1 Korint 15:50 - Nobonob Baibel

⁵⁰ O lailad, da ag amelagppa attem. Wanppan beɗu nug Kayaknu ɗo maɗoɗppa daakkunu elele iitta. Keeke beɗatte ele, amuam wanppan beɗu, amu keeke ii beɗatte ele, amuam Kayaknu ɗo maɗoɗ, amuppa daakkunu elele iitta.

1 Korint 15:50 Referans Kwoze

Matyu 16:17

Pita a amu, Jesus Nug oɗeppa awa aum. “Saimon, Jona bekka, Kayak Nug na itittak ena mettom daatte. Danab wanppanu laa nai amu ii ippunittom. Iitta. Da Mamel hab attan daatte, Nug na ippunittom

Epesus 4:17

Amunu da imu ag amelagppa attem. Da Naɗi onigppa iikku ɠagattag madittem. Ag nai imu aotteb ele amu, ag iitta aɗi ag dabmak apiɗidna oitteb ele amu, ag kobol amubiappa baula aib oippig.

Galesia 5:16

Da inam attem. Kayak Ouɗi Nug oiyak ahilag gumebeb, ag Nug dim lamidna oiyeg! Ag anam hena amu, ag beɗunu kobol ii dim lamidmana.

2 Korint 5:1

Wanppan keeke haen tutuib daatte, hab aabppanu keeke am hanhannu ele amunu, ig imuam dabmettat doottem. Ig gemunu beɗunig am wan imuppaib oiyaknu daatte. Keeke hanhannu iitta, danab nug peh haen tutuib daakkunu hette, amubia. Anam daatte amu, aria peh nug nauhtte, amubia ig beɗunig gemunu nauhppeg amu, Kayak Nug beɗunig laa, lagnab bia, hab aab appa megakkunu daatte. Lag amuam Kayak Nug heum; danab laa ii heum. Nug hanhan daakku.

Galesia 3:17

Nai dahil imu, nuhig diig amu inam. Kayak Nug tatam nug tituana nai qakkakppa Abraham amegppa keeke laa heeb bekkunu nai qakka aum. Dimppa maɗ 430 ukke amu, aria ɗo beum. Ɗo amu dim beum. Ɗo amuam Kayaknu nug tituana nai qakkak amu qeeb nekkunu elele iitta. Nai qakka aum ele amu, ɗo nug amu loppaɗkkunu ele elele iitta.

1 Korint 6:13

Ee nug ig oonignu daatte, ig oonig nug ee aokkun daatte, amge aa oh am gemunuib. Kayak heeb, aa oh iitta mekkulah. Aria, ee nug ig oonignu daatte, ig oonig ee aokkunu daatte, amge ig beɗunig amu, ig amuppa gappai hekkunignu ii daatte. Iitta. Ig beɗunig am Naɗinu keeke, amu Naɗi Nug ig beɗunig atognotte.

Kolosi 2:4

Amu da danab laa nug nuhig nai ittag ele amge meu iittappa ag eeɗadmanu dabmein, da ag amelagppa nai amu madittem.

2 Korint 9:6

Amge ag imu tutukku anidna doyeg! Danab nug ee tumu kuɗum ii ebatte, nug ee kuɗum ii aotte. Aria danab nug kuɗum ebatte, nug kuɗum aotte.

1 Korint 7:29

Amunu O lailad da nai imu attem. Haen tutu meum amunu, haen gamag imuppa amu ag inam dooglagnu attem. Danab ag ah diippig ele, ag am ahilag dabmakppa, “Ig ah ele, amge ig ah iitta bia daagnig,” dabmenan daaglag am ena.

1 Korint 1:12

Da nug mehqak kobolnu mattimi amu, da imunu ami. Ag oh ameg piɗe piɗe oppatna daanna, nai aeg ona aeg dotte. Ag anam henana amu, laa nug, “Da am Pol dim lamidttem,” awa aawo, laa nug, “Da Apolos dim lamidttem,” awa atte. Amu laa nug, “Da am Pita dim lamidttem,” awa aawo, laa nug, “Da am Kristus dim lamidttem,” awa atte.

Matyu 25:34

Anam maattoya, da king daattem amunu, da danab ah naɗiap-ppa maadmi ele amelagppa akkul. ‘Ag inam doig! Mame Nug ag itittak ena mattom! Da Mamel Nug ɗo maɗoɗ ahilagnu haen wan bau beebe babaitta mattom.

Rom 2:7

Danab laala ag binag amahlak oppiaawak ele, bau hanhan dayak, binag ele mattinna, kobol tutukku hetteb amu, geha Kayak Nug danab amu bauklel hanhannu madakku.

1 Korint 6:9

Ag imu iite dootteb? Danab ag nau hetteb ele amu, ag Kayaknu ɗo maɗoɗ ooppa ii daamna. Na nakka nahipnu aib hambuppume. Aun aɗi ag gappai hetteb, o aun aɗi ag kayak hambuppuak binalag metteb, o aun aɗi ag ewau pakkua gappai hak danab daatteb, o aun aɗi ag danab danabib, o ah ahib gappai aɗatteb,

1 Korint 6:10

o aun aɗi ag yabhak kobol hetteb, o aun aɗi ag baubau awaknu hik qak kobol dim lamidtteb, o aun aɗi ag le ɠagattag laeg, kaaka aqatte, o aun aɗi ag baeg qak nai maditteb, o aun aun aɗi ag nai ittag ele mattinna yabhoi hak danab daatteb amu, danab ah amu ag oh Kayaknu ɗo maɗoɗ ooppa ii daamna.

1 Korint 15:42

Anam amunu, danab mauhppig eɗun hippaidkkulag amu, kobol anamib aakku; ⌊beɗu dayom bia ii daama⌋. Beɗu ig boumttem am nauhtte; beɗu Kayak heeb eɗua hippaidkku amu, amuam ii nauhma.

1 Korint 15:44

Beɗu ig boumttem, nug amu wanppanu. Beɗu Kayak he eɗua hippaidtte amu, amuam hab aabppanu. Am wanppan beɗu genab daatte dayeb amu, hab aabppanu beɗu ele aakku genab daatte.

2 Timoti 4:18

Ao, Naɗi Nug laa dilag eheɗ hak ohppanu eɗua awiɗa, da nuhig hab aabppan ɗo maɗoɗppa daakkulnu Nug ena omaiɗa, appa gokku. Binag amahlak oppiaawak ele hanhan alet ele nuhigppa dayaɗ! Genab.