1 Korint 3:10 - Nobonob Baibel

¹⁰ ⌊Lag hak danab nug lag hekkunu dayeb amu, nug tatam lag ukku hette. Lag ukku amu danab ag lag amu qaɗeppa heppeg, ena daakku. Lag ukku am lag diig. Tamaniak diig am tamaniak ukku⌋ Aria Kayak ehaniɗe, lag hak danab nug lag ukku ena tutukkuib aɗatte, amubia da tamaniak tutukku enaib daakkunu, nuhig ukku daakkunu, ag amelagppa Jesusnu nai mehuqmi. Gemu laala ag danab laa uɗin lag ukku qaɗeppa lag hetteb, amubia da nai mattimi, nai amuppa ag uɗat tuɗidna hetteb. Amge laala, ag anam hetteb ele amu, ag dabmenan heig! Ag mauhnoak aib heppig.

1 Korint 3:10 Referans Kwoze

1 Korint 3:11

Aɗinu? Tamaniak ukku laa ii daatte. Da Jesus Kristusnu nai mattimi aakkuib am tamaniaknu ukku daatte, amu danab laa nug ukku laa heeb bekkunu elele iitta.

Epesus 2:20

Ig oh am Kayak laug bia daatteb. Ig nuhig totol danab amu nuhikkud propet ele, ig lag amunu ukku meut, ag amu qaɗeppa daatteb. Kristus Jesus Nug am lag amu ukku ɠagattag daakkunu men anuqak daatte.

Rom 15:20

Da uɗat amu heinne amu, da danab laa ag tatam tamaniak buueg beum daatte amuppa nai mehuqkkulnu ool ii daatte. Iitta. Da aben laalappa Kristus onig ii dooppig ele, ahilagppa Nai Ena madikkulnu da ool okkainab daatte.

Daniel 12:3

Laa ag doyak dabmak ena ele ag hab attan amahaltte, ag amubia amahalkkulag. Ge! Laa ag heeg, danab ah kuɗum ag kobol genab tutukku dim lamidtteb ele, ag hoɗoppai amahaltte bia amahalkkulag. Ge, laa ag heeg, danab ah kuɗum ag kobol tutukku dim lamidtteb ele, ag hoɗoppai amahaltteb bia hanhan amahalkkulag.

Matyu 24:45

Jesus Nug anam ana, Nug nai tuɗitta aum. “Maɗi nid laa doyak dabmak ena ele, nug oo metta ii uuak kobol haaha daatte amu, nuhig okkai nug maɗi nid amu nuhikkud maɗi nid laa gumattatta, haenppa ee madakkunu uɗat medakkunu elele.

Revelesen 21:19

Aab amunu aɗ ukkunu men duqe ukkak ele amu Kayak Nug men amuppa men laala daden nob okkai ele, qata-aqattom. Men duqe ukkak anuqakppa am men jaspa. Men duqe ukkak ebqak 2ppa am men sapaia. Men duqe ukkak ebqak 3ppa am men kalsedon. Aria men duqe ukkak ebqak 4ppa am men emeral.

1 Korint 9:2

Am danab laala ag dahilnu, “Nug am totol danab iitta,” doottebtai o iittatai, da ii doottem, amge ag Korint daatteb ele, ag am anam dooglagnu elele iitta. Aɗinu? Da nai mattiyi, ag Jesusnu oolagppa genab dooppig amunu, da genab totol danab daattem doyaknu, ag amunu am epponak keeke bia daatteb.

Matyu 7:24

Amunu danab nug nai dahil imu doya dim lamidtte amu, nug danab laa doyak dabmak ena ele, nug danab laa men qaɗeppa lag ukku aɗe, men aɗa dayeye, aria dimppa nug amu attan lag heum bia daatte.

1 Pita 4:11

Ao, danab ag ahilag uɗat oh anidna, Jesus Kristus onigppa ag Kayak binag mekkulagnu amu, danab laa nug Kayak nai mehuqtte ele dayeb, nug Kayak nai tutukku mehuqaɗ! Amu danab laa nug layag ehanidtte ele dayeb, nug ɠagattag Kayak medatte ele amuppa uɗat haɗ! Binag amahlak oppiaawak ele, ɠagattag oh ele hanhan alet ele Jesus Kristus, nuhigppa dayaɗ! Genab.

2 Timoti 2:15

Kayak Nug nahipnu ena dookkunu na uɗat nahip pehettakib hekkutnu wagai me! Na maɗi nid nug nuhig uɗat enaib hette, diig amunu nug uɗat nuhignu uɗa ii nette, amubia na danab ah Kayak nai tutukkunab ippunatte!

Kolosi 4:17

Aria ag Arkipus amegppa, “Na uɗat Naɗi eppegppanu aome amu, na uɗat amu heppe gogppa taɗ!” aon appeg doyaɗ!

Rom 12:3

Kayak Nug da ehanittak okkai hamu meɗom amu, da amuppa ag anen anen amelagppa attem. Ag akka anen anen ag, “Dahil hak, dahil oiyak ele am enanag,” amge nahip hak, nahip oiyak ele am melemel amuppa ii bette amu, ag anambia aib dabmeppig. Iitta. Kayak Nug ooppa genab doyak ahilag ag anen anen matte, ag uɗat hetteb ele amu, ag amu dabmenan, ag akka anen anen ag dabmak tutukku aon oiyeg!

Rom 1:5

Jesus, nuhigppa amu, Kayak Nug da iitta aɗi danab iɗu iɗu oh ag nuhignu oolagppa genab doon, nuhig nai dim lamidkkulagnu onilagppa ekkulnu Nug nuhig ehanittak okkai hamu megatte meɗa, da totol danab ele dayeye, totol uɗat hekkulnu meiɗom.

Aposel 18:27

Aa ippunitteh, amu dimppa Apolos nug prowins onig Akaia appa gokkunu he, Epesusnu Kristen oh ag nug nai doyom amu awa ukka tuɗidkkunu dabmak nuhig amu ɠagattag qedappig. Aria, Epesusnu Kristen ag danab Akaia appa Kristen meppig ele, ag amu dilag uɗug yaak laa yaan, ag Apolos ag ele laippu dayaknu oolagppa eleleib dooglagnu yaan, ⌊Apolos awa gokkunu medappig⌋. Metteg, Apolos ukka Akaia te amu, danab ah Kayaknu ehanittak okkai hamu megatte amu aona, ag oolagppa genab dooppig ele amu, Apolos nug ag ɠagattag aqom.

Luk 11:35

Amunu aɗi dabmak na ootppa daatte, na dabmak amunu, ‘am amahlak’ doottem amu, dabmak amuam gatatu daatte daamanu na dabme!

Eklisiastis 12:9

Ippunittak danab nug nai imu yom amu, nug am doyak dabmak okkai ele, amge nug nukka amu aɗa, nugib ehanidkkunu ii heum. Iitta. Nug doyak amu danab ah dooglagnu ele ippuanattom. Nug dabmak okkainab awawa, nug oiyak ehanittaknu nai tutu elenu meu pehettak anidkkunu haaha, nug awa babaitta, listappa pehettak yom.

Jems 3:1

O lailad, danab kuɗum laa ele ag oolagppanu ippunittak danab bekkulagnu aib dabmeppig. Aɗinu? Ag dootteb, dimppa Kayak Nug epeɗiak ɠagattag ippunittak danab ihinigppa haaha, Nug epeɗiak nakok bodoettak Nug baekkudppa laala dilagppa hekku.

1 Timoti 4:16

Na nakka kobol na hettem, amu nai, na amu danab ah ippunadttem ele amu, na amu oh atognona dabmenana he! Na uug doyaya eɗittaknuib dabmak awak kobol dim lamidna, anam he! Aɗinu? Na anam hekkut amu, uɗat nahip amuppa na laa nahip nai dootteb, na nakka nahipnu ele, na ag oh ehanadppe, ag ib ii apiɗidmana.

Kolosi 1:29

Diig amunu da dahil ɠagattag ohppa da uɗat amu hekkulnu heɗiag okkai hettem. Kristus Nug nukka da uɗat anam hekkulnu ɠagattag okkai nuhig da meɗa, Nug da tappaɗilele hettem.

Rom 15:15

Amge da nai laala ahilagnu nakok ɠagattag yaaladmi amu, da nai amuppa dabmak ahilag maɗedakkulnu dabmemi. Aɗinu? Kayak Nug da ehanittak okkai hamu meɗa he,

Luk 21:8

Ag anam aeg, Jesus Nug aum. “Laa ag hambuppualadmanu, ag dabmeig! Aɗinu? Danab kuɗum ag da onilppa uɗin, ‘Da am Kristus,’ ana, ‘Haen miag aakku doum,’ ele aon akkulag, amge ag ahan, ag aib dim lamadna goppig.

Sekaraia 4:9

“Serubabel nug mettid lag imunu ukku menppa haknu am aakku heum, nugib lag amu ha malakku amunu, qinob nai amu meu ob, dahilad danab ah ag da Yawe Dakka Ɠagattag Oh Ele, da na Sekaraia, da na meitte uɗime dooglag.

2 Stori 2:12

Hiram nug nai amu babaitta, nug tuɗitta, nai imu ele Solomon, nuhigppa me ukkom. “Ig Yawe, Israel dilag Kayak, Nug hab, wan ele heum amu, ig Nug binag humatu! Nug King Dawit nid danab laa mettom amu, nid amuam doyak dabmak ena ele. Nug dabmak meu unuqagnu doyak danab ele, nug keeke diignu doyak tutukku ele. Nid amu nug gemu king daya, nug Yawenu mettid lag, nuhig lag enanagnab ele hekku.

Revelesen 21:14

Aab okkai amunu aɗ ukku am men kuɗum duqe ukkak huu 12 ele. Aɗ nug amu attan daatte. Amu Sipsip Nagnu totol danab 12 onilkad amu, ag men amuppa yaalattak daappig.

2 Korint 10:15

Ig anam mehuqtata, ig uɗat danab laala heppig, danab laa nug ag ena heppig, o ag ena ii heppig akkunu elele iitta amu, ig attem heta, ig oninig humagnig. Iitta. Ig geha ag Korint, ag ahilag ooppa genab doyak ɠagattag beeb, ig ag oolagppa uɗat hettem amu ba, okkai tuɗitta elele daakkunu hettem.

Prowerb 9:1

Doyak Dabmak Ena Ele nug nug laug heum. Nug biidod eblaih aɗit okkai amu lagnu uug maoglagnu galattom.

1 Tesalonaika 3:2

Timoti, nug ig lainig, nug am Kayaknu maɗi nid, Jesus Kristusnu Nai Ena mehuqaknu danab ele amu, ig nug ag ɠagattag aqakkunu, ahilag ooppa genab doyak ele ehanidkkunu, am laala ag uug naɗi mawak haen imuppa ag oolag meppeg ta, meppeg nemanu ele nug meuɗ ukkom. Ag tutukku dootteb, Kayak Nug ig Kristen ig oh uug amubia maognignu tituanikkom.

2 Pita 3:15

Naɗi Nug danab dilagnu oo bodoettak ele dootte, Nug amuppa ag oolag eɗueb, Nug ag eɗua diiadkkunu haen madatte, ag amunu dabmenan antteg! Amu ig lainignab Pol, Kayak Nug nug ele doyak dabmak ena ele mettom, uɗug ahilagnu yom amu, nai imu amuppa ele anam daatte.

Eksodas 36:4

Ag anam heegeg, danab uɗatnu doyak okkainab ele ag mettid haknu peh lag henana, keeke huanak anam anidna, ag uɗat ag heppig amu ag uun,

Prowerb 12:8

Danab ag laa nug doyak dabmak ena ele, ag nug binag metteb; amge danab nug dabmak kaliaknu kobol hette, laa nuhignu ena iinab dootteb.