Nyabusulu ya Yowane 13:3 - Musamu Wamubwete 2013

³ Mosi mu mitu myaandi waba bunu wakeke, kasi mputa yaandi ya mfwiilu yiyo bayibelekese. Butoto bwabutsiina bwakimuka na bwanama kibulu.

Nyabusulu ya Yowane 13:3 Referans Kwoze

Nyabusulu ya Yowane 17:8

Kibulu ki wamwiini ye kyaba, ngo kyasaala ko, sa kitoomboko mu lubila, na sa kyeende ku mfukusulu; baatu badzakala ha butoto, babo bari mankuumbu mahele kutina mu mukaanda wa mwooyo, kuholosono nyirikulu nsi, sa bakimuka ha bamono kibulu, Bukuri kyo kyaba na kyasaala ko, kasi sa kyabweese kumonokono.»

Nyabusulu ya Yowane 13:14

Mu ntoono bimaangu bi bamuheeri miswa mu kuyirika, ha busu bwa kibulu, kyo kikwedziimbisa babo badzakala ha butoto, na kikweleele kuri badzakala ha butoto ti bayirika kiteki, mu kifwaani kya kibulu ki baleti boko mu mbeesi yayila, ngo kiri mwooyo.

Nyabusulu ya Yowane 17:17

Mukwongo, Nzaambi wasuusa mu mitima mya bo, kitsiimi kya kukukisa kitaasi kyaandi, mu kukukisa kitaasi kyokimosi, na mu kuyakisa kimfumu kya bo kuri kibulu, natee kuri ma leele Nzaambi mayirimini.»

Nyabusulu ya Yowane 17:10

bataanu mu bo babwa, mosi wuri, wakaka wakiri kwiisa pe; di kakwiisa nde, mwaa-ntaangu yantele kasa.

Nyabusulu ya Yowane 17:13

Bambyaasi bamaba kitsimi kimosi bari na kyo, kya kuha mpinu na lutumu lwa bo kuri kibulu.

Nyabusulu ya Yowane 13:12

Kyo kyaba kwesalila lutumu lwolunso lwa kibulu kyatete, ha busu bwaandi. Kibulu kikyo kyasa kuri ti butoto na badzakala mu bwo, basaambila kibulu kyatete, kyaba na mputa ya lufwa yabeelekiri.

Biyiriki bya Bantumu 8:13

Simoni nde-meene se wasa kanyi na wataambula mbotokulu. Nde wakaangama na Filipo na wapamuka, bu kaba kwemonaana bidiimbu na bimaangu byabinene byaba kweyirimaana.

Musamu wamubwete watina Luka 2:1

Mu biluumbu bibyo, Kayisari Oguste wapalisa lutumu lwa kusa ntaangulu baatu bobanso bari ha butoto.

Nyabusulu ya Yowane 17:6

Me nyamono mukyeetu wakolo mu makila ma bangisi, na mu makila ma bambaangi ba Yesu. Me nyakimuka mu kiteesu kya makwa ha nyamumwiini.

Musamu wamubwete watina Yowane 12:19

Hango Bafarisi balelesene bo na bo ti: «Lumono bubwo, beenu lubangusina kusa kitotolo ko: mono baatu bobanso beensi ha mambisa ma nde!»

Nyabusulu ya Yowane 17:11

Kibulu kyaba, na kiri kyasaala ko, yiyo ngo mbyaasi yampoomo, wuri mosi mu bambyaasi nsaamu na wuri mu kweende ku mfukusulu.»