Mukaanda kuri bari Filipo 2:22 - Musamu Wamubwete 2013

²² Ngo beenu luyaari ma kari kayirika nde: bunu bu buyirikaa mwaana kuri taayi, nde wasala kintwaari na me mu ntoono Musamu Wamubwete.

Mukaanda kuri bari Filipo 2:22 Referans Kwoze

1 Kol 4:17

Hango-nkuumbu, me nyaluheekiri Timoteho, mwaana waami wa mutima na wakwiikama mu Mfumu. Nde sa kalubaambula mwooyo mu manzila maami mu Kiristo [Yesu], bunu bu nkooyikisilaa me kwokunso, mu mpisi dibuundu.

2 Tim 1:2

kuri Timoteho, mwaana wa mutima: bweese, ngebe na kiyeengi bifumunaana kuri Taata Nzaambi, na kuri Mfumu yeetu Kiristo Yesu biba na ye.

1 Tim 1:2

Kuri Timoteho mwaana wangwanwa mu kanyi: bweese, ngebe na kiyeengi bifumunaa kuri Nzaambi Taata, na kuri Kiristo Yesu, Mfumu yeetu, biba na ye.

2 Kol 2:9

Bukuri mu bubwo me nyalutinini, mpisi me nyilutsiitsa, mu kuyaaba, kari beenu luri na bintambukulu mu myominso.

1 Tim 1:18

Ntumunu yi nyiri mu kuha kuri ye mwaana waami Timoteho, bunu buri mbikululu dzi bari batekesele kuleele mu ntoono ye, kuri ti, mu dzo, ye nwaana nwaanunu yayibwete,

2 Kol 8:22

Beetu twaheekiri mpaangi yeetu mu kweyende na bo, mu mantaangu malaka, beetu twamutsitsiri, mu kumono buri kuheme kyaandi, ngo mu lumalu kuheme kwaandi kweki kwabvulila mu ntoono nsiitu dzalaka dzikari na dzo mu beenu.

Mukaanda kuri Tito 1:4

Hemese bweese na kiyeengi, bifumunaa kuri Nzaambi Taata, na kuri Kiristo Yesu Mubvuukisi weetu, biba kuri ye Tito, mwaana waami wangwanwa mu kanyi dya ntwaari.

2 Tim 3:10

Ngo ye wanemi kwakubwete nyikusulu dzaami, ndyaatulu yaami, bitaasi byaami, kanyi dyaami, nkindusulu-mutima yaami, ntiilu yaami, kifiki kyaami,

Mukaanda kuri bari Filipo 2:20

Mukwongo, me nyahele na muutu mukimi ha yulu nde, wuri bitsimi byobimosi na me, wutsiminaa misamu mitariri beenu mu ngwanwa.

2 Kol 8:24

Yirikee kusoongo, ha busu bwa mabuundu, kidiimbu kya ntiilu yeenu, na kimweese kyeetu mu beenu kuri bo.

2 Kol 8:8

Me nyahele kuluha lutumu, kasi me nyiludzoonsolo mu kuheme kya bambaasi, mu kuri ti beenu se lusoongo bungwanwa bwa ntiilu yeenu.

Biyiriki bya Bantumu 16:2

Bampaangi ba ku Listara na ba ku Ikonyo baba tanaa kimbaangi kyakibweete mu nde.

Mukaanda kuri bari Loma 5:4

Kifiki kibuta ndulukulu mu nsindukulu, na ndulukulu mu nsindukulu yibuta nsiitu.

1 Kol 16:10

Mbuti Timoteho wiisiri kuri beenu, lo talee, yaa kaba na boomo ko kuri beenu; bukuri nde wuri mu kwesala kisalu kya Mfumu bunu me.

Mukaanda kuri bari Filipo 1:5

mu ntoono kintwaari, ki luri mu kusoongaa beenu kuri me mu Musamu Wamubwete, kuholosono kiluumbu kyatete natee mu lumalu.

Mukaanda kuri bari Filipo 1:7

Buri bwa yelemene ti, me nyetsima ma bubwo mu beenu-banso, bukuri me nyalusuusa mu mutima waami. Ti hayuku me nyiri mu boroko, nyiri mu kukalala nyutu, na nyiri mu kusyaamisa Musamu Wamubwete, lo beenu-banso luri kintwaari mu bweese bwa me.

Mukaanda kuri bari Filipo 1:12

Bampaangi, me ntiiri ti beenu luyaaba ti: mimyo mitariri me, myadziburi nzila kuri ti Musamu Wamubwete keende ku mankula.

Mukaanda kuri bari Filipo 1:16

Babamosi mu ntiilu, bu bayaari kuri ti, mu ntoono ya kukalila Musamu Wamubwete me nyiri mu boroko,

1 Tim 4:6

Wubaangulaana misamu mimyo kuri bampaangi, lo ye sa ba kisari kyakibwete kya Kiristo Yesu, kyadiisulu mu maampu ma kanyi, na mu nyikusulu dzadzibwete, dzi wuri mu kunama kwa kubwete.