Yela 119:1 - mzwDBL

¹ Nɛra ba we-ɛɛla aa toɡra, baa teŋɛ Korowii Mmarare ta la, ba na som.

Yela 119:1 Referans Kwoze

Amanesoma Luk Aa Chwera Tɔn 11:28

Anee Yeesu ŋɔ, “Nɛra baa dɛ no Korowii Waa dɛɛ teŋɛ a ta laanee na som.”

Ɛsekeɛl 11:20

Ásɛ baa teŋɛ me Mmarare ne n waa ta kɛrɛdɛ. Mɛɛ kpɔ baa ɛ n nɛra, ásɛ n ɛ Korowii baa dɛɛ tom mɛ.

Jems 1:25

Korowii Mmara wer kɛrɛdɛ, o ɡelɔ yaa dɔ ya te, waa yaa vɔrɔwe. Nomɛlbwa waa dɛ no dɛɛ pese o bini, waa wola soh dɛɛ ɛ ɡɛ waa baɡla la, Korowii ɛɛ swee andɛɛɡa tɛ naate o we-ɛɛla bwa ta.

Yela 128:1

Nɛra baa dɛ ɔmɛ Korowii, dɛɛ teŋɛ o Mmarare ta la, ba na som.

Amanesoma Jɔn Aa Chwera Tɔn 13:17

Dɛ he jemɛ ɡɛ waa nɔ dɛɛ ɛa ɡe te naa, hɛɛ na somee.

Amanesoma Luk Aa Chwera Tɔn 1:6

Dɛ ɡɛ nɛra banɛ nɔ bwa ɛ nɛndɛɛɡa ba waa aa su Korowii siwi, baa no Korowii wa, dɛɛ teŋɛ a bwa ta kɛrɛdɛ.

Yela 112:1

Hé kpɛɛ Korowii! Nomɛlbwa waa dɛ tomɛ Korowii, o sie ɛɛ lɛ o Mmarare ta kohona la, o na som.

Sɛɡla 11:20

Korowii kii nɛn o liire aa wola were, o sie dɛ lɛ nɛn o we-ɛɛla aa wera nɛ.

We-ɛɛla 24:16

N jemɔ kɛŋɔ Korowii ɛɛ ba bol nɛwɛnyina bwa waa dɛ́ pa bole. Anomanta, n dɛ ɛ n wobɛlbwa naa, n dɛ ɛa kɛrɛdɛ dɛ bɛ bolchɔɡe di Korowii ne nɛwɛnyina bwa be.

Yela 101:2

Mɛɛ dɛɛ nyiŋi n we-ɛɛla bini kɛrɛdɛɛ. Saŋ besoo he ba cha mɛ nɔ? Mɛɛ kpɔ bambidɛɛɡee so n dem,

Hosia 14:9

Umee wejereme ɔ? Naate ɛɛ jemɛ waa nɔɔ. Umee dɛɛ pese waɔ? Naate ɛɛ no a munii. Korowii ŋwɛnɛre toɡrɔ, nɛra ba wa aa toɡra dɛ teŋɛ a ta, kɛ deŋnekpeɡ tena dɛ lɔ naa a ta.

Wepila 22:14

Nɛra baa chɛɡɛ ba laala a do wer la na som, dɛkalkɛŋɔ banee dɛ́ won dɔ Mkpa Daa la nɔna di, dɛ́ won kpɔ doonyoone la ta ba tetoora dɛ́ɛ jo bwɛjen la ta.

Yela 101:6

Mɛɛ ɡeloo n sie do n nɛra Israel tena ba wa aa dɔ kasinteŋ la nɛ, ásɛ n ne ba pɛ so n koodem. Nɛra ba wa aa wera kɛrɛdɛ laanee mɛɛ ba ɡela baa tom mɛ.

2 Kɔrent 1:12

Webeŋkpoŋii ɡela ya baŋa pa. Anee kɛŋɔ yaa wonoo ŋɔ bambile bwa ne kɛŋɔ wobɛlbwa yaa ɛa harɛ bonɔ la, tepoŋ ne bambile bwa nee ya ɛa Korowii ŋwɛnɛ ta, a laa kɛ waa yaa ɛa he be la. Korowiirii sune ya nɛɛ dɛ cha yaa ya ɛa. Harɛ bonɔ wejema ne laa ya ɛa.

Amanesoma Jɔn Aa Chwera Tɔn 1:47

Yeesu aa na Nataaneɛl wɛɛ ba o be la, o ŋɔ, “Israel te tentenee nɔ. O waa dɔ kasinteŋ kɛrɛdɛ!”

Job Tɔn 1:8

Korowii ŋɔ o be ŋɔ, “Ɛrɛɛ he na n bonɔɔ Job waɔ? Nomɛlbwa toole o waa toɡre kɛ on harɛ nɔ ta, wechɔɡe bɛlbwa toole o nɛ, o dɛ tom mɛ, o laa o te dɛɛ kpɔ wechɔɡa ta.”

Job Tɔn 1:1

Baa bɛl fa lole, o sɔne Job, dɛ do harɛ bɛl ta baa yerɛ bela Us. Wobɛlbwa toole o nɛ, o waa toɡre. O dɛ tomɛ Korowii, dɛ laa o te dɛɛ kpɔ wechɔɡa ta.

2 Koranar 20:3

“N Naa Korowii, n poori, lii ɡɛ maa ta tea bwa tɛɛ, dɛ tomɛ kasinteŋ ne, dɛ ɛ waa haa dɛ nyin.” Dɛ wi lokua ne kohona.

Sɛɡla 13:6

Nɛn wedɛɛɡa ɛɛ dɛ chao o soɡa bini, asɛ nyubinikpeɡ ɡe ɛɛ chɔɡ wechɔɡ-ɛɛra.

2 Samoɛl 22:22

N dɛ teŋɛ Korowii Mmarare la ta, n ta habɔɔ berɛ kpo Korowii maa dɛ tomɔ la.

Sɛɡla 29:18

Harɛ o nɛra aa wola Korowii waa kpɔe dawɛ ba nɛɛ la, bɛlbwa dɛ ɛ ɡɛ waa dɛ nyin, kɛ nɛra baa dɛ teŋɛ o Mmara ta la, ba na som.