1 Timoti 6:9 - Nobonob Baibel

⁹ Amge laa ag enulag kuɗum ele daaglagnu dabmak huanak aotteb amu, eheɗ hekkulagnu oo eeɗak, pelemppa tak, oo hak dabmak iitta ele, aria oo hak danab guittak medatte ele, oo hak amu oh ag heeg, danab padal mette ele amu, keeke amu oh danab ag enub danab daaglagnu oolag hette amu aqadtteb.

1 Timoti 6:9 Referans Kwoze

Prowerb 15:27

Danab nug baubau awaknu hik qak dootte amu, nug uug he, baekkudppa dilagppa ele bette; amge danab nug lokkumakppa eheɗ haknu ehanittak awaknu o mettaknu, nug amunu nau ninig ele dootte amu, nug bau daakku.

1 Timoti 3:7

Laa ele amu danab nug Kristen tamaniaknu gumak ikki danab daakkunu oo daatte amu, nug eheɗ heeb, uɗa nak guittak ele doya, nug Satannu uhuippa nomanu nug dimittim danab, ag noolagppa danab ena daakkuoitte. Anam iitta dayeb, nug ag noolagppa ele danab ena dayaɗ!

Aposel 8:20

Saimon nug aum, amge Pita nug amegppa aum. “Na Kayak Nug keeke ihinig daakkunu hamu megatte men doɗoppa aokkutnu hettem. Men doɗo nahip amu na ele oh padal memayanu na dabme!

Matyu 13:22

Ee aeg wan uud keeke qaun ele beppigppa nena qeppig ele amu, nai amu inam ippunigtte. Danab laa nug nai dootte, amge wannu haen imunu uug laala, enub awak uɗatnu ameg qak kobol ele, keeke amu oh danab amu nug ooppa he, Kayak nai iitta ma, meu ii otte.

Jut 1:11

Danab amunu am gadonnab gadon. Ag Kainnu kobol hena oitteb. Ag men doɗonuib dabmena, Balam kobol eheɗ heum bia hetteb. Ag anukka Kora tappe nak ha nauhom, amubia ag anam hena, padal metteb.

2 Pita 2:3

Ippunittak danab hambuppuak amu ag men doɗo baubau awaknu hik aqebeb, ag geha ippunittak kobol genab iitta, ahilag dabmakppanu aakkuib ag ippunadnana, men doɗo aoglagnu hekkulag, amge Kayak Nug ameg ii amuhe niitte. Iitta. Nug ag nob nau madakkunu meum daatte; ag ii eɗidmana.

Epesus 4:22

Anam amunu, ag nai aoppig bia, ag oolag alag, nug dabmak eheɗ awa, kobol nau digdig hekkunu dabmaama, mauhkkunu hette ele, nug he, ag matu nuhig dabmak dim lamidppig ele amu, ag oiyak amu uueg!

Mak 4:19

amge ag wannu haen imunu uug laala, amu enub awak uɗat amu ameg qak kobol ele, keeke amu oh ag oolagppa he, Kayak nai iitta ma, meu ii otte.

Matyu 26:15

Nug ukka oɗ meum. “Da Jesus ag eppelagppa meppi amu, ag aɗi meɗaglag,” awa oɗ meum. Nug anam a amu ag silwa men doɗo 30 mettaglagnu ebqeppig.

Matyu 19:22

Awa a amu nid bau amu doya, nug oo uugnab ele ukkom. Aɗinu? Nug enub kuɗum ele.

Prowerb 22:16

Laa nug en okkai aokkunu daɗek danab duttunatte, ag nuhig uɗat o hamu bia hetteb, o laa nug enub danab ag nuhignu oolag hekkunu keeke ahilag daakkunu madatte amu; aɗit amu oh aa goya, daɗek daaglah.

Prowerb 21:6

En okkainab, danab nug hambuppuakppa awom ele, en amuam paha iitta ma, guittak ele en mameg medatte; en amu, doɗ pelemppa ta guittak aotte, amubia en mameg guittak medatte.

Prowerb 20:21

Laa nug nid bau dayaya, kalu mettak iitta haenppa mameg eppegppa aug aokku dayeb amu; gog takppa aug amu nug ii ehanidma.

2 Timoti 2:26

Anukka Satan danab amu ag nug dim lamidkkulagnu nuhig aɗppa maattom, amge Kayak Nug heeb, ag oolag eɗueb, ag nai genab doona, ag kobol ena ele doona amu, ag baula nuhig aɗppa ii daamna.

1 Timoti 1:9

Ig ele doottem, ɗo nug genab tutukku hak danab dilagnu ii daatte. Iitta. Ɗo nug ɗo ii dim lamittak danab dilagnu, am nai tappe nak danab dilagnu, am Kayak dimettak danab dilagnu, am hipunin danab dilagnu, am laa Kayaknu oppiaawak ele ii daatteb dilagnu, am laa Kayak dab-ii-mena wannu kobol dim lamidtteb dilagnu, am laa ag mamelkad anilkad aqaeg mauhtteb dilagnu, am danab ag lailkad aqaeg mauhtteb dilagnu,

Luk 21:35

Aɗinu? Deɗ amu danab ah oh wan ohppa daatteb ag beeb anidkkulag.

Sekaraia 11:5

Danab ag sipsip amu ⌊sipsip mamelkad dilagppanu, enub danab laanu men doɗoppa, nuhig daakkunu⌋ daden metteb ele ag daden mewona, ag ⌊laa⌋ baalag otaɗadna ⌊latteb⌋, amge ag bu ii aotteb. ⌊Enub⌋ danab ag sipsip amu ⌊ahilag men doɗoppa aoppig amu,⌋ ag aon meeg, laa daden meeg, enub danab ag men doɗo okkai aon, ag anen anen, ‘Ig Yawe onig humatu. Da enub danab bemi daattem!’ atteb. Sipsip amunu gumak danab ele ag ena ii atognoadtteb; ag ele aqadna ⌊latteb⌋. ⌊Aakku ib ewam amuppa sipsip ameg amuppa daatteb, ag nauhak aotteb.⌋

Aisaia 5:8

O gadonnab gadon, ag danab ag lag kuɗum, wan kuɗum ele aonna, ahilagnu qagmetteb. Ag anam hetteb, amu geha ag wan oh aoppeg, danab laa ag daaglagnu aben laa ii daama. Ag akka, ⌊Kayak anamnu ii aum bia,⌋ agib appa daaglag.

Prowerb 23:4

Na en okkainab aɗakkutnu uɗat ge iitta aib heme; na amu hemananu na doyak dabmak ena ele aɗan, nagakka atognoitte!

Sam 11:6

Am kalu laa huana eotte onig salpa ewawa, ad ewatte nauhtteb, amu ulah gakkaɗak iwala, ad bau he qaɗaiedatteb, amubia Yawe Nug geha nau hak danab bu madakku.

Josua 7:11

Israel ag hipunin heppig; ag dahil nug tituana nai qakkak nai, da ag amu dim lamidkkulagnabnu ami amu, ag nai amu tippalppig. Ag keeke dahilnuib pelemppa daappig, ag keeke amu yab agappig. Ag yab aakkuib ii heppig. Iitta. Ag heppignu ele hambuppuak nai mattinna, keeke amu, ahilkad keeke ooppa lokkumadppig.

Duteronomi 7:25

Ag kayak hambuppuak dottolkad adppa hoyattak aab aɗuppa manadppeg eoppeg, silwate, iitta golte amuppa tonadppig dayeb amu, ag gol, o silwa amu amelag qeeb aolobnab dabmak eheɗ aona, aib aoppig. Aɗinu? Yawe, ahilag Kayak, Nug keeke amunu ooppa uuaknab dootte. Ag aib aoppig. Ag aoglag amu, ag pelemppa tena, padal mekkulag.

Namba 31:8

Danab aqappig oolagppa amu Ewi, Rekem, Sur, Hur, Reba ele. Danab amu, ag am Midian ooppanu king tanig ele. Ag Balam, Beor bekka, ag nug ele qep elabppa qeeg mauhom.

Matyu 6:19

Wan imuppa amu, keeke laala tiig qe, iitta mette, keeke laala dittuɗ laeg, iitta mette, amu yabhoi danab ele ag lag keeke loppaɗna, keeke yab aotteb amunu, ag wan imuppa en okkai ahilagnu aib qagmeppig.

Luk 12:21

Jesus Nug nai amu ana, Nug nai gog ta aum. “Danab ag keeke kuɗum ahilagnu qagmetteb, amge Kayak noobppa amu ag danab ena iitta daatteb, ag am amubia anidkkulag,” awa aum.

1 Timoti 6:10

Keeke eheɗ ohnu diig laa am enubnu oo mauhak kobol. Danab laala ag enub ele daaglagnu wagai metteb ele amu, ag aakku ooppa genab doyak kobol uuna, uug kuɗum aakku aoppig daatteb.

1 Timoti 6:17

Danab ah wannu haen imuppanu keeke kuɗum ele amu, Na tutukku imu ag amelagppa appe doyeg! Ag beɗuppa tak kobol aib heppig. Ag keeke oh paha nauhtteb ele, ag amunu oolagppa genab aib dooppig. Ag Kayak, Nug nukka aakkuib keeke ena ena kuɗum, ig oonig gamag ahakkunu megatte ele amu, ag nuhignu aakkuib oolagppa genab doyeg!

Taitus 2:12

Kayaknu ehanittak okkai hamu mettak amu, nug ig Kayak dimettak kobol amu wannu oo gamag ahaknu dabmak nau ele, ig amu oh uuta, ig wannu haen imunu oitta, ig ikka ig ihinig oiyak pehettak atognota, tutukku oita, Kayaknu kobol dim lamidkkunignu ippunigtte.

1 King 21:6

Nug anam a amu, Ahap nug Jesebel amegppa aum. “Aɗinu? Jesril danab Nabot nug da nai ami amu, nug dahil nai amu ii doyom. Da nuhig grep dad daden mekkulnu ool daye amegppa ami. Nug men doɗo aokkunu oo ii dayeb am, da nug grep dad laa medakkulnu ami, amge Nabot nug dad amu da meɗaknu uuom,” awa aum.