1 Korint 4:15 - Nobonob Baibel

¹⁵ Ag Kristusnu daanna, ag ippunittak danab kuɗumnab ag ehanadkkulagnu diiglagtai. Ag diiglag dayeb am diiglag, amge amuam heeb, keeke laa ii baolima. Keeke ii baolikku, amuam da Jesusnu Nai Ena mehuqi, ag oolagppa genab dooppig amunu, daib ag mamelag daattem; ag mamelkad kuɗum iitta.

1 Korint 4:15 Referans Kwoze

Galesia 4:19

O nid dahilad, da ag Kristen bekkulagnu guittak naɗi, ah nid menukkunu guittak dootte, amubia doomi, amu gemu da ag Kristus daatte bia bekkulagnu guittak amubia baula doottem.

1 Korint 3:10

⌊Lag hak danab nug lag hekkunu dayeb amu, nug tatam lag ukku hette. Lag ukku amu danab ag lag amu qaɗeppa heppeg, ena daakku. Lag ukku am lag diig. Tamaniak diig am tamaniak ukku⌋ Aria Kayak ehaniɗe, lag hak danab nug lag ukku ena tutukkuib aɗatte, amubia da tamaniak tutukku enaib daakkunu, nuhig ukku daakkunu, ag amelagppa Jesusnu nai mehuqmi. Gemu laala ag danab laa uɗin lag ukku qaɗeppa lag hetteb, amubia da nai mattimi, nai amuppa ag uɗat tuɗidna hetteb. Amge laala, ag anam hetteb ele amu, ag dabmenan heig! Ag mauhnoak aib heppig.

1 Korint 9:23

Am Nai Ena aha okkai mekkunu, da nai amuppan itittak ena aokkulnu ele, da uɗat anam anam hettem.

1 Korint 9:14

Anam daatte bia Naɗi Nug ɗo imu ele meum. Danab ag Nai Ena mehuqtteb ele, danab amu ag danab ah Nai Ena dootteb ele, ag ahilagppanu enulag keeke, beɗulag ehanidkkunu, aoglag.

1 Pita 1:23

Aɗinu? Ag Kayak nai bauklel ele, nai amuam ii iitta mette, hanhan alet ele daatte, ag amuppa ag bau menuak aoeg, ag Kayak, Nug bau hanhan daatte, Nug ii mauhtte, ag Nug bekkod daatteb.

Jems 1:18

Iitta! Nug nukka dabmak nuhig dim lamitta, Nug nai nuhig doyak diig genabibppanu, Nug amuppa ha, ig Nug danab ag attem daaglagnu dabmeum ele amu, ig amubia daagnignu Nug bauklel ig mekkom.

Pilemon 1:19

Da Pol, da dakka da eppelppa nai imu uɗug imuppa iikku yaattem. Nug nahip keeke awom dayeb amu, nob amu da geha na medakkul, amge diigppanab, na nob okkainab laa da meɗakkutnu daattenu ii apa.

Taitus 1:4

O Taitus, i oh ooppa genab doyak laippu aɗattep, ooppa genab doyak amuppa na da bekkalnab daattem amu, da nahipnu iikku yaattem. Mame Kayak, amu ihinig Eɗua Awikkak Danab Jesus Kristus ele, ahilah ehanittak okkai hamu mettak, amu ahilah maɗoɗ ele nahip-ppa daaglahnu ool daatte.

2 Timoti 4:3

Aɗinu? Dimppa haen laa amu danab ag ippunittak nai genab ena ele uuglag. Ag akka ahilag dabmak dim lamidna, ippunittak danab hambuppuak kuɗum diiglag. Diippeg, ippunittak danab amu ag nai laala, danab ag dooglagnu oolag niitte ele, amu appeg dooglag.

1 Korint 9:18

da nob aɗi aokkul? Dahil nob ena amu inam. Da Nai Ena mehuqttem, uɗat amuppa da keeke da aokkulnu elele daattem amu, da ii awewe, da Nai Ena hamu nob laa iittappa mehuqe, danab madattem.

1 Korint 9:12

Danab laala ag ahilagppa dim goppig. Ag gona, nai mehuqegeg, ag keeke madatteb amunu, ig ahilagppa keeke aognignu elelenab daattem. Amge keeke ig aolomnu elele amu ig ii aomut. Aɗinu? Ig keeke amu aolom amu, Kristusnu Nai Ena ag aon oolagppa genab dooglagnu ib am oo nekkunigtai amunu, uug laala oh amu ig aakku maottem.

1 Korint 3:6

Da ee aeg eppai, Apolos nug le mettom, amge Kayak Nug he, ee amu beum.

Rom 15:20

Da uɗat amu heinne amu, da danab laa ag tatam tamaniak buueg beum daatte amuppa nai mehuqkkulnu ool ii daatte. Iitta. Da aben laalappa Kristus onig ii dooppig ele, ahilagppa Nai Ena madikkulnu da ool okkainab daatte.

Namba 11:12

Na, na onin aon, amuppa nahip nai ɠagattag qettan, danab ah imu mamelkad aɗi Kanan wan madakkutnu ame. Amge danab ah imu oh da ii hattami; da ii menuadmi. Da amu ii hemi amunu, na da ag dabmatte, atognoatte aute awewe, wan na amenu, appa omalatten gokkulnu ame amu, da amunu diig ii doottem.

1 Korint 1:30

Kayak Nug aakku he, ag Kristus Jesusnu daatteb. Kristus Nug am doyak dabmak ena, ig Kayaknu aottemnu diig. Gemu ig genab tutukku hak danab daattem, ig oppiaawak ele daattem, amu ig gemu qagaiettakppanu eɗua uhuqak aomut daattem, amu oh Kristus, nuhigppaib beppig daatteb.

1 Korint 3:8

Aria ee eppak danab, le mettak danab ele, aa oh diig laippunu uɗat hettep, amge maɗi ahilah am anen anen. Kayak Nug maɗi ahilah antta, melemel amuppa nob ena matakku.

1 Korint 9:16

Da Nai Ena mehuqttem ele amu, amuppa da dakka binal mekkulnu elele iitta. Aɗinu? Kayak Nug a, da hettem. Da ii mehuqlom amu, dahilnu gadonnab gadon.

1 Korint 15:1

O lailad, da ahilag dabmak Nai Enanu maɗedakkulnu hettem. Da tatam digmakppa Nai Ena amu mehuqi, ag Nai Ena amu doon aɗan, oolagppa genab doon, amuppa ɠagattag daatteb.

2 Korint 4:5

Anukka Kayak Nug aum. “Gatatu ooppa amahlak nug amahlaɗ!” awa aum. Kayak anam aum, amu Nug ele he, ig Jesus iɗuppa Kayak binag amahlak oppiaawak ele anidta doottem amunu, ig ikka ihinignu nai ii mehuqttem. Iitta. Ig Kristus Jesus, Nug am Naɗi daatte, anam mehuqtata, Jesusnu nai dim lamidttem, amuppa amu ig ahilag maɗi nid daattemnu ele mehuqttem.

Galesia 3:24

Ɗo nug am gumikkak danab ihinig bia, nug ig omaikka, Kristus toppa wab, ig Nai Ena oonigppa genab doopput, Kayak Nug ihinignu, “Genab tutukku hak danab,” awa akkunu dayom.

Galesia 3:25

Gemu Jesus Kristus Nug uɗat nuhig ha malom daatte, nuhignu ooppa genab doyaknu ib aakku daatte amunu, ɗo nug baula gumikkak danab ihinig ii daatte.