Tito 2:11 - Mixteco Metlatónoc

¹¹ Ra ña kuni Tata yo Ndioxi ke na kaku takundiꞌi va yuvi, ra xaꞌa ña ke ndañaꞌa ra ña kundaꞌvi ni ini ra xini ra yoo va.

Tito 2:11 Referans Kwoze

1 Timoteo 2:4

chi ña kuni ra kan ke na kaku takundiꞌi va yuvi, ra kandixa tu na tuꞌun ña ndaa va.

Efesios 2:8

Ra xiꞌin ña yoꞌo ke kundaa kaxi ini yo, ña ndikaku yo xaꞌa ña ndaꞌvi ni ini Ndioxi va, xaꞌa ña ndakundiaa ini yo Jesucristo. Ra ndia nii chiñu ndïxa yo xaꞌa ña, chi mii va Ndioxi kuvi ra saniꞌi ña yoo.

Hebreos 2:9

Ndi su kundaa va ini yo ña xiin va Tata yo Jesucristo xa ninu ra mii ra nuu na tatun Tata yo Ndioxi kii ña xitiaku ra nuu ñuꞌu yoꞌo. Ra xaꞌa ña kuꞌvi ini Tata yo Ndioxi xini ra na yuuvi yoꞌo va kuvi ña tiꞌvi ra Tata yo Jesucristo ña kixi ra ndixiꞌi ra xaꞌa takundiꞌi va yuvi; ndi su sandatiaku va Tata yo Ndioxi ra, ra taxi ni ra ña toꞌo, xiꞌin ña kaꞌnu ndaꞌa ra.

Efesios 2:5

ña kan ke vaꞌa ni xa na ndii va xikuu yo xaꞌa kuachi yo, ra ndïxa ra xaꞌa vi ña, chi taxi va ra ña kutiaku yo ta sandatiaku ra Cristo tiañu na ndii. Ra xaꞌa ña ndaꞌvi ini Ndioxi va kuvi ña ndikaku yo.

2 Tesalonicenses 2:16

Ra mii Tata yo Jesucristo xiꞌin Tata yo Ndioxi kuvi ra kuꞌvi ni ini xini yoo xiꞌin ña ndaꞌvi ini ña kuu mii ra, ra taxi ra tuꞌun ndiee ini ña kuëe ndiꞌi xaꞌa ndaꞌa yo, ra ndiniꞌi tu yo iin ña vaꞌa, ña kuu ña ndiaa ini va yo ra.

Romanos 5:15

Ra inüu vi kuachi ña xa ra Adán xiꞌin ña vaꞌa ña ^saniꞌi Ndioxi yoo, saa chi xaꞌa kuachi indaa ra Adán, ra kuaꞌa ni va yuvi ndixiꞌi. Ndi su chee ni ka va ña vaꞌa ña xa Ndioxi, saa chi xaꞌa indaa Jesucristo, ra kuaꞌa ni ka va yuvi ^niꞌi ña vaꞌa.

San Juan 1:14

Ra ña kuu tuꞌun kan ke nduu iin tiaa va, ra ra kan kuvi ra kixi ndixiyo nuu ña yuuvi yoꞌo va. Ra xini nuu va ndi ndiee ña taxi iva ra ndaꞌa ra, ña kuu ra ra mituꞌun, ra ndañaꞌa ra mii ra nuu ndi ña kuu ra ra ndaa, ra kuꞌvi ni ini ra xini ra yoo.

Hechos 11:23

Ra te ndixaa ra Bernabé ñuu kan, saa xini ra ña vaꞌa ña kaꞌnu xa Ndioxi xiꞌin na, saa ra kusii ni ini ra. Ra ndikaꞌan ra xiꞌin na, ña na ndakundiee ni ka na chikaa na ndiee ña kundikun Jesús xiꞌin ndinuni nima na, kachi ra xiꞌin na.

Hechos 20:24

Ndi su ndia nii ñaꞌa ke ndiꞌi ini yu xaꞌa vi, ra nii ña tiaku tu yu ke xäku ndiaa vi yu, chi ña kuni yu ke na ndakundiee ka yu xiꞌin ña kusii ini yu ña sandiꞌi yu chiñu ña taxi Tata yo Jesús ndaꞌa va yu, ña na ndakani yu nuu yuvi xaꞌa ña kuꞌvi ni ini Ndioxi xini ra na.

San Lucas 3:6

Ra kuni takundiꞌi va yuvi ra xaa sakaku na yuuvi yoꞌo”, ^kachi ña tiaa ra Isaías.

1 Timoteo 1:14

Ra ña yoꞌo ke xa Tata yo Jesucristo xiꞌin yu ña kundaꞌvi ni ini ra xini ra yuꞌu, ra taxi tu ra ndiee yu ña na kondiaa ni ini va yu ra, ra taxi tu ra ña kuꞌvi ini ña iyoo nuu va ra ndaꞌa yu, ra ña kuꞌvi ini yoꞌo ra xaꞌa ña xa nduu yo iin xiꞌin va ra ke taxi ra ña ndaꞌa yo.

Romanos 5:2

Ra xaꞌa ña ndiaa ini yo Jesucristo kuvi tu ña xa ra ña vaꞌa xiꞌin yo ña sanduyachin ra yoo nuu Ndioxi, ra iyoo yo xiꞌin ra iin takundiꞌi kii, ra xaꞌa ña kan va ke ^kusii ni ini yo, chi vichin ra kundaa kaxi va ini yo, ña kuni yo ña kaꞌnu kuu mii Ndioxi, kii ña vaxi.

Colosenses 1:6

Ra tuꞌun vaꞌa xaꞌa Tata yo Jesucristo ña xini soꞌo ndo yoꞌo, ra xa iinii kuvi va nuu ña yuuvi ndutia ndoso ña kuaꞌan ña, ra vaꞌa ni xa ña xiꞌin na, saa chi ndasama va ña na. Ra mii saa kuvi tu ña kuu xiꞌin ndoꞌo va, te sakan kundaa ini ndo ña ndixa va ke kuꞌvi ni ini Tata yo Ndioxi ^xini ra ndoꞌo.

Gálatas 2:21

Ra xaꞌa ña kan ke küni yu kundasi yu ña vaꞌa, ña saniꞌi Tata yo Ndioxi yuꞌu; ra tu xaꞌa ña saxinu yo ndiayu Ndioxi ña ndakoo ra Moisés va kuvi ña, nduu yo ta kuꞌva iyoo yuvi na köo kuachi nuu Ndioxi, na kachi yo, saa ra köo yaꞌvi ndiaa vi ña ndixiꞌi Tata yo Jesucristo.

2 Corintios 6:1

Ra xaꞌa ña kuu ndi ndia xachiñu nuu Ndioxi va kuvi ña xaku ndaꞌvi ndi nuu ndo, ña vaꞌa na kundäsi ndo ña vaꞌa ña ^taxi Ndioxi ndaꞌa ndo.

Hechos 13:47

Saa chi xa saa ke iyoo chiñu ña xaꞌndia mii Tata yo Jesús nuu va ndi, ta kachi ra suꞌva: Ndoꞌo kuvi ndo taxi yu ndiayu ndaꞌa, ña kuu ndo ñùꞌù ña kutuun ndo nuu takundiꞌi yuvi na küu judío, Ra kuꞌun tu ndo kaꞌan ndoso ndo tuꞌun yu, iinii kuvi nuu ña yuuvi ña vaꞌa na kundaa ini takundiꞌi yuvi ra kaku na, kachi ra ―kachi ra Pablo xiꞌin na.

Hechos 13:43

Ra ta nindutia ndiꞌi na kee veꞌe ñuꞌu kan kuaꞌan na, ra saa ndakundikun kuaꞌa ni na judío, xiꞌin na küu judío na kandixa Ndioxi kuaꞌan na sata ra Pablo xiꞌin ra Bernabé. Ra ndikaꞌan ndia xiꞌin na ña na ndïko ini na kundikun na Ndioxi, ra xá ña vaꞌa ña kaꞌnu xiꞌin na.

San Juan 1:9

Ra ra kuu ñùꞌù ña ndixa ña tuun nuu takundiꞌi yuvi, ra xa kixi va ra nuu ña yuuvi yoꞌo.

San Lucas 24:47

ra kaꞌan ndoso na ndikun ichi ra kivi ra iinii kuvi ña yuuvi, ña vaꞌa na nandiko ini takundiꞌi yuvi xaꞌa kuachi na, ra koo kaꞌnu ini ra xaꞌa na, ra xiꞌna ka va ñuu Jerusalén ke kiꞌin na kaꞌan ndoso na kuꞌun na, kachi ña.

San Marcos 16:15

Saa ndikaꞌan ra xiꞌin ndia kachi ra saa: ―Kuaꞌan ndo iinii kuvi ña yuuvi ra kaꞌan ndoso ndo tuꞌun vaꞌa, tuꞌun Ndioxi nuu iin takundiꞌi na yuvi.

San Mateo 28:19

Ra vichin kuaꞌan ndo iinii kuvi ña yuuvi, ra sañaꞌa ndo takundiꞌi yuvi ña ndinuni ni na kundikun na yuꞌu, ra sakuchi ndo na tixi ndiee Tata yo Ndioxi, xiꞌin tixi ndiee Seꞌe ra, xiꞌin tixi ndiee Tachi Yii ra,

Hebreos 12:15

Ña kan ke na kondiaa taꞌan ni ndo, saa chi tu köo, ra iyo ni ndakïꞌin ndo ña vaꞌa ña kuni Tata yo Ndioxi taxi ra ndaꞌa ndo; ra nduu tu ndo ta kuꞌva iyoo tioꞌo iku xatu, ra küvi ka kundikun ndo Tata yo Ndioxi, ra kuaꞌa ni ndo ndiꞌi xaꞌa.

2 Timoteo 4:17

Ra vaꞌa ni saa xa va ndia, ndi su mii va Tata yo Jesucristo kuvi ra chindiee taꞌan xiꞌin yu, ra taxi tu ra ndiee va yu, ña vaꞌa ndikaꞌan ndoso yu tuꞌun vaꞌa xaꞌa ra nuu yuvi, ra takundiꞌi va yuvi na küu judío xini soꞌo ña. Ra suꞌva va ke xa Tata yo Jesucristo ña sakaku ra yuꞌu nuu ña kuvi yu, ra ndia ta kuꞌva ndoꞌo iin tiaa ra ndisaña ndaꞌa ndikaꞌa va ke ndoꞌo yu.

Colosenses 1:23

ra ña vaꞌa na xaa ndo nuu Ndioxi, ra ña xiniñuꞌu va kuvi ña ndaku ni na koo nima ndo, ña kundikun ndo Tata yo Jesucristo, ña vaꞌa na ndaköo ndo tuꞌun vaꞌa xaꞌa Tata yo Jesucristo ña xini soꞌo ndo. Ra tuꞌun vaꞌa yoꞌo, ra xa iinii kuvi va nuu ña yuuvi xini soꞌo na ña, ra suvi kuvi tu ña kaꞌan ndoso yuꞌu, ra Pablo va.

Romanos 10:18

Ra ña kan ke na ndakatuꞌun yu ndoꞌo, vichin: ¿A ndixa ndixïni soꞌo na tuꞌun Ndioxi? ¡Ndïxa! ¡*Xini va soꞌo na ña! Saa chi saa ke kachi mii tuꞌun Ndioxi ña tiaa na xinaꞌa ña kaꞌan, kachi suꞌva va: Iin takundiꞌi va nuu ña yuuvi, ^xini soꞌo na ña kaꞌan takundiꞌi ñaꞌa ña xavaꞌa Ndioxi xaꞌa ndiee ña kuu mii ra, ra kaꞌan tu ña, xiꞌin yuvi na ndee ndia nuu ndiꞌi nuu ñuꞌu va, ^kachi ña.

Hechos 17:30

Xinaꞌa ra xa ndiee ni va ini Ndioxi xaꞌa kuachi na xii xikua yo. Ndi su vichin ra ña kuni Ndioxi ke na nandiko ini takundiꞌi va yuvi na ndee iinii saa ña yuuvi ra kandixa na ra, ra kaku na.

2 Timoteo 1:10

Ra vichin, xiꞌin ña xa Tata yo Jesucristo ña kixi ra sakaku ra yoo va kuvi ña ndañaꞌa Tata yo Ndioxi ña ^kuꞌvi ni ini ra xini ra yoo. Ra mii va Tata yo Jesucristo kuvi ra sandiꞌi xaꞌa ndiee ña xaꞌni, ra xiꞌin tuꞌun vaꞌa xaꞌa mii va ra kuvi ña taxi ra ña tiaku yo, ra ña ^tiaku yo vichin, ra kuëe ndiꞌi ka xaꞌa ña.