Jeremia 23:16 - mzwDBL

¹⁶ Waa Koranar Bwa Kooro aa dɛ bol laanee nɔ. “He bɛ waa keamere la aa dɛ bol he be la no, ba dɛ chɔɡ he liire, hwɛɡa bɛlbwa toole a ta. Anɔ la baa liira ɡboo ba na chaahna ta dɛɛ baɡle, waa men Korowii aa bola laa.

Jeremia 23:16 Referans Kwoze

Jeremia 14:14

Belaa Korowii ŋɔ n be ŋɔ, “Keamere la teŋe nyosone dɛɛ bol wa n sɔn ta. N ta ban tomɛ kɛɛ dɛ lee ba, n ta wobɛlbwa ɡe bolɛ ba be. Waa baa dɛ na chaahna ta, ne anɔ la aa chiɡ kerekere, dɛ voɡa toma waa baa dɛ bol la bwa ɛ waa ba ɡbaɡba aa liira.

Ɛsekeɛl 13:6

Ba wepila ne ba nyosonwaa baa ŋɔa aa bao kerekere la bwa ɛ nyosone, ba ŋɔ men Korowiirii bola, dɛ n laa tom ba, dɛ ta ɛɛ nyiŋi kɛŋɔ anɔ la baa bola la ɛɛ ɛo.

Matiu 7:15

Hɛ́ɛ nyiŋi nyosonteŋna baa ŋɔa Korowii keameree ban la kɛrɛdɛ. He na ba aa, ba pwɛre kɛŋɔ peera ken. Kɛ ba bini te, ba sie beɡre kwaa kɛ ɡboli ken.

Ɛsekeɛl 13:3

Nemenɛ Korowii ŋɔ, “Keame ɡɛna la bwɛɛlɛ. Ba cheɡɛ ba ɡbaɡba wejema ta, dɛ ŋɔ ba dɛ na chaahna, dɛ ba ta wobɛlbwa nae.

1 Jɔn 4:1

Yabala, he bɛ nɛra baa ŋɔa ba dɔ Korowii Domadɛɛɡe la, dɛ che o ta dɛɛ baɡle waa la dɛɛ yarada warawara. Hé pese ba, dɛ́ na kɛŋɔ kpeɡri baa dɔa la le Korowii Domadɛɛɡe la be kɛɛ? Dɛkalkɛŋɔ nɛra baa dɛ neɡre nɛra kɛŋɔ ba ɛ Korowii keamere ba harɛ nɔ ta bobɛlbwa pirim.

Jeremia 23:21

N laa tomɛ ɡɛ keamere nɔ, kɛ ane a bwa, dɛ ba iro dɛ kaa. N ta ŋɔe ba ka bol wobɛlbwa, kɛ ba cheɡɛ n sɔn ta kaa bol wa.

2 Koranar 17:15

Ba vɛh waa Korowii aa do ba a ta la, dɛ vɛh fɔo o ne ba naawa aa fɔwa, ne kaeh waa kah ba la. Ba teŋɛ voɡa aa ɛ konsale nɛ, dɛ ɡbabir ɡe ɛ nɛnsale. Ba chaa harɛre aa bar ba la nɛra nawee we-ɛɛla, dɛ kpɔ ba da. Dɛ Korowii ŋɔ ba be ŋɔ, “He bɛ ɡɛ baa dɛ ɛ la ɛ.” Kɛ ba ɡarɔ ɛ ɡɛ Korowii aa kah ba ŋɔ ba bɛ ɛ la.

Maeka 2:11

Nɛra nɔ dɛ nyin keame waa teŋe nyosone ŋɔ, ‘Mɛɛ ɡeloo sene bwa soo siwi bu he nyɔ dɛ́ dɛɛ.’

Jeremia 23:26

Saŋ besoo a ɡɛ keamere nyosonteŋna baa cheɡɛ ba ɡbabir liire ta dɛɛ baɡle waa nɔ ɛɛ ba ɡela ɔ?

Ɛsekeɛl 22:28

Ba keamechɔɡa laa sie kpɔ ɡɛ wechɔɡa nɔ ta, kɛŋɔ baa kpɔ fula lɔ dekɔɔh danjwɛ ta, dɛ tɔ o peɡra ta ken. Ba won nyosone teŋa ŋɔ ba na waane wepila ta, dɛɛ baɡle ŋɔ waane ɛɛ bao, dɛɛ neɡre nɛra ŋɔ men Nemenɛ Korowii bee a le, dɛ n laa bol wobɛlbwa.

Ɛsekeɛl 13:23

Haa wepila ne nyosonwaa aa dɛ ba bala laanee na kpa. Mɛɛ lɛ n nɛraa le he nɔn ta, ásɛ he jemɛ kɛŋɔ menee Korowii.’ ”

Ɛsekeɛl 13:16

Israel harɛ keamere la ŋɔ deŋnesɔɔhna lɔ Jerusalam, kɛ dɛ deŋnesɔɔhna ɡe toole. Men Nemenɛ Korowiirii bola.’ ”

Jeremia 29:8

Men Koranar Bwa Kooro, Israel tena aa dɛ tom mɛ dɛ́ kah heyaa ásɛ he bɛ ɡel keame nyosonteŋna ne voɡra baa soɡe he bini la ɛɛ neɡre heya. He bɛ wepila baa ŋɔa ba dɛ na la yarada.

Jeremia 9:20

Belaa Jeremia ŋɔ, “Haahna, hé cheɡ deŋne Korowii be, dɛ́ɛ no waa waa dɛ bol. Hé chaɡle he bihaahna ɡɛ baa dɛ wi, ne he daamanar ɡɛ baa dɛ taa wiile.

Jeremia 2:5

Waa Korowii aa dɛ bol laanee nɔ, “Bɔkwa waa n ne he naawa dɔ, asɛ ba vɛɛh mɛ dɛ berɛ habɔɔ kpo mɛ nɔɔ? Ba teŋɛ voɡa aa wola tɔnɔ dɔe nɛɛ dɛ berɛ nɛnsale.

Sɛɡla 19:27

N bie, he dɛ vɛh waa baa dɛ doe a ta hwela aa, hɛɛ le wejema ŋwɛnɛ taa.

Tɔn Pɔɔl Aa Chwerɛ Rom Tena 1:21

Nɛwɛnyini jemɔ kɛŋɔ Korowii lole, kɛ baa on duu ɡɛ aa chɛ kɛ baa duuru. Baa jam kpɔe dɛɛ tɛo. Nɛwɛnyini wechɔɡa ɡelɔ ba wili, ba ta liire dɔe kpa.

Jeremia 9:12

Asɛ n bɔɔ ŋɔ, “N Naa Korowii, umee dɔ wejema kohona dɛ́ won no waa nɔ mun ɔ? Umee he le ŋɔ ó won baɡle a bini nɔ? Bɔkwa waa harɛ nɔ chɔ pɛɛ kɛŋɔ pua hɛŋle ɡbo harɛ nɛra aa wola o ta kpɔ kpa nɔɔ?”

Wiile 2:9

Bwɛjen la doonyojena choɡlo dɛ huɡe harɛ, bune baa kpɔa dɛɛ kaɡra ɡe kuuɡi dɛ chɔɡ. Ba lawɛ o koranar ne nomonjena bwa laa ta kaa harɛfala ta. Sɔfore aa nɛra Korowii waa baɡle, asɛ Korowii keamere ɡe aa won wepila na dɛɛ le Korowii be kpa.

1 Koranar 22:11

Korowii keamere la bini bɛlee Kenaana bibaa Sedekia. O kpɔ bune ɛ kwaane a do kɛ nyeɡlare. O ŋɔ Kooro Ahab be ŋɔ, “Waa Korowii aa dɛ bol laanee nɔ. ‘Kwaa nɔɔ hɛɛ ba kpɔe yo Siiria tena, dɛ́ pɔ ba nɛ.’ ”

2 Webena 18:5

Anomanta, Kooro Ahab yerɛ Korowii keamere lafraanaarɛ, dɛ kpɔ bil ba sie ŋɔ, “Ń ka yo Ramɔt Gelead tena kɛɛ ń ɡel ɔ?” Ba ŋɔ, “La ka yoo ba, Korowii ɛɛ kpɔ baa do he nɔn taa.”

Jeremia 29:23

Dɛkalkɛ ba ɛ wedoŋa tenten Israel harɛ ta, ba dɛ nyin ba bala haahna, dɛ che n sɔn ta teŋe nyosone, a ɛ waa maa wola ban a ta doe. N jemɛ a bwa dɛɛ di a danseɛ. Men Korowiirii bola.’ ”