2 Korint 5:12 - Nobonob Baibel

¹² Nai amuppa amu, ag ig uɗat imu haknu ena dooigkkulagnu ii hettem. Iitta. Ig ag ihinignu maɗoɗppan gamag ahak doon, ag danab ag dimittimnu keeke aakkuib, danab ag amu anidkkulagnu elele, ag amunu anuqak doon binag metteb, amge ag ooppan keeke, danab ag amu anidkkulagnu elele iitta, ag amunu anuqak ii doon binag ii metteb ele noob mekkulagnu elele daaglagnu nai imu yaattem.

2 Korint 5:12 Referans Kwoze

2 Korint 3:1

⌊Laa atteb bia⌋ nai imuppa ig baula digmeta, uɗat imu haknu ena dooigkkulagnu hettemte? O iitta, ag Korint danab ag ig uɗat imu haknu ena dooigkkulagnu, danab laala hetteb amubia, danab laa ag ihinignu ad uɗug laa yaappeg mattagnigte? O iitta ag Korint ag ihinignu ad uɗug amubia laa yaaglagte? Amu oh iitta!

2 Korint 10:18

Danab nug nukka nuhignu, “Da uɗat amu hekkulnu ena, elele daattem,” atte, amuam keeke hamu, amge danab Naɗi Nug nuhignu, “Nug uɗat amu hekkunu ena, elele daatte,” atte, amuam meu ele.

2 Korint 12:11

Da nai madittem imuam danab nug Kayak dab-ii-maama ii dim lamidttenu nai bia, amge ag akka da nai imu inam madikkulnu duttuniɗeg, da madittem. Aɗinu? Ag dahilnu, “Nug ena hette,” pasppa yaaglagnu am aib iitta, amu kobol elele, ag helob am ena, amge ag anam ii heppig. Genab, da amu keeke hamu, amge da gaɗalagib totol danab ahilkad amu ag waalagppa ii daattem.

2 Korint 10:12

Laa amu, ag oolagppa laala ag, “Ig am danab enanag,” aon atteb ele amu, ig amu dilag melemel amu aot, ig beɗunigppa meta doognignu elele iinab anidta dabmettem. Aria ig ahilag kobol ele aot, ihinig kobol melemel amuppa ii hettoɗittem. Iitta. Danab amu ag akka akka beɗulagppa doonna, ag akka ag epeɗiadtteb. Am danab amu ag ahilag kobolnu amu ag akka ahilag kobolib anidna, ahilag kobol melemel amuppa epeɗidtteb. Danab amu ag am doyak dabmak ena ele iitta.

2 Korint 10:8

Am Naɗi Nug ig ahilag ooppa genab doyak ɠagattag qettagnignu uɗat amunu ehah mekkom. Ig anam hepput, ahilag ooppa genab doyak na qekkunu ii mekkom amunu, da ehah amu onig okkai humattem dayeb amu, da uɗal ele ii nema. Da aɗi hekkulnu attem am da hekkul.

2 Korint 6:4

Iitta. Ig am Kayaknu maɗi nid daattem ippunadkkunignu amu, ig uug digdig bak haenppa ig ɠagattag daat, uug amu doot maot oittem, amuppa amu ippunadttem. Ig ihinig kobolppa qagaiettak haenppa, oo doyak haenppa, aolak haenppa, oikkak haenppa, maniguittak inikkak haenppa, lamikkak haenppa, uɗat naɗi ɠagattag hak haenppa, niiak elele iitta haenppa, amu enug iqak haenppa ele amu, ig haen amu oh ig ɠagattag daat, uug maottem amuppa amu ig am Kayaknu maɗi nid ippunadttem.

Prowerb 27:2

Na aib na nakka binan humame; uuppe, laa nug na humittaɗ! Na uuppe, laa nug na humittaɗ; nakka nakka iitta!

2 Korint 10:7

Ag keeke unuqagnab amu ii anidtteb. Danab laa nug nuhignu, “Da am genab tutukku hak danab, Kristusnu danab daattem,” ɠagattag dabmette dayeb amu, nug eɗua imu ele doyaɗ! Nug am Kristusnu danab daatte, amubia ig ele am Kristusnu danab daattem.

Pilipai 1:26

Amunu diig am, ag Kristus Jesusnu daatteb, amu haen da eɗue ag gumatte wappi, ag Kayak Nug ehaniɗe, da ahilagppa eɗue gomi anidna, ag amunu maɗoɗppan gamag ahak okkai dooglag.