1 Samuel 13:3 - Nobonob Baibel

³ Saul he, Israel dilag daup ag anam daanna, Pilistia dilag daup laa, ag aab onig Geba appa daappig amu, Jonatan, nuhikkud daup ele ag ahan, Pilistia amu ele ban heppig. Jonatan aɗi ag anam heeg, Pilistia laa ag doon, ag oolag nauhom amunu, Saul nug aabaabppa Israel danab ag bannu uɗiglagnu nai dooglagnu, nug nai awa ukkak danab ag gona, trampet iwalkkulagnu maatte gona iwalppig.

1 Samuel 13:3 Referans Kwoze

1 Samuel 10:5

Keeke amu beeb, dimppa amu na gona, Kayaknu aab Gibea, Pilistia danab ag appa daup dayaknu aben bappaidppig daatteb amu, na gona, aab amu gukkuidppeppe, propet danab laala ag aabnu mettid lag nakokppanu nebeppeg, huu laa ag propet noolag aon, musik haknu keeke digdig onig laia, tambarin, dumuttum, harp ele hebeppeg amu, propet ag propet nai mattiglag.

Ikki Danab 3:27

Haen nug ukka, Epraim wanppa, qauko qauko daattebppa ta amu, nug Israel danab ag oh qagmena, bannu gokkulagnu trampet iwalom. Nug trampet amu iwale, gumidna ukkaeg, nug Israel dilag bannu huu laa qauko nakok amuppanu omalatta noum.

Ikki Danab 6:34

Ag amu heeg amu, Yawenu Ouɗi Nug Gideon, nuhigppa uɗie, nug Abieser buɗub ag nug gumidna gona dim lamidna, banelag gona, ban hekkulagnu trampet ag onilagppa ekkunu iwalom.

Sekaraia 14:10

Juda wanppa yawalti uɗitteppanu Geba daatteppa ukka, Jerusalem daatteppanu yau uɗitteppanu Rimon daatteppa amu, aab aɗit amu gamalahppa wan amu oh am eɗua, wannu laih onig Araba daatte, am amubia, ⌊honap⌋ daakku. Wan amuam wannu laih onig Araba daatte, am amubia, ⌊honap⌋ daakku, amge Jerusalem am nuhig abenppa, attan daakku. Jerusalemnu tom am aɗnu od laa onig Benyaminnu Od, amuppa digma ukka, od laa onig Alagnu Odppa ukka, aria, appanu tom am od laa onig Daugppan Od, amuppa ukka, amuppanu am lag attan ta ukkak menppa hak onig Hananelnu Lag, amuppa ta ukka, appanu kingnu grep meu tappa leppu awaknu abenppa batakku.

Aisaia 10:29

Appa mewona ag gona, qauko ikki oppoɗu noakppa nona, aab okkai Geba, appa haen tutu dayaknu aab kalaglag. Ag appa niibppeg, danab ah Rama aab okkaippanu ag eheɗ baɗaglag. Baɗappeg, King Saul appag diig Gibeanu danab ah ag ahan, aab uun, ag oolna gokkulag.

2 Samuel 23:14

Dawit nug ban haknu aben ɠagattag amuppa daye, Pilistia ag ahilkad huu laa ag ahan gona, Betlehem aabppa, ag appa daappig.

2 Samuel 20:1

Amu danab laa onig Seba, nug Benyamin ted, Bikri bekka, nug appa dayom. Nug hanhan he, uug digdig bettom, amu nug appa dayaya, Juda dilag nai doya, nug trampet iwalala eum. “Ig Israel laa oh, ig Dawit ele laippu iitta. Ao, ig Jesi bekka Dawit, ig nug buɗub iitta. O ag Israel danab laa, da ag ele ig oh ahat, ig appanig diigppa gotu,” awa aum.

2 Samuel 2:28

Joap nug anam anana, nug trampet iwale gaye, nuhikkud danab ag dim lamittak uɗat amu uuppig. Ag Israel laa dim lamadkkulagnu uun, ag ele ban ii heppig.

1 Samuel 13:16

Aria Saul, nug bekka Jonatan, amu ahilti daup ele ag Benyamin wanppa, aab onig Gibea, appa daappig; Pilistia danab ag am Mikmas appa haen tutu dayaknu aab kalan daappig.

Josua 21:17

Israel dilag huu okkai laa Benyamin ooppan amu, Israel ag mana mettak danab Aron buɗub aab imu ele madappig. Aab amuam, Gibeon, Geba,

Josua 18:24

Kepar Amoni, Opni, Geba ele. Aab amu oh ebqak amu 12. Aab naunau laala ele aab amu talilittak daappig amu, ag aab amu ele ag madappig.