San Mateo 6:2 - Mixteco Metlatónoc

² Ña kan ke te taxi ndo ñaꞌa ndaꞌa na ndaꞌvi, ra na käꞌan ndoso ndo xaꞌa ña xiꞌin takundiꞌi yuvi ña na kundaa ini na, chi saa ke ^xa inka yuvi na chiꞌña tuꞌun va, chi na kan ra iin kunani na xika na ña ndatuꞌun na xiꞌin takundiꞌi na veꞌe ñuꞌu, ra xika tu na iin takundiꞌi yaꞌya va ña ndatuꞌun na xiꞌin yuvi, ña kuni na ña vaꞌa ni na kaꞌan yuvi xaꞌa na; ra ña ndixa ke kaꞌan yu xiꞌin ndo, chi na xa saa, ra xa ña kan ke niniꞌi va na, chi köo ka ñaꞌa taxi vi Ndioxi ndaꞌa na.

San Mateo 6:2 Referans Kwoze

San Mateo 6:5

Ra saa ndikaꞌan ka ra kachi ra saa xiꞌin na: ―Te kaꞌan ndo xiꞌin Ndioxi, ra xä ndo ta xa na chiꞌña tuꞌun, chi na kan ra kutoo ni na kundita na ini veꞌe ñuꞌu nuu tuvi, ra xini sii ni tu na ña kundita na tutun yaꞌya va ña kaꞌan na xiꞌin Ndioxi, ña vaꞌa na kuni yuvi na, ra kaꞌan toꞌo ni na xaꞌa na kuni na. Ra ña ndixa kaꞌan yu xiꞌin ndo, chi na kan, ra köo ka ñaꞌa taxi Ndioxi ndaꞌa vi na, chi xa ña kan ku yaꞌvi va na.

San Mateo 6:16

Ra saa ndikaꞌan ka ra xiꞌin na kachi ra saa: ―Te iyoo suꞌun ndo ña xïxi ndo, ra na ndañäꞌa ndo mii ndo ña kuvita ini ndo ta kuꞌva xa na chiꞌña tuꞌun, chi na kan, ra iin ndanama chuun na nuu na, ña kuni na kuni yuvi ña iyoo suꞌun na ña xïxi na. Ra ña ndixa ke kaꞌan yu xiꞌin ndo, chi na xa saa kan, ra xa ña kan kuvi yaꞌvi va na, ra köo ka ñaꞌa taxi Ndioxi ndaꞌa vi na.

San Juan 5:41

’Yuꞌu ra xiniñüꞌu yu ña kaꞌan vaꞌa ni yuvi xaꞌa yu.

Hebreos 13:16

Ra na näa ini ndo ña sa ndo ña vaꞌa xiꞌin yuvi na xamani nuu, ra saa tu ña taxi ndo ñaꞌa ña iyoo nuu ndo ndaꞌa va na; saa chi ña ^xa ndo suꞌva, ra ta iyoo iin ñaꞌa va iyoo ña soko ndo nuu Tata yo Ndioxi, ra kusii ni ini ra xiꞌin ña.

San Lucas 20:46

―Kuenda ni koo ndo, ra xä ndo ta xa ndia maestro sañaꞌa ndiayu Ndioxi ña ndakoo ra Moisés, saa chi ndia kan, ra kotoo ni ndia kundixi ndia tikoto nani, ra kuni ni tu ndia satoꞌo ni yuvi ndia te ndakutaꞌan ndia xiꞌin na nuu yaꞌvi va. Ra saa tu te kuaꞌan ndia veꞌe ñuꞌu a te kuaꞌan ndia viko, ra xini sii ni ndia kundee ndia tiayu tu ndee na kunaꞌnu.

San Juan 7:18

Saa chi ra kaꞌan ña ^ndaku ini mii, ra ña kuni ra ña na satoꞌo ni yuvi va ra ke kaꞌan ra; ndi su ra kuni ña na satoꞌo ni na ra tiꞌvi ñaꞌa vaxi ra, ra ña ndaa va kaꞌan ra, ra sandäꞌvi ra.

1 San Pedro 4:11

Ra ndoꞌo na kuu mii ña xinituni ña kaꞌan ndoso ndo, ra na kaꞌan ndo ta kuꞌva kuni mii Tata yo Ndioxi va. Ra ndoꞌo na kuu mii ña xinituni ña chindiee taꞌan ndo xiꞌin inka yuvi, ra na chindiee taꞌan ndo xiꞌin na xiꞌin takundiꞌi ndiee ña taxi Tata yo Ndioxi ndaꞌa va ndo. Ra takundiꞌi chiñu ña xa ndo, ra na sa ndo ña, ña ndasakaꞌnu ndo Tata yo Ndioxi xaꞌa ña xa Tata yo Jesucristo, ra kuu mii ndiee, xiꞌin ña kaꞌnu ndia ndikaa ndikuꞌun va. Saa koo.

Efesios 4:28

Ra ndoꞌo, na xikuu na kuiꞌna, ra na sakuïꞌna ka ndo vichin, chi ña xiniñuꞌu sa ndo ke na sachiñu ndo xiꞌin ndaꞌa va ndo, ña vaꞌa na koo ñaꞌa nuu ndo ña chindiee taꞌan ndo xiꞌin na ndaꞌvi.

Gálatas 2:10

Ra takua ña ndikaꞌan ndia xiꞌin ndi kuvi ña, na näa ini ndi xaꞌa na ndaꞌvi chi na chindiee taꞌan va ndi xiꞌin na, kachi ndia. Ra ta iyoo ña ndikaꞌan ndia xiꞌin ndi ke ^xa va yu.

Hechos 10:4

Saa ndakotoꞌni vaꞌa ra Cornelio nuu ra tatun kan ra iyuꞌvi ka vi ra, ra saa ndikaꞌan ra kachi ra saa: ―¿Ni chiñu kuni kun yuꞌu, Tata? ―kachi ra. Ra saa ndikaꞌan ra tatun kan xiꞌin ra kachi ra saa: ―Kusii ni ini Ndioxi ña chindiee taꞌan kun xiꞌin na ndaꞌvi, ra xa xini tu soꞌo ra ña kaꞌan ni kun xiꞌin va ra.

1 Timoteo 6:18

Ra ña xiniñuꞌu kaꞌan kun xiꞌin na ñani yo na kuika ke vivii va na sa na xiꞌin xuꞌun na, ra na kuika xiꞌin chiñu vaꞌa va ke na kuu na, ra na koo nduvi tu na ña chindiee taꞌan na xiꞌin inka yuvi, ra ndataꞌvi tu na ñaꞌa ña kuu mii na xiꞌin inka yuvi va.

Romanos 12:8

Ra tu sava tu yo ndiniꞌi taꞌvi ña kaꞌan yo tuꞌun ndiee ini xiꞌin inka yuvi, saa ra na sa yo ña xiꞌin ndinuni nima va yo. Ra tu sava tu yo ndiniꞌi taꞌvi ña saniꞌi yo ñaꞌa inka yuvi, saa ra na saniꞌi yo ña na xiꞌin ndinuni nima va yo. Ra tu sava tu yo ndiniꞌi taꞌvi ña kunuu yo nuu yuvi, saa ra xiꞌin ndinuni nima va yo na kunuu yo nuu na; ra tu sava tu yo ndiniꞌi taꞌvi ña chindiee taꞌan yo xiꞌin na ndaꞌvi, saa ra na chindiee taꞌan yo xiꞌin na xiꞌin ña sii ini va yo.

Hechos 24:17

’Ra na kundaa ini yoꞌo, ra Tata chiñu, chi xa kuaꞌa ni va kuiya ke kee yu xika niꞌni yu inka ñuu, ra vichin vi ke nandiko yu nuu na ñuu yu, ra niꞌi yu loꞌo xuꞌun ña chindiee taꞌan yu xiꞌin na ndaꞌvi, ra niꞌi tu yu ñaꞌa ña soko yu nuu Ndioxi va.

Hechos 10:31

Ra ndikaꞌan ra xiꞌin yu kachi ra saa: “Cornelio, xa xini va soꞌo Ndioxi ña kaꞌan ni kun xiꞌin ra, ra xa kundaa tu ini ra ña chindiee taꞌan ni kun xiꞌin na ndaꞌvi va.

Hechos 10:2

Ra ra Cornelio xiꞌin takundiꞌi na veꞌe ra, ra na xindikun Ndioxi ndixiyo na, ra chindiee taꞌan ni ra xiꞌin na judío xiꞌin xuꞌun, ra tiaa ni tu ndikaꞌan ra xiꞌin Ndioxi va.

Hechos 9:36

Ra ñuu Jope kanduꞌu iin ñaꞌa ña ndikun Jesús, ra Tabita ke nani ña, ra Dorcas ke kachi ña tuꞌun griego. Ra vaꞌa ni ñaꞌa kuvi ña, saa chi chindiee taꞌan ni ña xiꞌin na ndaꞌvi ndoꞌo.

San Juan 13:29

Ra sava ndia ndakani ini, ña kuꞌun ra Judas kan sata ra ñaꞌa ña kuniñuꞌu ndia viko, a ñaꞌa, ña saniꞌi ndia na ndaꞌvi va tu, saa chi mii ra kan kuvi ra ndiso xuꞌun va.

San Juan 5:44

¿Ra ni ke sa ndo ña vaꞌa kandixa ndo tuvi ndo, tu niña ndo ndasakaꞌnu taꞌan mii va kuvi ndo, ra xïin ndo nanduku ndo ña kaꞌnu ña taxi indaa Ndioxi ra tiaku?

San Lucas 6:42

Ra tu xïni kun itun chee ndikaa nuu mii kun, ¿ra nichuun vaꞌa kiꞌin kun kuenda ña kaꞌan kun xiꞌin ñani kun: “Ñani, naꞌa, na tava yu miꞌi loꞌo ña ndikaa nuu kun”, kachi kun? ¡Ra ra chiꞌña tuꞌun va kuvi kun! Chi xiꞌna ka itun chee ndikaa nuu mii kun na tava kun. Ra saa ke vaꞌa ndakotoꞌni kaxi kun, ra vaꞌa tava kun miꞌi loꞌo ña ndikaa nuu ñani kun ―kachi Jesús xiꞌin na.

San Marcos 12:39

Ra saa tu te kuaꞌan na veꞌe ñuꞌu a te kuaꞌan na viko, ra xini sii ni na kundee na tiayu tu ndee na kunaꞌnu.

Filemón 1:7

Ra tiaa ni kusii ini ndi, ra ndiakua ndakindiee tu ini va ndi xiꞌin kun ñani Filemón, saa chi kuꞌvi ni ini kun xini kun na veꞌe ñuꞌu, ra xaꞌa ña xa yoꞌo kuvi ña ndakindiee tu nima va na.

1 Tesalonicenses 2:6

Ra ndia nii tu ichí täan ndasanaꞌnu ndi mii ndi nuu yu̱vi ña ná satoꞌo ni na nduꞌu va, ra nii kuëe kuni tu ndi ña satoꞌo ni ndoꞌo nduꞌu va, ra saa tu inka va na. Ndi su tu ndikuni ndi ña satavi ndi ndoꞌo ña nduku ndi ñaꞌa nuu ndo, ra kuvi va, saa chi ña ndixa va ke kuu ndi ndia xika chiñu nuu Tata yo Cristo.

Hechos 11:29

Saa ndikataꞌan na ndikun Jesús na ndee ñuu Antioquía ña chindiee taꞌan na xiꞌin na ndikun Jesús na ndee chi Judea, ra ta kuꞌva niꞌi ndaꞌa na ke taꞌan va na kachi na ndikataꞌan na.

San Lucas 13:15

Ra saa ndakuiin Jesús, kachi ra saa xiꞌin ra: ―Na chiꞌña tuꞌun va kuvi ndoꞌo, saa chi, ¿a ndäxi ndo sindiki sana ndo a burru sana ndo ña kuꞌun ri koꞌo ri tiakuii kii yii ndakindiee̱ yo, su ndaxi va ndo ri?

San Lucas 12:56

¡Ra na chiꞌña tuꞌun va kuvi ndo!, saa chi xini va ndo ña kiꞌin ndo kuenda xiꞌin ña kuu nuu ndivi xiꞌin ña kuu nuu ñuꞌu, ¿ra nichuun kundäa tu ini ndo xiꞌin ña kuu tiempo ña ndee ndo vichin? ―kachi Jesús xiꞌin na.

San Lucas 12:33

Ra na xiko ndo ñaꞌa ña kuu mii ndo, ra saa ke kuchuun ndo chindiee taꞌan ndo xiꞌin na xamani nuu. Ra na ndiꞌi ini ndo ña chuvaꞌa ndo ñaꞌa ndo ini ñaꞌa ña nduꞌu ndivi, ña kuëe ndiꞌi xaꞌa, nuu koo ña kuika ña kuëe ndiꞌi xaꞌa, ra nii ra kuiꞌna kuchüun sakuiꞌna ña, ra nii tikixin sandïꞌi xaꞌa ña.

San Lucas 11:43

’¡Ra ndaꞌvi ni ndoꞌo, ndia fariseo!, saa chi ta kuaꞌan ndo veꞌe ñuꞌu ra kuni ni ndo kundee ndo tiayu na kunaꞌnu; ra saa tu ta xika ndo nuu yaꞌvi va, saa chi kuni ni ndo ña na satoꞌo yuvi ndoꞌo.

San Lucas 11:41

Ña kan ke tu ndinuni ni nima ndo na taxi ndo ñaꞌa ndaꞌa na ndaꞌvi, ra saa ke kindoo vaꞌa ndo nuu Ndioxi.

San Lucas 6:24

’Ndi su ndaꞌvi ni ndoꞌo na kuika, chi xa iyoo vaꞌa ni va ini ndo vichin, ndi su vaxi kii ra köo ña vaꞌa niꞌi vi ndo.

San Marcos 7:6

Saa ndakuiin Jesús kachi ra saa xiꞌin na: ―Ña ndixa ni ke ndikaꞌan ra Isaías xaꞌa ndoꞌo na maña te yachi, ra suꞌva ke kachi Ndioxi ndikaꞌan ra xiꞌin ra xaꞌa ndo, kachi tuꞌun ña ndatiaa ra: “Na yuvi yoꞌo, ra takua iin tuꞌun ni̱nù va ke kaꞌan na ña xatoꞌo na yuꞌu. Ndi su nima na, ra xika ni va iyoo ña nuu yu.

San Mateo 24:51

Saa ra tiaa ni sandivaꞌa ra xitoꞌo ra xiꞌin ra, ra tiin ra ra, ra sakoꞌni ra ra nuu ndoꞌni yuvi ñaꞌa, na chiꞌña tuꞌun. Ra ikan kuu nuu kuaku ni ra, ra iin ndiakua ndakaxi nùꞌù ra ―*kachi Jesús xiꞌin ndia itaꞌan xiꞌin ra.

San Mateo 23:6

Ra te kuaꞌan ndia nuu iyoo viko, a te kuaꞌan tu ndia veꞌe ñuꞌu, ra kutoo ni ndia kundee ndia tiayu tu ndita chi nuu, nuu ndee na kunaꞌnu.

San Mateo 22:18

Ndi su xa ^kundaa va ini Jesús, ña kuni ndia kotondoso ndia ra, ra saa ndikaꞌan ra xiꞌin ndia kachi ra saa: ―Ndia chiꞌña tuꞌun va kuvi ndo, saa chi yuꞌu va kuvi ra ixtondoso ndo.

San Mateo 16:3

Ra chi ixtiaan tu kachi ndo saa: “Vichin ra ndiee ni kuun savi, saa chi tiaa ni ndikaa viko ndivi, ra iin ña ñaa kaa”, kachi ndo. ¡Ra na chiꞌña tuꞌun va kuvi ndo! Saa chi vaꞌa va ndakuni ndo kii, ¿ra nichuun küvi kundaa tu ini ndo xiꞌin ña ^xa Ndioxi nuu ña yuuvi yoꞌo tiempo vichin? ―kachi Jesús xiꞌin ndia.

San Mateo 15:7

Saa chi ¡na chiꞌña tuꞌun va kuvi ndoꞌo! Ra ña ndixa ni va ke ndikaꞌan Ndioxi xiꞌin ra Isaías ra ndikaꞌan tuꞌun yuꞌu ra xinaꞌa xaꞌa ndo, te ndikaꞌan ra, kachi ra suꞌva:

San Mateo 7:5

Saa ra ra chiꞌña tuꞌun va kuvi kun, chi xiꞌna ka va itun chee tu ndikaa nuu mii kun kuvi nu, na tava kun. Ra saa ke vaꞌa ndatuvi nuu kun, ra vaꞌa tava kun miꞌi loꞌo ña ndikaa nuu ñani kun.

San Mateo 5:18

Ra ña ndixa ke kaꞌan yu xiꞌin ndo, ra na kundaa ini ndo: chi ndia nii tuꞌun loꞌo xiꞌin ndia nii letra loꞌo ña kuu ndiayu Ndioxi ña tiaa ra Moisés xinaꞌa, ra ndïꞌi xaꞌa ña, ra nii na ndiꞌi va xaꞌa ña yuuvi yoꞌo, ndi su xiniñuꞌu xinu ndiꞌi va ña kaꞌan tuꞌun Ndioxi.

San Mateo 6:3

Ña kan ke te chindiee taꞌan ndoꞌo xiꞌin na ndaꞌvi na kumani ñaꞌa nuu, ra ndatüꞌun ndo xiꞌin ndia nii yuvi, ra na kundäa ini ndaꞌa ichin ndo xaꞌa chiñu ña xa ndaꞌa kuaꞌa ndo.

San Mateo 23:5

Ra takundiꞌi chiñu ña xa ndia, ra süvi ña xatoꞌo ndia Ndioxi ke xa ndia ña, chi ña kuni ndia kindoo vaꞌa ni ndia nuu na ñuu va ke xa ndia ña. Ra xaꞌa ña kan ke iin niꞌi savi ndia tutu ña ndoso tuꞌun Ndioxi nuu xika ndia, ra ndia nuu tikoto ndia xiꞌin tiaan va ndia ndee tuꞌun Ndioxi xika ndia, ra xinisii ni tu ndia kundixi ndia tikoto ña nani ni iꞌva yuꞌu va ña vaꞌa na kuni yuvi ra kaꞌan na xaꞌa ndia, ña ndinuni ni ndikun ndia Ndioxi.

1 Corintios 13:3

Ra vaꞌa nii na ndataꞌvi tu yu takundiꞌi va ñaꞌa ña iyoo nuu yu xiꞌin na ndaꞌvi, ra nii na ndataxi tu yu mii yu ña koko yu xaꞌa va na, ndi su tu köo ña kuꞌvi ini ña taxi Ndioxi iyoo nima yu, saa ra ^köo yaꞌvi ndiaa vi ña sa yu saa.