San Juan 11:32 - Mixteco Metlatónoc

³² Ra saa te ndixaa ña María nuu íin Jesús, ra saa ndakutoꞌni ña nuu ra, ra ndakusiti ña xaꞌa ra, ra ndikaꞌan ña xiꞌin ra kachi ña saa: ―Tata, tu yoꞌo ndixiin kun, saa ra küvi vi kuꞌva yu ―kachi ña.

San Juan 11:32 Referans Kwoze

San Juan 11:21

Ra saa ndikaꞌan ña Marta xiꞌin Jesús, kachi ña saa: ―Tata, tu ndixiin kun yoꞌo, saa ra küvi vi kuꞌva yu.

San Lucas 17:16

Ra xaa ra ndakusiti ra nuu Jesús, ra ndakundiee ra ndia nuu ñuꞌu, ra ndataxi ra tixaꞌvi ndaꞌa Jesús. Ra tiaa yoꞌo ra ra ñuu Samaria va kuvi ra.

San Lucas 5:8

Ra ta xini ra Simón ña xa Jesús, saa ra ndikun ndakusiti ra nuu ra, ra kachi ra saa: ―Tata, tiaa ra iyoo kuachi va kuvi yuꞌu, ndi su yoꞌo, ra ra yii va kuvi kun. Ña kan ke küvi kitaꞌan yu xiꞌin kun, ra vaꞌa ka na kutiaꞌa va kun nuu yu ―kachi ra xiꞌin Jesús.

San Lucas 8:41

Ra saa xaa iin tiaa ra nani Jairo nuu iin Jesús. Ra ra xikuaꞌa ndiso chiñu xiꞌin veꞌe ñuꞌu kuvi ra, ra ndikun ndixkusiti va ra nuu Jesús, ra xaku ndaꞌvi ka vi ra nuu ra ña na kuꞌun ra xiꞌin ra veꞌe ra.

Apocalipsis 22:8

Yuꞌu, ra Juan, kuvi ra xini, ra xini tu soꞌo va yu, takundiꞌi ña yoꞌo, ra te ndiꞌi xini yu ña xiꞌin ña xini soꞌo yu ña, ra saa ndakusiti yu xaꞌa ra tatun Ndioxi ra ndiñaꞌa ña nuu yu, ña ndasakaꞌnu yu ra.

Apocalipsis 5:14

Ra saa ndikaꞌan kumi saa ña tiaku kan ^kachi ña saa: ―¡Ndixa, saa ke iyoo va ña! ―kachi ña. Ra ndakusiti tu oko kumi saa ndia xikuaꞌa kan va, ra ^ndasakaꞌnu ni na ra tiaku ndiaa ndikaa ndikuꞌun.

Apocalipsis 5:8

Ra te ndakiꞌin ra tutu kan, saa ra ndikun ndakusiti kumi saa ña tiaku kan xiꞌin oko kumi saa na xikuaꞌa kan nuu ra kuu ndikachi loꞌo kan, ra ^niꞌi takundiꞌi na arpa xiꞌin xikoo vali ña oro, ra iin chitu ndaa ña xiꞌin xuxa vaꞌa; ra xuxa vaꞌa kan ke kuu tuꞌun ña kaꞌan na yii na ndikun ichi Ndioxi xiꞌin ra.

San Juan 11:37

Ra sava tu na kaꞌan kachi saa: ―Ra yoꞌo, ra vaꞌa va sandaꞌa ra nuu na kuaa, ¿ra a väꞌa saa ndixa ra, ña täxi kuvi ra Lázaro? ―kachi na.

San Juan 4:49

Ra saa ndikaꞌan tiaa ra xachiñu nuu ra rey kan kachi ra saa: ―Tata, sa ña mani ra na koꞌo xiꞌin yu chi tu köo, ra kuvi va seꞌe yu ―kachi ra xiꞌin Jesús.

San Juan 11:2

Ra ña María, kuvi ña kosondiee ndutia xaꞌan tami xaꞌa Jesús, ra ndakuꞌva ña ña xiꞌin ixi xini ña.