1 Timoti 1:5 - Nobonob Baibel

⁵ Da danab oh ag Jesusnu oolagppa genab dootteb ele, da ag oolagppa oo mauhak amba dayeb oiglagnu, da diig amunu haknunab anak amu madattem. Oo mauhak amunu amu, am danab oolkad oppiak ele, ahilkad ooppan oiyak ippunittaknu ulum eheɗ laa heppig ii ippunadtte, amu ag Kayaknu ooppa genab doyak genab doonna oitteb, oo mauhak amuam danab ag oolkad amubia daatte, am ahilagppanu ba gotte.

1 Timoti 1:5 Referans Kwoze

1 Timoti 1:19

Na Kristusnu ootppa genab doyak nahip ɠagattag aɗan heppe, beɗunppa aab iitta oiyak ele aib paɗame. Danab laa amu ag amu paɗappig amunu, ahilag ooppa genab doyak nug uub gikkuɗ attan ta aoɗa nauhom bia nauhppig.

Galesia 5:22

Beɗunu kobol am aakku, amge Kayak Ouɗi Nug he, oiyak ihinigppa meu laala imu bette. Oo mauhak kobol, maɗoɗppan gamag ahak kobol, maɗoɗ dayak kobol, dagom kobol, oo bodoettak kobol, ena hak kobol, oo metta ii uuak kobol,

2 Timoti 2:22

Amu nid bau dilag dabmak eheɗ nahip dabmakppa beeb amu, na tabappe naɗ! Na kobol genab tutukku, ooppa genab doyak kobol, oo mauhak kobol, amu maɗoɗ kobol ele, laala ag oolag tutukku ele, ag kobol nau uun, kobol ena amu oh aɗan, Naɗi onigppa etteb ele amu, na ag hetteb amubia he!

2 Timoti 1:5

Nahip ooppa genab doyak am ooppa genab doyak genab da daulppa daatte. Danab laa amelagnuib iitta. Ooppa genab doyak amuam tatam na alan Lois, nuhigppa daye, na anin Yunis, nuhigppa ele dayom. Amu ooppa genab doyak amu nahip-ppa ele daatte amu, da oolppa genab doottem.

2 Timoti 1:3

Timoti, da nahipnu Kayak amegppa, “Ena heme,” awe attem. Da mamelad aɗi ag Kayak waappa daan Nug oɗe dim lamidppig bia, da Kayak waappa daye Nug oɗe dim lamitten, beɗulppa aab iitta doyen, da tuqan, amun ele da nahipnu ele hanhan unuqidttem.

1 Pita 3:21

Aria, ag gemu daatteb amu, ag am Noa aɗi, ag aɗi keeke ippunigtteb bia daatteb. Ag ele leppa ehanittak aotteb. Amuam layattak, amge layattak am beɗunigppanu dubuttid ihaknu keeke iitta. Iitta. Layattakppa ⌊ag oolag eɗueb,⌋ ahilkad ooppan oiyak ippunittaknu ulum am ag oolagppa eheɗ laa ii daatte ippunatte, ag amuppa Kayak oɗe genab dim lamidkkulagnu Nug amegppa ahilag nai ɠagattag qettan maditteb. Amunu diig am Jesus Kristus, Nug mauhakppanu eɗua hibaittom.

1 Pita 3:16

amge na oo bodoettak kobol, na laanu ena elele doyak kobol ele dim lamidna, anam he! Danab laa ag na Kristusnu daanna, hak ena hettem anidna, ag baeg qak nai nahipnu maditteb amu, ag amunu uɗalag nekkunu na beɗunppa aab iitta eleppa henan oikkut.

1 Pita 1:22

Ag gemu ag doyak diig genabib dim lamidtteb, amuppa ag danab oolag ihan oppiak daatteb amunu, ag oo mauhak kobol genabppa ag lailkad dilagnu oolag mauhtte. Ag anam daatteb, amge ag tuɗidna, ag lailkad dilagnu oolkad unuqagppanu oo mauhaknab doyeg!

2 Pita 1:7

Amu ag lailkad ele layam ena daaglagnu kobol aona, ag genab tutukku hak kobol ele ouaqateg! Amu ag oo mauhak kobol aona, lailkad ele layam ena dayak kobol ele ouaqateg!

Rom 10:4

Juda ag anam hetteb, amge Kristusnu uɗat okkaippa, ig oonigppa genab doottem ele amu, ig ib amuppa genab tutukku hak danab bemut daattem. Ig ɗoppa genab tutukku danab ah ii bettem. Uɗat amu Kristusnu uɗat okkaippa aakku iitta meum amunu, danab oh ag Kristusnu oolagppa genab dootteb aakkuib Kayak Nug ahilagnu amu, “Genab tutukku hak danab,” awa atte.

Taitus 1:15

Am danab ag oolag dubuttid iitta ele amu, ahilagnu keeke oh am oppiaawak ele daatte, amge danab ag dubuttid ele, ag oolagppa genab ii dootteb ele amu, ahilagnu keeke oh am oppiaawak iitta. Ahilag dabmakppa, ahilag ooppan oiyak ippunittaknu ulum eleppa dubuttid aakku teum daatte.

1 Timoti 3:9

Ag beɗulagppa aab iitta daanna, ag ooppa genab doyaknu nai unuqag ɠagattag aɗeg!

2 Korint 1:12

Aria, ig keeke laanu maɗoɗppan gamag ahak doottem. Ihinig ooppan oiyak ippunittaknu ulum am keeke amuam genab ippunigtte. Keeke amuam inam. Ig wanppa oimut, gemu ele oittem amu, ig Kayaknu oppiaawak kobol amu nuhig hambuppuak iitta kobol ele aot oimut. Ig danab dabmakppa ii hemut. Iitta. Ig Kayaknu ehanittak okkai hamu megatte, ig amuppa hetata amu, ig ag Korint daatteb oolagppa huana hemut.

Sam 51:10

O Kayak, na heppe, da ool unuqag oppiak ele daakkunu oɗ medattem. Ao, na heppe, dahil dabmak tutukku ele dayeye, na dim lamidkkulnuib hekkulnu unuqidttem.

1 Pita 4:8

Ag lailkad dilag huana oolag mauhkkunu dabmak ahilagppa anuqak dayaɗ! Aɗinu? Layagnu oo mauhak kobol nug kobol eheɗ kuɗum tone iitta mette.

Jems 4:8

Ag Kayak gumidna wappeg amu, Nug ele ag gumatta dokku. Danab nug eppeg leppa ihe, dubuttid iitta daatte bia amu, ag hipunin danab ag heppeg, ag ahilag oiyak am dubuttid iitta ele dayaɗ! Ag danab ag dabmak laippu iitta, ag heppeg, ag oolag oppiak dayaɗ!

Aposel 23:1

Pol nug noolagppa hibaitta dayaya, hettoɗiak okkai danab daappig amu oh neekkattatta, nug aum. “O lailad, da Kayak noobppa oolppan oiyak ippunittaknu ulum ippuniɗom bia oiiyi uɗie, gemu ele oittem,” awa aum.

Sam 24:4

Amuam laa ag oolagppa oppiak ele, agib appa daaglag. Yo, amuam laa ag dottolag eppelagppa hoyadppig dilagnu dup noa binag mak kobol ii hetteb, agib appa daaglag. Ge, amuam laa ag hambuppuak nai laanu ag ahilag nai ɠagattag qena ana, ag nai amunu, “Am nai genab,” ii maditteb ele, agib appa daaglag.

1 Jon 3:3

Am danab ah ag Kristus anidna, Nug daatte bia daaglagnu dabmak aɗan oitteb ele, ag Kristus Nug oppiak daatte, ag amubia oppiak daaglagnu hetteb.

Hibru 10:22

amunu, ig oonigppa hambuppuak laa iitta ele daatta, ig Jesusnu oonigppa genab doot autta aota, Nug he ig ihinkad hipunin uhuqa mekkak daatteb dootta, ig beɗunig le oppiaawakppa babaitta malak oitta, Kayak gumidta gotu!

1 Korint 13:1

Da danab amelagppa danab nailag digdig amu engel nailagppa ele madittem dayeb, amge da laa dilagnu oo mauhak ii doottem dayeb amu, da do hamu gaatte bia, o iitta simbal oqotti hamu otte bia daattem.

Rom 14:15

Aria, laa nug keeke laa lakkunu eheɗ dootte dayeb, amge na ee amu lattem amu, kobol nahip amuppa na heppe, na layap nug ooppa guittak dookku, na amunu dookkut, kobol amuppa na layapnu oot ii mauhtte. Amu Kristus Nug na layap amu eɗua aokkunu mauhom amunu, na nahip ee lanak kobolppa nuhig ooppa genab doyak aib heppe nauhom.

Rom 9:1

Da Kristusnu dayeye, da nai imu genabib madittem. Da ham-ii-bubuttem. Kayak Ouɗi Nug da oolppan oiyak ippunittaknu ulum gumeme, amuppa ele da ham-ii-bubuttem doottem.

Aposel 24:16

Amunu da hanhan deɗ oh da oolppa keeke eheɗ laa Kayak noobppa, danab ah amelagppa ele ii daamanu, da wagai mettem.

Aposel 15:9

Nug ihinigppa kobol laa haaha, ahilagppa kobol laa ii heum. Iitta. Ag oolagppa genab doyeg, ahilag ooppa genab doyak amuppa Nug he, ag oolag oppiak dayom.

Matyu 12:35

Danab ena nug ooppa dabmak ena kuɗum niitte, amuppa nug kobol ena he bette, amge eheɗ hak danab nug ooppa dabmak eheɗ kuɗum niitte, amuppa nug kobol eheɗ he bette.

Matyu 5:8

Danab aun aɗi ag oolagppa oppiak ele amu, ag itittak ena aoppig daatteb. Aɗinu? Ag Kayak anidkkulag.

1 Jon 3:23

Nuhig haknunab nai am inam. Ig Nug Bekka Jesus Kristusnu oonigppa genab doot, Nug ig amenigppa haknunab nai aum, amubia ig lainkad ele nug oo mauhak ele doognigoitte.

Hibru 13:18

Ihinkad ooppan oiyak ippunittaknu ulum am Kayaknu neekkakppa ig beɗunigppa aab iitta ippunigtte oonigppa genab doottem, ig haen oh tutukkuib oignignu oonig daatte amunu, ag Kayak ig ehanigkkunu unuqitteg!

Hibru 9:14

amge gemu, ig Kayak bauklel ele waappa daat Nug oɗe dim lamidkkunignu ig Kristus tiigppa genab oppiaawak daagnignu elelenab. Aɗinu? Kristus Nug beɗuppa eheɗ laa iittanab, Nug Kayak Ouɗi hanhan daatte ele, nuhig ɠagattagppa, Nug nukka Nug beɗu, mana mettak bia, Kayak mettom amunu, Nug tiig ig beɗunigib ii ihom. Iitta! Ig Kayak bauklel waappa daat, nuhig uɗat hekkunignu Nug tiigppa ihinig hak nau, hak amuam danab mauhakppa omaladna gotteb amu, am hak nau amu oh uhuqa mekkak daatteb.

Galesia 5:6

Danab nug Kristus Jesus ele ouqak daattep amu, nuhigppa gaɗa otaɗak kobol, o iitta gaɗa ii otaɗak kobol, aɗit amu oh am keeke hamu. Nuhigppa keeke laippuib am okkai daatte. Amuam danab nug ooppa genab doya, laa dilagnu oo mauhtte.

Jeremaia 4:14

O Jerusalem danab ah, Juda danab ah ele, ag oolag dubuttid ele amunu, ag padal ii memananu, ag ehanittak aoglagnu, ag dubuttid amu oppieg! Ag nau hekkulagnu dabmak aɗan daatteb; amu haen gane laa ele ukkeb, ag dabmak amu uuglag.

Duteronomi 10:12

Gemu amu, ag Israel, ahilagnu amu, Yawe, ahilag Kayak, Nug ag aɗi hekkulagnu atte? Nug ag imu hekkulagnu atte. Nug ag nuhignu ebehilag oh bodoetta le meeb, nuhig nai dim lamidnana, nuhignu oo mauhak doonna, ag Nug waappa daan Nug oɗe dim lamittak kobol ag meulag ohppa, oolag ohppa ele hekkulag.

Sepanaia 3:7

Amu da Jerusalem danab ah amelagppa ami. ‘⌊Ag uug digdig da laa dilagppa hemi anidppig amunu,⌋ gemu ag Jerusalem danab ah, ag dahilnu ebehilag oh bodoetta le mekkunu doottem. Ao, ⌊ag anidna,⌋ gemu ag daug batak nai dahil doon, dim lamidkkulag ⌊amunu, da baula bu madakkulnu ii hepa⌋ doottem,’ ami. Amge iitta. Jerusalem danab ah ag anam heppiglob amu, ahilag aab nauhkkunu ii daama. Ge, dahil bu oh ahilagppa taknu ii daama. Anam, amge ag tuɗidna hipunin hekkulagnu oolag huana dayom. Ao, ag buttua ukka tueb batak hewona, tueb ukka buttua aam bette batak amuib henan daappig,” awa atte.

Rom 12:9

Ag lailkad dilag oo mauhak genabppa oolag mauhaɗ! Ag aib hambuppuak bia heppig. Ag kobol eheɗnu nau ninig ele doyeg! Ag kobol ena amuib aɗan autna aweg!

1 Timoti 1:18

O da bekkal Timoti, da propet nai na aɗi aɗi hekkutnu tamaniak ag na medappig amunu dabmein, da na ban danab ag ena daanna ban hetteb, na amubia daanna, uɗat nahip amu attem pehettak hekkutnu mattiak nai imuppa na ippunidttem.

1 Jon 3:10

Anam amunu, ig kobol imuppa aun nug am Kayak Bekka, aun nug am Kayak Bekka iitta, nug Satan bekka daatte, amu ele doottem. Am inam. Aun nug kobol tutukkuppa ii oitte amu, nug Kayak Bekka iitta. Am laa nug layagnu oo ii mauhtte, nug ele Kayaknu iitta.