Efesios 6:6 - Txa²wã¹sũ̱³na² Wãn³txa²

⁶ Ĩ²nx2ti³hĩ¹na² so¹lxi³ wi¹wa³kon³yah³lxi³txa³hẽ¹la². Ĩ²nx2ti³xa³kxan²ti³ wi¹wa³kon³jah¹lxi³hẽ¹la². A²nũ²a² so¹lxi³ ĩ³wi¹lxon³kxi²sih¹nx2ti³jau³nũ³su² nxe³yah³lxi³txa³hẽ¹la². Yxãn¹ta¹ Kris²tu³jah¹la² a²wa³kxẽn³yah³lo²lot3jah³lxi¹nha²kxai³ wxa²ẽ¹nãu³ai²na²: — Wain³txi³ kãi³a¹tũ¹xã¹. Txa²wã¹sũ̱³na² a²ten³ju³ta³nũ³a² so¹lxi³ kãi³a¹tũ¹xã¹. Nxe³yah³lxin¹jau³su² nxe³jah³lxi³hẽ¹la².

Efesios 6:6 Referans Kwoze

1 Tesalonisẽnses 2:4

Nxe³yãn¹ta¹ kã³nxai³kai³lu² Txa²wã¹sũ̱³na² hi²sen³su² ĩ²sxã³ sa²so¹sa²sĩn¹te³nah¹lxi¹: — Wxãi²na² txa²wãn³txa² wi¹jau³xa² ĩ³yau¹ũ¹sih¹nx2tai¹na¹jau³su² ĩ³sa²si¹hã³nx2ta¹tu¹wi¹. Sain¹sĩ¹nha²kxai³ Sũ̱³na² wãn³txa² so¹lxi³ ĩ³yau¹ũ¹nx2ti³sĩ¹na¹tai¹ti²tu³wa². Txa²wã¹sũ̱³na² wi¹lĩ²sa²sĩn¹ju³ta² so¹lxi³ ten³sa²sĩ¹nha²kxai³ a²nũ²a² so¹lxi³ kwa² ĩ³wi¹lxo³kxi²sain¹sĩn¹ju³ta³la³ ten³sa²sĩ¹nxa³ha²kxai³ sĩ¹na¹hẽ³la², Txa²wã¹sũ̱³na² hi²sen³su² txa²wã¹ẽ¹nãu³ai²nãn¹jau³xa² ĩ³ye³sxã³ ĩ³sai¹ki̱³sxa³jau³xa² a³la³kxi²nẽ³lha²kxai³la².

Kálatas 1:10

Jã¹nxa¹jut3su² a²nũ²a² so¹lxi³ wi¹le³kxi²sain¹ju³ta² ten³sa²nxa³nha²wa². Hãi¹sxã³ Txa²wã¹sũ̱³na² wi¹le³kxi²sa²ju³ta² ten³sa³nha²wa². Te²yã¹nxe³sxã³ a²nũ²a² so¹lxi³ wi¹lxo³kxai¹na¹kxe³su² kãi³a¹kxai²nãn²tu̱³ wai³nhĩ̱³nx2nxa³wa². Kris²tu³jah¹la² so¹lxi³ wi¹lxo³kxai¹na¹kxe³su² kãi³a¹kxai²nãn²tu̱³ wai³nhĩ̱³nx2na³la². Nxe³na¹kxai²nãn²tu̱³ Kris²tu³jah¹lai²na² wãn³txa² a²wa³ka³li³lot3sxã³ yxau²xai³lhĩ̱³na¹wa².

Efesios 5:17

Kwa²toh³lxa³ti³su² yah³lxi³txa³hẽ¹la². Txa²wã¹hxi²kan¹ta² Si³yxau³jah¹lai²na² ten³sih¹nxa²ti³jau³su² a³la³kxi¹jxah³lxi³hẽ¹la².

1 Petro 4:2

Nxe³ha²kxai³, yuh³xai²nãn¹ta³ko³xai²na² yxau²xai³yah³lxi¹nhĩ¹nãn¹te²ka³ya̱³tu̱³, Txa²wã¹sũ̱³na² a²ẽ¹nãu³a¹ ten³jau³xa² so¹lxi³ ĩ³hau³ko³tũh¹sxã³ yxau²xai³jah¹lxi³hẽ¹la². Hai³txi³ wxa²sĩ̱³nãu³ai²na² ko̱³nxe³thin¹yah³lxin¹jau³la³ yxau²xai³yah³lxi³txa³hẽ¹la².

Filipẽnses 2:12

Jã¹nxa¹jut3su² ain³kxi²sah¹lxi³hẽ¹la². A³lxi¹nx2ta¹wa². A²kxã³nxa² yxau³ya³nhẽ³lhĩ¹nai³tã² txa²wãn³txa² wain³txi³ sa²yxo²wet1sah³lxin¹tai¹ti²tu³wa². Te²yã¹nxe³sxã³ u²lyxau³na¹tãu³a² kxan²ti³ sa²yxo²wet1sah¹lxi³hẽ¹la². òla² kãi²non³sxã³ Kris²tu³jah¹lai²na² wãn³txa² sa²yxo²we¹jah¹lxi³hẽ¹la². Txa²wã¹sũ̱³na² sa²nẽn¹kxi²yah³lxin¹ju³ta² so¹lxi³ kãi³jah¹lxi³hẽ¹la². Ko̱³nxe³ti³ kãi³yah³lxin¹kxa²ya̱n³txi³su² wi¹lĩ²jah¹lxi³hẽ¹la².

Mateus 12:50

Nxe³sxã³ a²nũ²a² ĩ²li³te²na² sa²kxai³lu² Txa²wĩ³na² Oh³nãn¹jah¹a² Si³yxau³jah¹lai²na² a²ten³jau³su² sa²yxo²wet1sxã³ kãi³kxai²nãn²tu̱³ nxe³te²nãn²tu̱³ txa²hã³ka³nũ²su² ha²kxai³ txa²lon³ti³tãu³su² ha²kxai³ ne³te²sain¹na³li¹. Je³su²jah³la² ta¹hxai²hẽ¹la².

Ebreus 13:21

A²nxe³jah¹lo²su² Txa²wã¹sũ̱³na² Si³yxau³jah¹la² ĩ³hxi²ka¹txa²lxi³ju³ta² ten³sa³nha²wa². A²ten³kxi³su² wi¹lhin¹sxã³ sa²yxo²we¹jah³lxin¹kxi³nũ³a² ĩ³hxi²ka¹txa²lxi³ju³ta³nũ³a² ten³sa³nha²wa². A²nxe³sxã³ Kris²tu³jah¹lai²na² hxi²ka² nxe²kãi³ya³nhẽ³tu¹wa². Nxe²kãi³ya³nhẽ³kxai²nãn²tu̱³ Je³su² Kris²tu³jah¹la² ĩ³sa²nẽn¹kxi²sxã³ yxau³ki̱³tu¹wa².

Ebreus 10:36

Ya³nãn³ta³ki²la²sxã³ wahx3nxe³jah³lxi³hẽ¹la². Nxe³sxã³ Txa²wã¹sũ̱³na² a²ten³ju³ta² sa²yxo²we¹jah¹lxi³hẽ¹la². Nxe³yah³lxin¹kxai²nãn²tu̱³ yen³kxi³nũ³a² au³ũ¹nx2ti³jau³xai³tã² ũ³hũ¹nx2ti³tu¹wa², Txa²wã¹sũ̱³na²sa³.

Kolosẽnses 1:9

Nxe³sa²sĩn¹jau³xa² ain³kxi¹nx2ti³sĩ¹na¹hĩ¹nãn¹ju³tu̱³, hu³ wxa²ha³lo²a² sa²hau³ko³tũh¹nx2ti³si¹nha¹jau³nũ³su², Txa²wã¹sũ̱³na² ha³tin³ti³ ĩ³ye³kxi²to³sĩ¹na¹hẽ³la². Nxe³sĩ¹na¹te³nah¹lxi¹: — Sũ̱³na², nxet3sĩ¹lxi¹. Nũ¹ãn¹tũ̱³ka̱³txa² Ko³lo³sẽ²sa³ nũ̱³ka̱³txa² sa²hau³ko³tain¹sxã³, Wxa²yãu³ka³jxah¹la² wi¹lhin¹jah¹la² ã³nxũ²kwa̱i³wi¹sxã³ yxau³ai¹nhĩn¹ka³tu̱³ kãin² a³la³kxi²ti³hi¹txain¹sĩ¹nhẽ³li¹. Ain¹nhĩn¹kxai²nãn²tu̱³ Txa²sũ̱³nu² ĩ̱³nxai²na² wxa²ẽ¹nãn¹jau³xa² a̱u³txi³ ain³nha²nhĩn¹jau³xa² a²ten³nhĩn¹jau³xa² ta³nxũ̱¹ka̱³txai²na² a³la³kxi²ti³hi¹ta³lu²ni² wi¹ko̱³nha²ti³hi¹ta³lu²ni² nxe³txain¹sĩ¹nhẽ³li¹. Nxe³to³sĩ¹na¹hẽ³la².

Mateus 7:21

A²nũ²a² ĩ²li³te²a² hxi²kan¹txi³ Txa²wã¹sũ̱³na² A²hxi²kan¹ta² Si³yxau³tãu³lot3ju³ta³nũ³a² yxau²xai³lai¹nxa³lho³li¹. Nxe²e³kxain¹kxan²ti³: “Nxe³sa¹lxi¹. Txa²hxi²kan¹jah¹lo²si¹lxi¹.” Nxe²e³kxi²kxan²ti³nũ¹ Txa²wã¹sũ̱³na² A²hxi²kan¹ta² Si³yxau³tãu³lot3ju³ta³nũ³a² yxau²xai³lai¹nxa³lho³li¹. Yxãn¹ta¹ Txa²wĩ³na² Oh³nãn¹jah¹la² Si³yxau³jah¹lai²na² a²ten³jau³su² sa²yxo²we¹kxai²nãn²tu̱³ nxe³te²na² ĩ²li³te²la³ oh³nãn¹ko³nãu³a² ã³wih¹tu¹wi¹.

1 Joãu 2:17

Nxe³kxe³su² ko̱³nxe³ti³ kãi³ain¹tũ̱³ka̱³txai²na² yxau²xai³lain¹ju³ta² hxa³ni² ya³ni̱³lain¹ju³ta² hxa³ni² nxe³tu¹wa². Nxe³to³ta¹ Txa²wã¹sũ̱³na² a²ten³jau³xa² sa²yxo²we¹te²su² te²an²tu̱³ hxa³nxa³kxe³su² yxau²xai³lain¹tu¹wa².

Romanos 6:17

Yxãn¹ta¹, ti³he¹nx2nxa³wa². Txa²wã¹sũ̱³na² ka³li³si¹nhẽ³na³la². Nxe³si¹nhẽ³jau³xa²sa¹: wxa²yu³ta², kxãn³su² wxa²ko̱³nxe³ti³ kãi³yah³lxin¹ju³ta³lot3sxã³, yxau²xai³yah³lxi³ta¹hxai¹nhẽ¹la². Yah³lxin¹ta¹: — A²hĩ¹nai²na² Txa²wã¹sũ̱³na² wãn³txa² wi¹jau³xa² a²ya³la³tu̱³jau³xa² ĩ³yau¹ũ³nx2ti³sĩ¹na¹jau³xa² ain³kxi²so¹sxã³, a̱u³txi³ wxa²ẽ¹nãu³a¹ whãi²na¹ sa²kxai³lu² ten³khai¹nxe³sa²tu̱n³nhã¹. Nxe³sxã³ sa²yxo²we¹jah³lxi³ta¹hxain¹ti³ai¹ti²tu³wa².

Kolosẽnses 4:12

Jã¹nxe³sxã³ E³pa²frah³la² wxa²nũ̱³ka̱³txi³sain¹nũ³nha²kxai³, Je³su² Kris²tu³jah¹la² wa³ka³li³yu³ta³lot3jah¹lo²su² nx2na³la². A²nxe³jah¹la² ĩ³hen³txi³nx2ti³nũn³na³la². A²nxe³jah¹lai²na² Txa²wã¹sũ̱³na² ha³tin³ti³ ã³nxũ²kwa̱i³lxũ¹ti³nha²sxã³ ĩ³ye³kxi²te³nah¹lxi¹: — Sũ̱³na² nxe³ti¹. Ko³lo³sẽ²sa³ nũ̱³ka̱³txai²na² wxa²ẽ¹nãn¹jau³xa² kan²txi³ yxo²ĩ²sxã³ a³la³kxi²ta³lun²sxã³ sa²yxo²we¹ta³lu²ni² wa³nũn³ta³ki²la² wi¹lhin¹khai¹nxe² nxe² yxau²xai³lain¹ju³ta³nũ³a² ti³hi¹txai¹nhẽ³li¹. Nxe³nx2ti³to³hxai²na²hẽ³la².

1 Petro 2:15

Yah³lxin¹kxai²nãn²tu̱³, wi¹kãi³yah³lxin¹kxai²nãn²tu̱³, a²nũ²a² Txa²wã¹sũ̱³na² wãn³txa² sa²yxo²ã³ain¹tũ̱³ka̱³txa²: — Ko̱³nxe³ti³hit1sxã³ ĩ³ye³kxi²na¹tũ¹xã¹. Nxe³kxi¹nx2ti³kxa² ha³ta̱³nxãn²txi³, wxa²wain³txi³ kãi³yah³lxin¹ju³ta² ĩ²so¹nx2ti³kxai²nãn²tu̱³, hãi¹nxe² ã³ka³nah²nxe³sxã³ yxau³ya³nx2ti³hĩ̱³nx2na³la².

1 Tesalonisẽnses 4:3

A²nxe³jau³xai²na² Txa²wã¹sũ̱³na² a²ten³jau³xai²la¹wa². Nxe³te³nah¹lxi¹: — Txa²wãn³txa² yxo²ha³kxa¹ wi¹lĩ²nha²sxã³ sa²yxo²we¹thxa³jah¹lxi³hẽ¹li¹. Ko̱³nxe³thin¹sxã³ ũ³whĩn¹ta³kxi²nyhu¹ah³lxin¹ju³ta² ã³na¹hxa³jah¹lxi³hẽ¹li¹. Nxe³nx2tain¹na³la².

Markos 3:35

A²nũ²a² a²ten³te² ten³jau³su² te²an²tu̱³ Txa²wã¹sũ̱³na² a²ten³jau³su² sa²yxo²wet1sxã³ kãi³kxai²nãn²tu̱³ a²nxe³te²su² te²he³la³ku³ txa²lon³su² nxe³ha²kxai³ txa²ha³lĩ³ti³su² nxe³ha²kxai³ txa²hã³ka³nu²su² nxe³ha²kxai³ nxe³te²sain¹na³li¹. Ta¹hxai²hẽ¹la².

1 Korĩntios 7:22

Nxe³sxã³ kwa²wa³ka³li³lo³te²su² te²a² Txa²wã¹sũ̱³na² wãn³txa² yxo²ĩ² ã³si³wxe³kxai²nãn²tu̱³ nxe³hĩ¹nãn¹te²tu̱³ a²ẽ¹nãu³ai²na² ã³wa²sut1sxã³ yxau³hĩ̱³nx2na³la². Te²yã¹nxe³sxã³ a²nũ²a² ã̱³xa² ã³wa²sut1sxã³ yxau³jah¹lai²na² sa²kxai³lu² Kris²tu³jah¹lai²na² wãn³txa² yxo²ĩ² ã³si³wxe³kxai²nãn²tu̱³ Kris²tu³jah¹la² kwa²wa³ka³li³lot3sxã³ o²la³kxi²jah¹la² yã¹nx2na³la².