1 Timoti 6:4 - Nobonob Baibel

⁴ danab amu nug hamu, ikki okkai kobol aakkuib hette. Nug diignu doyak tutukku laa ele iitta. Nug oɗmak hamu ge iitta hekkunu, nai onig diignu, naippa nug mehqak kobol amu ele hekkunu oo okkai daatte. Kobol amuppa kobol nau digdig ele betteb. Am inam: laanu ameg qe oo elele ii dayak kobol, naippa nug qak kobol, baeg qak nai anak kobol, layagnu dabmak eheɗ awak kobol amu

1 Timoti 6:4 Referans Kwoze

2 Timoti 2:23

Amge na laa ag dabmak Kayaknu doyak iittappanu betteb, o dabmak kaaka ele, ag amunu nai aeg ona aeg dotte ele amu, na ag ele daan, nai amunu mattiaknu uue! Na doottem, mattiak amuam he, nug mehqak bette.

2 Timoti 3:4

Ag kadoi layag kekeɗ eppelagppa mak kobol, ahilag dabmak nau paha dim lamittak kobol, amu enaen mak kobol ele hekkulag. Geha ag beɗunu gamag ahak digdig kobol amunuib oolag mauhebeb, Kayaknu amu oolag ii mauhma.

1 Timoti 3:6

Kristen bau nug enaen mak, ikki okkai kobol ele haaha, nug Satan na qa nob nau awom bia na qemanu, nug Kristen tamaniaknu gumaknu ikki aib dayom.

Jut 1:10

Amge danab imu ag keeke ii dootteb ele, ag keeke amunu nai eheɗ atteb. Doɗ dakkuɗ ag dabmak aon, keeke ii hetteb; ag hak hetteb. Amu danab imu ag keeke ii dootteb ele, ag anam bia hetteb. Amu keeke ag anam hetteb ele amu, keeke amuam heeg, ag padal metteb.

2 Pita 2:12

Amge hambuppuak ippunittak danab ag am keeke ii doottebnu dabittak nai maditteb. Ag am doɗ dabmak iitta ele daatteb bia daatteb. Ag am doɗ dakkuɗ ag aɗi aɗi hekkulagnu daatteb amu, ag dabmenan ii hetteb. Iitta. Ag hakib hetteb, amubia ippunittak danab hambuppuak imu ag anam hetteb. Ag am doɗ pelemppa aɗualadta, aqadkkunignuib menuattak bia daatteb. Ag geha doɗ dakkuɗ bia padal mekkulag.

2 Timoti 2:14

Na haen oh keeke imu oh nahipad danab ah ag daulagppa dokkunu amelagppa appe doyeg! Na Kayak noobppa ag amelagppa ag nau aomnanu nai ana, ag nai onig digdignu nug aib qeppig. Nai onignu nug qak, amuam meu iitta, danab laa ele ii ehanidtte. Kobol amuam danab ag nai amu dootteb amu, am ag he nauhtteb aakkuib.

Jut 1:16

Danab amu ag naittuɗ mak naunab metteb. Ag ahilagppa kobol aɗi bette, ag amunu oolag nauhtte. Ag beɗu kobol eheɗ ahilag dim lamidtteb. Ag akka beɗulag humaglagnu oɗelag alala ebatte. Amu ag danab laa dilag keeke aoglagnu dittuanin mattan, oo eeɗaknu nai ittag ele maditteb.

2 Pita 2:18

Danab amu ag akka ag beɗulag human, keeke okkai heppignu hambuppun maditteb. Ag beɗulagppan kobol naunu mattiegeg, danab laa kobol tutukku digmena dim lamidtteb ele amu, ag kobol nau amunu ittag aqebeb dim lamidkkulagnu dabmetteb.

1 Timoti 1:7

Ag Kayaknu ɗo mehuqak danab daaglagnu oolag daatte. Ag ele atteb. “Ig ihinig nai amu genabnab,” amge ag akka ag nai amu pehettak ii dootteb, nuhig diig ele ii dootteb.

1 Timoti 1:4

Laa ele, ag kaya hamu, amu alalkad memetalkad onilag kuɗumnab batak iitta amu, amunuib aib dabmenana madippig. Ag keeke aɗit amu mattinna, tamaniak ooppan danab ah dilag dabmak kabolitteb. Nai ag maditteb ele amu, Kayaknu uɗat ii ehanidtte. Iitta. Kayaknu keeke am ooppa genab doyak, ib amuppaib bette.

Jems 1:19

O lailadnab, ag oh kobol imu doon autna aweg! Ag nai paha dooglagnu daulag human dayeg! Ag anam hekkulag, amge ag nai paha aib madippig, oppoɗilag ele paha aib beum.

Taitus 3:9

Amge na danab ag dabmak tutukku iittappa nai aeg ona aeg doak hetteb, ag kaino onilagnu ge iitta mattiak hetteb, amu ag ɗo meunu nug mehqak, aeg ona aeg doak ele hetteb amu, na ahilagnu awaidna laih ukke! Aɗinu? Keeke amu oh am keeke hamu; am ig kobol enappa laa ii ehanigmana.

Aposel 15:2

Ag anam aon aeg, Pol, Barnabas ele nai amu dooya, amunu ena ii dooya ahaeh, Juda ele huanak aeg ona aeg doum amunu, Kristen ag Pol, Barnabas amu danab laala oolagppa genab dooppig ele ag ahan, Jerusalem goppeg, totol danab amu ikki danab ele ag nai amu bappaidkkulagnu otiadppig.

Revelesen 3:17

Na nai inam madittem. ‘Da enul ele. Da keeke kuɗum ele daattem. Da keeke laanu tutu mak iitta.’ Amge iitta. Na uug naunabppa daattem; na danab ag nahipnu oolag dookkunu elelenab daattem; na daɗek daattem; na amen gaɗuak daattem; amu na bam iitta ele daattem. Na nakka na anam daattem, amge na amu ii doottem,

2 Tesalonaika 2:4

Danab amu nug danab laa oh ag keeke oh dilagnu, “Imuam Kayak,” atteb, keeke amu noolagppa ag gatelag qaun otteb ele amu, nug amu oh tappeb neeb, nug onigib humeb, attan tekku. Nug Kayaknu mettid lag, appa nug aguppa daakkunu ta dayaya, nuhignu, “Da iikkuib am Kayak,” awa akku.

Kolosi 2:18

Danab laa nug danab amelagppaib nug onig qe nette, amge ooppa nug nukka nuhignu, “Da am danab onil ele,” dootte, nug ele engel binalag mette amu, nug ag hambuppualatteb, ag nob ena Kayak madakkunu dabmette ele ii aomnanu ag danab amubia waappa aib daappig. Danab amubia amu nug tul niiakppa o ib attenppa aɗi keeke anttom ele amu, nug amunu nai kuɗum mattiaya, nuhig dabmak, Kayak Ouɗi Nug dabmak nuhig ii gumatte ele amu, nuhig dabmak amu he, danab amu nug nukka nuhignu am binag okkai ele dootte.

Pilipai 2:14

Ag anam henana, ag Kayaknu neekkakppa oolagppa kaliak laa iitta, oppiak ele wan imuppan kobol eheɗ ooppa, wan imuppan eheɗ hak danab ele oolagppa, Kayak bekkod oolagppa kaliak laa iitta ele daaglagnu, ag aɗi hetteb ele amu, ag naittuɗ mak, a ona a doak ele uuna heig! Ag hoɗoppai gatatuppa amahalna, miag atiak daatteb, amubia ag am Kayaknu danab daatteb, doyak amu miag atiak daakkunu ag nai bauklel ele aɗan, wan imuppanu danab laa, ag kobol tutukku uuna, eheɗ hetteb ele amu, ag amu ippunadkkulagoitte. Ag anam hekkulag dayeb amu, da Kristusnu deɗppa ahilagnu oo gamag ahak dookkulnu, da uɗat hamu ii hein, ɠagattag dahil hamu ii kakidmi ele dookkulnu elele daakkul.

Pilipai 2:3

Ag akka akka ahilagnuib dabmenan, keeke laa aib heppig. Amu ele ag akka hamu onilag humanna, keeke laa aib heppig. Ag akka ag onilag qeppeg neeb, danab laa dilagnu, “Da ag eɗadttem,” aib dooppig.

Pilipai 1:15

Amu genab, laa ag Kayak ehaniɗe, da Kristusnu Nai Ena mehuqttem anidna, ag amelag qe oolag elele ii daye, ag onilag attan ta daakkunu, layag ele kekeɗ mettakppa ele ag Kristusnu nai mehuqtteb. Laa ag anam hetteb, amge laala ag dabmak ena ele nai mehuqtteb.

Galesia 6:3

Danab laa nug nukka nug, “Da onil ele,” dabmette, amge nug onig iitta, danab amu nug nukka nug oo buppuidtte.

Galesia 5:26

Ig aɗi kobol hepput, ig lainkad oo nauhak dooglag amu, ig kobol amu ii hemata. Ig laa dilagnu ameg qe oo elele ii dayak kobol ele ii hemata. Ig amubia ii hetata amu, ig dada kobol ele aib hemut.

Galesia 5:15

Amge ag oolagppa akka akka naippa nug qemananu, ag nug emalak hemananu amu dabmeig! Ag anam hekkulag am ag oh padal mekkulag!

2 Korint 11:20

Ao, danab laa nug ag nugib waappa daaglagnu atte dayeb, o nug keeke ahilag amu oh aotte dayeb, o nuhig hambuppuakppa ag diitte dayeb, o nug enaen ma duttunadtte dayeb, o nug eppeg oohap ta, hippelkad mataɗadtte amu, aria ag nuhig nai, nuhig kobol ele epeɗilob am ena, amge ag anam ii hetteb amunu, nug aakku anam hette.

1 Korint 11:18

Amu laa ag haen ag Korint tamaniak ag Mettid hekkulagnu qagmetteb amu, ag obatak obatak daatteb, laippu oh ii daatteb, anam aeg doomi amu da nakok oolppa genab doottem.

1 Korint 11:16

Amu laa nug nai imu tappeb neeb, awa awa qettak nai mattiaya hette dayeb amu, nug doyaɗ! Ig kobol amunu ɗo laa ii mettem, Kayaknu Kristen tamaniak ooppa ele anamib daatte.

1 Korint 3:18

Amge laa nug nugakka buppuidmanu dabmaɗ! Ag oolagppanu danab laa nug wannu haen imuppanu doyak dabmak ena okkai awom amunu nug, “Da am doyak dabmak ena ele danab,” dabmette dayeb, nug genab doyak dabmak ena ele danab ba daakkunu, nug wannu haen imuppan doyak dabmak ena ele oh qeeb naɗ!

1 Korint 3:3

Aɗinu? Ag dabmak alagppa daatteb. Kristen kobol amu ag beɗulagppa ii beum. Ag lailkad dilagnu, ihinigppa anam daalon dabmak aɗan daatteb, ag nug mehqak henan daatteb ele amunu, ig ag kobol alagppa, Kristen kobol iittappa daatteb anidkkunignu elele. Kobol amuam dabmak alagnu, wanppan danab dilag kobol.

Rom 14:1

Aria, danab laa nug ooppa genab doyak nuhig ɠagattag iitta dayeb amu, ag nug aon tamaniak ahilag ooppa omalna noig! Amge ag dabmak laala, dabmak amuam keeke anuqaknu iitta, danab oh ag amunu ele dabmak laippu ii aotteb amu, ag nug ele amunu aib nai appeg ona appeg doum.

Rom 13:13

Amu ig danab nug amunppa tutukku kobolppa oitte bia oitu! Ig aib goɗak qiɗ nau heta, le ɠagattag nau ele aib laut, kaaka iqom. Ig aib gappai kobol heta, hipaɗu ahak kobol ele aib hemut. Ig aib nug aidtata, laa dilagnu, ihinigppa anam daalon dabmak aib aɗat daamut.

Rom 12:16

Ag oh laippu daan, oolag maɗoɗ ele dayeg! Ag dada kobol aib dim lamidppig. Iitta. Ag danab binag okkai iitta ele oh oiyeg! Ag akka ahilagib dabmena, “Da dakka iikku doyak ena ele,” aib appig.

Rom 2:8

Amge danab laala ag akka ahilagnu dabmenana, ag doyak diig genabib dimettan, kobol eheɗ, amuib dim lamidtteb ele amu, geha Kayaknu oppoɗi bak aqeb, ag nob naunab aoglag.

Aposel 18:15

Amge ag uɗin, ag nai onignu, onig laalanu ele amu ag akka ahilag ɗonu ele da oɗ meɗatteb amunu, da amu ii hepa; ag akka babaitteg! Da keeke amu epeɗikkulnu, da uumi!” awa aum.

Aposel 8:9

Ag oolag anam doyeg amu, danab laa aab okkai amuppa dayom, nug onig Saimon. Anukka nug am onig awak kobol heehe, Samaria danab ah oh ag nuhignu dabmak kuɗum aoegeg, nug nukka binag ma, “Da am danab okkai,” attom.

Aisaia 58:4

Haen ag ee ohnu kud mena daatteb amu, haen amuppa ag nai aeg ona, aeg do, ag akka akka nug qenana, ag eppelag bitakkan, nau henana, nug makkuɗak, nug qak uɗat ele hetteb. Ag attem hena, ag ee ohnu kud mena daanna, kobol nau amu oh ele henana, da ahilag unuqittaknu dabmekkulnu dabmetteb?

Prowerb 26:12

Danab nug Kayak dab-ii-maama ii dim lamidtte amu, amuam nau, amge laa nug nuhignu nug baolia, ena bekkunu dabmak aɗa oikkunu elele; amge danab nug nukka nuhignu, “Da doyak dabmak ena ele aɗe oittem,” anam dabmette amu, amuam kobol naunab, laa nug nuhignu nug baolia, ena bekkunu dabmak aɗa oikkunu am uug ele.

Prowerb 25:14

Danab ag laa keeke mattaknu atteb, amge ag ii madatteb; ag am lombig aam haenppa gu wan le ii medatte, amubia hetteb.

Prowerb 13:7

Danab laa nug enub okkai ele bia ippu hak hette, me nug keeke ele ii daatte; amge danab laa nug daɗek daatte bia ippu hak hette, me nug am keeke kuɗum ele daatte.