guittak huanak ele doyom. Danab ah ag laa, ag nug nakok laa anidkkulagnu oolag iinab hette amu, ag Yawenu maɗi nidnu ena iinab dooppig. Ig nug binag nakok laa ii mettamut.

2 Samuel 5:7

Ag anam appig, amge Dawit eɗattowa, nug aab Sion aɗ ɠagattagnab ele amu awom. Amuam Dawitnu Aab aakku.

2 Samuel 6:15

Am danab Yawenu Tituanak Nainu Kunup maon ukkaegeg, Dawit, am Israel laa oh ele goppig ele ag enana, ag trampet ele iwalppig.

2 Samuel 6:20

Dawit nug anam hewowa, haen nug nug baekkudppan ele itittak ena madakkunu ukke amu, Saul aɗeg Mikal nug dimittim uɗia, uɗa ta, amegppa aum. “Na king, na nakka na gemu onin memede! Na danab kaaka, dabmak iitta ele nug lamen iitta oitte, na anam bia hee, nahipad ehanittak ah dilag begbeg maɗi ah, ag na anam anidppig,” awa aum.

1 Samuel 18:17

Am danab ah oh ag Dawitnu oolag mauhom amunu, Saul nug inam dabmeum. “Da dakka Dawit ii qeppi mauhma. Iitta. Amge Dawit nug Pilistia ele ban henana, ag geha nug qeppeg mauhkku. Da amu ii hepa.” Saul nug anam dabmaama amu, nug Dawit amegppa aum. “Antte! Imuam nid ahin dahil tatamnu. Nug onig am Merap, amu na nug na waat daakkunu aokkutnu da ool daatte. Amge tatam aa ewau matulak ii awak, haen imuppa amu, na dahil ban danab tutukku daanna, na kekeɗ ele ban haknu amu, na ootppa ɠagattag doyak ele anidkkulnu ool daatte. Anam daappe, haen Yawe Nug ig Israel ig gopput, kekeɗ aun ele ban hekkunignu ab amu, aria na gona, ban amu hekkut. Aria, na anam henana amu, na da aɗel aokkut; iitta am iitta,” awa aum.

1 Samuel 18:20

Amge Saul aɗeg laa, onig Mikal, nug Dawitnu oo mauhom. Nug nuhignu oo mauhe, Saul nug nai amu doya, nug ena doyom.

Sam 123:3

O Yawe, danab ah kuɗum ag ihinignu keeke hamunab dootteb amunu, na ihinignu oot gai-iitta doon oot mekkan ehanigkkutnu oɗ medattem. Ao, na ihinignu oot gai-iitta doon oot mekkan ehanigkkutnu unuqidttem.