1 Samuel 15:22 - Nobonob Baibel

²² Saul nug anam aum, amge Samuel nug eɗua amegppa aum. “Yawe Nug manaknu ofa, amu mana mettak laala elenu oo hette, amge Nug danab ag Nug oɗe dim lamidkkulagnu amu, Nug amunu oo huanaknab hette. Yawe oɗe dim lamittaknu, am mana mettak eɗidtte. Ao, Yawenu nai doon dim lamittaknu, am sipsip dawai ittag mana, Kayak mettaknu eɗidtte.

1 Samuel 15:22 Referans Kwoze

Hosea 6:6

Amunu diig am, da ag laanu oolag gai-iitta doon, oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem. Ao, ag da, Kayak, ag da genab dooiɗkkulagnu da anuqak doottem. Da ag manaknu ofa, da meɗaglagnu anuqak ii doottem,” awa atte.

Prowerb 21:3

Danab nug Yawenu mana mettak hekku dayeb amu, amuam ena; amge danab nug kobol tutukku, amu nai doya mala hettoɗia epeɗia elele mettak kobol ele hette amu, amuam Yawenu neekkakppa enanag.

Mak 12:33

Amu na nuhignu na meut ohppa, nahip dabmak ohppa, nahip ɠagattag ohppa ele oot mauhkku, amu na nakka nahipnu oot mauhtte, amubia na laipad dilagnu oot mauhkku, keeke aɗit amu aa manaknu ofa oh, mana mettak laa oh ele eɗidttep,” awa aum.

Matyu 9:13

Gemu ag nai imu Kayak Nug mattiom, nuhig naippa daatte, ag nai amu anidna doyeg! Nai am inam. ‘Da ag laanu oolag gai-iitta doon oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem.’ ” Jesus Nug anam anana, Nug tuɗitta aum. “Da genab tutukku hak danab ag oolag eɗukkunu ii uɗimi. Iitta! Da hipunin danab ag oolag eɗukkunu uɗimi,” awa aum.

Eklisiastis 5:1

Haen na Kayaknu mettid lag amuppa gonana, na dabmenan ukke! Na appa gona, Kayak baag dookkutnu dabmenan gokkut; na gona, doɗ keeke hamu hamu, danab nug Kayak dab-ii-maama ii dim lamidtte ele hette bia manadna, Kayak aib mettame. Aɗinu? Danab amu ag eheɗ aakku hetteb ii dootteb.

Matyu 12:7

Ag Kayak naippa nai laa daatte, nai amu doolob amu ena. Nai amuam inam. ‘Da ag laanu oolag gai-iitta doon oolag mattan ehanadkkulagnu anuqak doottem. Da ag doɗ main meɗaglagnu anuqak ii doottem.’ Ag amunu meu genabnab doolob amu, ag danab imu eheɗ laa ii heppig ele beɗulkadppa nai ii yaalob.

Matyu 23:23

O gadonnab gadon ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag keh naunau amu oh oppateg, ameg eblaih tanig ele neeg, ameg laippu amu Kayak medatteb, amge ag ɗo laa okkai ii dim lamidna oitteb. Ɗo ag ii dim lamidna oitteb ele am, nai doya mala hettoɗia epeɗia elele mettak kobol, laa dilagnu oo gai-iitta doya oo metta ehanittak kobol, amu oo metta ii uuak kobol ele. Ag ɗo ii dim lamidtteb, amu laa dim lamidtteb ele, ag amu oh dim lamidlob, amuib am tutukku.

Matyu 5:24

na nahip mana mettak qaɗab guguittak meppe dayebeb, tatam goppe, layap ele oolah babaitteɗ! Babaittoya, aria, na eɗun gona, nahip mana mettaknu keeke main, Kayak mette!

Jeremaia 26:13

Amunu ag ahilag oiyak, ahilag hak ele bappaidna, elele mettan dayeg! Ag anam henana, ag Yawe, ahilag Kayak, ag Nug oɗe doon dim lamitteg! Ag anam hekkulag amu, Yawe Nug nuhig dabmak baolia, Nug ag bu madakkunu dabma hekkunu aum bia ii hema.

Eksodas 19:5

amunu, gemu ag dahil nug tituana nai qakkak ɠagattag aɗan, dahil nai tutukku dim lamidkkulag dayeb amu, ag geha dahiladnab danab ah daaglag. Aɗinu? Wan ohppan danab ah ag ele am dahilad daatteb, ⌊amunu da aun otikkul hein amu, da otikkul⌋.

Jeremaia 11:7

Aɗinu? Haen da ag, Israel, ag mamelkad aɗi Isipnu omalatti uɗippig, haen amuppa da digmein, nau aomnanu dabmettak nai haen kuɗum ag amelagppa matti uɗie, gemu batak. Da nau aomnanu dabmettak nai mattieye, da, “Ag da oɗel dim lamitteg!” ami.

Jeremaia 11:4

Anukka ag Israel, ag mamelkad aɗi ag Isip wanppa uɗat ɠagattag, eheɗ nau henan daappig. Ag daanna anam heegeg, da ag Isipnu diien, omlatti uɗiegeg, da haknunab nai ag haen amuppa mattami amu, nai amu, nai laa iitta, nai amu aakkuib gemu daatte. Da ami. “Ag da oɗel dim lamidnana, ag dahil haknunab nai oh dim lamidkkulag dayeb amu, ag dahilad danab ah daappeg, da ahilag Kayak daakkul.

Genesis 4:4

amge Abel nug nuhig doɗ sipsip, meeme ele nalkad ⌊dawai⌋ tatamnu laala ittalkad awa uɗia mana, Yawe mettom. Aa anam heeh amu, Yawe nug Abelnu, nuhig mana mettak elenu ena anttom,

1 Samuel 13:13

Saul nug Samuel amegppa anam a amu, Samuel nug eɗua, nug amegppa aum. “Na heme amu, amuppa na dabmak tutukku iittappa heme. Na Yawe, nahip Kayak, na nuhig nai ii dim lamidme. Na dim lamidlom amu Nug heeb, na, amu na buɗun ele ag hanhan Israel gumalob.

1 Samuel 13:12

amunu, da dabmemi. ‘Pilistia ag ahan, Gilgal ippa uɗin lamigkkulagnu hekkulag, me da Yawe dahilnu ena doya ehanigkkunu doɗ laa ii mane mettami.’ Da amu dabmemi amunu, da manaknu ofa Nug medakkulnunab doyen hemi,” awa aum.

Hosea 8:13

Israel danab ah ag doɗ main, da meɗatteb. Ag mana mettak hena, ag teppu latteb, amge da, Yawe, da ahilagnu ena ii doottem. Gemu da ahilag hak naunu dabmein; da hipunin ag heppignu bu madakkul. Ag geha eɗun, Isip gokkulag.