Mukaanda kuri bari Kolosayi 1:27 - Musamu Wamubwete 2013

²⁷ Kuri bo, Nzaambi katiiri kuyaabisa, ha kakati dya makaanda, bunu buri busina bwa nkeembu ya mpaanu yimayi. Mpaanu yiyo ngo Kiristo mu beenu, nsiitu ya nkeembu.

Mukaanda kuri bari Kolosayi 1:27 Referans Kwoze

Musamu wamubwete watina Yowane 14:20

Mu kiluumbu kikyo, beenu sa lwabakula ti me nyiri mu Taayi dyaami, na beenu, mu me, na me, mu beenu.»

Mukaanda kuri bari Loma 8:10

Mbuti Kiristo wuri mu beenu, lo nyutu yafwa mu ntoono masumu, ngo Mpeeve yiluha bumwooyo, mu ntoono nsungumunu.

1 Yow 4:4

Mwaa-baala, beenu luri ba Nzaambi, na beenu lwabwiisiri babikiri bampya; bukuri wunde wuri mu beenu, bvuriri makwa na wunde wuri mu nsi.

Mukaanda kuri bari Ngalatya 2:20

Me nyiri mwooyo, ngo kari me ko, kasi Kiristo wuri mwooyo mu me. Mi nyikwemono me lumalu, mu kidziingu kya me mu muswinyi, me nyikwenata myo mu kanyi di nyiri na dyo mu Mwaana Nzaambi, wantya na wayekiri nyutu yaandi mu ntoono me.

1 Kol 3:16

Buri beenu lwahele kuyaaba ti beenu luri nzo-Nzaambi, na ti Mpeeve Nzaambi yadzakala mu beenu?

Nyabusulu ya Yowane 3:20

Mono, me nyateleme ha mweelu na nyikomboto; mbuti muutu yukiri mbeembu yaami, na dzibiri mweelu, me nsa nkoto mu nzo yaandi, nsa dya na nde, na nde sa kadya na me.»

Musamu wamubwete watina Yowane 14:17

Mpeeve ya ngwanwa yiri, nsi lo yahele kubangisina kuyitaambula, bukuri nsi yahele kuyimono, na yahele kuyiyaaba; ngo kasi beenu luyiyaari, bukuri yo yiri ha kakati dya beenu, na sa yanamitina kuba mu beenu.

Mukaanda kuri bari Ngalatya 4:19

Baala baami, me nyiri mu kubweese kumono misoongo mya mbutulu, natee kuyirima Kiristo munsa beenu.

2 Kol 4:6

Bukuri Nzaambi waleeriri ti: «Mu mampimbisi, buungi sa bwaseme!» Nde wasemini mu mitima myeetu, mu kusoongo nteendele ya nyaabulu nkeembu Nzaambi, ku busu bwa Yesu Kiristo.

1 Tim 1:1

Pawulo, ntumu Yesu Kiristo, bunu buri lutumu lwa Nzaambi mubvuukisi weetu, na lwa Yesu Kiristo, nsiitu yeetu.

Mukaanda kuri bari Kolosayi 2:3

mu nde mwaswekeme busina bwobunso bwa madyeele, na bwa nyaabulu.

Musamu wamubwete watina Yowane 14:23

Yesu wabvutula, waleele kuri nde ti: «Mbuti muutu tiiri me, lo sa kakebe Maampu maami; na Taayi dyaami sa kamutya, na kuri nde sa tweende, na beetu sa twadzakala kuri nde.

2 Kol 6:16

Nkya nyukusunu yiri ha kakati dya Nzo ya Nzaambi na biteki? Bukuri beetuneenu turi Nzo ya Nzaambi yamwooyo, bunu bwaleele Nzaambi ti: «Me sa nzakala ha kakati dya bo, na me sa nyeyende na bo, Me sa mba Nzaambi bo, na bo sa baba baatu baami.»

Mukaanda kuri bari Kolosayi 3:11

Mu didyo, kwasaala Muhelene na Muyudayo ko, wateendu bubakala na wahele kuteende bubakala ko, munzeense, Musikite, nkutu, muutu wuri bunsaalisi ko; ngo Kiristo wuri byobinso na wuri mu bobanso.

Musamu wamubwete watina Yowane 17:26

Me nyabayaabisa nkuumbu yaaku, na me sa mbweese kubayaabisa, mpisi heki ntiilu yi wuri watiila me, yiba mu bo, na me se mu bo.»

Mukaanda kuri bari Efeso 2:22

Mu nde, beenu se luri lwatuunguma mu kintwaari, mu kuba nzo yi dzakalaa Nzaambi mu Mpeeve.

Musamu wamubwete watina Yowane 6:56

Wunde wudya muswinyi waami, na wunwa makila maami, wasa kikuundi mu me, na me mu nde.

Mukaanda kuri bari Efeso 1:7

Mu nde, beetu turi na nkuululu mu makila maandi, na mpemusunu ya lumvuki, bunu buri busina bwa bweese bwaandi,

Mukaanda kuri bari Filipo 4:19

Nzaambi yaami sa kayukitisa manzala meenu momanso, bunu buri busina bwaandi kunsa nkeembu mu Kiristo Yesu.

Mukaanda kuri bari Loma 9:23

Nde watiiri se kuyaabisa busina bwa nkeembu yaandi, kuri bisa bikari kabakila ngebe, bi katekisiri kuyirika mu ntoono nkeembu yaandi.

Mukaanda kuri bari Loma 5:2

mu nde se turi twabaka miswa, mya kutaambula mu kanyi mu bweese bubwo, bu turi twatelemene, na turi twasiila kimweese kyeetu, mu nsiitu ya nkeembu Nzaambi.

Mukaanda kuri bari Kolosayi 1:5

mu ntoono nsiitu yibari balusweekele mu mayulu, yi luri lwatekesele kuyuka, mu maampu mangwanwa ma Musamu Wamubwete.

2 Kol 4:17

Mukwongo, mpasi dzeetu dzaleenge mu ntaangu yi, dziri mu kubuta kilemu kya nkeembu ha yulu nkeembu, yahele manunu kuri beetu.

Musamu wamubwete watina Luka 17:21

ka baleele ko ti: "Kyoki hamaha!" Bunu pe ti: "Kyoonii kunii!" Mukwongo Kimfumu kya Nzaambi kiri ha kakati dya beenu.»

Musamu wamubwete watina Matayi 13:11

Nde wabvutula kuri bo ti: «Bukuri, kuri beenu baheeri kiteesu kya kuyaaba mpaanu dza Kimfumu kya mayulu; ngo kuri bo, bahele kuha.

2 Kol 2:14

Matoondo kuri Nzaambi! Nde wuri mu mpisi ntaangu wutululukisaa mu Kiristo, na wukwepukulaa mu mpisi kibeendu, mfuku ya nyaabulu yaandi mu beetu.

Mukaanda kuri bari Loma 11:33

Busina, madyeele na nyaabulu ya Nzaambi biri na musundu; nsundusulu dzaandi dziri na bwa kufyongokono ko, na manzila maandi mari na bwa kukotolo ko.

Mukaanda kuri bari Loma 2:4

Hoti busina bwa mbweeyulu-mutima waandi, nkuundulu na nkindusulu-mutima waandi, ye wuri mu kunyaafuna, mu kuhele kuyaaba ti mbweeyulu-mutima ya Nzaambi, yinataa ye ku nyiingulu madyeele?

Mukaanda kuri Bahebeleho 6:19

dziri bunu kinko kya kidziingu kyeetu, kyakomono mu makwa na keketee, kyakaanga natee mu nsaanda Nzo-nzaambi ya ku yulu.